Read Nduga YOANES 11 Bible Online

YOANES 11 - Nduga bible

YOANES 11

¹O Mbetania nap Lasarus na kugi ebem yidnak woragaij-o. O iri me-ge Maria min ambap Marata min enma-o.

²(Nde, Maria iri-ge Nagawan Indo ijok pem emben konak amburu kuluruk, at anggulsu-nen at ijok ndogwarak pid kwe-ge iri nar-o. Nde, kwe iri na owe Lasarus-e kugi worak woragaij-o.)

³Iri ala-ge, Lasarus iridtak mberen iri-nen wene wosa Yesus eram pil mborogolar-e: “Nagawan Indo wa-e. Nit nintid kanggam abuwa worak na-ge kugi worak worasu-o” luk yiga-o.

⁴Alama-ge, wene na kuluruk, Yesus-nen yosolar-e: “At kugi wirid iri-nen ndowaga wat ma-ge lag-o. Are, Mbal Pem Nagawan min Mbal Pem Nagawan Ambara an min nunnu kek tak puwakluk-nen at ebem mbij-o” luk yij-o.

⁵Nde, Yesus-nen-e Marata min Maria na min Lasarus min enabuwa kasolat woragaij-o.

⁶Nde, Lasarus na kugi worak worasu obog-e kuluruk-net nde, indi-net Yesus na at woragaid sa na-t mberen nene yij-o.

⁷Iri luk, Yesus-nen at owosirak na yak ondosolar-e: “Yurea tuguruk mburuwog-o” luk yak indij-o.

⁸Yak ondosoloma-ge, it-nen at yak togolar-e: “Mul Nondoso Nap wa-e. Yawuri nap-nen tono-t kerep pem kuruwokluk yiga na-t nde, tuguruk iri na me-t mburugun-a?” luk yak tiga-o.

⁹Yogolikma-ge, Yesus-ne yosolar-e: “O misik nda yidnag-e duabelas jam nde kali bug-a? Nde, ap-nen-e lengge yaya bem waring kasolar-e, at ijok abis mbaroso bug-o.

¹⁰Alat nde, o kubu nggwe waring kaso nab-e at arem yaya lak me, ijok abis mbaroso-o” luk yij-o.

¹¹Wene na yuruk, tuguruk Yesus-nen it yak ondosolar-e: “Nennggam Lasarus na nene yusu-o. Alat nde, an-nen mendak ebeyekluk mbirimin-o” luk yak indij-o.

¹²Yak ondosoloma-ge, at owosirak-nen yogolar-e: “Nagawan Indo wa-e. Ar-e nene yusu ala-ge, ki ma-o” luk yiga-o.

¹³Alat nde, Yesus-nen-e: “Lasarus na wat yij-o” yosolat-nen yij-et nde, it inndi arem-nen-e ndemeret nene yili ereba na nggal nene yusu-o luk peraiga-o.

¹⁴Iri ala-ge, Yesus-nen mondok nam-et yak ondosolar-e: “Lasarus na wat yamu-o.

¹⁵Alat nde, kit kinndi angin tubu yobokluk-nen an nebalma ob-et wat yij-o luk an nalen kasu-o. Iri ala-ge, at eram mburuwog-o” luk yak indij-o.

¹⁶Yak ondosoloma-ge, Tomas na unu misig-e Kambera Nderak na-nen at anggamirak yak ondosolar-e: “At imin totno wat mok-nen mburuwog-o!” luk yij-o.

¹⁷Yesus na wok yid nggal-e, Lasarus na yapma ibikma, kenan nene yidnak nde kagaij-o.

¹⁸Mbetania na-ge Yerusalem-nen mborogolar-e, tiga kilometer nggal me,

¹⁹Yawuri nap kwarar-e Marata min Maria min intid wat yidnak me, inndi yangunuwokluk lobok yiga-o.

²⁰Nde, Marata na-ge “Yesus lobok yusu-o” luk yogola kuluruk, imin lobok yekluk at abuwok mbirij-o. Alat nde, Maria-ge ma woragaij-o.

²¹Marata-nen Yesus yak tosolar-e: “Nagawan Indo wa-e. Kar-e yu me woraigen nggal-e, mondok an nowe wat yelep pug-o!

²²Alat nde, yawo-nen na kat-nen Mbal Pem Nagawan nggi yak tugun mende na wok kuruwa-o luk an-e naru-o” luk yak tij-o.

