Read Nduga LUKAS 20 Bible Online

LUKAS 20 - Nduga bible

LUKAS 20

¹Misik tarem-e Yesus na Mbal Pem Nagawan ama-nen ap mul ondosolat, aid wene yak ondosolat kwat tenak worasoma-ge, tepan omborak nagawan min imiri mbarak pidnak wene enaru nap min Yawuri nap ennggendumu-nen enne kulugwi nap min-e at eram lobok luk,

²at yak togolar-e: “Kar-e ta-nen yidnak pem yu mende kwaril nusu-o? Ta-nen ‘Iri kwari-o’ yak keramu-nen kwarusu-o? Yak nindi-o” luk yiga-o.

³Yogolikma-ge, Yesus-nen it enne erep nggarosolar-e: “Iri yigep me-ge, an-e wene misik mbi kin wok kenpeyeg-o.

⁴Yoanes ap yi marosolat woragaid iri-ge, Mbal Pem Nagawan-nen yidnak pem kwarid, lak? Are, ki nap-nen yidnak pem nde kwarij-a? Kit-nen yak nerer-o” luk yij-o.

⁵Yosoloma-ge, it na yak kerak mbogolar-e: “Nit-nen nde: ‘Mbal Pem Nagawan-nen yidnak pem-net kwarij-o’ luk yulndig-e, at-nen-e: ‘Iri ala-ge, kir-e noluk-nen Yoanes ebem kinndi angin tubu yigit lak yigeb-o?’ luk yuwa-o.

⁶Nde, nit-nen nde: ‘Ki nap-nen yidnak pem kwarij-o’ luk yulndig-e, ap pidsa-nen-e Yoanes iri-ge Mbal Pem Nagawan ene lomboksa yoso nab-er-o luk eberagwi me, nit kerep pem nunduwa-o” luk yiga-o.

⁷Iri ala karuk, it-nen yogolar-e: “Iri-ge ta-nen yidnak pem kwarij-o? Nir-e kabag-o” luk yiga-o.

⁸Yogolikma-ge, Yesus-nen it yak ondosolar-e: “Iri ala-ge, an-nen na ta-nen yidnak pem kwarusu-o luk yak kindimin pug-o” luk yij-o.

⁹Iri luk, yesus-nen nden karuk wene yu-ge ap iri na yak ondosolar-e: “Ap misik-nen yabu mbi waga anggut uwi yaguruk, yabu na-ge ap erep-nen parugu woraidnak pem engen mbi wanuwakluk yak undurug-e, at iri-ge o nin sa mberarik kwarat woragaij-o.

¹⁰Woralar-e, engen ogore yoso tarem ndak ndak wok yosola-ge, parugu worali nap-nen yabu winde iri na amanggim anggut engen erep wok tuwakluk, at ndegel oboso nap mbi it endam wirik pij-et nde, parugu worali nap iri-nen ndegel oboso nap na nggambu wosa we irit wirik ibiga-o.

¹¹Iri ala karuk, yabu winde iri-nen ndegel oboso nap misik tuguruk wirik ibij-et nde, parugu worali nap-nen at iri na nggambu wutluk, inggiri wosa keya buruk, we irit wirik ibiga-o.

¹²Iri lug-e, tuguruk kenan pem tak posolar-e, ndegel oboso nap mbi wirik ibij-et nde, parugu worali nap-nen mbut ndam ndam wosa leget ombol nggwe mbo biga-o.

¹³Iri ala-ge, yabu winde-nen yosolar-e: ‘E! Yawo-ge no kwarimin-o? Lag-o. An nambik nambara nindi kundik irit wirik pumu-ge, at iri perak nde kek tak ubuwa-o’ luk yij-o.

¹⁴Alat nde, parugu worali nap-nen ambara na yik karuk, it-nen yak kerak mbogolar-e: ‘Eid eyabu winde ma nab-e yur-o. Nde, yabu yu winde yuwok-nen at yu-ge wuruwog-o!’ luk yiga-o.

¹⁵Yurug-e, ambara iri na-ge leget ombol nggwe lesa mbo uburuk, wiriga-o” luk yij-o. Iri yak unduruk, Yesus-nen yosolar-e: “Iri ala-ge, yabu winde na lobok yosolar-e, parugu worali nap na-ge no kwat unpuwa kali-o?

