Read Nduga LUKAS 9 Bible Online

LUKAS 9 - Nduga bible

LUKAS 9

¹Nde, Yesus-nen at owosirak duabelas na wene mbo unpurug-e, kugi pidsa wirik purak amawi min ap ki rak unpurak amawi min wok indij-o.

²Iri lug-e, Mbal Pem Nagawan-nen tenagaidnak wi wene mul ondogolat, ud enpem mbidnak nap ki rak inpil nogolat yuwakluk wirik inpij-o.

³At-nen it yak ondosolar-e: “Tu waring kagolar-e, silobulo mbi wanurak pug-o. Wangun ala na, kot manik ala na, mburu ala na, uwang ala na, yurugwi sum mberen ala na wanurak pug-o.

⁴Nde, o mbi-nen wok konpogola-ge, iri me-t woraruk, o siri iri me-nen mborogolat-net keya burag-o.

⁵Nde, ap-nen wok kinpigit lak yogola-ge, o siri iri me-nen mborogolar-e, it inndi wanuwakluk kunuwok liri pil karuk mberer-o” luk yak indij-o.

⁶Yak ondosoloma, at owosirak na mborogolar-e, o siri marik ereba na nggwe nogolar-e, aid wene yak indil nogolat ap ki rak onpogolat kwaril niga-o.

⁷Iri kwaril waring kaidnak wene na-ge o Nggalilea nggweyak tena woraso Erores-nen kulurug-e, indi kabak yamu-o. Ap erep-nen yogolar-e: “Ap yi maroso nap Yoanes na tuguruk uruk yamu-o!” yogolat,

⁸it erep-nen yogolar-e: “Lag-o. Elia na nam yamu-o” yagolat, nde, erep-nen yogolar-e: “Lag-o. Nanduk Mbal Pem Nagawan ene lomboksa yugwi nap ereba na misik uruk yarig-o” yogolat yogola, at indi kabak yamu-o.

⁹Iri ala-ge, Erores-nen yosolar-e: “Yoanes urusu mbaruwakluk yak undukmu, urusu mbariga na-t nde, at owene an kwarat kulusu yu-ge ta-o?” yurug-e, Yesus kudtak irit peragaij-o.

¹⁰Wirik inpidnak nap na-ge tuguruk Yesus eram wok yigarig-e, kwaril waring kaidnak wene na kiringgiga-o. Iri lug-e, Yesus na it inmin luk, enarik nak o siri Mbetsaira mbiriga-o.

¹¹Mborogola-ge, it mbiriga onpok enaru lug-e, ap kwarat na at imbirik mbiriga-o. Mborogola, Yesus-nen imin tak unpurug-e, Mbal Pem Nagawan-nen tenagaidnak wi wene yak ondosolat, ap kugi worak it ennggendumu ki rak onposolat kwarij-o.

¹²Nde, o ki yosola-ge, at owosirak duabelas na at eram lobok yigarik-nen yogolar-e: “O yu-ge ap lak ma me, ap yeba-ge it norak mburu min it nene yurak o min kore yuwakluk, o siri inggi inggi yeba nggwe wirik inpi-o” luk yiga-o.

¹³Alat nde, Yesus-nen it yak ondosolar-e: “Kit-net nunggwi mende mak undurag-o” luk yak ondosoloma, at owosirak-nen yogolar-e “Nir-e oroti mburu lima min keyane mberen min nak worasu-o. Nde, nir-e ap kwarat yu enmanggim nunggwi mende onggo pil mburuwakluk-nen yigen-a?” luk yiga-o.

¹⁴(Nde, ap nag-e kwarat, limaribu (5,000) nggal iri me woraiga-o.) Nde, Yesus nen at owosirak yak ondosolar-e: “Ap yu logona mbo koreyak onpogolar-e, ap limapulu nggal nin me kore yogolat, limapulu nggal nin me kore yogolat mag-o” luk yak indij-o.

