Read Nduga YOANES 17 Bible Online

YOANES 17 - Nduga bible

YOANES 17

¹Yesus-nen wene na yurug-e, at erengen mbal arogo lik karuk-nen yosolar-e: “Neid wa-e. An nururak tarem-e yawo-n panggo yij-o. Kat Kambara an-nen kat kek tak kubuwaklug-e, kat-nen-e Kambara an kek tak nibi-o.

²Kat-nen lena wok niridnak nap iri-ge unlug-et woralik nalik elem an-nen wok unduwakluk, ki nap oboksa tena unpuruk wolmomtak amawi-ge an ninggem pigen-o.

³Unlug-et pem-et woralik nalik momtak elem-e ap-nen Mbal Pem Nagawan Lud tak Nak Kwaroso kat misiget nak enaru yogolat, kat wirik ibil lobok yigen nap Yesus Kerisut na enaru yogolat yugwi irir-o.

⁴Nggweyak ma yu me-nen kat kek tak kobosolar-e, kat-nen nebem pigen yabu na woroksa wanigi-o.

⁵Neid wa-e! Nggweyak yu ndak wirigit lak ma-nen kat kimin woralat an nunu kek tak woraso iri na bem yawo-nen kat kinmbiri bem an nunu kek tak pi-o.

⁶Nggweyak ma nap ennggenggerak-nen lena wok nirigen nap pidsa inmbiri bem-e kat mirik inpigi-o. It iri-ge kat karengge woraigen-et nde, wok nirigen-o. It-nen-e kat-nen yidnak yidnak nak yugwi-o.

⁷Nde, yawo-ge kat-nen wok niridnak mende pidsa-ge kat keram-nen lobok yidnak-nen yusu-o luk ir-e enaru yili-o.

⁸Nde, kat-nen nebem pigen wene-ge an-nen it yak ondosola, waniga-o. Wanogolar-e, an-e ndemeret kat keram-nen lobok yidnak irit enaru yogolat, an-e kat wirik nibil lobok yigen-o luk neberali-o.

⁹It enmanggim-et an-e tepan yusu-o. Nggweyak ma nap pidsa enmanggim an-e tepan yusu bug-et nde, kat-nen wok nirigen nap iri-ge kat karengge me, it enmanggim-et tepan yusu-o.

¹⁰An narengge pidsa-ge kat karengge-nen yusu-o. Nde, kat karengge pidsa-ge an narengge-nen yusu-o. Nde, it enpem-nen an kek tak nibili-o.

¹¹Yawo an-e kat keram lobok yekluk yusu-o. An-e nggweyak ma yu me woramin pug-et nde, ir-e nggweyak ma worali-o. Konak nak Woraso Neid wa-e. Nit nenmberek misiget nak worali nggal, it na misiget nak makluk, an nebem pigen kunu, kat kunu iri bem-nen it na kwara ndegel onposolat wolmin-o.

¹²An-e it inmin woralar-e, an wok nirigen kunu iri bem-et ndegel onposolat woragi-o. Nde, an-nen-e it yik eneyarok worala-ge, misiger-o luk tet pul yigit lag-o. Are, Mbal Pem Nagawan engga bem mbaridnak na ndak ndak makluk, ap misiget nak pul yij-o.

¹³Nde, yawo an-e kat keram lobok yekluk yusu-o. An-e nggweyak ma yu me we luru woralat-nen wene yusu yu-ge, an nalen-e it inndi arem kobong makluk-nen yusu-o.

¹⁴An-e kat-nen yidnak wene yak indigi-o. Iri bem-e, an-e nggweyak ma nab-e lag-o. Iri nggal-et it na nggweyak ma nab-e lak ala karuk, nggweyak ma nap-nen-e it insili rak inpiga-o.

¹⁵An-nen-e: ‘Nggweyak ma yu me wolma naru, wok inpi-o’ luk kemengen mbarusu bug-et nde, ‘Meya Yoso Nap-nen it meya rak unpuwa naru, kwara untum wiri-o’ luk kemengen mbarusu-o.

¹⁶An-e nggweyak ma nab-e lag-o. Iri nggal, it na nggweyak ma nab-e lag-o.

¹⁷Ndemeret wene bem-net ir-e lena kat karengge rak inpi-o. Kat-nen yidnak wene-ge ndemeret wene-nen yusu-o.

¹⁸Kat-nen-e ki nap ennggendumu wirik nibil lobok yigen nggal, an-nen na it ki nap ennggendumu wirik inpigi-o.

¹⁹Ir-e ndemeret wene bem lena kat karengge makluk, it enmanggim an-e kat karengge teyek-nen an-e an-net len yigi-o.

²⁰It enarik enmanggim nak an-e tepan yusu bug-o. Are, it-nen yidnak wene kuluruk an nebem inndi angin tubu yuwa nap enmanggim min-et tepan yusu-o.

²¹It oboksa lambuksa misiget mak-nen an-e it enmanggim tepan yusu-o. Neid wa-e. Kar-e an narem woralat, nde, an-e kat karem woralat yili nggal, iri nggal ir-e nit nenarem wolmakluk-nen yigi-o. Iri yuwama-ge, nggweyak ma nap-nen-e an-e kat-nen wirik nibil lobok yij-o luk inndi angin tubu yuwakluk-nen tepan yusu-o.

²²Nit nenmbereg-e misiget nak worali nggal, it na iri nggal-et misiget wolmakluk, kat-nen an kek tak nibigen nggal, it na kek tak inpigi-o.

²³Nde, it na-ge mondok misiget maklug-e, an-e it enarem woralat, nde, kar-e an narem worasola-ge, nggweyak ma nap-nen-e kat-nen an wirik nibil lobok yij-o luk enaru yogolat, kat-nen an nabuwa kaso nggal, it na enabuwa kasu-o luk enaru yogolat ma-o.

²⁴Neid wa-e. An lena wok nirigen nab-e an kek tak woraso na kujwakluk, an woramin sa it na iri me totno wolmomtak perasu-o. Nde, an-nen kek tak woraso iri-ge nggweyak yu awo ndak wirigit lak ma, kar-e an nabuwa kasolar-e, wok nirigen nar-o.

²⁵Lud tak nak Kwaroso Neid wa-e. Nggweyak ma nap-nen-e kat enaru buk worali-t nde, an perak nde kat naru-o. Nde, kat-nen an wirik nibil lobok yij-o luk it yu-nen perak nde enaru-o.

²⁶Kat-nen an nabuwa kaso elem na it enarem worasolat, an na it enarem worasolat makluk, an-nen kat kunu mirik onposo-o. Nde, iri nggal-et kat kunu-ge mirik onposolat woramin-o” luk yij-o.