¹⁶Yabu winde iri lobok yuwarig-e, ap ereba na unduruk, yabu na nin nap-nen parugu wolmakluk wok unduwa-o” luk yij-o. Iri yosoloma, kuluruk yigarig-e, it-nen yogolar-e: “Ije! Iri kwarurag-e meya-o!” luk yiga-o.

¹⁷Yogolikma-ge, yesus na it lombot onposolat-nen yak ondosolar-e: “Iri ala-ge, Mbal Pem Nagawan engga bem-nen yosolar-e: ‘O wurugwi nap-nen mbo bidnak kerep iri-ge o unggut paro pidnak irit kwat yij-o’ luk yid iri-ge ebe-ge ngge yosolat-nen yij-o?

¹⁸Nde, kerep yu ebem wosa mbuwa nab-e ndamara labuk ma-o. Nde, kerep yu-nen yumnduwa nab-e yigisa mabe rak puwa-o” luk yij-o.

¹⁹Wene iri yid tarem ereya na-net, “Nden karuk wene yu-ge nit-et yak nindij-o” luk it imiri mbarak pidnak wene enaru nap min tepan omborak nagawan min-nen Yesus tenaguwokluk yiga-t nde, ap kwarat iri enaye-nen larok yiga-o.

²⁰Iri ala-ge, at tenagurak tarem ndak makluk, enlengen waruk tak piga-o. Iri kwarogolar-e, Yesus-nen wene mbi mberak posola, iri na bem-nen at tenaga ap enpem wene mbaroso Gubernor na inggem puwokluk, imiri mbarak pidnak wene enaru nap min tepan omborak nagawan min-nen wirik onpogolar-e, enlengen enlengen yugwi nab-et nde, mot mot kwaroso nap nggal kwasa at kin wok ubuwakluk onggo wok unduruk wirik inpiga-o.

²¹Nde, it enlengen enlengen yuwakluk onggo wok indidnak nap na-nen Yesus yak togolar-e: “Mul Ondoso Nap wa-e. Kat-nen yoso wene min kat-nen mul nondoso wene min mot mot nak yoso-o luk nir-e nenaru-o. Nde, kar-e ap entare mbenaroso buk me, kat-nen-e ki nap-nen kwarurak Mbal Pem Nagawan indi-n peraidnak iri-ge kar-e mondok nam-et nak mul nondoso-o.

²²Nde, nit-nen idnak imiri mbarak pidnak wene bem-e nir-e Nagawan Kaisat amanggim tol purag-e op, lak meya-a? Yak nindi-o” luk yak tiga-o.

²³Yak togolikma-ge, Yesus na-ge it-nen at are pogolat-nen yili na yenggerak karug-e, at-nen it yak ondosolar-e:

²⁴“Kerep tol mbi an kayek-nen nuk kil lobok yer-o. Tol yu bem-e ta erare min ta unu min mbarak kali-o?” luk yij-o. Yosoloma-ge, it-nen yogolar-e: “Kaisar-o” luk yiga-o.

²⁵Yogolikma-ge, Yesus-nen it yak ondosolar-e: “Iri ala-ge, Nagawan Kaisat arengge ala-ge, ar-et wok ter-o. Nde, Mbal Pem Nagawan arengge ala-ge, Mbal Pem Nagawan-et wok ter-o” luk yak indij-o.

²⁶Ap kwarat ereba na inmbiri bem at are purak wene mbi mberak pigit lak ala-ge, at-nen mberak pidnak wene bem wi luk, puk nak yiga-o.

²⁷“Wat yidnak nab-e unluk yugwi bug-o” luk yugwi nap, Saruki nap ereb-e Yesus eram lobok yogolat-nen

²⁸at kin wok obogolar-e: “Mul Ondoso Nap wa-e: Musa-nen nit nenmanggim-e imiri mbarak pidnak wene mbarosolar-e: ‘Ap misik nde la ondolma pigit lak wat yosola-ge, at owe ondolma purak pem kwetogwe na-ge owot-net wanurag-o’ luk mbarij-o.

²⁹Misik tarem-e ap enpe tuju nderak irit woraiga-o. Woragolar-e, onowe manggu na kwe wanuruk, la ndakit lak wat yij-o.

