Read Nduga YOANES 5 Bible Online

YOANES 5 - Nduga bible

YOANES 5

¹Iri rak purug-e, Yawuri nap-nen sakwi tarem ala, Yesus na Yerusalem mbirij-o.

²Nde, Yerusalem-nen-e Lomba Wam Tumende eralu-ge yi ugup lerak mbi woragaij-o. Nde, yi ugup iri unu-ge Iberani wene bem-e Mbetera irir-o. Nde, yi ugup lerak iri na inggi nggwe-ge o lima ngguwa nak wosarak iri me woragaij-o.

³Nde, o ereba na arem-e kugi worak nab-e, enlengen ngguru nde unuwok kago worak nde kambung puk tak woragwi nde, ap kwarat irit iri me mbinggirik woragwi-o. [Woragola-ge, it pidsa-ge yi wuruk kemek mbuwa na yik karok woragwi-o.

⁴Nde, misik tarem misik tarem-e Nagawan Indo-nen idnak aid nap mbuwasolar-e, ereya na-net yi ugup lerak iri na wuruk kemek tak poso-o. Nde, yi wuruk kemek mbosola, nandug-et nggwidnak nap iri na nak at kugi worak woraidnak na-ge ki yoso-o.]

⁵Ap mbi kugi worak woralar-e, olengen tiga pulu delapan (38) woraidnak nap mbi iri me woragaij-o.

⁶Worala-ge, Yesus-nen at na mbinggirik worasola karuk, ar-e obi-net ud kasolat woraso na aru luk, ap iri na yak tosolar-e: “Kar-e ki yurag-e kindingen, lak?” luk yak tij-o.

⁷Yak tosoloma-ge, kugi worak nap na-nen yosolar-e: “Nab-o. Yi ugup na wuruk kemek yosola, an yongga neraga yi ma nuburak nap lak me, an-e awo nggweyek tak tak yosoma, nin nab-e nandug-et nggugwi-o” luk yij-o.

⁸Yosoloma-ge, Yesus-nen at yak tosolar-e: “Kar-e men luk, kat ndamak nene yoso kilis kud turuk, mbiri-o” luk yak tij-o.

⁹Yak tosoloma, iri na tarem-et ap na ki luk, ndamak nene yoso ilis kud turuk, mbirij-o. Iri kwarid iri-ge we woragwi tarem-o.

¹⁰Iri ala-ge, Yawuri nap-nen ki rak ibidnak nap na yak togolar-e: “Yawo-ge we woragwi tarem me, kat kilis kud tusu meyog-o” luk yak tiga-o.

¹¹Yak togolikma-ge, at-nen yosolar-e: “Nde, an ki rak nibid nap na-nen yak norosolar-e: ‘Kat ndamak nene yoso kilis kud turuk mbiri-o’ luk yak nirij-o” luk yij-o.

¹²Yosoloma-ge, it-nen at kin wok obogolar-e: “ ‘Kat ndamak nene yoso kilis kud turuk mbiri-o’ yak kirid iri-ge ta-nen yak kirij-o?” luk yiga-o.

¹³Alat nde, iri me-ge ap kwarat ereba na ennggendumu Yesus na nabet kabet yidnak me, ki rak ibidnak nap na-nen-e: “Ta-n ki rak nibij-o?” luk kabag-et woragaij-o.

¹⁴Misik tarem-e Yesus na-ge Mbal Pem Nagawan ama-nen ap iri na karuk, at yak tosolar-e: “Yawo kar-e ki yigenma-o. Nanduk kebem mbid iri-ge te nggal-et nde, terak mena kebem mbuma naru, meya mbi kwarurak puk na-e” luk yak tij-o.

¹⁵Yak tosoloma-ge, ap iri na keya buruk mborosolar-e, Yawuri nap yak ondosolar-e: “Yesus-net ki rak nibij-o” luk yak indij-o.

¹⁶Nde, Yesus na we woragwi tarem-et nde, ap yu na ki rak pidnak pem-e Yawuri nap-nen-e at lel mberel ubuwokluk tu kore yiga-o.

