Read Nduga LUKAS 14 Bible Online

LUKAS 14 - Nduga bible

LUKAS 14

¹We woragwi tarem misik pem Yesus na mberarik, Parisi nap ene kulugwi nap mbi ama-nen nunggwi mende nasola-ge, ap iri me-nen-e kwara abut mbarogolat woraiga-o.

²Worakmu-ge ijok min inggi min limbiridnak na misig-e Yesus eram lobok yij-o.

³Iri ala-ge, Yesus-nen imiri mbarak pidnak wene mul undugwi nap min Parisi nap min kin wok onposolar-e: “Nit-nen idnak imiri mbarak pidnak wene bem-e we woragwi tarem-nen ap ki rak unpurag-e wosama, lak? Are, ob-a?” luk kin wok inpij-o.

⁴Alat nde, it imiri mbarak pidnak wene mul undugwi nap min Parisi nap min-e wene erep nggarigit lak, larok nak yiga-o. Alama-ge, Yesus-nen ap iri na wene mbo buruk, ki rak puruk, wirik ibij-o.

⁵Iri luk, Yesus-nen it yak ondosolar-e: “Kit kennggendumu-nen kit misik we woragwi tarem-nen kenmbara ala na, konowam ala na mbunmu yoboksa mbuwama-ge, we woragwi tarem-o luk ndag-et nak lit yaga inpil luwagit lak yurak mbi worali-a?” luk yij-et nde,

⁶it-nen-e wene iri onggo yurag-e puk nak yiga-o.

⁷Nunggwi mende nujwakluk yonggo inpidnak nap erep-nen-e kore yurak konak na-t yonogola karuk, Yesus-nen nden karuk wene yu it oboksa yak ondosolar-e:

⁸“Kwe wanogolat nunggwi mende sakolat-nen kit yonggo konpogola-ge, ap kek tak-nen kore yugwi sa kore yil mbururak pug-o. Nde, kit kore yugupndik worakmu-ge, kit nggal-e lak, are, ap kek tak misik yonggo bidnak me,

⁹kit yonggo kinpid nap iri-nen kit yak kondosolar-e: ‘Nap tag-o. Yu-ge ap iri kore yuwakluk amanggim pukmu-o’ yosola-ge, kinnggiri nggo nggosa we ma kore yugub-o.

¹⁰Iri bem-e kit yonggo kunpuwama-ge, kir-e we nap-nen kore yugwi sa ereba-t kore yer-o. Kore yugupndik worakmu, yonggo kinpidnak nap na lobok yosolat-nen yak kondosolar-e: ‘Nenggamirag-o. Konak ma yu me-t kore yer-o’ luk yak kondosola-ge, iri nggal yuwa iri bem-nen-e yonggo inpidnak nap pidsa inmbiri bem kek tak kunpuwa-o.

¹¹Nde, ap-nen at ondomok kek yuwa nab-e teberak ubuwa-o. Nde, at ondomok indi tebe yuwa nab-e kek tak ubuwa-o” luk yij-o.

¹²Yurug-e, Yesus-nen at yonggo ibid nap na yak tosolar-e: “Kar-e lengge ala na, kubu ala na norak pem ap enmanggim nunggwi mende sagosolar-e, kat kenggamirak min kowe kowosi min kimi kambara min keralu woragwi insilobulo worak nap min yonggo unpurak pug-o. Iri kwarosola-ge, it-nen na sakolar-e, onggo yonggo kubuwa nar-o.

¹³Iri bem-e, kat-nen nunggwi mende saburug-e, insilobulo lak nap min unuwok kago worak min kambung puk tak woragwi min enlengen ngguru min yonggo unpugun ala-ge,

¹⁴it-nen onggo sak kururag-e lak me, imbiringgat tak kubuwa-o. Lud tak woragwi nap tuguruk unluk tak puwa tarem-nen-e Mbal Pem Nagawan-nen onggo wok kuruwa-o” luk yij-o.

¹⁵Nunggwi mende nokluk at imin koreyak woraidnak ap misik-nen wene iri kuluruk, Yesus yak tosolar-e: “Mbal Pem Nagawan-nen tenagaidnak wi-nen nunggwi mende nujwa nab-e enalen kujwag-o” luk yij-o.

¹⁶Yosoloma-ge, Yesus-nen at yak tosolar-e: “Misik tarem-e ap mbi-nen nunggwi mende nggulok sagosolar-e, ap kwarat yonggo inpij-o.

¹⁷Iri lug-e, nunggwi mende abu saga keya burug-e, ap iri-nen at ndegel oboso nap mbi at-nen yonggo inpidnak nap endam wirik posolat-nen yosolar-e: ‘Abu lid lud tak pidnak worasu-o. Nil lobok yer-o luk yak indil mbiri-o’ luk yij-o.

