Read Nduga LUKAS 3 Bible Online

LUKAS 3 - Nduga bible

LUKAS 3

¹Tiberius na nagawan Kaisat men luk worasolat, olengen limabelas pem-e, Pontius Pilatus na-ge Yurea nggweyak pem gubernor woragaij-o. Nde, Erores na-ge Nggalilea nggweyak pem nagawan woralat, at owot Pilipus na-ge o Iturea min o Terakonitis min nagawan woralat yiga-o. Nde, Lisanias na-ge o Abilene iri me nagawan woragaij-o.

²Nde, Anas min Kaipas min-e tepan omborak nagawan irit woraiga-o. Iri tarem-e Sakaria ambara Yoanes na-ge karu me worasoma, Mbal Pem Nagawan-nen wene yak tij-o.

³Yak tosoloma-ge, Yoanes na-ge yi Yorodan arem woragwi urusu mbut pidsa waring kasolat-nen yosolar-e: “Mbal Pem Nagawan-nen kit meya yidnak amberam tak puwakluk, kir-e meya yidnak keya buruk kondok yogola-ge, yi ma kunpurag-o” luk yak indil nij-o.

⁴Mbal Pem Nagawan ene lomboksa yoso nap Yesaya-nen at engga bem mbarosolar-e: “Karu me-nen ene nggoksa yosolar-e: ‘Nagawan Indo mbururak urula yager-o. At urula ndung tak per-o!

⁵O nggorok kobok pidsa kemek tak posolat, ndobo nggulok min ndobo teberak min oboksa yanggona mbirik tak posolat, tu yunuk wanuk na mot tak posolat, tu lalik nggwilik na mbirik tak posolat ma-o.

⁶Nde, ap yi wi ndi wi oboksa-nen Mbal Pem Nagawan-nen ap inmiri yosola, kujwa-o’ ” luk mbarij-o.

⁷Yoanes-nen yi ma unpuwaklug-e, ap kwarat at eram ndok worogola-ge, Yoanes-nen it yak ondosolar-e: “Meya yugwi nap kit yu-ge wa-e. Mbal Pem Nagawan isilepma-nen lak tak kunpurak na inggem-nen ta-nen mbela mburugub-o luk yak kindij-o?

⁸Meya kwarugwi keya buruk, kondok luk-nen kwarugwi mende mbi nam tak per-o! Kir-e: ‘Abaram iri-ge nit nonmbo-nen yusu-o’ luk yurak pug-o. Yak kendeyeg-o: Mbal Pem Nagawan-nen-e kerep yeba bem-nen Abaram-nen wigarak nap nggal kwasa ndak wat unpurak na ndak-net yusu-o!

⁹E mengen kuri tebera mbo beyeklug-e, ije kunarak worasu-o. Engen konak poso buk e pidsa-ge ndara kan ma buwa-o” luk yij-o.

¹⁰Yosoloma-ge, ap kwarat ereba-nen Yoanes na kin wok obogolar-e: “Iri ala-ge, nir-e ngge nde kwarul-o?” luk yiga-o.

¹¹Yogolikma-ge, Yoanes-nen it yak ondosolar-e: “Sum mberen worak nap-nen-e misig-e sum lak nap wok tosolat, nunggwi mende worak nap-nen na iri nggal-et kwasa tumbururag-o” luk yij-o.

¹²Yak ondosoloma-ge, pemerinta enmanggim tol ndok wurugwi nap ereb-e it na yi ma unpuwakluk Yoanes erem lobok yogolat-nen at kin wok obogolar-e: “Mul Nondoso Nap wa-e. Nir-e ngge kwarul-o?” luk yogola-ge,

¹³Yoanes-nen it yak ondosolar-e: “Tol nggi yogolar-e, iri nggal purag-o yidnak na keya buruk, terak mena nggi yili meyog-o” luk yak indij-o.

¹⁴Yosoloma-ge,san winde erep-nen at kin wok obogolar-e: “Nit perak nde ngge nde kwarul-o?” luk yogola-ge, Yoanes-nen it yak ondosolar-e: “Kit kenmawi bem-nen na irit, enesiget wene bem-nen na irit, ap enarengge mengga wanurak pug-o. Nde, kit-nen wanidnak pem onggo wok kindili iri-ge, ‘Yu-ge ndag-er-o’ luk kinndi abu wolmomtag-o” luk yak indij-o.

