Read Nduga YOANES 7 Bible Online

YOANES 7 - Nduga bible

YOANES 7

¹Iri rak purug-e, Yurea-nen Yawuri nap-nen at wururak peragola karuk, Yesus-e Yurea nggwe waring kudtag-e imbit-nen Nggalilea nggweyak pem waring kasolat woragaij-o.

²Worala-ge, Yawuri nap-nen O Sare Wi Wiril Mbiriga yebet kagolat sakwi tarem na panggo yosoloma-ge,

³Yesus owottak-nen at yak togolar-e: “Kat kowosirak-nen-e kat-nen kwaroso mende kujwakluk, yu me keya buruk Yurea mbiri-o.

⁴Ap misik-nen-e ‘An nunu nggulok mag-o’ perasolar-e, at-nen kwaroso kurasa kwaroso bug-o. Nde, kar-e yu mende kwarosolat worasu me, ki nap pidsa-nen enaru makluk nam-et mirik inpi-o!” luk yak tiga-o.

⁵(Nde, iri yogolar-e, at ambik owottak-nen na at ebem inndi angin tubu yigit lak yiga-o.)

⁶Yak togolikma, Yesus-nen it yak ondosolar-e: “An-nen kwarurak tarem-e awo wok yigit lak worasu-o. Nde, kit-nen kwarurak tarem-e ndak nak worasu-o.

⁷Ki nap pidsa-nen-e kir-e insili rak kunpuwa bug-et nde, an-nen-e: ‘Kit-nen kwatli mende meya nak kwatli-o’ luk yak undusu me, insili rak nibili-o.

⁸Nunggwi mende nggulok saguwa sa kir-e mberer-o. An-nen kwarurak tarem-e awo wok yigit lak me, an-e nunggwi mende nggulok iri saguwa sa mbirimin pug-o” luk yak indij-o.

⁹Yak undurug-e, ar-e Nggalilea puk agaij-o.

¹⁰Nde, at owottak na nunggwi mende nggulok saguwa sa mborogola karuk, Yesus-nen na iri me mborosolar-e, mbik mbok kuraga mbirij-o.

¹¹Alama-ge, nunggwi mende nggulok na sakola tarem-e Yawuri nap na-nen at ogore yogolar-e: “Yesus na-ge ngge me worasu-o?” luk kin waruk waruk yiga-o.

¹²Yogolikma-ge, ap kwarat ereba na-nen Yesus obok tapsa yak kerak mbogolar-e, it erep-nen yogolar-e: “At iri-ge konak nab-o” yogolat, nde, it erep-nen yogolar-e: “Lag-o. At iri-ge ap inndi kabak tak poso-nen yusu-o” luk yiga-o.

¹³Alat nde, Yawuri nap na enaye-nen ap misiger-o luk tet-nen at obog-e nam-et para yigit lag-o.

¹⁴Nunggwi mende nggulok na sakwi tarem enggendumu-ge Yesus na Mbal Pem Nagawan ama nggwarik ap mul indij-o.

¹⁵Mul ondosoloma-ge, Yawuri nap na wi langgu mbarogolat-nen yogolar-e: “Ap yu-ge sekola yoso buk yu-t nde, nggesa-nen kwarat aru yij-o?” luk yiga-o.

¹⁶Yogolikma-ge, Yesus-nen it yak ondosolar-e: “An-nen mul ondoso wene yu-ge an nindi-n pidnak wene-ge lag-o. Are, an wirik nibil lobok yidnak nap Mbal Pem Nagawan-nen yidnak yidnag-et mul ondoso-o.

¹⁷Nde, ta-nen nde Mbal Pem Nagawan indi-n pidnak kwareyeg-o luk peraidnak nap-nen-e an-nen mul ondoso wene yu-ge Mbal Pem Nagawan eram-nen lobok yidnak wene nde mul undusu, lak? Are, at indi-n pidnak wene nde mul undusu-a? luk aru yuwa-o.

¹⁸Ap misik-nen-e at ondomok indi-n pidnak mul ondoso nab-e at ambik unu kek tak purak kwarusu-o. Alat nde, at wirik ibil lobok yidnak nap unu kek tak purak indingen nap-nen-e at arem-e enesiget wene-ge mondok lak me, mot mot yoso-nen yusu-o.

