Read Nduga LUKAS 11 Bible Online

LUKAS 11 - Nduga bible

LUKAS 11

¹Misik tarem-e mbi me-nen Yesus na tepan yosolat woragaij-o. Tepan yaga keya bosola-ge, at owot mbi-nen at yak tosolar-e: “Nagawan Indo wa-e. Yoanes-nen tepan yurak at owosirak na mul ondosolat woragaid na nggal, nit na iri nggal kwasa mul nindi-o” luk yij-o.

²Yosoloma-ge, Yesus-nen it yak ondosolar-e: “Kit-nen tepan yogolar-e, yu nggal yurag-o: ‘Neid wa-e. Kat kunu kek tak irit wolmag-o. Kat-nen tenagaidnak wi iri lobok yuwag-o.

³Nit-nen ukwe peraidnak nunggwi mende-ge pempa wok nondosolat wolmin-o.

⁴Ap-nen meya rak ninpidnak nenmberam tak pili me, kat-nen na nit meya yidnak kamberam tak pi-o. Nit ninndi ngaruwakluk keya nunpurak pug-o’ ” luk yij-o.

⁵Iri yurug-e, Yesus-nen at owosirak yak ondosolar-e “Kit kennggendumu-nen ap misik anggam eram nggiringgendumu mburuwarik-nen yak tosolar-e: ‘Nanggam-o. Mburu kenan mbi we luru wok niri-o.

⁶An nanggam mbi tula mborosolat, an neram nggeret wok yamu, at mak turak mende mondok lak ala-n yigi-o!’ luk yak tosoloma-ge,

⁷at anggam-e ma nggwe-nen wene erep nggarosolar-e: ‘An nene yuwom sil neyasu meyog-o! Tu-ge imig worak puruk, an nilirak inmin-e nene yili-o. An-e men luk, mburu mbi wok kururag-e meya-o’ luk yeleb-o.

⁸Iri ala-ge, ngge kwarurak kali-o? An yak kendeyeg-o. We anggam pem nag-e mburu iri wok kuruwa bug-et nde, ‘Wok niri-o’ luk kwiye lag-et kiri keresa nggi yik tenak worasola-ge, men luk, kat-nen ukwe luk nggi yugun mende-ge wok kuruwa-o.

⁹Iri ala-ge, an-nen yak kundusu yur-o: Nggi yer-o. Nggi yogola-ge, wok kunduwa-o. Kore yer-o. Kore yogola-ge kagub-o. Tu mende lel lel ker-o. Lel lel kagola-ge, tu kuwarak kunpuwa-o.

¹⁰Nde, nggi yuwa nab-e wog-et tuwa-o. Kore yuwa nab-e kujwa-o. Tu lel lel kujwa nab-e tu kuwarak ubuwa-o.

¹¹Kit kennggendumu ap misik ambara-nen: ‘Keyane wok niri-o’ yosola-ge, eid-nen-e waro nde wok tuwa-a?

¹²Are, at-nen: ‘Towe engen mak niri-o’ yosola-ge, kigaru nde wok tuwa-a?

¹³Nde, kir-e meya yugwi nab-et nde, konak mende-t kinlirak wok undugwi irir-o. Iri ala-ge, Nineid aid arem woraso-nen-e at eram Konak Indi nggi yuwa nab-e mondok wog-et unduwa-o” luk yij-o.

¹⁴Misik pem-e Yesus-nen ene lak kugi mbi ap mbi arem-nen wirik pij-o. Nde, kugi na mborosola-ge, ap iri na ene worak alama-ge, ap kwarat iri-ge wi langgu mbariga-o.

¹⁵Alat nde, ap erep-nen Yesus abut mbarogolat-nen yogolar-e: “Lag-o. Kugi nagawan Mbelsebul-nen amawi wok tidnak pem-e kugi wirik pusu-o” luk yiga-o.

¹⁶Nde, it erep-nen-e at indi ngarogolar-e; “Kar-e Mbal Pem Nagawan eram-nen lobok yidnag-o luk yenggerak kiyujwok-nen kwiye worak mende mbi kwari-o” luk yak tiga-o.

