Read Nduga YOANES 3 Bible Online

YOANES 3 - Nduga bible

YOANES 3

¹Yawuri nap ennggendumu Parisi nap kek tak misik unu-ge Nikoremus irit woragaij-o.

²Misik tarem kubu nggwe-ge at na-ge Yesus eram mberarik, at yak tosolar-e: “Mul Ondoso Nap wa-e. Kar-e Mbal Pem Nagawan-nen kibil lobok yidnak-nen yusu-o luk nir-e nenaru-o. Mbal Pem Nagawan nde inmin woragit lak-nen-e kat-nen kwiye worak mende kwarusu yu nggal-e ap misiger-o luk tet-nen kwarurag-e meya-o” luk yij-o.

³Yosoloma-ge, Yesus-nen at yak tosolar-e: “An-e ndemeret yak kurusu-o. Mberen pem ndet ibigit lak nab-e Mbal Pem Nagawan-nen tenagaidnak wi-ge erengen kujwa bug-o” luk yij-o.

⁴Yosoloma-ge, Nikoremus-nen at kin wok obosolar-e: “Ab-e nggok yidnak nggwe-ge nggesa-nen mberen pem ndet unpurag-o? Tuguruk iniya arem ngguruk mberen pem ndet unpurak nde yigen-a?” luk yij-o.

⁵Yosoloma-ge, Yesus-nen at yak tosolar-e: “An-e ndemeret yak kurusu-o. Yi min Konak Indi min-nen ndet inpigit lak nab-e, Mbal Pem Nagawan-nen tenagaidnak wi ngguwa bug-o.

⁶Ki nap-nen ndet onpogolar-e, ki nab-et ndet unpugwi-o. Nde, Konak Indi-nen ndet onposolar-e, inndi-t ndet onposo-o.

⁷An-nen-e: ‘Kit pidsa-ge mberen pem-et ndet kunpuwag-o’ luk yak korosola, kar-e kindi bok yurak pug-o.

⁸Obube puk kil lobok yosolar-e, at indi-n pidnag-et mborosola, kir-e ene pu nak kulili-o. Ene pu nak kologolar-e: ‘Ngge nggwe-nen lobok yusu? Ngge nggwe-nen mburusu?’ luk kabag-et worali-o. Nde, ap Konak Indi-nen ndet onposo-ge iri nggal-net yusu-o” luk yij-o.

⁹Yosoloma-ge, Nikoremus-nen yosolar-e: “Kat yigen wene iri-ge nggesa-nen kwat ma-o?” luk yij-o.

¹⁰Yosoloma-ge, Yesus-nen at yak tosolar-e: “Kar-e Isarael nap mul ondoso nab-et nde, kar-e wene yu-ge kabak yusu-a?

¹¹An-e ndemeret yak kurusu-o. Nit-nen-e nit nenaru iri na-t yak kondogolat, nenlengen-nen kaidnak iri na-t mirik konpogolat yili-t nde, nit-nen yidnak wene-ge kit-nen wanurak kinsili yili-o.

¹²An-nen-e nggweyak ma-nen kwarugwi bem yak kondosola-t nde, te rak pili me, aid arem-nen kwarugwi bem yak kondosola-ge, nggesa-nen ndemerer-o luk peragub-o?

¹³Nde, ap misiger-o luk tet aid arem lagwi bug-et nde, at aid arem-nen mbuwagaidnak nap Ap Ambara an narig-et nag-o” luk yij-o.

¹⁴“Nde, Musa-nen posid waro e bem perena karu me mendak pid iri na nggal-et Ap Ambara an-e mendak nubuwa iri-ge

¹⁵ap pidsa an nebem inndi angin tubu yogola-ge, unlug-et woralik nalik momtak elem wanuwakluk mendak nubuwa-o.

¹⁶Mbal Pem Nagawan-nen ki nap pidsa nenabuwa nggulok karuk, at Ambara misiget nderak wok nendamu-o. Ta-nen nde at ebem inndi angin tubu yuwa nab-e lak yigit lag-et, are, pem-et unlug-et woralik nalik momtak elem irit wanuwa-o.

¹⁷Nde, Mbal Pem Nagawan-nen-e at Ambara an nggweyak ma nibil mbuwagaij-e ki nap pidsa lak tak unpurak pem enpem wene mbaruwakluk nibil mbuwagit lag-o. Are, ki nap pidsa inmiri yaga wok unduwakluk nibil mbuwagaij-o.