¹⁵Yak ondosoloma-ge, at owosirak na-nen at-nen yak indid iri na nggal-et koreyak inpil mbiriga-o.

¹⁶Iru lug-e, Yesus na-nen oroti mburu lima na min keyane mberen na min wanurug-e, mbal lik karuk, Mbal Pem Nagawan wa yak turuk, mbara mbara ligik puruk, ap na tembesa wok unduwakluk, at owosirak na wok indij-o.

¹⁷It pidsa inmbitsa irit ningga-o. Nde, erep minggirig-e, at owosirak-nen yarak pukmu, mul sum duabelas irit kobong yij-o.

¹⁸Misik tarem-e Yesus na arig-et woralat-nen tepan yosoma-ge, at owosirak na eram mbiriga-o. Mborogolikma-ge, Yesus-nen it kin wok onposolar-e: “Ap kwarat-nen-e an-e ta-o luk neberali-o?” luk yij-o.

¹⁹Yosoloma-ge, it-nen yogolar-e: “Ap erep-nen kar-e ap yi maroso nap Yoanes nde keberali-o. Nde, ap erep-nen-e kar-e Elia nde keberali-o. Nde, arep-nen-e: ‘Lag-o. Nanduk Mbal Pem Nagawan ene lomboksa yugwi nap yeba na misik uruk yarik-nen yusu-o’ luk keberali-o” luk yiga-o.

²⁰Yogolikma-ge, at-nen it kin wok onposolar-e: “Kit-nen-e an-e ta-o luk neberali-o?” luk yosoloma-ge, Peterus-nen wene erep nggarosolar-e: “Kar-e Mbal Pem Nagawan eram-nen lobok yidnak Kerisut-nen yusu-o” luk yij-o.

²¹Yosoloma-ge, Yesus-nen at owosirak yak ondosolar-e: “Wene yu-ge ap misiger-o luk tet mondok yak undurak pug-o” yurug-e,

²²“Ap Ambara-ge andi bandi kwarat kasolat, ogore yidnak nap min tepan omborak nagawan min imiri mbarak pidnak wene enaru nap min-nen pelek pelek tak uburuk, wuruwa-t nde, mberen naruk, kenan tak purak tarem-e tuguruk uruk tak puwa-o” luk yij-o.

²³Iri luk, Yesus-nen it pidsa yak ondosolar-e: “Ta-nen nde an nimbirik nurak perasolar-e, at-nen nggok tak poso mende pidsa keya buruk, at-nen idnak e lang pang tak na pempa-n kud turuk, an nimbirik nosolat wolmag-o.

²⁴At uruk wolmomtak iri na nggok tak pusu nab-e at uruk wolmomtak iri na lak tak pusu-o. Nde, an nebem ala, at indi abuwa lak tak pusu nab-e uruk wolma-o.

²⁵Ap-nen-e nggweyak ma yu me pidsa winde ma-t nde, at ambik indi pul tak posola-ge, no nde lesa wanuwa-o?

²⁶Ta-nen nde an min an-nen yidnak wene min yurak inggiri pasiyem tak puwa nab-e, Ap Ambara an-nen-e an namawi bem Neid min lenak inpidnak aid nap min enmawi bem lobok yimin tarem-nen-e ap iri na obok para yurak na ninggiri pasiyem tak pimin-o.

²⁷An-e ndemeret yak kundusu-o. Yu me worali nap ereb-e Mbal Pem Nagawan-nen tenagaidnak wi enlengen-e kagit lak ma-nen-e wat ma bug-o” luk yij-o.

²⁸Wene na yuruk, tuju nggal nene lug-e, Yesus na Peterus min Yoanes min Yakobus min inmin lug-e, tepan yekluk ndobo be mbirij-o.

²⁹Tepan yosolat worasoma-ge, at erare-ge nin yosolat, at usum-e loro lombok luk, igip kip worak irit agaij-o.

³⁰Ereya na-net mberen nap Musa min Elia min-e

³¹aid arem yaya bem-nen nam luk, siyag-et woraruk Yesus na Yerusalem mbutluk, iri me wat momtak wene irit Yesus imin mbarogolat woraiga-o.

