Read Nduga YOANES 13 Bible Online

YOANES 13 - Nduga bible

YOANES 13

¹O Anggul Pandok Mbiridnak tarem yebet kagolat nggulok saguwokluk nene yogolar-e, Yesus na nggweyak ma yu me keya buruk, Eid eram mondok mbururag-e yawo-n panggo yij-o luk, aru yij-o. Aru yosola-ge, at winde nap nggweyak ma yu me woragwi iri enabuwa kaso na worok tak purak tarem-nen na it enabuwa-t kagaij-o.

²Kubu nggwe-ge Yesus at owosirak inmin totno mburu nunggukmu-ge, Simon ambara Yuras Ikariot na-nen Yesus iminep wusururak indi iri Sere-nen at indi rak pij-o.

³Yesus na Eid-nen yi mende ndi mende at inggem pidnak na aru, nde, Mbal Pem Nagawan eram-nen lobok yidnak me, tuguruk ijok lem Mbal Pem Nagawan eram-et mbururak na aru woraidnak me,

⁴mburu nunggwi sa-nen men luk yarik, amberam sum na yunggwirik puruk, yi sum misig-e at ubugulwak ngonoksa pij-o.

⁵Iri rak purug-e, yimbe misik arem yi kenangga pil nggurug-e, at owosirak na unuwok marosolat, at ubugulwak pem ngonok tak pidnak yi sum na bem unuwok korosolat kwaril mbirij-o.

⁶Iri kwaril kwaril Simon Peterus ebem wok yosoma, at-nen Yesus yak tosolar-e: “Nagawan Indo wa-e. Kat-nen an nuwok marurak yusu-a?” luk yak tij-o.

⁷Yak tosoloma-ge, Yesus-nen at yak tosolar-e: “An-nen kwarusu yu-ge yawo kar-e karu bug-et nde, abok-nen-e yenggerak pugun-o” luk yak tij-o.

⁸Iri yosoloma-ge, Peterus-nen at yak tosolar-e: “Kat-nen an nuwok marurag-e mondok lik laksa-o!” luk yosoloma-ge, Yesus-nen at yak tosolar-e: “An-nen kat mat kibigit lak ala-ge, kar-e an nimin kundig-e lag-o” luk yak tij-o.

⁹Yak tosoloma-ge, Simon Peterus-nen at yak tosolar-e: “Nagawan Indo wa-e. Iri ala-ge, an nuwok nak marurak pug-o! Are, ninggi min nanggul min-et marurag-o!” luk yak tij-o.

¹⁰Yosoloma-ge, Yesus-nen at yak tosolar-e: “Yi maridnak nab-e ebe pidsa mondok marak worasu me, at tuguruk marurag-e lag-o. Are, at ijok nak marurag-o. Kit pidsa marak nak worali-t nde, ap misiget perak nde marak pigit lak worasu-o” luk yij-o. (

¹¹“Kit pidsa marag-et nde, pidsa-ge lag-o” luk yid iri-ge at iminep wusururak nap iri-ge aru-t worasolat-nen yij-o.)

¹²It unuwok masa keya buruk, Yesus-nen at usum na yutluk, tuguruk ondolma kore luk-nen it kin wok onposolar-e: “An yanem kwat kinpigi iri-ge ebe-ge yenggerak pili, lak, lag-a?

¹³Kit-nen an yak norogolar-e: ‘Mul Nondoso Nap wa-e’ yogolat, ‘Nagawan Indo wa-e’ yogolat yili iri-ge ndemeret ndak ndag-et yak nitli-o.

¹⁴An-e kit-nen idnak Nagawan Indo min Mul Kondoso Nap min-et nde, kit kunuwog-e yawo marigi-o. Iri bem-e kit-nen na mondok kunuwok mat kerak mbogolat wolmer-o.

¹⁵An-nen kwat kinpigi yu-ge, kit-nen na an kwat kinpigi iri nggal ndak ndak kwarogolat worabokluk-nen mul kindigi-o.

¹⁶An-e ndemeret yak kundusu-o. Ndegel unpugwi nab-e at eid na teberak puruk, nggok-nen yusu-ge lag-o. Nde, wirik inpil mburugwi nab-e at ibil mbiridnak nap na teberak puruk nggok-nen yusu-ge lag-o.

¹⁷Nde, kit-nen nde wene ya kenaru luk, kwarugup ala-ge, kir-e kenalen worak yugub-o.

¹⁸Wene yu-ge kit pidsa yak kundusu-ge lag-o. An-nen len inpidnak nab-e an naru worasu-o. Alat nde, Mbal Pem Nagawan engga bem-nen yosolar-e: ‘An totno mburu naso nap-nen-e an isili rak nibij-o’ luk mbaridnak iri na ndak ndag-et kwat ma-o.

¹⁹Wene iri-ge awo kwat yigit lak ma-net yawo-ge yak kundusu-o. Nde, wene iri abok ebe kwat yosola-ge, kit-nen peragolar-e: ‘Kerisut na-ge ndemeret ar-er-o’ luk nebarabokluk-nen yak kundusu-o.

