Read Nduga YOANES 16 Bible Online

YOANES 16 - Nduga bible

YOANES 16

¹An-nen wene yu yak kindigi yu-ge kit kinndi angin tubu yidnak keya bugup naru-nen yak kindigi-o.

²Nde, tepan yugwi ma-nen abu abu wirik kunpuwa-o. Nde, kit kunduwa nap-nen peragolar-e: ‘An-e Mbal Pem Nagawan eyabu wanusu-o’ luk yurak tarem-e panggo yuwa-o.

³It-nen iri kwat kunpuwa iri-ge an Neid nenmberek enaru buk-nen kwat kunpuwa-o.

⁴Alat nde, wene yu yak kindigi yu-ge, iri kwat kunpurak tarem wok yosola-ge, ‘E! Iri yak nindid nar-o’ luk yeberak worabok-nen yak kindigi-o. An-e kit kinmin worasolat me, wene yu-ge nandug-et yak kindigit lak woragi-o.

⁵Nde yawo an-e wirik nibil lobok yidnak nap na eram mburusu-t nde, kit misik-nen-e: ‘Kar-e ngge mburusu-o?’ luk kin wok nibili bug-o.

⁶Nde, wene yu yak kindigi bem-e, kit kinndi puru pera yili-o.

⁷Alat nde, an-e ndemeret yak kundusu-o. An mbirimin iri-ge, kit konak tak kunpurak pem mbirimin-o. An mbirigit lak yimin nggal-e, Yongga Kundurak Nap na-ge kit kendam lobok yuwa bug-o. Alat nde, an mbirimin iri-nen at na-ge kit kendam wirik ibil mbuwamin-o.

⁸Nde, at iri na lobok yuwarig-e, nggweyak ma nap iri mirik onposolar-e, it meya yugwi elem min lud tak nak kwarugwi elem min Mbal Pem Nagawan-nen ap enpem wene mbarurak min ebe-ge iri nggal-o luk mirik unpuwa-o.

⁹Ir-e an nebem inndi angin tubu yugwi buk iri-ge meya yugwi elem-e irir-o luk mirik unpuwa-o.

¹⁰An-e Neid eram mburumu-ge, kri-e an neyagit lak yugup me, an-e lud tak nak kwarugwi elem-nen yusu-o luk mirik unpuwa-o.

¹¹Nde, nggweyak tena woraso na-ge abu ebem wene mbarak pidnak worasu me, Mbal Pem Nagawan-nen-e ap enpem wene mbarurag-e abu tel korarik worasu-o luk mirik unpuwa-o.

¹²An-nen yak kundurak wene-ge kwarat worasu-t nde, yawo kit-nen wanurag-e meya-o.

¹³Alat nde, Konak Indi na lobok yuwarig-e, lud tag-et Mbal Pem Nagawan mirik konposolar-e, lud tak nak kwarugwi mende pidsa mirik kunpuwa-o. Nde, at indi-n pidnak wene-ge yak kunduwa bug-o. Are, at-nen kulidnak wene nak yak kondosolat, abok-nen kwat momtak wene nde yak kondosolat ma-o.

¹⁴At iri na-nen an nunu kek tak posolar-e, an-nen yidnak wene nak kamboksa kit yak kondosolat wolma-o.

¹⁵An Neid eram worasu mende pidsa-ge an narengge-nen yusu-o. Iri ala-nen Konak Indi-nen yak kunduwa iri-ge an-nen yidnak wene kamboksa kit yak kunduwa-o luk yak kindigi-o” luk yij-o.

¹⁶Yuruk, at-nen yosolar-e: “Nde, siyag-et nak worarug-e, an neyagup pug-o. Iri luk, siyag-et nak woraruk, an neyagub-o” luk yij-o.

¹⁷Yosoloma-ge, at owosirak erep-nen it nak yak kerak mbogolar-e: “ ‘Siyag-et nak worarug-e, an neyagup pug-o. Iri luk, siyag-et nak woraruk, an neyagub-o. Nde, Neid eram mbirimin-o’ luk yak nindid iri-ge, ngge yosolat-nen yij-o?

¹⁸Nde, ‘Siyag-et nak worarug-o’ yid yu-ge nir-e yenggerak pili bug-o. Ngge yosolat-nen yid kali?” luk yiga-o.