¹⁵Iri tarem-e ap kwarat-nen it na it nak yak kerak mbogolar-e: “Yoanes yu-ge Kerisut lobok yuwa-o luk nit yik karok worali na-ge yu-t, lak?” luk yiga-o.

¹⁶Yogolikma-ge, Yoanes-nen it pidsa yak ondosolar-e: “An-e we yi bem mat kunpusu-t nde, an-e teberak-nen yusu-o. An nimbirig-e ap nggulok mbi lobok yuwa-o. An nggal-nen-e at ijok sum kere wusururag-e meya-o. At iri-nen-e Konak Indi bem, kanduk pem yi mat kunpuwa-o.

¹⁷Nggandum mbato ebe min ababul min lena arik tak pugwi mende-ge at inggem worasu-o. Lena arik tak purug-e, nggandum mbato ebe-ge ndok wosa pil nggugwi sa posolat, abapno-ge nigi yoso buk kanduk iri na me kan puwa-o” luk yak indij-o.

¹⁸Nde, Yoanes-nen aid wene na ap kwarat iri yak ondosolar-e, nggomo wene kwarat yak ondosolat woragaij-o.

¹⁹Alat nde, nagawan Erores Nggalilea wi tena woraso na-ge at ambik owot ogwe Erorias iri wanosolat, meya mende erep min-et kwarosolat woraidnak pem-e Yoanes-nen Erores na met ibij-o.

²⁰Alat nde, Erores na-nen meya ebem tebesa kwarosolar-e, Yoanes na waga o kubu me ibil nggwij-o.

²¹Ap erep pidsa yi ma unpurug-e, Yesus na irit yi ma bij-o. Yi ma bosola, at-nen tepan yosolat worasoma-ge, mbal na ngak luk,

²²Konak Indi-ge towe nggwende nggal luk, at ebem mbuwagaij-o. Nde, aid arem-nen ene pil mbuwasolar-e: “Kar-e an nambara nindi kundik-nen yusu-o. Kar-e an nindi alen tak pusu-o” luk yij-o.

²³Yesus na-ge ndesa mburuk, olengen tiga pulu nggal woraruk pem-e, at eyabu tel korosola-ge, ap-nen at eberagolar-e: “At yu-ge Yusup ambara-nen yusu-o” luk eberaiga-o. Nde, Yusup na-ge Eli ambara,

²⁴Matet ambara, Lewi ambara, Malki ambara, Yanai ambara, Yusup ambara,

²⁵Matisa ambara, Amos ambara, Nakum ambara, Esli ambara, Nagai ambara,

²⁶Mat ambara, Matisa ambara, Simei ambara, Yosek ambara, Yora ambara,

²⁷Yowanan ambara, Eresa ambara, Serubabel ambara, Saltiel ambara, Neri ambara,

²⁸Malki ambara, Adi ambara, Kosam ambara, Elmaram ambara, Et ambara,

²⁹Yesua ambara, Eliaset ambara, Yorim ambara, Matet ambara, Lewi ambara,

³⁰Simeon ambara, Yewura ambara, Yusup ambara, Yonam ambara, Eliakim ambara,

³¹Melea ambara, Mina ambara, Matata ambara, Natan ambara, Ndaud ambara,

³²Isai ambara, Obet ambara, Mboas ambara, Salmon ambara, Nagason ambara,

³³Aminaram ambara, Atmin ambara, Arini ambara, Eseron ambara, Peres ambara, Yewura ambara,

³⁴Yakup ambara, Isak ambara, Abaram ambara, Tera ambara, Nagot ambara,

³⁵Serung ambara, Eregu ambara, Pelek ambara, Ebet ambara, Salmon ambara,

³⁶Kenan ambara, Arapagasat ambara, Sem ambara, Nu ambara, Lamek ambara,

³⁷Metusala ambara, Enok ambara, Yaret ambara, Magalalel ambara, Kenan ambara

³⁸Enos ambara, Set ambara, Aram ambara, Mbal Pem Nagawan ambara-o.