¹⁹Imiri mbarak pidnak wene na-ge Musa-nen wok kindid na-ge lag-a? Alat nde, kir-e misiger-o luk tet imiri mbarak pidnak wene iri-nen yidnak yidnag-e kwatli bug-o. Kir-e noluk-nen an nuruwokluk yili-o?” luk yak indij-o.

²⁰Yak ondosoloma-ge, ap kwarat ereba na-nen at yak togolar-e: “Kar-e kugi karem nggwidnak-nen yusu-a? Tarak-nen kuruwokluk yogola-nen yusu-o?” luk yiga-o.

²¹Yogolikma-ge, Yesus-nen it yak ondosolar-e: “An-e kwiye worak mende misiget nak kwarosola-ge, kit pidsa wi langgu mbarigeb-o.

²²Musa-nen-e kiniye ambasap waburak wene mirik kinpid pem-e, kir-e we woragwi tarem-nen li iniye ambasap wabugwi-o. (Nde, iri kwarugwi iri-ge Musa lak ma-nen kit kenlawingga-nen tel kwirikma-o.)

²³Musa-nen imiri mbarak pidnak wene na kuruk tul naru, li iniye ambasap iri-ge we woragwi tarem-nen wabugwi na-t nde, an-nen we woragwi tarem-nen ap misik mondok ki rak pigi na bem-nen kir-e noluk-nen kinsilepma an nebem pili-o?

²⁴Kit-nen-e ap enpem wene mbarogolar-e, we ombol nggwe yik kaidnak pem nak mbarurak pug-o. Are, ndemeret wene bem-et mbarurag-o” luk yak indij-o.

²⁵Yak ondosoloma-ge, Yerusalem nap erep-nen yogolar-e: “At yu-ge wuruwokluk tu kore yili na-ge yu-t lak?

²⁶At yu-ge nam-et yosola kulili-t nde, it-nen wene erep mbi yak tili buk iri ker-o! Nde, nit-nen enne kulugwi nap-nen-e at yu-ge ndemeret Mesias-nen yusu-o luk enaru-nen yili, lak?

²⁷Alat nde, Mesias na lobok yuwama-ge, at lobok yidnak sa-ge ap misiget ter-o luk enaru bug-o. Alat nde, at yu lobok yidnak sa na nit pidsa nenaru nar-o” luk yiga-o.

²⁸Nde, Yesus na Mbal Pem Nagawan ama-nen ap mul ondosolar-e, at ene ngguloksa-t yosolar-e: “Kit-nen-e ndemeret an yenggerak neyagolat, an lobok yidnak sa na kenaru yogolat yili-a? An nindi-n pidnak pem lobok yigi-ge lag-o. An nibil lobok yidnak nap iri-ge mondok lud tak kwaroso-nen yusu-o. Kit-nen-e at iri kenaru buk worali-t nde,

²⁹an-e at imin woraso, at-nen wirik nibil lobok yidnak me, at iri-ge an-e naru-o” luk yij-o.

³⁰Iri tarem-net it-nen-e at tenagurak yiga-t nde, at tenagurak tarem-e awo wok yigit lak me, ap misiger-o luk tet at tenagurak meya agaij-o.

³¹Alat nde, ap ereba na ennggendumu ap kwarat-nen at ebem inndi angin tubu yogolat-nen yogolar-e: “At yu-nen kwiye worak mende kwarat kwarusu yu-ge, Mesias abok lobok yuwarig-e, kwiye worak mende terag-e no mende nde kwaruwa-o?” luk yiga-o.

³²Ap kwarat ereba na-nen Yesus obok yagap yagap wene yil mborogola, Parisi nap-nen kuluruk, it min tepan omborak nagawan nagawan min-nen-e Yesus tenagurak pem Mbal Pem Nagawan wi yik karok woragwi san winde wirik inpiga-o.

³³Iri ala-ge, Yesus-nen yosolar-e: “Kit totno woragolar-e, marig-et nak worarug-e, an nibil lobok yidnak nap eram mbirimin-o.

³⁴Nde, kit-nen an woramin sa iri me wok momtag-e meya me, kir-e an nogore yugub-et nde, neyagit lak yugub-o” luk yij-o.

³⁵Yosoloma-ge, it Yawuri nap na-nen yak kerak mbogolar-e: “At yu-ge ngge mborosoma-nen kir-e kagit lak yurak nde yij-o? Yawuri nap nin sa Yunani nap ennggendumu worali ereba na endam mbutluk, Yunani nap mul undurak pem yusu, lak?

