Read Nduga LUKAS 13 Bible Online

LUKAS 13 - Nduga bible

LUKAS 13

¹Iri tarem-e ap-nen Yesus yak togolar-e: “Nggalilea nap ereb-e wam wosa Mbal Pem Nagawan amanggim kan pukmu, Pilatus-nen it indij-o” luk yak tiga-o.

²Yak togolikma-ge, Yesus-nen wene erep nggarosolar-e: “Nggalilea nap ereya-ge iri nggal indidnak kuluruk, kit-nen peragolar-e: ‘Nggalilea nap ereb-e meya yidnag-e marig-et nde, it iri-ge meya yidnak kwarat ala-nen iri nggal kwat inpij-o’ luk perali-a?

³An yak kendeyeg-o. Mondok lag-o! Nde, kit meya yidnak keya buruk kondok yigit lak ala-ge, kit pidsa na iri nggal-et lak yugub-o.

⁴Nde, o Siloam-nen o mot na tud yosolar-e, ap delapan belas iri yemen inpid iri na ngge perali-o? Nde, iri kwaridnak pem-e kit-nen peragolar-e: ‘Yerusalem woragwi nap ereb-e meya yidnag-e marig-et nde, it yemen inpid iri-ge meya yidnak kwarat ala nen kwat inpij-o’ luk perali-a?

⁵Mondok lag-o! An yak kendeyeg-o. Nde, kit meya yidnak keya buruk kondok yigit lak ala-ge iri nggal-et lak yugub-o” luk yij-o.

⁶Iri lug-e Yesus-nen nden karuk wene yu yak ondosolar-e: “Ap misik at eyabu anggut wi yaidnak sa iri me-nen e ara misik yak yidnak woragaij-o. Worala-ge, ombo na e na engen mbenaril mbirij-et nde, engen misiger-o luk tet yigit lak kagaij-o.

⁷Iri ala-ge, at eyabu yik karok woraso iri na yak tosolar-e: ‘Yu nde ki-o. E ara yu engen pij-o luk kil lobok yosolar-e, olengen kenan woragi-t nde, engen mbi pigit lag-o. E yu-ge ndarak pi-o! Wewesa yu me ya wolmomtag-e lag-o’ luk yak tij-o.

⁸Iri yak tij-et nde, eyabu yik karok woraso nap na-nen at yak tosolar-e: ‘Nap wa-e. Olengen misiget nak mbi woralat, an-nen-e elem pem nggweyak yala, umut mbarak pumu-ge,

⁹olengen misik pem-e engen puwa nde ma-o. Nde lak nde ala-ge, Ndari-o luk yak noronog-o’ luk yij-o.”

¹⁰We woragwi tarem misik pem Yesus na tepan yugwi ma-nen ap mul ondosolat woragaij-o.

¹¹Iri me-ge kwe mbi kugi arem nggwidnak me, kugi worak nak olengen delapan belas worasolar-e, ombolwak tumbu yidnak me, motsa men yurag-e meya irit woragaij-o.

¹²Nde, Yesus-nen kwe iri na karuk, ene ngguloksa yak tosolar-e: “Niya wa-e. Kat andi kaso mende-ge lak tak kibigi-o” luk yak tij-o

¹³Yak turuk, Yesus-nen inggi kwe na tena bosola ereya na-net kwe na motsa men luk, Mbal Pem Nagawan erembel wanij-o.

¹⁴Yesus na we woragwi tarem-nen kwe na ki rak posola karuk, tepan yugwi ma wari mendak pidnak nap iri-ge indi puru kwarat luk, ap kwarat iri na yak ondosolar-e: “Nit-nen yabu wanurak tarem-e enam worasu-o. Ki rak kunpuwakluk ereya tarem-nen lobok yer-o. Nde, we woragwi tarem-nen lobok yurak pug-o” luk yij-o.

¹⁵Yosoloma-ge, Nagawan Indo-nen at yak tosolar-e: “Kennesiget siget yugwi nap wa-e. We woragwi tarem-et nde, kit pidsa-nen-e konowam lembu wam nde kelerai wam nde at uwi ma-nen tu kuwara wirik puruk, yi mak til mburugwi bug-a?

¹⁶Nde, Abaram-nen wigarak kwe yu-ge Sere-nen kamarak puruk olengen delapan belas pem woraidnak yu-ge we woragwi tarem-nen wisirik uburag-e meya-a?” luk yij-o.

¹⁷Iri yosola kulurug-e, Yesus imin wene eyak wiriga nap oboksa-ge innggiri kaiga-o. Nde, ap erep oboksa-ge Yesus-nen kwaridnak mende pidsa-ge wi yurak mende ala karuk, enalin enalen kaiga-o.

¹⁸Yesus-nen yosolar-e: “Mbal Pem Nagawan-nen tenagaidnak wi-ge ngge nggal-o? No mende min ndak wirimin-o?