¹⁸Ambara an nebem inndi angin tubu yuwa nap na enpem-e lak tak unpurak wene mbaruwa bug-o. Nde, inndi angin tubu yigit lak nab-e Mbal Pem Nagawan Ambara misiget nderak an nebem inndi angin tubu yigit lak me, it enpem-e lak tak unpurak wene-ge mondok mbarak puruk worasu-o.

¹⁹It lak tak unpurak wene enpem mbarid iri-ge elem yu bem-nen-o: Yaya na-ge nggweyak ma yu me lobok yij-et nde, ir-e meya nak kwarugwi me, yaya na insili rak puruk, ‘Ndamuk irit ninndingen-o’ luk yugwi iri bem-nen enpem wene mbarid irir-o.

²⁰Nde, meya nak kwarugwi nap-nen-e yaya iri insili rak puruk, it meya yugwi nam tak puwa naru, yaya na eram lobok yili bug-o.

²¹Alat nde, Mbal Pem Nagawan indi-n pidnak nak kwarugwi nap-nen-e it-nen kwarugwi na-ge Mbal Pem Nagawan indi-n pidnak nak kwarugwi-o luk nam maklug-e, yaya na eram lobok yugwi-o” luk yij-o.

²²Iri rak purug-e, Yesus min at owosirak min-e Yurea wi mberarig-e, o iri me-t inmin woralar-e, ap yi ma onposolat woragaij-o.

²³Nde, iri tarem-e Yoanes na-ge o kubu me awo ibil nggwigit lak worala me, Yoanes-nen na irit, o Salim koroga o Ainon iri me yi kwarat alama karuk, ap yi marosolat woragaij-o. Nde, ab-e at eram lobok yogola, yi ma onposolat woragaij-o.

²⁵Worala-ge, Yoanes owosirak erep-nen-e yi ma unpugwi iri na wene lit lit Yawuri nap misik imin ngguno nggwiga-o.

²⁶Alama-ge, ir-e Yoanes eram mbirigarik, at yak togolar-e: “Mul Ondoso Nap wa-e. Yi Yorodan eyak ele bem kimin woragaid nap, kat-nen mirik ninpigen nap iri na kar-e yeberak worasu, lak? Nde, ap iri na-ge yawo ap yi ma onposola, ap pidsa-nen at eram mbitli-o” luk yiga-o.

²⁷Yogolikma-ge, Yoanes-nen yosolar-e: “Mbal Pem Nagawan-nen ap mbi kwat ibigit lak-nen at ondomok amawi bem-nen nak kwarurag-e meya-o.

²⁸‘An-e Kerisut-e lag-o. Are, at abuwok wirik nibil lobok yidnak-nen yusu-o’ luk yosola, kuligep nar-o.

²⁹Kwe ap wanurak kwe iri-ge at wok uburak nap iri na ogwer-o. Nde, kwe iri wok uburak nap anggam mbi-ge an ene kolosolat at eram mendak worasolar-e, kwe wanurak nap iri na ene-ge alen min-et koloso-o. Nde, iri nggal-et an yawo na nalen kwarat kasu-o.

³⁰Ar-e mondok kek yil lasola, an-e tebe yil mbosolar-e, ob-o” luk yij-o.

³¹Teram-nen mbuwagaid nab-e kek tak terak minig-er-o. Nde, nggweyak ma-nen lobok yidnak nab-e nggweyak ma nap me, nggweyak ma wene nak yoso-o. Nde, teram-nen mbuwagaid nab-e kek tak terak minig-er-o.

³²At iri-nen-e at erengen-nen kaidnak nde at eyanggo-nen kulidnak nde iri na-t yak undusu-t nde, ap misiger-o luk tet at ene wanili bug-o.

³³Nde, at-nen yidnak wene ndemerer-o luk perali nap-nen-e: “Mbal Pem Nagawan iri-ge lud tak nak kwaroso-nen yusu-o” luk yili-o.

³⁴Nde, Konak Indi ebis-et wok tidnak me, Mbal Pem Nagawan-nen wirik ibil lobok yidnak nap-nen-e Mbal Pem Nagawan-nen yidnak wene nak yak ondoso-o.

³⁵Eid nen-e at Ambara abuwa karug-e, yi kwarurak ndi kwarurak pidsa Ambara inggem nak pamu-o.

³⁶Ambara ebem indi angin tubu yusu nab-e urug-et pem-et woralik nalik wolmomtak elem wanusu-o. Nde, Ambara-nen yidnak wene kuruk tusu nab-e urug-et wolma bug-o. Are, Mbal Pem Nagawan isilepma-ge at ebem mondok puruk wolma-o.