¹⁸Iri yij-et nde, it pidsa-nen-e: ‘An-nen wanurak na kwarar-o. Lobok yimin pug-o’ luk yil mbiriga-o. At misik-nen yosolar-e: ‘Nab-o. An-e nggweyak mbi onggo pigirik me, nggweyak iri mbenaril mburusu-o’ luk yij-o.

¹⁹Nde, at misik-nen yosolar-e: ‘Nab-o. An-e lembu wam sepulu onggo pigirik me, wal kil mburusu-o’ luk yij-o.

²⁰Nde, at misik-nen yosolar-e: ‘An-e kwe nggeret wanigirik me, an lobok yurag-e meya-o’ luk yij-o.

²¹Iri yogola karug-e, ndegel oboso nap na mberarig-e, iri na wene oboksa-ge at eid ndegera yak tij-o. Yak tosoloma-ge, at eid na isilepma kwarat luk, at ndegel oboso nap na yak tosolar-e: ‘Kar-e ndag-et nak o silmu mburugundik, tula tula ereba waring kasolar-e, insilobulo lak nap min unuwok kago worak min enlengen ngguru min kambung puk tak woragwi min inmin luk lobok yi-o’ luk yak tij-o.

²²Iri kwatluk lobok yosolar-e, ndegel oboso nap-nen eid na yak tosolar-e: ‘Neid wa-e. Kat-nen yidnak yidnak kwarigi-t nde, o-ge terag-et worasu-o’ luk yij-o.

²³Yosoloma-ge, eid na-nen ndegel oboso nap na yak tosolar-e: ‘An nama yebet yuwaklug-e, kar-e tula nggok nggwe min marik nggwe min mborosolar-e, ap yorok porok wesu bem woragwi ereba kene lembesa langgara inpil lobok yi-o.

²⁴Nde, wene yu yebet ker-o Nunggwi mende saki yu-ge nandug-et yonggo inpigi nap misik mbi-nen nujwa bug-o!’ ” luk Yesus-nen yij-o.

²⁵Ap mondok kwarat-nen Yesus imin waring kaiga-o. Iri ala, at na nden kaga yik eneyasolat-nen it yak ondosolar-e:

²⁶“Ta-nen nde an neram lobok yosolar-e, at eid ija min ogwe la min owe owosi min at ondomok indi min isili rak pigit lak-nen-e an nimbirik noso nap momtag-e meya-o.

²⁷At-nen idnak e lang pang tak pidnak iri pijanuruk, at nimbirik nuwa buk nab-e an nimbirik noso nap momtag-e meya-o.

²⁸Nde, kit misik-nen-e o mot mbi wereyeg-o perasolug-e, awo wirigit lak ma-net kore luk, o yu na wururak mende onggo purak tol-e ndak worasu, lak? Luk orol na wonarugwi-o.

²⁹Nde, tol nde wonarigit lak-nen-e ap iri-nen-e o mabin puwa-t nde, o mot na wiril ludtak mende lak me, o na wirigit lak keya buwama-ge, iri kwarosola kaidnak nap pidsa-nen-e at pesel ubuwa-o.

³⁰Pesel obogolar-e: ‘E! Ap yu-ge o tel nak kosa keya bid yu-ge ngge-o!’ luk yak tuwa-o.

³¹Ap nagawan misik at nap san winde-ge sepulu ribu worak iri na-nen ap nagawan misik at nap san winde-ge dua pulu ribu worak na imin wim mbareyekluk, kore luk. Ap iri imin-e ndak nde wim mbarimin, lak, ngge-o?” luk nandug-et indi wal kaso-o.

³²Nde, indi mbenatluk nde wim purag-e meya ala-ge, wim nggwigit lak ma-net lambuk yurak wene mbaruwokluk wene wosa wim nap endam ap wirik puwa-o.

³³“Iri ngglal-et kit kennggendumu-nen ap misiger-o luk tet kit kinsilobulo pidsa ‘Nimbir-o’ luk keya bigit lak-nen-e an nimbirik noso nap kwat momtag-e meya-o” luk Yesus-nen yij-o.

³⁴Yuruk, Yesus-nen yosolar-e: “Mayu iri-ge undu worag-et nde, mayu na undu lak ala-ge, nggesa undu worak tak purag-o?

³⁵Mayu undu lak iri-ge yaidnak sa purak na meya, nggweyak amburu rak puwakluk purak na meya ala karuk, mbo nak pugwi-o. Ta-nen nde wene yu kulurak eneyanggo worak ala-ge, wene yu kuluwag-o” luk yij-o.