Read Nduga YOANES 14 Bible Online

YOANES 14 - Nduga bible

YOANES 14

¹Yuruk, Yesus-nen yosolar-e; “Kit kinndi kabak yili-ge meyog-o. Kinndi-ge Mbal Pem Nagawan ebem angin tubu yogolar-e, an nebem na kinndi angin tubu yer-o.

²An Neid ama-ge wolmomtak sa-ge kwarat worasu me, an-e kit kondoro konil mburusu-o. Wene yu-ge ebe lak yurak nggal-e, an-e yak kendelep pug-o.

³Nde, an mbirimindik, kit kondoro kona keya buruk, an woramin sa iri me kit na iri me-t worabokluk, tuguruk kit wok kinpil lobok yimin-o.

⁴Nde, an mbirimin sa iri tula-ge kir-e kenaru-o” luk yij-o.

⁵Yosoloma-ge, Tomas-nen Yesus yak tosolar-e: “Nagawan Indo wa-e. Kat mburugun sa nir-e nenaru buk me, nggesa-nen iri me mbururak tula-ge nenaru mul-o?” luk yak tij-o.

⁶Yak tosoloma-ge, Yesus-nen at yak tosolar-e: “An-e Mbal Pem Nagawan enaru yugwi tula min ndemeret wene min unlug-et wolmomtak elem min-nen yusu-o. An nebem nggwe mbirigit lak-nen-e ap misiger-o luk tet an Neid eram wok momtag-e meya-o.

⁷Nde, kit-nen nde an kenaru nggal-nen-e ndemeret an Neid na kenaru yeleb-o. Alat nde, yawo-nen perak at kenaru yogolat, kagolat yili-o” luk yij-o.

⁸Yosoloma-ge, Pilipus-nen Yesus yak tosolar-e: “Nagawan Indo wa-e. Ninndi yamuksa wolmok-nen kat Keid iri-ge mirik ninpi-o” luk yij-o.

⁹Yosoloma-ge, Yesus-nen at yak tosolar-e: “Pilipus wa-e. An-e pempa kit kinmin worasu-t nde, kar-e yenggerak neyasu bug-a? An neyali nap-nen-e an Neid iri kali-t nde, noluk-nen kat-nen-e: ‘Kat Keid iri mirik ninpi-o’ luk yigen-o?

¹⁰An-e Neid arem woralat, nde, Neid na an narem woralat yusu iri-ge kar-e kindi angin tubu yusu bug-a? An-nen yak kundusu wene-ge an nindi-n pidnag-et yak kundusu bug-o. Are, an Neij-e an narem worasu iri-net ereba pidsa-ge kwarusu-o.

¹¹An-e Neid arem woralat, nde, Neid na an narem woralat yusu-o luk kinndi angin tubu yer-o. Nde, iri momtag-e meya ala-ge, an-nen kwarusu mende karuk iri bem-et kinndi angin tubu yer-o.

¹²An-e ndemeret yak kundusu-o. An nebem indi angin tubu yuwa nap-nen-e an-nen kwaroso mende pidsa at-nen na kwaruwa-o. Nde, an-e Neid eram mbirimin me, an-nen kwaroso-ge marik nggal-o. At-nen-e nggulok mende-t kwaruwa-o.

¹³Nde, an nebem-nen Neid kek tak puwakluk, an nunu bem kit-nen nggi yugub mende-ge pidsa kwat kinpimin-o.

¹⁴Nde, kit-nen-e an nunu bem yi mende ndi mende nggi yak norogola-ge, obok kwat kinpimin-o” luk yij-o.

¹⁵Yurug-e, “Kit-nen nde an nabuwa kagolar-e, an-nen yidnak yidnak nak kwarogolat wolmer-o.

¹⁶Nde, an-nen Neid nggi yak tumu-ge, kit kinmin pem-et woralik nalik makluk, Yongga Kundurak Nap mbi wok kunduwa-o.