³⁰Wat yosola-ge kwe togwe na owot imbirik mende na wanij-et nde, la ndakit lag-et wat yij-o.

³¹Nde, at imbirik mende-nen na irit tit it enpe tuju na pidsa-nen kwe na waniga-t nde, li ndakit lak irit pidsa wat yiga-o.

³²Iri luk, abog-e kwe na wat yij-o.

³³Iri bem-e ap unluk tak puwa tarem-e kwe iri-ge ap tuju-nen wanidnak me, kwe iri-ge ta ogwe nde ma-o?” luk kin wok ibiga-o.

³⁴Yogolikma-ge, Yesus-nen it yak ondosolar-e: “Ap yawo yeba woragolar-e, kwe wok kerak mbili-t nde,

³⁵wat yidnag-et nde tuguruk unluk tak purak ndak nap na-ge Mbal Pem Nagawan-nen o nin lena wok indidnak sa iri me woragolar-e, kwe wok kerak mburag-e lag-o.

³⁶It iri-ge aid nap nggal-et, mondok wat ma bug-o. It iri-ge wat yidnag-et nde, tuguruk unluk tak pidnak me, ir-e Mbal Pem Nagawan ilirak-nen yili-o.

³⁷Nde, wat yidnak nap unluk tak purak wene iri-ge Musa-nen nam-et nak yij-o. Mbal Pem Nagawan engga bem-nen Musa na e sugwe kan nasola kagaid wene na bem-e. Musa-nen Nagawan Indo imin yosolar-e: ‘Kar-e Abaram min Isak min Yakup min ineid Mbal Pem Nagawan-nen yusu-o’ luk yid nar-o.

³⁸Iri yid iri-ge, Mbal Pem Nagawan-e wat yidnak nap Enmbal Pem Nagawan-nen yusu-ge lag-o. Are, unluk woragwi nap Enmbal Pem Nagawan-net yusu-o. Mbal Pem Nagawan-nen eneyasolar-e, ap pidsa-ge unluk nak eneyaso-o” luk yij-o.

³⁹Yosoloma-ge, imiri mbarak pidnak wene enaru nap erep-nen at yak togolar-e: “Mul Nondoso Nap wa-e. Wene onggo yigen iri-ge konak lombog-o!” luk yak tiga-o.

⁴⁰Iri bem-e it-nen Yesus kin wok uburag-e kwiye yiga-o.

⁴¹Iri luk, Yesus-nen it yak ondosolar-e: “Ap-nen: ‘Kerisut iri-ge Ndaud ambara-nen yusu-o’ yili iri-ge noluk-nen yili-o?

⁴²Nde, Ndawi Engga bem-nen Ndaud at-nen yosolar-e: ‘Nagawan Indo-nen an-nen idnak Nagawan Indo yak tosolar-e: An ninggi kigit ambigit nggwe yu-t koreyak worasoma, kat kuwim nab-e an-nen kat kuwok unggutmu teberak inpimin-o luk yak tid na-t nde-o’.

⁴³

⁴⁴Iri ala-ge, Ndaud na-nen Kerisut imin-e: ‘Kar-e an-nen idnak Nagawan Indo-nen yusu-o’ luk yid ala-ge, Kerisut iri na-ge ngge rak puruk-nen Ndaud ambara-o luk yurag-o?” luk yij-o.

⁴⁵Ap pidsa-ge, at ene kolak worakmu-ge, Yesus-nen at owosirak yak ondosolar-e:

⁴⁶“Imiri mbarak pidnak wene enaru nap enabiyem-o luk kwil kwalsa wolmer-o. Ir-e unsum mot na yutluk waring kudtak indingen yogolat, onggo wanugwi sa-nen kek tak unpurak indingen yogolat, tepan yugwi ma-nen na irit, sakwi sa-nen na irit, ap kek tak-nen kore yugwi sa nak kore yurak indingen yugwi-o.

⁴⁷It iri-ge kweyap togwe na onmbol pem lagolat, it unuwi mengga wanugwi-o. Nde, it-nen meya kwarugwi na lumurogolar-e, ir-e tepan mot pare lit karuk mburugwi-o. Iri kwatli iri-ge it enpem-e wene angin worag-et mbaruwa-o” luk yij-o.