³²Nde, iri tarem-e Peterus anggamirak inmin-e nene yiga-t nde, men yogolat-nen yik kaiganggal-e, yesus na abinal worak mberen nap inmin irit mendak worakmu eneyaiga-o.

³³Iri luk, mberen nap na Yesus keya buruk mborogoloma-ge, Peterus-nen at yak tosolar-e: “Mul Nondoso Nap wa-e. Nir-e ob-et yu me worali-o. O lije kenan wurul-o. Kat kamanggim, Musa amanggim, Elia amanggim nde wurul-o” luk yij-o. (Wene yid iri-ge at indi-ge yebet kagit lak me, kasa ereya-t yij-o.)

³⁴Nde, Peterus-nen wene na yosoma-ge, nggan nggan misik lobok yosolar-e, it na yemendak onposola, it kwiye kwarat yiga-o.

³⁵Nde, nggan nggan na arem-nen ene iri-nen yosolar-e: “Yu-ge an Nambara, an-nen len ibidnak nap-nen yusu-o. At-nen yidnak wene nak koler-o!” luk yij-o.

³⁶Ene na yosoloma, it-nen yik kaiganggal-e, Yesus na arig-et worasoma yik kaiga-o. Nde, at owosirak na-nen-e it-nen kulidnak wene-ge iri tarem-nen ap misiget tet yak indigit lak, larok nak yiga-o.

³⁷Nene luk, Yesus owosirak inmin ndobo bem-nen mbogola-ge, ap kwarat Yesus eram lobok yiga-o.

³⁸Nde, ap ereba na enggendumu-nen ap misik-nen ene nggoksa yosolar-e: “Mul Nondoso Nap wa-e. Nap wa-o. An nambara misiget nak nderak yu nde, kat-nen kanokluk pil lobok yigi-o!

³⁹Kugi meya na at arem nggosolar-e, mimo ene nggwa luk, inggi nggo nggo owak nggo nggo, eragup kila kilasa keya boso-o. Nde, kugi iri-nen-e pempa andi bandi rak perenak worasolar-e, at arem-nen mboroso bug-o.

⁴⁰Nde, kugi iri wirik puwakluk, kat kowosirak enmengen mbarigi-t nde, it-nen wirik pigit lag-o” luk yij-o.

⁴¹Yosoloma-ge, Yesus-nen yosolar-e: “Kit kinndi angin tubu yugwi buk, lugud tak nggwe nak kwarugwi nap wa-e. Kit kinmin nunggwirik tarem nggal woramin-o? Kit kinmin nunggwirik tarem nggal mamak puruk woramin-o?” luk, “Kambara na waruk lobok yij-o” luk eid na yak tij-o.

⁴²La na Yesus eram mborosoma-ge, kugi na-nen la iri na mbud tak puruk, inggi lele owak lele rak pij-o. Alama-ge, Yesus-nen-e: “Kar-e mbiri-o” luk kugi na met puruk, la na ki rak puruk, waga eid eram pij-o.

⁴³Iri kwarosola-ge, Mbal Pem Nagawan amawi kwiye worak iri na karug-e, ap pidsa-nen wi yiga-o. Yesus-nen kwaridnak iri na karuk, ir-e wi langgu mbal tenak irit woragola-ge, Yesus-nen at owosirak yak ondosolar-e:

⁴⁴“An-nen yak kundusu wene yu-ge keneyanggo-nen kuluruk, kwara yebet ker-o. Ap Ambara na iminep wesera ki nap ininggem ubuwa-o” luk yij-o.

⁴⁵Alat nde, Yesus owosirag-e wene na-ge yebet kagit lag-o. Wene na it yebet kagit lak makluk, kura bij-o. Nde, ir-e wene na at kin wok uburag-e kwiye-nen larok yiga-o.

