Read Nduga YOANES 2 Bible Online

YOANES 2 - Nduga bible

YOANES 2

¹Mberen nene lug-e, Nggalilea wi-nen o siri Kana iri me-ge kwe wok kerak mbogola, Yesus ija na iri me-t woragaij-o.

²Nde, kwe wanosolat nunggwi mende sakola tarem na-ge Yesus min at owosirak inmin yonggo inpiga-o.

³Anggut engen amburu pidsa nuruk, lak ala karug-e, Yesus ija-nen at yak tosolar-e: “Anggut engen amburu lak agaij-o” luk yak tij-o.

⁴Yak tosoloma-ge, Yesus-nen at ija yak tosolar-e: “Kwe yu-ge wa-e. Kat-nen-e: ‘Iri nggal kwari-o’ luk yak nururak pug-o. An-nen nam tak purak tarem-e ndak yigit lak awo worasu-o” luk yak tij-o.

⁵Yak tosoloma-ge, Yesus ija-nen ndegel unpugwi nap na yak ondosolar-e: “At-nen: ‘Iri kwarer-o’ yak kunduwa mende-ge irit kwarugup na-e” luk yak indij-o.

⁶Nde, kerep yimbe enam-e iri me woragaij-o. Nde, yimbe ereya-ge Yawuri nap-nen kwarugwi kwarogolat enaboro maruwakluk lid lud tak pidnag-o. Nde, yimbe ereya na-ge nggulok me, misik arem-e yi kenangga yebet tak pogolar-e, yimbe marik pem-nen-e seratus pem nggal kenangga pil nggugwi-o (seratus liter).

⁷Nde, Yesus-nen ndegel unpugwi nap na yak ondosolar-e: “Yimbe ya-ge kobong tak per-o” luk yak indij-o. Yosoloma, it-nen-e yimbe na kenangga kobong tak piga-o.

⁸Kobong tak pogolikma-ge, Yesus-nen it yak ondosolar-e: “Yawo-ge yi na kenangga sagaid winde iri na wok til mberer-o” luk yak ondosoloma-ge, yi na kenangga wok til mbiriga-o.

⁹Wok togolikma-ge, sagaid winde na-nen we yi-t nde, anggut engen amburu kwat yid yi iri na undu wal karug-e, (At iri na-ge anggut engen amburu iri kenanggidnag-e aru bug-et woragaij-et nde, ndegel unpugwi nap kenanggiga ereya na nak-nen enaru woraiga-o.) sagaid winde na-nen kwe wanurak nap na wene mbo uburuk-nen

¹⁰yak tosolar-e: “Ap pidsa-nen-e anggut engen amburu undu konak mende-ge nandug-et tembesa mak unduruk, inmbitsa nuruk woragola-nen we meya nggal-e abok nggwe-nen tumburugwi-o. Alat nde, anggut engen amburu undu konak yu-ge kar-e parugu woraigendik, yanem-et mak nundusu-o!” luk yak tij-o.

¹¹Yesus na-ge at-nen kwiye worak mende tel korosolar-e, Nggalilea wi o siri Kana iri me-nen tel kwirij-o. Nde, kwiye worak mende iri kwarid iri bem-nen at-nen kek tak woraso nam tak posola, at owosirag-e at ebem inndi angin tubu yiga-o.

¹²Iri lug-e, Yesus na-ge ija min owottak min at imin nugwi nap min inmin luk, Kaperenaum wi mbiriga-o. Mbirigarik, o iri me woragolar-e, kenan nggal ereba-t nene yiga-o.

¹³Yawuri nap-nen O Anggul Pandok Mbiridnak tarem yebet kagwi na panggo yosola-ge, Yesus na-ge Yerusalem mbirij-o.

¹⁴Mberarik, Mbal Pem Nagawan ama na nggwidnggal-e, sapi wam min lomba wam min towe nggwende min onggo wanugwi nap min uwang nden penden yugwi nap min koreyak worakmu, eneyagaij-o.

¹⁵Iri kwarogola eneyasolug-e, kere linggamburok kona keya burug-e, lomba wam min sapi wam min pik paksa Mbal Pem Nagawan ama-nen mbepme wirik pij-o. Iri luk, uwang nden penden yugwi ondoro na nden yaga keya bosola-ge, tol ereba na-ge nggilara nggweyak ma nari wari yij-o.

¹⁶Iri lug-e, at-nen towe nggwende onggo wanugwi nap na yak ondosolar-e: “Yeba pidsa waruk mberer-o! An Neid ama yu-ge onggo wanogolat, onggo pogolat yugwi sa nggal tak pili-ge meyog-o!” luk yak indij-o.

¹⁷Iri yosola-ge, at owosirak-nen-e “Mbal Pem Nagawan wa-e. Kat kuwi abuwa kasolar-e, an nindi arem-e kan pago pidnak nggal nggulog-et kasu-o” luk engga wene Mbal Pem Nagawan engga bem mbaridnak iri na nde yebet kaiga-o.

¹⁸Iri kwarosola karuk, Yawuri nap-nen Yesus met nggal pogolar-e: “Yu kwarigen yu-ge, iri kwarurak amawi-ge kat kebem pidnak nde ala-ge, nit yenggerak kujwok-nen kwiye worak mende mbi kwari-o” luk yiga-o.

¹⁹Yogolikma-ge, Yesus-nen it yak ondosolar-e: “Mbal Pem Nagawan uwi yu-ge mijarak pugupmu-ge, o yu ondolma worosolar-e, kenan pem nak wirimin-o” luk yij-o.

²⁰Yosoloma-ge, Yawuri nap na-nen yogolar-e: “Abuga! Mbal Pem Nagawan uwi yu worogolar-e, olengen empat pulu enam (46) woraiga-t nde, kat-nen-e: ‘Worosolar-e, mberen nak nene yimin-o’ yigen-a?” luk yiga-o.

²¹Alat nde, Yesus-nen-e: “Mbal Pem Nagawan uwi-o” yid iri-ge at ebe min-et yij-o.

²²Nde, at na wat luk, uruk yosoloma karuk, at owosirak-nen-e “Ondolma worosolar-e, mberen-et nak nene yimin-o” luk yid na-ge yebet kaiga-o. Yebet karuk, Mbal Pem Nagawan engga bem-nen mbaridnak na min Yesus-nen yidnak wene min ebem inndi angin tubu yiga-o.

²³Nde, O Anggul Pandok Mbiridnak tarem iri na yebet kagolat Yesus na Yerusalem worasola-ge, Yesus-nen kwiye worak mende kwarosola karug-e, ap kwarat-nen at ebem inndi angin tubu yiga-o.

²⁴Alat nde, Yesus na-ge ap pidsa enarem kaso me, at-nen-e te rak inpij-o.

²⁵At-nen-e ap inndi arem-nen peragwi mende oboksa aru me, ap-nen-e: “Ki nap inndi arem-e iri nggal peragwi-o” luk at yak turag-e lag-o.