¹⁷Alat nde, Yesus na-ge it inndi-n perali na aru me, it yak ondosolar-e: “Nagawan misik-nen tenagaidnak wi iri na me woragwi nap-nen nde lambuksa woragit lak, kuri worak woragolar-e, nagawan iri-nen tenagaidnak wi-ge nari wari ma-o. Nde, it lolo iri na nde kundik woragit lak, kuri werep mberep woragolar-e, it lolo kwasa wolma bug-o.

¹⁸Iri nggal-et Sere-nen tenagaidnak wi arem-nen nde Sere nde lambuksa woragit lak, kuri work woragolat erep-nen erep min wim ngarak woragola-ge, Sere-nen tenagaidnak wi kwasa wolma-ge, lag-o. Irit nde, kit-nen yogolar-e: ‘Mbelsebul-nen amawi wok korosola, kugi wirik pusu-o’ luk yak nirigeb-o.

¹⁹Nde, Mbelsebul-nen amawi wok niridnak pem kugi wirik pusu ala-ge, kit kinmin nugwi nab-e ta amawi bem-nen kugi wirik pili-o? Kit kinmin nugwi nap-nen kwaridnak pem kit-nen yili na-ge lugud tak yu-gwi kwat yusu-o.

²⁰Alat nde, an-e Mbal Pem Nagawan amawi bem-net kugi wirik pusu-o. Nde, iri yusu ala-ge, Mbal Pem Nagawan-nen tenagaidnak wi na-ge nendam wok yij-o luk yebet ker-o.

²¹Ap amawi worak mbi-nen nde san kundugu at ambik uwi mborom towarak worasola-ge, at arengge pidsa-ge imiri worak wolma-o.

²²Alat nde, at ombol pem amawi worak nap misik-nen nde imin wim mbatluk, urugwe nggwe rak purug-e, at o winde iri-nen indi ebem wat tak puruk woraso esan iri na wanuruk, at arengge pidsa tembesa wok unduwa-o.

²³Nde, an nimin yusu buk nab-e ndemeret an nimin wim nap-nen yusu-o. Nde, an yongga nitli buk nab-e ndemeret an neyabu na nari wari rak pili-o” luk yij-o.

²⁴Yuruk, Yesus-nen yosolar-e: “Kugi meya na ap enarem-nen mbutlug-e, ombol kwarurak sa kore yil nidnag-et nde, nggweyak umbuk pem nak me, at ombol kwarurak sa lak ala karug-e, at-nen yebet kasolar-e: ‘An nuwi keya buruk lobok yigi sa na-t tuguruk mbereyeg-o’ luk yoso-o.

²⁵At na mbiridnaknggal-e, o iri na o liri kora mondok konidnak kaso-o.

²⁶Iri ala karug-e, kugi meya na mborosolar-e, kugi meya erep tuju iri-ge at nggal-e lak, mondok terak minik meya irit inmin lobok yosolar-e, ap iri na arem ngguruk, woragola-ge, ap iri na nanduk woraso nggal-e lak, mondok meyasa irit woraso-o” luk yij-o.

²⁷Nde, Yesus-nen wene iri na yosola karug-e, ap kwarat na ennggendumu-nen kwe mbi-nen Yesus yak tosolar-e: “Kat ndet kuburuk, kamo mak kiridnak kwe-ge alen kasolat wolma-o” luk yij-et nde,

²⁸Yesus-nen yosolar-e: “Iri yigen-et nde, Mbal Pem Nagawan-nen yidnak wene na kuluruk, iri-nen yidnak yidnak kwatli nab-e enalen-e terak menna kagolat wolma-o” luk yij-o.

²⁹Nde, ap kwarat-nen Yesus lop lop worogola-ge, at-nen yosolar-e: “Yawo worali nap-nen meya kwatli-ge mondok ijar-o! ‘Kwiye worak mende mirik ninpi-o’ luk yili-t nde, kwiye worak mende misiget ter-o luk mirik kinpimin pug-o. Are, kwiye worak mende Yunus kwat ibid iri nak perak mirik kinpimin-o.