¹⁷Alama-ge, Yesus-nen it yak ondosolar-e: “An Neig-e yabu wok tenak kundugu yawo na wanusur-o. Nde, an-nen na yabu wanusur-o” luk yij-o.

¹⁸Wene iri yidnak pem it Yawuri nap ebem lud insilepma luk, “Nggesa-nen wurul-o?” luk tu kore yogolat woraiga-o. Nde, iri yiga iri-ge we woragwi tarem-nen “Kwarurak pug-o” yidnak na kwid toso iri bem-nen nag-e lag-o. Are, at-nen yosolar-e: “Mbal Pem Nagawan an Neig-er-o” luk yosola-ge, “E! Ar-e at ambikpebe Mbal Pem Nagawan nggal yusu-o” lug-e at wururak yiga-o.

¹⁹Iri ala, Yesus-nen ap ereba na yak ondosolar-e: “An-e ndemeret yak kundusu-o. At Ambara an-nen-e nambik nindi-n pidnak kwarusu bug-o. Are, an Neid-nen kwarosola kaidnak iri na-t an-nen na kwarusu-o. Nde, an Neid-nen kwaroso mende iri na-t Ambara an-nen na kwarusu-o.

²⁰An Neid-nen at Ambara an nabuwa luk, at-nen kwaroso mende pidsa-ge an mirik nubusu-o. Nde, Neid-nen kwaroso mende oboksa mondok nggok lombok ninggem posola, kit pidsa-nen-e wi yugub-o.

²¹Nde, an Neid-nen ap wat yidnak mendak unpuruk, unluk tak unpusu nggal, iri nggal-et Ambara an-nen na iri kwat enpeyek peraidnak nab-e unluk tak unpusu-o.

²²Nde, ap enpem wene mbarurak amawi-ge Ambara an ninggem pidnak me, Neid-nen-e ap enpem wene mbarusu bug-o.

²³Nde, an Neid-nen amawi an ninggem pid iri-ge ap pidsa-nen Neid kek tak pili nggal, Ambara an na kek tak nubuwakluk-nen ninggem pij-o. Ambara an kek tak nibili buk nab-et wirik nibil lobok yidnak nap an Neid na kek tak pili bug-o.

²⁴An-e ndemeret yak kundusu-o. An-nen yidnak wene kuluruk, an nibil lobok yidnak nap ebem indi angin tubu yuwa nab-e, unlug-et woralik nalik wolmomtak elem-e mondok wanarik worasu-o. Iri yidnak nab-e wat yugwi elem tena woraidnak keya buruk, unlug-et wolmomtak elem wanidnak me, at ebem-e wene mbi mbaruwa bug-o.

²⁵An-e ndemeret yak kundusu-o. Wat yidnak nap-nen Mbal Pem Nagawan Ambara ene kuluruk, kulidnak nab-e unlug-et wolmomtak tarem-e wok yuwa-t nde, mondok wok yij-o.

²⁶Nde, Neig-e unlug-et wolmomtak elem-nen yusu-o. Nde, iri nggal-et Neid-nen-e Ambara an na irit unlug-et wolmomtak elem kwarak nibij-o.

²⁷Nde, an-e Ap Ambara-t me, ap enpem wene mbarurak amawi-ge Neid-nen Ambara an ninggem-et pij-o.

²⁸Wene yak kindimin yu kulurug-e wi yurak pug-o. Wat yidnak nap pidsa-ge an nene kuluruk,

²⁹yapma inpidnak sa-nen men ma tarem-e panggo yij-o. Men yogolar-e, konak nak kwarogolat woraidnak nab-e unlug-et wolmomtak pem men ma-o. Nde, meya kwarogolat woraidnak nab-e enpem wene mbarurak pem men ma-o” luk yij-o.