³⁶At-nen yosolar-e: ‘An nogore yugub-et nde, neyagup pug-o’ yurug-e, ‘An woramin sa iri kit-nen wok yurag-e meya-o’ luk yid iri-ge ebe-ge no yosolat-nen yij-o?” luk yiga-o.

³⁷Iri lug-e, nunggwi mende nggulok sakolat, yobok tak purak tarem mondok nggulok iri na bem-e Yesus na men luk ene ngguloksa-t yosolar-e: “Ta-nen yi nere ala-ge, an neram lobok luk, yi nujwag-o.

³⁸Ap an nebem inndi angin tubu yuwa nap enmanggim-e Mbal Pem Nagawan engga bem-nen yosolar-e: ‘At arem-nen unlug-et wolmomtak yi-ge urusu kundik mborosolat nak wolma-o’ ” luk yij-o.

³⁹(Yesus-nen wene iri yid iri-ge at ebem inndi angin tubu yidnak nap-nen Konak Indi wanurak pem-nen yij-o. Nde, Yesus na awo kek tak ibigit lak worala me, Konak Indi na awo ap enpem mbuwagit lak ma-nen yij-o.)

⁴⁰Yesus-nen yidnak wene iri kulurug-e, ap iri na ennggenggerak woraidnak nap erep-nen yogolar-e: “Mbal Pem Nagawan ene lomboksa yoso nap iri na-ge at yu-net yusu-o!” luk yiga-o.

⁴¹Nde, it erep-nen yogolar-e: “At yu-ge Mesias-net yusu-o” luk yogolat nde, it erep-nen-e: “Lag-o. Mesias iri-ge o Nggalilea nggal-nen lobok yurak meya-o.

⁴²Mbal Pem Nagawan engga bem-nen yosolar-e: ‘Mesias iri-ge Ndaud-nen wigarak, Ndaud ama Mbetleyem-nen ndet ma-o’ luk yij-o” luk yiga-o.

⁴³Wene iri yogolar-e, ap kwarat ereba na-nen Yesus owene lit lit ngguno nggwiga-o.

⁴⁴It erep-nen-e Yesus na tenagurak inndi peraigat nde, at tenagurag-e kwiye ala, keya biga-o.

⁴⁵Iri ala-ge, Mbal Pem Nagawan wi yik karok woragwi san winde na unuwok lem mbirigarik, tepan omborak nagawan min Parisi nap min endam wok yogola, it-nen kin wok onpogolar-e: “Kir-e noluk-nen at imin lobok yigit lak yigeb-o?” luk yiga-o.

⁴⁶Yogolikma-ge, Mbal Pem Nagawan wi yik karok woragwi san winde-nen yogolar-e: “Ap misiger-o luk tet at-nen yusu wene iri nggal-e yugwi bug-o” luk yiga-o.

⁴⁷Yogolikma-ge, Parisi nap-nen it yak ondogolar-e: “Kit na nden keneyasu-a?

⁴⁸Nenne kulugwi nap nit nennggendumu-nen na irit, Parisi nap ennggendumu-nen na irit ap misik mbi-nen at ebem inndi angin tubu yogola, eneyali-a?

⁴⁹Musa-nen imiri mbarak pidnak wene enaru buk ap kwarat yeba-ge imbiri lamut tak unpuwag-a!” luk yak indiga-o.

⁵⁰Iri yogolikma-ge, it ennggenggerak woraso misik, nanduk Yesus eram lobok yidnak nap Nikoremus na-nen it yak ondosolar-e:

⁵¹“Nit wok nindidnak imiri mbarak pidnak wene-nen yosoalar-e: ‘Ap mbi-ge at-nen yidnak wene kwara kuligit lak, at-nen kwaridnak na kwara mbenarigit lak-nen-e at ebem wene mbarurak pug-o’ yidnak worasu nar-o” luk yak indij-o.

⁵²Yak ondosoloma-ge, it-nen at yak togolar-e: “Nde, kar-e Nggalilea nap-nen yusu-a? Kar-e Mbal Pem Nagawan engga kwara mbenari-o. Mbenarosoma-ge, Mbal Pem Nagawan ene lomboksa yoso nap mbi Nggalilea-nen lobok yuwa-o yidnak mbi kagun pug-o” luk yak tiga-o.

⁵³[Yak turug-e, it pidsa enmarak ndi yiga-o.