³⁰Nde, Yunus na-ge Niniwe nap-nen yenggerak purak mende kwat yid iri nggal-et Ap Ambara an-e yawo worali nap yu-nen yenggerak purak mende kwat yimin-o.

³¹Ap pidsa enpem wene mbaruwa tarem-nen-e o araptap ponok (selatan) nggwe-nen lobok yidnak kwe nagawan na yawo worali nap inmin men yosolar-e, kit kinmbiri paruwa-o. Kwe na-nen-e Salomo indi nggat nggat worak iri-nen mul ondoso wene kuleyeklug-e, erepma ereba-nen lobok yij-o. Nde, an yak kendeyeg-o. Alat nde, yu me-ge Salomo nggal-e lag-o. Are, nggok terak minik misik yawo worasu-o.

³²Ap pidsa enpem wene mbaruwa tarem-nen-e o Niniwe nap na yawo worali nap kinmin men yogolar-e, kinmbiri paruwa-o. It iri-nen-e Yunus-nen yidnak wene kulurug-e, it meya yidnak keya buruk, kondok yiga-o. Alat nde, yu me-ge Yunus nggal-e lag-o. Are, nggok terak minik misik yawo worasu-o” luk yij-o.

³³Yuruk, Yesus-nen yosolar-e: “Ap-nen-e tal pagurug-e, kura bogolat, urumu mon kagolat yugwi bug-o. Are, o ma ngguwa nap-nen yaya kujwaklug-e, tal ondolma-t pugwi-o.

³⁴Kit kenlengen-e kenpe amanggim tal-nen yusu-o. Nde, kenlengen nde konak-nen-e kenpe oboksa na yaya worak-nen yusu-o. Alat nde, kenlengen nde unggul-nen-e kenpe oboksa na mom ki ma-o.

³⁵Iri bem-e, kit kenarem worasu yaya iri ndamuk ma naru, kwara-t wolmer-o.

³⁶Nde, kit kenpe-ge ndamuk mondok lak, pidsa yaya rak kinpidnak ala-ge, kenpe pidsa-ge tal eyaya nggal eyaya worak-nen yili-o” luk yij-o.

³⁷Yesus na wene na yuruk keya bosola-ge, Parisi nap mbi-nen at ama mburu totno norak pem yonggo posoloma, Yesus na at ama mberarik, mburu nayekluk kore yij-o.

³⁸Nde, Yesus-nen mburu norak pem inggi marigit lak nasola karug-e, Parisi nap na-nen-e wendet yij-o.

³⁹Iri ala-ge, Yesus-nen at yak tosolar-e: “Nde, kit Parisi nap-nen-e yimbe min piring min marogolar-e, ombol nggwe nak matli-t nde, arem nggwe kopkap woraso nggal, iri nggal-et kit kenmawi bem ap enarengge mengga wanugwi min meya kwarugwi min-nen kit kenarem yebet yidnak worasu-o.

⁴⁰Wid kinndi worak nap wa-e. Piring ombol nggwe ndak wirik Mbal Pem Nagawan-nen arem nggwe na ndak wirid iri kali bug-a?

⁴¹Alat nde, kit kinidmbe min kin piring min arem worasu irit ap insilobulo lak nab-e wok undurag-o. Nde, iri nggal kwarogola-ge, kit kenambigir-e marak irit kwat ma-o.

⁴²Parisi nap wa-e. Kenpem mbuwa mende bem kenabuwa-o! Kit-nen-e lawet min kwendet min nunggwi mende undu worak tak pugwi engga pidsa min enggem lombok karetkwe-nen yidnag-e Mbal Pem Nagawan amanggim pili-t nde, ndung tak kwarugwi min Mbal Pem Nagawan abuwa kagwi min perak nde kir-e keya bili-o. Ndung tak kwarugwi min Mbal Pem Nagawan abuwa kagwi min kwarogolar-e, erep kwatli iri na keya burak puk na-e.