²³Yak tosoloma-ge, Yesus-nen Marata na yak tosolar-e: “Kat kowe iri-ge tuguruk uruk ma-o” luk yak tij-o.

²⁴Yosoloma, Marata-nen Yesus yak tosolar-e: “I woronosolat tarem-nen uruk ma-o luk naru worasu-o” luk yij-o.

²⁵Yosoloma-ge, Yesus-nen Marata na yak tosolar-e: “Unluk tak onposo elem min unlug-et wolmomtak elem min-e an-net yusu-o. Inndi-ge an nebem angin tubu yuwa nab-e wat ma-t nde, unlug-et ma-o.

²⁶Nde, unluk woragolat-net inndi an nebem angin tubu yuwa nab-e mondok wat yigit lak ma-o. Wene yu-ge kat kindi angin tubu yusu, lak?” luk yak tij-o.

²⁷Yak tosoloma-ge, kwe na-nen at yak tosolar-e: “Eyo, Nagawan Indo wa-e. Kar-e ‘Abok-nen lobok yuwa-o’ yugwi nap Mesias, Mbal Pem Nagawan Ambara-nen yusu-o luk nindi angin tubu yusu-o” luk yij-o.

²⁸Nde, wene na yuruk Marata na ama mberarik-nen owot Maria na wene mbo buruk, mbik mbok-nen yak tosolar-e: “Mul Nondoso Nap na lobok yarig-e, kat kin wok kibij-o” luk yak tij-o.

²⁹Yak tosoloma kuluruk, Maria na men luk, ndag-et nak Yesus eram mbirij-o.

³⁰(Nde, Yesus na o silmu awo wok yigit lak, Marata imin lid pid yiga sa iri na me-t woragaij-o.)

³¹Iri ala-ge, Maria indi yangonogolat o ma woraiga Yawuri nap-nen kwe na men luk ndag-et nak mborosola karuk, “Kwe na-nen-e yapma pidnak sa yip teyekluk mburusu-o” peragoluk, at imin mbiriga-o.

³²Alama-ge, Maria na-ge Yesus woraidnak sa eram wok yosolar-e, at yik karug-e, at eralu tud luk-nen at yak tosolar-e: “Nagawan Indo wa-e. Kar-e yu me woraigen nggal-e, mondok an nowe wat yelep pug-o!” luk yak tij-o.

³³Nde, Yesus-nen Maria min at imin lobok yidnak Yawuri nap na min yip togola eneyaruk, at indi andi luk, indi puru kwarat agaij-o.

³⁴Iri luk, at-nen it kin wok onposolar-e: “Ngge me yapma pigeb-o?” luk yosola-ge, it-nen at yak togolar-e: “Nagawan Indo wa-e. Kil mburuwog-o” luk yiga-o.

³⁵Yogolikma-ge, Yesus na yip tij-o.

³⁶Yip tosola karuk, it Yawuri nap-nen yogolar-e: “At anggam Lasarus ebem indi kundik woraso-ge ijar-o!” luk yiga-o.

³⁷Alat nde, it erep-nen yogolar-e: “Ap yu-nen-e enlengen ngguru enlengen kuwarak poso-net nde, Lasarus na wat yigit lak ma-net yongga wururag-et nde, noluk yongga wirigit lag-o?” luk yiga-o.

³⁸Iri luk, Yesus na tuguruk indi andi kwarat luk, yapma pidnak sa mbirij-o. Nde, at yapma pidnak sa-ge kerep yanggoma puruk, kerep misik-nen tumende nggelak pidnak me,

³⁹Yesus-nen yosolar-e: “Kerep iri lembera waber-o!” luk yosoloma-ge, wat yidnak nap owot Marata na-nen yosolar-e: “Nagawan Indo wa-e. Wat luk, kenan nene yidnak me emben kwarat yamu-o!” luk yij-o.

⁴⁰Yosoloma-ge, Yesus-nen Marata na yak tosolar-e: “ ‘Kat kindi angin tubu yosola-ge, Mbal Pem Nagawan kek tak woraso iri-nen idnak amawi kagun-o’ luk yanem-et yak kirigi na-ge lag-a?” luk yak tij-o.

⁴¹Iri luk, kerep na lembera wabiga-o. Nde, Yesus na erengen lik karuk-nen yosolar-e: “Neid wa-e. Kar-e an nene koloso bem ‘Neid wiwa-o’ yak kurusu-o.