¹⁹Mbal Pem Nagawan-nen tenagaidnak wi-ge sawi uwi nggal-nen yusu-o. Ap mbi-nen uwi iri waga, at eyapmu yabosoma, uwi na mborosolar-e, e nggulok irit lasoma-ge, inggi bem-e towe uwi woroso-o” luk yij-o.

²⁰Yesus-nen tuguruk yosolar-e: “Mbal Pem Nagawan-nen tenagaidnak wi-ge no mende min ndak wirimin-o?

²¹Mbal Pem Nagawan-nen tenagaidnak wi iri-ge oroti lomboroso mende nggal-nen yusu-o. Iri mende-ge kwe mbi-nen mbato sisidnak kenan pem waga imin puruk, omok worosola-ge, pidsa lomboroso-o” luk yij-o.

²²Yesus na Yerusalem mborosolar-e, o siri nggulok wok lik o siri marik wok lik ap mul indil indil mborosolat woragaij-o.

²³Nde, ap misik-nen at yak tosolar-e: “Nab-o. Ab-e wonarak nak inmiri yuwa, lak?” luk kin wok obosoloma-ge. Yesus-nen it yak ondosolar-e.

²⁴“Tumende mboronggo iri me nggurak pem-e kenmawi ler-o. An yak kendeyeg-o. Ap kwarat-nen-e ngguwokluk yuwa-t nde, nggurag-e meya ma-o.

²⁵O winde-nen men luk, tumende na lerak pumawa-ge, kir-e mbepme nggwe mendak woragolat, tumende lel lel kagolat-nen yogolar-e: ‘Nab-o. Tu kuwarak ninpi-o!’ luk yak tugub-et nde, at-nen wene erep nggarosolar-e: ‘Kir-e ngge me-nen lobok yigeb-o? An-e naru bug-o’ luk yuwa-o.

²⁶Yosola, kit-nen yogolar-e: ‘Lag-o. Nir-e totno mburu nilik, yi nilik kwarige-o. Nde, nit nenma-nen tula nggwe waring kasolar-e, mul nindigen nar-o!’ luk yugub-o.

²⁷Yogola-ge, at-nen tuguruk yak kondosolar-e: ‘Kir-e ngge me-nen lobok yigeb-o? An naru bug-o. Meya nak kwarugwi nap kir-e an neram yu me-nen mberer-o!’ luk yak kunduwa-o.

²⁸Nde, Abaram min Isak min Yakup min Mbal Pem Nagawan ene lomboksa yugwi nap oboksa min-e Mbal Pem Nagawan-nen tenagaidnak wi enalin enalen pem woragola eneyagub-et nde, kir-e mbepme wirik kinpidnak me, yip togolat, andi bandi kagolat yugub-o!

²⁹Yi wi ndi wi-nen lobok yogolar-e, mo luwaso sa-nen na, mo mboso sa-nen na, araptap abam nggwe, ena nggwe-nen na (utara, selatan) lobok yuwarig-e, Mbal Pem Nagawan-nen tenagaidnak wi iri me enalen pem wolma-o.

³⁰Iri tarem-e ndemeret abok yidnak nab-e nanduk ma-o. Nde, nanduk yidnak nab-e abok ma-o” luk yij-o.

³¹Iri na tarem-e Parisi nap erep-nen Yesus eram lobok yigarik, yak togolar-e: “Erores-nen kat kereyekluk yusu me, kar-e o yu me keya buruk, nin sa mbiri-o” luk yak tiga-o.

³²Yak togolikma, Yesus-nen it yak ondosolar-e: “Wene yu waruk ndak-ge iri yak til mberer-o: ‘Yawo min kup min-e kugi wirik posolat, ap ki rak onposolat woramin-o. Nde, kenan tak posolat-nen perak nde, neyabu wu rak pimin-o’ yij-o luk yak til mberer-o.

³³Irit nde, yawo min kup min kup iri min woralar-e mborosolat woramin-o. Mbal Pem Nagawan ene lomboksa yoso nab-e wesu bem-nen wururag-e meya-o. Yerusalem-net wururag-o.

³⁴Yerusalem wa-e. Yerusalem wa-e. Mbal Pem Nagawan ene lomboksa yugwi nab-e kat-net ondosolat, Mbal Pem Nagawan-nen keram wirik inpil lobok yidnak nap na kerep pem-nen ondosolat yoso-o! Towe wam-nen at amarig-e eraplabe-nen yomondoso nggal, iri nggal-et kwarat pem kat-nen idnak nap na ndok wat enpeyekluk yigi-t nde, ‘Nimbir-o’ yigen-o.

³⁵Iri bem-e Mbal Pem Nagawan-e kinmin wolma bug-o. Kenaru mer-o. Yawo kuri-nen an-e neyagup pug-o. Alat nde, kit-nen yogolar-e: ‘Nagawan Indo unu bem lobok yusu nab-e kek tak puwog-o’ yugup tarem-nen perak nde neyagub-o” luk yij-o.