⁴³Parisi nap kenpem mbuwa mende bem kenabuwa-o! Kir-e tepan yugwi ma-nen unnu worak nap-nen kore yugwi sa kore yurak nak kindingen yogolat, onggo wanugwi sa-nen ap-nen kek tak kunpurak nak kindingen yogolat yugwi-o.

⁴⁴Parisi nap kenpem mbuwa mende bem kenabuwa-o! Kir-e yapma unpuruk yenggerak purak mende pigit lak me, yapma inpidnak pem enaru buk me unuwok pugwi iri nggal-nen yili-o” luk yij-o.

⁴⁵Yosoloma-ge, imiri mbarak pidnak wene mul ondoso nap misik-nen Yesus yak tosolar-e: “Mul Ondoso Nap wa-e. Kat-nen wene iri nggal yosolar-e, nit na irit pesel nunpusu-o!” luk yij-o.

⁴⁶Yosoloma-ge, Yesus-nen yosolar-e: “Imiri mbarak pidnak wene mul undugwi nap wa-e. Kit na irit kenpem mbuma bem-e kenabuwa-o! Kit-nen-e angin worak mende-t nde, ‘Kwarurag-o’ luk ap enpem pili-t nde, it-nen kwaruwakluk marig-et ter-o luk yongga indili bug-o.

⁴⁷Kenpem mbuwa mende bem kenabuwa-o! Kit kenlawingga-nen indidnak nap, Mbal Pem Nagawan ene lomboksa yugwi nap na yapma inpidnak sa-ge kit-nen o wosa konili-o.

⁴⁸Iri kwatli iri-ge kit kenlawingga-nen kwariga mende-ge ob-et kwariga-o peragoluk-nen kwatli-o. It-nen indiga nap enmanggim-e kit-nen it yapma inpidnak sa o wosa konogola-nen yigi-o.

⁴⁹Iri bem-e, Mbal Pem Nagawan Indi Kwid Pidnak-nen yosolar-e: ‘Mbal Pem Nagawan ene lomboksa yugwi nap min wirik inpidnak nap min it endamwirik inpil lobok yimin-o. Nde, it-nen-e ereb-e ondogolat, ereb-e lel mberel onpogolat ma-o’ luk yij-o.

⁵⁰Mbal Pem Nagawan-nen iri inpil lobok yuwa iri-ge Mbal Pem Nagawan ene lomboksa yugwi nap pidsa nggweyak yu ndak wirid kuri-net enderenak ti-net yawo na indili iri na enmena-ge kit yawo worali nap kenpeyekluk-nen kwaruwa-o.

⁵¹Nde, Abel na wirid kuri, Sakaria wiriga kuri, indidnak nap enmena purak nde yigi-o. Sakaria na worogolar-e, Mbal Pem Nagawan amanggim wam wosa pugwi sa wok Mbal Pem Nagawan wi wok enggendumu iri me-nen wiriga-o. Kenaru mer-o. Yawo worali nap kir-e it pidsa enmena kunpuwa-o.

⁵²Imiri mbarak pidnak wene mul undugwi nap kenpem mbuwa mende bem kenabuwa-o! Enaru yugwi mende tu imij-e kit-net parugu worali-t nde, kir-e ngguruk enaru yugwi mende na kore yurag-e kinsili yogolar-e, it ngguwokluk yidnak nap na enambigit tu nggela labuk yili-o” luk yij-o.

⁵³Nde, Yesus na o iri me keya buruk mborosola-ge, imiri mbarak pidnak wene mul undugwi nap min Parisi nap min-nen at ebem mbud yogolar-e, at are puwokluk indi lorogolar-e, yi wene ndi wene kwarat kin wok eberenak woraiga-o.

⁵⁴Nde, iri yosola iri-net at tenaguwokluk at-nen wene lugud tak nggwe wirik puwa-o luk kwara abut mbal tenak woraiga-o.