Read Nduga LUKAS 16 Bible Online

LUKAS 16 - Nduga bible

LUKAS 16

¹Yesus-nen at owosirak yak ondosolar-e: “Isilobulo kwarat winde mbi-nen-e at orol ndok woroso nap mbi woragaij-o. Worala-ge, ap mbi-nen isilobulo winde na yak tosolar-e: ‘Kat korol ndok woroso nap na-nen-e kat korol-e we irit ndibi ndi rak pusu-o’ luk yak tij-o.

²Yak tosoloma-ge, tol ndok woroso nap iri na wene mbo uburuk, winde iri-nen yak tosolar-e: ‘Kar-e ngge kwarosola-nen kobok kuligi-o? An nisilobulo wanosolat woraigen iri-ge engga bem ndegera mbarosoluk, wok niril lobok yi-o. Nde, kat-nen an norol tena wolmomtag-e lag-o’ luk yak tidj-o.

³Iri yak tosola-ge, tol ndok woroso nap na indi-nen yebet kasolar-e: ‘An neid-nen we nap tak nubusu yu-ge nggweyak yalurak na namawi lak, nggi yurak na ninggiri kwarat me, ngge nde kwarimin-o?

⁴Lag-o. An kwarurak mende-ge yawo-n yebet kagi-o! Iri kwarimindik me, an we nap tak nobosola-ge, an-nen yongga indimin pem it-nen enma rak nubuwa-o’ luk peragaij-o.

⁵Iri perasoluk woralar-e, tol ndok woroso nap na-nen at eid arengge wanidnak nap oboksa wene mbo unpuruk yarik, nandug-et lobok yid nap na yak tosolar-e: ‘Kar-e an neid arengge-ge namat nunggwirik wanigen-o?’ luk

⁶yosoloma-ge, ap iri-nen yoslar-e: ‘Wam amburu kenanggo yimbe seratus (100) wanigi-o’ luk yij-o. Yosoloma-ge,tol ndok woroso nap-nen at yak tosolar-e: ‘Kat namat wanigen engga mbarak yu wanosoluk, ndag-et nak kore luk-nen: ‘Yimbe-ge lima pulu (50) wanigi-o’ luk mbari-o luk yij-o.

⁷Yurug-e, at-nen ap misik yak tosolar-e: ‘Nde, kat namat wanigen-e nunggwirig-o?’ luk kin wok obosoloma-ge, ap iri-nen yosolar-e: ‘Nggandum’ mbato sum seribu (1,000) wanigi-o’ luk yij-o. Yosoloma-ge, tol ndok woroso nap na-nen ap iri na yak tosolar-e: ‘Kat namat wanigen engga mbarak yu wanosolug-e, “Sum delapan ratus (800) nak wanigi-o” luk mbari-o’ luk yak tij-o.

⁸Iri kwarij-o yogola kolosolug-e, eid na-nen tol ndok woroso nap mot mot kwaroso buk iri-nen indi nggat nggat pidnak karuk, erembel wanij-o. Nde, nggweyak ma nap inndi nggat nggar-e ijar-o. Nde, yaya bem worali nap-nen inndi nggat nggar-e lak nggal-nen yusu-o” luk yij-o.

⁹Yurug-e Yesus-nen yosolar-e: “An yak kendeyeg-o. Nggweyak ma mende yu-nen-e kanggamirak momtak nap indi yangoner-o. Iri ala-ge, nggweyak ma mende na lak ma-t nde, unlug-et pem wolmomtak sa-nen wok kunpuwa-o.

¹⁰Marik kwarurak pem-net nde, mot mot kwaroso nab-e nggulok kwarurak pem-nen na mot mor-et kwaruwa-o. Nde, marik kwarurak pem mot mot kwaroso buk nab-e nggulok kwarurak pem na mot mot kwaruwa bug-o.

¹¹Nde, kat-nen-e nggweyak ma mende yu wanosolar-e, mot mot kwarigit lak ala-ge, piri yoso buk mende-ge ta-nen nde kinggem puwa-o?

¹²Nde, ap enarengge kat-nen mot mor-et kwarigit lak ala-ge, kat karengge-ge ta-nen nde wok kuruwa-o?

¹³Ndegel oboso nap-nen eid tag-e mberen tak ndegel unpurag-e meya-o. Iri kwarosolar-e, eid misik iri abuwa kasolat, misik isili kujwa-o. Nde, eid misik-nen yidnak yidnak kwarosolat misik-nen yidnag-e te rak puwa-o. Iri nggal-et kar-e Mbal Pem Nagawan min nggweyak ma mende min mberensa-t ndugururag-e meya-o” luk yij-o.

¹⁴Iri yidnak wene na kulurug-e, it Parisi nab-e uwang ukwe ukwe yugwi me, Yesus na nda wat ibiga-o.