¹⁷Konak Indi iri-ge ndemeret Mbal Pem Nagawan Mirik Konposo irit wok kunduwa-o. Nde, nggweyak ma nap-nen at kagolat, enaru yogolat yurak meya me, at wok uburag-e meya-o. Alat nde, ar-e kit kinmin worasolat, kit kenarem worasolat yusu me, ar-e kir-e kenaru-o.

¹⁸An-e li mul nggal keya kinpimin pug-o. Kendam lobok yimin-o.

¹⁹Siyag-et nak worarug-e, nggweyak ma nap-nen-e an niyujwa bug-et nde, kit-nen perak nde an neyagub-o. Nde, an-e nurug-et worasu me, kit na irit kunlug-et woragub-o.

²⁰Iri tarem wok yosola-ge, an-e Neid arem woralat, kit na an narem woragolat, an na kit kenarem woralat yusu-o luk kenaru yugub-o.

²¹An-nen yidnak yidnak nak wanuruk, irit kwaruwa nab-e, an nabuwa kaso nab-e irir-o. Nde, an Neid-nen-e an nabuwa kasu nap na abuwa kujwa-o. An-nen na at abuwa kasolat, an-net an mirik obosolat yimin-o” luk yij-o.

²²Iri yosola-ge, Yuras Ikariot na lag-o. Are, Yuras misik-nen at yak tosolar-e: “Nagawan Indo wa-e. Kat-net kat nggweyak ma nap mirik inpigit lak, nit nak mirik nunpurak yigen iri-ge noluk-nen yigen-o?” luk yij-o.

²³Yosoloma-ge, Yesus-nen at yak tosolar-e: “An nabuwa kaso nap-nen-e an-nen yidnak yidnak nak kwaruwa-o. An Neid-nen-e at abuwa kasolat, nde, an Neid nenmbereg-e at eram lobok yulndik, at imin wulmul-o.

²⁴Nde, an nabuwa kaso buk nap-nen-e an-nen yidnak yidnak kwaroso bug-o. Nde, wene yu yak kindigi yu-ge an-nen yidnak wene-ge lag-o. Are, an wirik nibil lobok yidnak nap Neid iri-nen yidnak wene-nen yusu-o.

²⁵Wene yu-ge an-e kit kinmin worasolat tarem ya-net yak kundusu-o.

²⁶Alat nde, Yongga Kundurak Nap iri-ge an nunu bem an Neid-nen wirik ibil lobok yuwa Konak Indi na-nen-e yi mende ndi mende pidsa mirik konposolat, an-nen yak kindidnak wene pidsa yeberak konposolat ma-o.

²⁷Yamuksa woragwi elem-e an-nen kit kenpem keya busu-o. Nde, yamuksa woragwi elem iri wok kundusu iri-ge an-nen idnak irit wok kundusu-o. Nde, iri-ge nggweyak ma nap-nen yamuksa woragwi elem wok undugwi nggal-e lag-o. Iri bem-e, kit kinndi kabak yogolat, kwiye kagolat yurak pug-o.

²⁸An-nen yak kondosolar-e: ‘An-e mbirimin-et nde, tuguruk kendam lobok yimin-o’ yak kondosola, kuligep nar-o. Nde, kir-e an nabuwa kagolat nggal-e, an Neij-e nggulok terak minig-et me, at Eid eram mburusu-o luk kenalen kaleb-o.

²⁹Nde, wene yawo yu-ge pidsa awo kwarigit lak ma-net yak kundusu yu-ge, iri ebe kwat yosola-ge, kit yenggerak pobokluk-nen yak kundusu-o.

³⁰Nggweyak yu tena woraso na panggo yusu me, wene mor-et yak kindimin pug-o. At iri-ge an nimin ndak ndag-e lag-o, teberak-net yusu-o.

³¹Alat nde, nggweyak ma nap pidsa-nen-e an-nen Neid abuwa kasu-o luk enaru makluk, an Neid-nen yak niridnak wene pidsa irit kwaroso-o. Yu me-nen mburuwog-o. Men mer-o” luk yak indij-o.