Read Nduga YOANES 21 Bible Online

YOANES 21 - Nduga bible

YOANES 21

¹Iri rak purug-e, Tiberias Koma bem—nen Yesus-e at owosirak inmbiri bem tuguruk nam yij-o. Nde, nam yosolar-e, yu nggal kwarij-o.

²Misik tarem-e Simon Peterus min Tomas na unu misig-e Kambara Nderak na min Nggalilea nggweyak pem o Kana nap Natanael na min Sebendeus ilirak na min Yesus owosirak mberen mbi min-e lambuksa ndok worak woraiga-o.

³Woragolar-e, Simon Peterus-nen it erep yu na yak ondosolar-e: “An-e keyane wil mburusu-o” luk yak ondosoloma-ge, it-nen yak togolar-e: “Nit na totno-t mburuwog-o” luk yiga-o. Yurug-e, it na mbirigarik, e koma arem ngguruk, kubu aptusa keyane kore yiga-t nde, misik mbi wanigir-e lag-o.

⁴Nde, kup o nda yosola-ge, Yesus-e yi koma eyak pem mendak worala-t nde, at owosirak-nen-e iri-ge Yesus-nen yusu-o luk yenggerak ibigit lag-o.

⁵Nde, at-nen it yak ondosolar-e: “Nowosirak wa-e. Keyane mbi wanigep, lak, lag-a?” luk yak ondosoloma-ge, it-nen at yak togolar-e: “Mbi wanigit lag-o” luk yak tiga-o.

⁶Yak togolikma-ge, at-nen it yak ondosolar-e: “Keyane wanugwi sum iri-ge kininggi kigit ambigit nggwe e koma eralu mberak per-o. Mberak pogola-ge, keyane-ge wanugub-o” luk yak indij-o. Iri yosoloma-ge, it-nen sum na mberak piganggal-e, keyane mondok kwarat yat yidnak me, sum na lit yaga e koma arem pil nggurak na meya agaij-o.

⁷Iri alama karuk, Yesus imin noso nap indi kundik na-nen Peterus yak tosolar-e: “Iri-ge Nagawan Indo-o!” luk yak tij-o. Nde, “Nagawan Indo-o” yid na kulurug-e, Simon Peterus na sum yunggurik we woragaid na sum na yutluk, kwid mbok yi ma nggwij-o.

⁸Nde, Yesus owosirak erep na-ge yi koma eyak pem koroga seratus meter nggal woraidnak me, e koma bem mborogolar-e, keyane kobongsa yaridnak sum na lit kuruk kuruk eyak pem mbiriga-o.

⁹Mbirigarik, yi koma eyak pem wok yogolat-nen yik kaiganggal-e, kan engen pem keyane min oroti mburu min wora kaiga-o.

¹⁰Nde, Yesus-nen it yak ondosolar-e: “Yawo wanigep keyane siyak mbi waruk lobok yer-o” luk yak indij-o.

¹¹Yak ondosoloma-ge, Simon Peterus na-ge e koma arem nggurug-e, sum na yi koma eyak pem lit yaga pil wagaij-o. Nde, sum iri arem-e keyane yok nggok nak lambuksa wonasa-ge seratus lima pulu tiga-t (153) nde, keyane wanugwi sum na-ge ndelep yigit lag-o.

¹²Iri luk, Yesus-nen it yak ondosolar-e: “Nunggwi mende nil lobok yer-o” luk yak ondosoloma, it inndi arem-nen-e yu-ge ndemeret Nagawan Indo-nen yusu-o luk enaru me, it-nen-e: “kar-e ta-o?” luk, kin wok uburag-e kwiye-nen larok yiga-o.

¹³Alama-ge, Yesus-nen oroti mburu na wanuruk, it endam panggosa mborosolar-e, it tembesa mak indij-o. Iri nggal-et keyane na tembesa mak indij-o.

¹⁴Iri kwarid iri-ge Yesus na wat yidnak ennggendumu-nen uruk luk, kenan pem tak posolat at owosirak inmbiri bem nam luk-nen kwarij-o.

¹⁵Nunggwi mende na nonggolug-e, Yesus-nen Simon Peterus na yak tosolar-e: “Yona ambara Simon wa-e. Kat kanggamirak-nen-e an nabuwa te nggal kali-t nde, kat-nen-e an nabuwa-ge kwarat kasu, lak?” luk yak tosoloma-ge, at-nen yosolar-e: “Eyo. Nagawan Indo wa-e. An-nen kat kabuwa kaso iri-ge kar-e karu-o” luk yij-o. Yosoloma-ge, Yesus-ne at yak tosolar-e: “Iri ala-ge, an nolomba wam marik yeba parugu wolmin-o” luk yak tij-o.

