Read Nduga YOANES 10 Bible Online

YOANES 10 - Nduga bible

YOANES 10

¹Yak unduruk, Yesus-nen yosolar-e: “An-e ndemeret yak kundusu-o. Lomba wam ngenwa woraso sa nggosolat tu ndanggi nggwe nggwigit lak, leget abare nggwe kwid tusu nab-e yariya wanoso min ap enarengge ndena wanoso nap-nen yusu-o.

²Alat nde, tu ndanggi nggwe-t nggusu nab-e lomba wam ombo-ge irir-o.

³Nggosola-ge, lomba wam tumende yik karok woraso nap-nen-e lomba wam ombo na nggumakluk tu kuwarak poso-o. Nggosolar-e, lomba wam na enarik tak unnu luk wene mbo onposola kuluruk, lit eneyaruk at imbirik mbepme mburugwi-o.

⁴Lomba wam ereba na mbepme waruk mbutlug-e, lomba wam-nen-e at ene-ge yenggerak kulugwi me, at nanduk mborosola, imbirik mburugwi-o.

⁵Alat nde, lomba wam-nen-e nin nap inmbirig-e mburuwa bug-o. Are, at ene-ge enaru buk me, kwiye nde mburuwa-o” luk yij-o.

⁶Yesus-nen nden karuk wene yu yak indij-et nde, at-nen yak indidnak wene-ge ir-e yenggerak pigit lak yiga-o.

⁷Iri ala, Yesus-nen tuguruk it yak ondosolar-e: “An-e ndemeret yak kundusu-o. Lomba wam uru mende-ge an-net yusu-o.

⁸An lobok yigit lak ma, nanduk-net lobok yiga nap pidsa-ge yariya wanugwi min ap enarengge ndena wanugwi min lobok yidnak me, lomba wam-nen-e it enne kuligit lak yiga-o.

⁹Tumende an-net yusu-o. An nebem nggwe ngguwa nab-e imiri yimin-o. Nde, imiri yidnak nap na-ge nggwilik mbitlik kwat tenak worasolar-e, nunggwi mende nasolat wolma-o.

¹⁰Yariya wanugwi nap na lobok yugwi-ge, yariya wanurak pem min undurak pem min lak tak unpurak pem min lobok yugwi-o. Alat nde, an lobok yigi-ge, lomba wam-nen-e unlug-et wolmomtak elem mondok kwarat wanuwakluk-nen lobok yigi-o.

¹¹Lomba wam ombo konag-e an-net yusu-o. Nde, lomba wam ombo konak-nen-e at olomba enmanggim at na at-net iminep wisirik pusu-o.

¹²Nde, lomba wam ombo-ge lak, we onggo wanurak pem nak lomba wam parugu woraso nap-nen-e ndakngge lobok yosola karuk, lomba wam na keya buruk, kwiye mboroso-o. Kwiye mborosola-ge, ndakngge na-nen lomba wam ereb-e nasola, ereb-e ndibi ndi rak poso-o.

¹³Onggo wanurak pem nak parugu woraso nap iri-ge lomba wam na umud kagit lak, kwiye mboroso-o.

¹⁴Lomba wam ombo konag-e an-net yusu-o. Nde, an Neid-nen an aru worasu nggal, an-nen na Neid naru worasu iri nggal-et an-nen-e an nolomba naru worasu-o. Nde, it-nen na an enaru worali-o. Nde, an nolomba enmanggim-e wat yimin-o luk perasu-o.

¹⁶Nde, an nolomba erep na worasur-o. Lomba ereba-ge ngenwa yu me nggwigit lak nde yigi-o. An-nen na it oboksa mondok inpil lobok yimin-o. It-nen an nene kologolat, it pidsa misiget nak luk, lomba wam ombo na misiget nak wolma-o.

¹⁷Abok-nen nindi tuguruk waneyekluk, an-net an nindi wisirik pusu me, an Neid-nen an nabuwa kasu-o.

¹⁸Nin nap-nen an nindi mengga wanuwa bug-o. An nindi-net nindi wisirik pimin-o. Nindi wisirik purak na, nindi tuguruk winde yurak na, an nebem-et worasu-o. Iri kwarurak iri-ge an Neid-net nebem pij-o” luk yij-o.

¹⁹Yesus-nen wene iri yosola kulurug-e, Yawuri nap-nen inndi kuri worak woraiga-o.

²⁰Iri yogolar-e, it erep kwarat-nen yogolar-e: “At yu-ge kugi arem nggwidnak, indi wawa-nen yusu-o! Kit noluk-nen at-nen yidnak wene kulili-o?” luk yiga-o.

²¹Nde, it erep-nen yogolar-e: “Kugi enarem nggwidnak nap-nen-e wene iri nggal yugwi bug-o. Enlengen ngguru yidnag-e kugi-nen-e ndak kuwarak poso-a?” luk yiga-o.