⁴⁶It ennggendumu-nen ta nde kek tak wolma-o luk wene iri lit lit Yesus owosirag-e yuk puk mbiga-o.

⁴⁷Nde, Yesus-nen it-nen perali wene na yenggerak purug-e, la marik mbi waga at eralu mendak puruk-nen

⁴⁸it yak ondosolar-e: “An nunu bem la marik yu wanuwa nab-e an irit wok nubusu-o. Nde, an wok nubusu nab-e an wirik nibil lobok yidnak nap irit wanusu-o. Kit kenngge nggerak marik worasu nap iri-ge nggulok-nen yusu-o” luk yij-o.

⁴⁹Yosoloma-ge, Yoanes-nen yosolar-e: “Mul Nondoso Nap wa-e. Ap misig-e kat kunu bem kugi wirik posola karug-e, ar-e nit ninmin waring kaso buk ala-ge, ‘Iri kwarusu meyog-o’ luk yak tige-o” luk yij-o.

⁵⁰Yosoloma-ge, Yesus-nen Yoanes min at owosirak erep min yak ondosolar-e: “At imin-e ‘Iri kwarusu meyog-o’ luk yak turak pug-o. Kit kinmin wene eyak witli buk nab-e kit kennggam-nen yili-o” luk yij-o.

⁵¹Yesus na aid arem wok uburuk ludtak tarem panggo yosola, Yerusalem mbururak peragaij-o.

⁵²Perarug-e, at mburuwom nggwe ap mbi nanduk wirik inpij-o. Nde, it na mbirigarik, Samaria nap enma wok lug-e, at amanggim lid lud tak purak mende mbi lid lud tak puwokluk yiga-t nde,

⁵³at indi-ge Yerusalem mbururak wat tak pidnak me, o iri nap-nen Yesus wok uburak insili rak piga-o.

⁵⁴Iri la, at ososirak mberen Yakobus min Yoanes min-e iri kwarogola karuk, it-nen yosolar-e: “Nagawan Indo wa-e. Ap yu lak tak unpuwakluk, nit-nen-e aid arem-nen kanduk mberak pi-o yurag-e kindingen, lak?” luk yiga-o.

⁵⁵Yogolikma-ge, Yesus na nden karuk, met inpij-o.

⁵⁶Iri lug-e, o siri misik me mbiriga-o.

⁵⁷Nde, Yesus owosirak inmin-e tula mburukmu-ge, ap misik-nen Yesus yak tosolar-e: “Kat mburugun sa na an-e kimin-et mbirimin-o” luk yij-o.

⁵⁸Yosoloma-ge Yesus-nen at yak tosolar-e: “Ndakngge nene yoso ondoro kerep eyanggo worasu-o. Nde, towe nene yoso uwi na worasu-t nde, Ap Ambara mbinggirik woraso ondoro-ge lag-o” luk yij-o.

⁵⁹Yurug-e, Yesus-nen nin nap yak tosolar-e: “An nimin ni-o” luk yak tij-et nde, ap iri-nen yosolar-e: “Nagawan Indo wa-e. An mbirimindik, neid yapma puruk-nen obok yek-nen mbiri-o yak niri-o” luk yij-o.

⁶⁰Yosoloma-ge, Yesus-nen at yak tosolar-e: “Ap wat yidnak iri-ge wat yidnak nap-nen yapma puwag-o. Nde, kar-e Mbal Pem Nagawan-nen tenagaidnak wi wene waruk wigaril waring ki-o” luk yak tij-o.

⁶¹Yak tosoloma, nin nap-nen yosolar-e: “Nagawan Indo wa-e. An mbirimindik, nama woragwi nap wa yak unduruk-nen kimin neyak-nen mbiri-o yak niri-o” luk yij-o.

⁶²Yosoloma-ge, Yesus-ne at yak tosolar-e: “Ap-nen yabu tel kereyekluk, kagweyap sindik nak puruk, imbirik nggwe yik karok wolma nab-e, Mbal Pem Nagawan ilirak kwat momtag-e meya-o” luk yij-o.