²⁰An-e ndemeret yak kundusu-o. Ap-nen-e an-nen wirik ibidnak nap wok ubusu iri-ge an-net wok nubusu-o. Nde, an wok nubusu iri-ge an wirik nibil lobok yidnak nap iri na-t wok ubusu-o” luk yak indij-o.

²¹Yesus-nen wene na yosoluk, at indi andi kwarat luk, nam-et kenggel ondosolar-e: “An-e ndemeret yak kundusu-o. An niminep wusururak nab-e kit kennggendumu ap misik worasur-o” luk yij-o.

²²Yosoloma-ge, at-nen imin yid nap iri-ge enaru buk me, at owosirag-e wendet luk, nerengen ma kerengen ma mbiga-o.

²³Yesus-nen indi kundik abuwa worak nab-e Yesus eralu koreyak woragaij-o.

²⁴Worala-ge, Simon Peterus-nen ap iri imin inggi warok pem yak tosolar-e: “ ‘Kat yigen iri-ge ta imin yigen-o?’ luk kin wok ibi-o” luk yak tij-o.

²⁵Iri ala-ge, at iri-nen Yesus eram panggo lasolat-nen at kin wok obosolar-e: “Nagawan Indo wa-e. Kat yigen iri-ge ta imin yigen-o?” luk yij-o.

²⁶Yosoloma-ge, Yesus-nen at yak tosolar-e: “Ap iri-ge an-nen oroti mburu mbi amburu masa wok timin nap irir-o” yuruk, oroti mburu mbarak mbi waga amburu masa Simon Ikariot ambara Yuras irit wok tij-o.

²⁷Wok tosoloma, Yuras-nen oroti mburu na tenagosoloma, ereya na-net Sere at arem nggwij-o. Nde, Yesus-nen at yak tosolar-e: “Kat-nen kwarurak peraigen-e ndag-et nak kwaril mbiri-o” luk yak tij-o.

²⁸(Alat nde, iri me mburu nonggolat woraiga nap ap misiger-o luk tet-nen-e: “Noluk-nen Yesus-nen-e ap iri iri yak tusu-o?” luk yenggerak pigit lak yiga-o.

²⁹Yuras iri-ge it ontol tena woraso nap me, it erep inndi-nen peragolar-e: “Yesus-nen-e nunggwi mende nggulok sagili yu amanggim nunggwi mende mbi onggo pil mburuwakluk-nen yak tusu, lak?” Are, “Insilobulo lak nap tol erep tembesa wok unduwakluk-nen yusu, lak?” luk peraiga-o.)

³⁰Iri peragola-ge, Yuras na-ge oroti mburu na wanuruk, ereya na-net wulungsa ndag-et mbirij-o. Iri tarem-e kubu nggwe-o.

³¹Yuras na mborosola karuk, Yesus-nen yosolar-e: “Yawo-ge Ap Ambara an kek tak nobogolat, an nebem Mbal Pem Nagawan na kek tak obogolat yili-o.

³²Nde, an nebem-nen Mbal Pem Nagawan kek tak obogola-ge, Mbal Pem Nagawan-nen na at ondomok ebem-net Ap Ambara an na kek tak nubuwa-o. Yanem-et ndag-et nak kek tak nubuwa-o.

³³Nilirak wa-e. Kit kinmin-e we siyag-et nak woramin-o. Ap nogore yubug-et nde, an-nen Yawuri nap yak indigi nggal, kit na irit yak kundusu-o. An mbirimin sa-ge kit-nen wok momtag-e meya-o.

³⁴An-nen-e imiri mbarak pidnak wene ngget yu wok kundusu-o: Nabuwa kabuwa nak kagolat wolmer-o. An-nen kit kenabuwa kaso nggal kit-nen na nabuwa kabuwa irit kagolat wolmer-o.

³⁵Kit-nen-e nabuwa kabuwa nak kagola-ge, ap pidsa-nen-e kir-e an nowosirak-nen yili-o luk yenggerak kiniyujwa-o” luk yij-o.

³⁶Yosoloma-ge, Simon Peterus-nen at kin wok obosolar-e: “Nagawan Indo wa-e. Kar-e ngge me mburugun-o?” luk yosoloma, Yesus-nen at yak tosolar-e: “An mbirimin sa-ge kar-e yawo-nen an nimin mbururag-e meya-t nde, abok-nen perak nimbirik mburugun-o” luk yak tij-o.

³⁷Yak tosoloma-ge, Peterus-nen at yak tosolar-e: “Nagawan Indo wa-e. An-e yawo-nen kat kimin mbururag-e meya-o yigen iri-ge noluk-nen yigen-o? An-e kat kamanggim wat momtag-e nindingen-o!” luk yak tij-o.

³⁸Yak tosoloma-ge, Yesus-nen at yak tosolar-e: “An namanggim wat momtak ob-er-o yigen-a? An-e ndemeret yak kurusu-o. Towe wam kusi ene awo yigit lak worala-ge, kat kenan pem-et ‘Yesus-e an-e naru bug-o’ yugun-o” luk yak tij-o.