¹⁶Yak turuk, mberen pem tak posolar-e, Yesus-nen at yak tosolar-e: “Yona ambara Simon wa-e. Kar-e an nabuwa kasu, lak?” luk yak tosoloma-ge, Peterus-nen at yak tosolar-e: “Eyo, Nagawan Indo wa-e. An-nen kat kabuwa kaso iri-ge kar-e karu-o” luk yij-o. Yosoloma-ge, Yesus-nen at yak tosolar-e: “Iri ala-ge, an nolomba wam parugu wolmin-o” luk yak tij-o.

¹⁷Yak turuk, kenan pem tak posolat Yesus-nen at yak tosolar-e: “Yona ambara Simon wa-e. Kar-e an nabuwa kasu, lak?” luk yak tij-o. Nde, Yesus-nen kenan pem-et: “Kar-e an nabuwa kasu, lak?” luk yak tosola karuk, at Peterus na indi puru luk-nen Yesus yak tosolar-e: “Nagawan Indo wa-e. Kar-e pidsa karu me, an-nen kat kabuwa kaso iri-ge kat karu irir-o!” luk yosoloma-ge, Yesus-nen at yak tosolar-e: “Iri ala-ge, an nolomba wam parugu wolmin-o.

¹⁸An-e ndemeret yak kurusu-o. Kar-e sugwe worasolar-e, kat kondomok-nen kusuwon are ngonoksa yorosolat, kat kindi-n pidnak sa waring kasolat woraigen-et nde, abok kindi worak yosola-ge, kat kinggi nuk kasola, nin nap-nen kat kinggi kamarak puruk, kat mbururak kisili kaso sa nde kibil mburuwa-o” luk yak tij-o.

¹⁹Wene iri yak tid iri-ge Mbal Pem Nagawan unu kek tak peyekluk, Peterus abok-nen wat momtak wene irit yak tij-o. Yak turug-e, Yesus-nen Peterus yak tosolar-e: “An nimbirig-et ni-o” luk yak tij-o.

²⁰Yak tosoloma-ge, Peterus na nden kaga yik kagaidnggal-e, Yesus imin noso indi kundik na-ge it inmbirik lobok yosola, kagaij-o. Nde, at iri-ge it kubu nggwe nunggwi mende nonggolat-nen Yesus eralu lomboksa koreyak worasolat-nen at kin wok obosolar-e: “Nagawan Indo wa-e. Kat kiminep wusururak nab-e ta-o?” luk kin wok ibid nap iri nar-o.

²¹Peterus na-ge ap iri na karuk-nen Yesus yak tosolar-e: “Nagawan Indo wa-e. Nde, at yu-ge nunggwirig-o?” luk yak tosoloma-ge,

²²Yesus-nen at yak tosolar-e: “Nde, an-nen perasolar-e, at yu-ge urug-et worasoma, an nde lobok yurak nggal-nen-e iri-ge kat-nen wene yurag-e lag-o. Alat nde, kar-e an nimbirik ni-o” luk yak tij-o.

²³Iri yid na-t nde, Yesus owosirak-nen wigarogolar-e: “Yesus imin noso nap iri-ge wat ma bug-o” luk yiga-o. Alat nde, Yesus-nen yosolar-e: “At yu wat ma bug-o” luk yigir-e lag-o. Are, “An-nen perasolar-e, at yu-ge urug-et worasoma, an nde lobok yurak nggal-nen-e iri-ge kat-nen wene yurag-e lag-o” luk yij-et nde, iri yiga-o.

²⁴Engga yu arem kwaridnak yeba wene-ge Yesus imin noso an-net konggorosolat, engga yu mbarigi-o. Nde, an-nen kinggiridnak wene yu-ge ndemeret wene-o luk nenaru-o.

²⁵Nde, Yesus-nen kwaril waring kagaid wene ereb-e mondok kwarat worasu-o. Nde, iri kwarid wene pidsa ndindera engga bem mbatlep nggal-nen-e nggweyak ma yu me pidsa yebet yosolat, ngge me purak nggal yelep perasu-o.