⁴²Kar-e an nene pempa koloso iri-ge a naru-t nde, ap ndok wiriga yeba-nen kuluruk, an-e kat-nen ibil lobok yamu-o luk inndi angin tubu yuwakluk-nen wene yu yusu-o” luk yij-o.

⁴³Iri yuruk, at ene ngguloksa-t yosolar-e: “Lasarus wa-e. Wasug-o!” luk yij-o.

⁴⁴Iri yosoloma-ge, wat yidnak nap na wasolar-e, ap wat yogola nggitlik unpugwi sum-nen inggi ijok nggitlik pidnak na min erare sum-nen muruksa piga iri na min kundugu-t wagaij-o. Wasoloma-ge, Yesus-nen it yak ondosolar-e: “Kona mburuwak-nen wisirik eber-o” luk yak indij-o.

⁴⁵Nde, Yesus-nen iri kwarosola karuk, Maria eram lobok yiga Yawuri nap kwarat-nen Yesus ebem inndi angin tubu yiga-o.

⁴⁶Alat nde, it ennggendumu ap ereb-e Parisi nap endam mbirigarik, Yesus-nen kwarid wene yak indiga-o.

⁴⁷Yak ondogolikma-ge, tepan omborak nagawan min Parisi nap min-nen wene mbarugwi nap inmin ndok wutluk-nen yogolar-e: “At-nen-e kwiye worak mende kwarat kwarusu me, nir-e ngge nde kwat ubul-o?

⁴⁸Yawo kwarusu nggal kwaruwakluk, we keya nak obogola-ge, Oroma nap lobok yuwarik, Mbal Pem Nagawan uwi yu min nit nenlem nap pidsa min lak tak unpuwa-o!” luk yiga-o.

⁴⁹Yogolikma-ge, it ennggendumu-nen ap misik olengen iri bem-nen tepan ombo nggulok wolmakluk len ibidnak nap unu-ge Kaipas-nen yosolar-e: “Li yu-ge, kir-e mondok kenaru buk-nen yili-o!

⁵⁰Nde, nit nenlem nap pidsa lak tak unpuwa naru, at misiget nak nit nenlem nap oboksa ondolmasa wat momtag-e konag-o luk, kinndi yebet kagit lak yili-a?” luk yij-o.

⁵¹(Kaipas-nen yid iri-ge, we at indi-n pidnak yigir-e lag-o. Are, at iri-ge olengen iri bem tepan ombo nggulok pidnak me, Yesus-e Yawuri nap enlem oboksa ondolmasa wat momtak na urul pij-o.

⁵²Nde, Yesus elem nap Yawuri nap enarig-et nak ondolma wat momtak pem-e lag-o. Are, Mbal Pem Nagawan ilirak yi wi ndi wi ndi rak inpidnak na ndok wosa misiget tak unpurak pem wat yij-o.)

⁵³Iri ala-ge, iri tarem-nen Yawuri nap ennggendumu enne kulugwi nap na-nen Yesus wururak wene mbarogolat woraiga-o.

⁵⁴Iri bem-e Yesus na Yawuri nap ennggendumu-ge nam-et waring kagit lak yij-o. Nde, Yurea na keya buruk, karu me koroga o siri misik unu-ge Eparaim iri me mberarik, at owosirak inmin woragaij-o.

⁵⁵Nde, iri tarem-e O Anggul Pandok Mbiridnak tarem yebet kagolat Yawuri nap-nen sakwi tarem na panggo yosola-ge, o siri iri me woragwi nap kwarat-nen nunggwi mende sakit lak ma-nen it-net it mbek tak unpurak pem Yerusalem mbiriga-o.

⁵⁶Mbirigarig-e, Yesus ogore yogolar-e, Mbal Pem Nagawan ama-nen ndok wirigarig-e, it na kin wok kerak mbogolar-e: “Kir-e ngge perali-o? Nunggwi mende nggulok yu sakola, Yesus na lobok yuwa,lak, ngge-o?” luk yiga-o.

⁵⁷Nde, tepan omborak nagawan min Parisi nap min-nen wene wirik pogolar-e: “Yesus tenaguwok-nen ap misik nde at worasu enaru ala-ge, nit yak nindil lobok yurag-o” luk wene wirik piga-o.