¹⁵Alat nde, Yesus-nen it yak ondosolar-e: “Ap-nen kek tak yik kagwi iri-ge Mbal Pem Nagawan-nen teberak yik kaso me, ap enlengen pem-e nir-e lud tak nak kwarugwi-o luk yili-t nde, kit kinndi arem-e Mbal Pem Nagawan aru-o.

¹⁶Nde, ap yi maroso nap Yoanes na wok yigit lak worala-net Musa-nen imiri mbarak pidnak wene min Mbal Pem Nagawan ene lomboksa yugwi nap-nen mbaridnak wene min-e kwat tenak woraiga-o. Nde, Yoanes wok yid kur-nen-e Mbal Pem Nagawan-nen tenagaidnak wi wene aid wene na yak ondogola-ge, Mbal Pem Nagawan-nen tenagaidnak wi iri na me nggogolar-e, pela mbo mbo nggwili-o.

¹⁷Nde, mbal min nggweyak min lak momtag-e te-t nde, imiri mbarak pidnak wene-ge marig-et ter-o luk lak tak puwa bug-o.

¹⁸Ta-nen nde ogwe keya buruk, kwe misik wanosola-ge, mbabi-t yusu-o. Nde, nin nap-nen kwe keya bidnak iri wanosola-ge, iri na mbabi-t yusu-o” luk yij-o.

¹⁹Yuruk, yesus-nen yosolar-e: “Isilobulo worak nap mbi woragaij-o. Woralar-e, usum-e konak nak yorosolat, nunggwi mende undu konak nak pempa nok tenak woragaij-o.

²⁰Nde, at uwi tumende bem-e isilobulo lak nap unu-ge Lasarus, mama worak nap na mbinggirik woragaij-o.

²¹Iri me woralar-e, ‘Isilobulo worak nap-nen at naso sa-nen mburu abapno mbidnak pendaga namin-o’ luk peragaij-o. Nde, yengge lobok yosolar-e, at mama yeba na aben nasolat woragaij-o.

²²Misik tarem-e isilobulo lak nap na wat yosola-ge, aid nap-nen at wok uburuk Abaram eralu piga-o. Nde, imbirig-e isilobulo worak nap na wat yamu, yapma piga-o.

²³Wat yidnak nap ndok wurugwi sa woralar-e, yane worosolat-nen-e at erengen lik kagaidnggal-e. Abaram na erepma worala, Lasarus na-ge Abaram eralu worala lik eneyagaij-o.

²⁴Eneyarug-e, isilobulo worak nap na-nen ene ngguloksa yosolar-e: ‘Neid Abaram wa-e. An-e kanduk arem yane wat tenak worasu yu-ge, kar-e an nabuwa kasolar-e, Lasarus iri yak ti-o. Inggi yi ma buruk, an nama imin tak puwak-nen yak ti-o’ luk yij-o.

²⁵Alat nde, Abaram-nen yosolar-e: ‘Nambara wa-e. Kindi yebet ki-o. Kar-e kuruk woralar-e, konak mende nak wanosolat woraigen-o. Nde, Lasarus-e meya mende nak wanosolat woragaij-et nde, yawo-ge ar-e yu me alen pem worasu-o. Nde, kar-e andi bandi kasu-o.

²⁶Nde, wene misig-e yu-o. Ap yu me-nen iri me mbogolat, ap iri me-nen yu me luwagolat ma naru, kat min nit min nennggendumu lembet nggok nggaserak worasu-o’ luk yij-o.

²⁷Yosoloma-ge, isilobulo worak nap na-nen yosolar-e: ‘Iri ala-ge, Neid wa-o. Lasarus iri-ge an neid ama wirik pi-o.

²⁸Iri me-ge an nowosirag-e lima worali me, ir-e andi bandi kagwi sa yu me ngguma naru, kirimbi yak unduwak-nen Lasarus irige wirik pi-o’ luk yij-o.

²⁹Yosoloma-ge, Abaram-nen yosolar-e: ‘Kat kowosirag-e Musa min Mbal Pem Nagawan ene lomboksa yugwi nap min-nen mbaridnak engga-ge it tena worali me, iri-nen yidnak yidnak kwarogolat wolmag-o’ luk yij-o.

³⁰Yosoloma-ge, isilobulo worak nap na-n yosolar-e: ‘Iri kwarurak iri nag-e ndag-e lag-o. Neid Abaram wa-e. Are, wat yidnak nab-et nde, uruk luk, it endam wok yosola-n perak nde it meya yidnak keya buruk kondok yuwa-o’ luk yij-o.

³¹Alat nde, Abaram-nen yosolar-e: ‘It iri-nen-e Musa-nen yidnak wene min Mbal Pem Nagawan ene lomboksa yugwi nap-nen yidnak wene min te rak pogola-ge, wat yidnak nap ennggenggerak-nen uruk luk mbiridnak nap-nen yidnak wene na kuluwa bug-er-o’ ” luk yij-o.