²²Iri tarem-e Yerusalem-nen Mbal Pem Nagawan uwi wiriga na at amanggim pidnak tarem yebet kagolat sakwi tarem wok yij-o. Nde, iri tarem-e kimamo wok yidnak tarem-o.

²³Yesus na-ge Mbal Pem Nagawan ama Salomo abanggo bem waring kasoma-ge,

²⁴Yawuri nab-e at lop lop worogolat-nen yak togolar-e: “Nit ninndi birik keya nunpuruk worasolar-e, nunggwirik woragun-o? Kar-e Mesias alar-e, nam-et yak nindi-o” luk yak tiga-o.

²⁵Yak togolikma-ge, Yesus-nen it yak ondosolar-e: “An-e pi-net yak kondosolat woragi-t nde, kit kinndi angin tubu yigit lak yigeb-o. An neid unu bem kwaril nusu mende-ge an yenggerak neyabokluk mul kundusu-t nde,

²⁶kir-e an nolomba wat yigit lak me, kinndi angin tubu yili bug-o.

²⁷An nolomba-nen-e an nene kulili-o. Nde, an-nen-e ir-e naru me, an nimin nili-o.

²⁸An-nen-e unlug-et woralik nalik momtak elem wok undusu me, ir-e pem-et lak ma bug-o. Ap misiger-o luk tet-nen an ninggem-nen ming unpurak na meya-o.

²⁹Nolomba ninggem pidnak nap an Neid na-ge terak minik nggulok pare-nen yusu me, an Neid inggem worali nab-e ap misiger-o luk tet-nen ming unpurag-e mondok meya-o.

³⁰An min Neid min-e misiget nak-nen yusu-o” luk yak indij-o.

³¹Yak ondosoloma-ge, it Yawuri nap-nen tuguruk at wururak pem kerep waniga-o.

³²Alama-ge, Yesus-nen it yak ondosolar-e: “An Neid-nen konak kwarurak mende kwarat nebem posola, kit kinmbiri bem kwarigirik me, ngge kwaridnak pem-nen kir-e kerep pem an nuruwokluk yili-o?” luk yak indij-o.

³³Yak ondosoloma-ge, Yawuri nap-nen at yak togolar-e: “Kat-nen konak mende kwaridnak pem-nen kat kuruwokluk yili-ge lag-o. Are, kar-e ki nab-et nde, Mbal Pem Nagawan imin ndak ndak yosolar-e, Mbal Pem Nagawan obok pusu iri bem-nen kuruwokluk yili-o” luk yak tiga-o.

³⁴Yak togolikma-ge, Yesus-nen it yak ondosolar-e: “Kit-nen idnak imiri mbarak pidnak engga bem-nen Mbal Pem Nagawan-nen yosolar-e: ‘Kir-e Mbal Pem Nagawan nggal-net yili-o’ luk mbaridnak na kali bug-a?

³⁵Nde, Mbal Pem Nagawan engga bem mbaridnak wene iri-ge ndemeret pem-et wolmomtak wene-nen yusu-o luk nir-e nenaru-o. Mbal Pem Nagawan-nen yidnak wene yak indidnak nap inmin-e: ‘Kir-e Mbal Pem Nagawan nggal-net yili-o’ luk yak indidnak me,

³⁶Neid-nen len nuburuk wirik nibil lobok yidnak nab-et nde, an-nen-e: ‘An-e Mbal Pem Nagawan Ambara-o’ luk yusu iri bem kit noluk-nen: ‘Mbal Pem Nagawan obok poso nab-o’ luk yak nitli-o?

³⁷An Neid-nen nebem pidnak mende kwarigit lak ala-ge, kinndi-ge an nebem angin tubu yurak pug-o.

³⁸Alat nde, an-nen-e at-nen nebem pidnak mende kwarusu ala-ge, kinndi-ge an nebem angin tubu yili bug-et nde, an-nen kwaroso mende bem nak kinndi angin tubu yer-o. Iri bem, kinndi angin tubu yugup ala-ge, an Neij-e an narem woralat, nde, an-nen na Neid arem woralat yili-o luk kwara kenaru yugub-o” luk yak indij-o.

³⁹Iri yosoloma, wandak at tenaguwokluk yiga-t nde, it ininggem-nen mengga mbirij-o.

⁴⁰Iri luk, Yesus na mberarig-e, Yi Yorodan eyak ele bem ndil larik-nen Yoanes-nen nandug-et ap yi ma onposolat woraidnak sa iri me woragaij-o.

⁴¹Worala-ge, ap kwarat na at eram lobok luk-nen yogolar-e: “Yoanes-nen-e kwiye worak mende mbi kwarigit lag-et nde, at-nen ap yu owene-ge pidsa-ge lud tak nag-et yak nindij-o” luk yiga-o.

⁴²Yurug-e, iri me-nen ap kwarat-net inndi-ge at ebem angin tubu yiga-o.