³⁰Yuruk, Yesus-nen yosolar-e: “An nondomok nindi-n pidnak pem nak yi kwatlik ndi kwatlik kwarurag-e meya-o. Are, Mbal Pem Nagawan-nen yak niridnak iri na ndak ndag-et ap enpem wene mbarusu-o. An-e nondomok nindi-n pidnak kwarusu bug-o. Are, an wirik nibidnak nap indi-n pidnak nak kwarusu me, an-e ap enpem wene mbarusu-ge mot mor-et mbarusu-o.

³¹Nde, an nondomok-net an nebem wene yelepnggal-e, ‘Yu-ge enesiget yusu-o’ luk yurag-o.

³²Alat nde, an nebem wene kunggurusu nap misig-e worasu-o. Nde, an nebem wene kenggel undusu iri-ge lud tag-et yusu-o luk an-e naru-o.

³³Kit-nen-e Yoanes na eram ap wirik inpigepma-ge, at-nen-e an nowene-ge lud tag-et kenggel kindij-o.

³⁴Nde, kit nap-nen an nowene kunggururak iri-ge an-e nimbir-o. Are, kit kinmiri yaga wanobokluk-nen wene yu-ge yusu-o.

³⁵Yoanes na-ge tal pago eyaya worak nggal woragaij-o. Pago worala-ge, luru kir-e at eyaya bem kenalen min-et woraigeb-o.

³⁶Alat nde, Yoanes na an nebem kinggirid wene-ge marik nggal-nen yusu-o. Nde, an nebem kunggurusu wene nggulog-e yur-o: An Neid-nen an-nen kwaruwakluk nebem pidnak iri-ge an-nen kwaril waring kasu yu-nen-e an nebem konggorosolar-e: ‘At Eid-nen wirik ibil lobok yij-o’ luk an nebem kunggurusu iri bem-nen yenggerak neyali-o.

³⁷Nde, wirik nibil lobok yidnak nap an Neid-nen na irit an nowene kenggel kundusu-o. Irit nde, kit-nen-e at ene na kulugwi buk, at erare na kagwi buk me,

³⁸at-nen wirik nibil lobok yidnak nap an nebem kinndi angin tubu yigit lak yili me, at-nen yidnak wene-ge kit kenarem-e mondok lag-o.

³⁹‘Mbal Pem Nagawan engga mbarak yu bem unlug-et wolmomtak elem wanul-o’ peragoluk, kit-nen-e engga na kwara mbenarogolat worali-o. Irit nde, engga iri-nen an nowene kenggel kundusu-t nde,

⁴⁰unlug-et wolmomtak elem wanuwokluk an neram lobok yurag-e kinsili yili-o.

⁴¹An-e ki nap-nen kek tak nubuwag-o luk-nen yusu-ge lag-o.

⁴²Alat nde, kir-e an-e keneyasu-o. Kit kenarem-e Mbal Pem Nagawan abuwa kali buk iri-ge an-e naru-o.

⁴³An-e Neid unu bem-et lobok yigi-t nde, kit-nen-e wok nibigit lak yili-t nde, ap misik at ambik unu bem lobok yosola-ge, wok ubugub-o.

⁴⁴Nde, kit-nen-e: ‘Mbal Pem Nagawan misiget nak iri-nen an kek tak nubuwa-o’ perali bug-o. Are, ki nap-nen kek tak kunpurak pem, kit na kit-net kentembel wok kerak mbili me, kir-e nggerak puruk-nen kinndi angin tubu yugub-o?

⁴⁵Alat nde, kit-nen-e an-nen Neid imbiri bem ninmbiri wuruwa-o luk yebet kudtak pug-o. Kit-nen kinndi ebem mbung mbung tak woragwi Musa iri-net kinmbiri wuruwa-o.

⁴⁶Musa-nen mbarid iri-ge an nowene-t mbaridnak me, kit-nen ndemeret Musa ebem kinndi angin tubu yigepnggal-e, an nebem na kinndi angin-et tubu yeleb-o.

⁴⁷Alat nde, kit-nen-e Musa-nen mbaridnak wene bem kinndi angin tubu yili buk me, ngge rak puruk-nen an-nen yidnak wene bem-e kinndi angin tubu yugub-o?” luk yij-o.