¹⁹Yogolikma-ge, it-nen at kin wok uburak peraidnak na yenggerak karuk, Yesus-nen it yak ondosolar-e: “ ‘Siyag-et nak worarug-e an neyagup pug-o. Iri luk, siyag-et nak woraruk, an neyagup-o’ luk yak kindigi na bem kir-e kin wok kerak mbili-a?

²⁰An-e ndemeret yak kundusu-o. Kit-nen-e yip togolat, yip kondok lud mbogolat yugub-o. Nde, nggweyak ma nap-nen-o enalen kujwa-o. Nde, kit kinndi puru pera yugup na-t nde, kinndi puru pera yugup na nden yaga kenalen yugub-o.

²¹Kwe mbi ela ndageyekluk woralar-e, yane wururak tarem panggo yosolar-e, kwe na andi bandi kaso-t nde, ela na ndaguruk nggwe-ge ‘Nggweyak ma yu womomtak pem-e la mbi ndaki-o’ luk alen kasolar-e, andi bandi kaidnak na mid tak poso-o.

²²Iri nggal, kit yawo-ge kinndi puru pera yili-t nde, abok kendam wok yimin nggal-e, kenalin kenalen kwarat kamin-o. Nde, kenalen kagwi iri-ge ap misiger-o luk tet-nen kit kinndi arem-nen mengga wanurag-e meya-o.

²³Nde, iri tarem wok yosola-ge, kir-e yi mende ndi mende mbi nggi yak nurugup pug-o. An-e ndemeret yak kundusu-o. An nunu bem an Neid nggi yak tugup mende-ge wog-et kunduwa-o.

²⁴Kir-e nanduk-net an nunu bem yi mende ndi mende mbi nggi yigit lak worali-o. Kit kenalen na iminep mbal maklug-e, nggi yer-o. Nde, nggi yogola-ge, wanugub-er-o” luk yij-o.

²⁵Yuruk, “Wene yak kundusu yeba-ge nden karuk wene bem yak kundusu-t nde, nden karuk wene bem keya buruk, an Neid owene-ge nam-et nak yak kundurak tarem wok ma-o.

²⁶Wok yosola-ge, an nunu bem-et nggi yak tugub-o. Nde, an yak kendeyeg-o. Kit kenmanggim an Neid na nggi yak timin pug-o.

²⁷Nde, iri yigi iri-ge, Neid at-net kit kenabuwa kaso-o. Nde, kit kenabuwa kaso iri-ge, kit-nen an nabuwa kagolat, an-e Mbal Pem Nagawan eram-nen lobok yidnak nab-o luk yebet neyagwi iri bem-net kenabuwa kaso-o.

²⁸An Neid eram-nen lobok yigirig-e, nggweyak ma yu me ngguwagi-o. Yawo nggweyak ma yu keya buruk, tuguruk Neid eram mbirimin-o” luk yij-o.

²⁹Yosoloma-ge, at owosirak-nen at yak togolar-e: “Eyo. Yawo-nen perak nde, kat-nen-e nden karuk wene bem yak nindigit lak, nam-et nak yak nindigen-o.

³⁰Kar-e yi wene ndi wene pidsa karu-o luk yawo nenaru yili-o. Ap misik-nen kin wok kuburag-e meya-o. Iri bem-e, kar-e Mbal Pem Nagawan eram-nen lobok yidnak nap-nen yusu-o luk ninndi angin tubu yige-o” luk yiga-o.

³¹Yogolikma-ge, Yesus-nen it yak ondosolar-e: “Yawo-nen perak kinndi angin tubu yigeb-a?

³²Li yu-ge wa-e! Kit pidsa kenma lombok ndibi ndi rak konpogola, an narig-et nak keya nuburak tarem-e panggo yuwa-t nde, yawo wok yij-o. Alat nde, an Neij-e an nimin-et woraso me, an narig-et nak woramin pug-o.

³³An wene yu yak kindigi yu-ge kir-e an nimin kundik woragolat-nen kinndi yek tag-et worabok-nen yak kindigi-o. Kir-e nggweyak ma yu me woragolar-e, lel mberel kunpuwa-t nde, kinndi tugup lak wolmer-o! Nggweyak ma yu me-ge an-nen mul wosa urugwe nggwe rak pigi-o!” luk yij-o.