Read Nduga YOANES 8 Bible Online

YOANES 8 - Nduga bible

YOANES 8

¹Alat nde, Yesus-na-ge Saitun ndobo bem mbirij-o.

²Nene luk, kuplila-ge Yesus na-ge tuguruk Mbal Pem Nagawan ama nggosoloma karuk, ap kwarat ereba na at eram ndok worogola, at na kore luk mul ondosolat woragaij-o.

³Worasoma-ge, imiri mbarak pidnak wene enaru nap min Parisi nap min-nen-e kwe mbi mbabi yosoma karuk, kwe na imin mbirigarik, it ennggendumu iri me kwe na mendak uburuk,

⁴it-nen Yesus yak togolar-e: “Mul Ondoso Nap wa-e. Kwe yu-ge mbabi yukmu, tenaidnag-o.

⁵Musa-nen mbal nindidnak imiri mbarak pidnak wene bem-nen yosolar-e: ‘Iri nggal kwaroso kwe ala-ge, kerep pem mondok wururag-o’ yij-et nde, kat kindi-nen ngge nde perasu-o?” luk yak tiga-o.

⁶Iri yak tiga iri-ge at imbiri wururak pem, at indi ngarogolat-nen yak tiga-o. Alat nde, Yesus na wandu luk, inggi ndum-nen nggweyak pem mbarosolat woragaij-o.

⁷Nde, it na-nen wene iri na yak terenak kundugu ala karug-e, Yesus na pugak luk-nen it yak ondosolar-e: “Kit kennggendumu-nen meya yoso buk nap mbi worala-ge, at nanduk-net kerep waga kwe yu wuruwag-o” luk yak indij-o.

⁸Yak undurug-e, at na tuguruk wandu luk inggi ndum-nen nggweyak pem mbarosolat woragaij-o.

⁹Wene na yak ondosoloma kulurug-e, it yu na mborogolar-e, inndi worak nanduk-nen nggigi nggigi, pidsa mbiriga-o. Alama-ge, Yesus min kwe mendak na min enaruk keya inpiga-o.

¹⁰Iri ala-ge, Yesus na pugak luk, kwe na yak tosolar-e: “Kwe yu-ge wa-e. It yeba na ngge nde mbiriga-o? Kat kowene mbarurak yiga nab-e obok mbiriga, lak?” luk yak tosoloma-ge,

¹¹kwe na-nen yosolar-e: “Eyo, nab-o. Mondok lag-o” luk yosoloma-ge, Yesus-nen at yak tosolar-e: “Iri ala, an-nen na kebem wene mbarimin pug-o. Mbiri-o. Alat nde, kar-e abok meya mbi kwarurak pug-o” luk yak tij-o.]

¹²Iri rak puruk, Yesus-nen tuguruk it yak ondosolar-e: “An-e ki nap ennggendumu yaya-nen yusu-o. An nimin nuwa nab-e ndamuk arem nuwa bug-o. Are, unlug-et wolmomtak yaya irit tena wolma-o” luk yak indij-o.

¹³Yosoloma-ge, Parisi nap-nen at yak togolar-e: “Kat-net kat kebem wene kunggurusu yu-ge kar-e ndemeret wene kunggurusu bug-o” luk yiga-o.

¹⁴Yogolikma-ge, Yesus-nen it yak ondosolar-e: “Lag-o. An-e an lobok yidnak sa min an mbirimin sa min naru me, an nondomok nebem wene kenggel kundusu-t nde, ndemerer-et yak kundusu-o. Nde, an lobok yidnak sa min an mbirimin sa min kir-e kenaru bug-o.

¹⁵Kit-nen-e we ombol nggwe nak yik karuk, ap enpem wene mbatli-o. Nde, an-e ap misik ebem wene mbarusu bug-o.

¹⁶Alat nde, an-e narig-et worasu-ge lak me, an-nen ap enpem wene mbarosolat nggal-e, an Neid nibil lobok yid na an nimin worala me, mot mor-et mbatleb-o.

¹⁷Kit wok kindidnak imiri mbarak pidnak wene bem-nen mbarosolar-e: ‘Mberen nap-nen yidnak ala-ge, ndemerer-o’ luk mbarak worasu-o.

¹⁸Nde, an nebem wene kinggirili nab-e an min an Neid wirik nibil lobok yidnak nap min-nen nebem wene kinggirili-o” luk yak indij-o.

¹⁹Yosoloma-ge, it-nen at kin wok obogolar-e: “Kat keij-e ngge me-o?” luk yogolikma-ge, Yesus-nen yosolar-e: “Kit-nen-e an min an Neid min kenaru bug-o. Nde, kit-nen nde an kenaru nggal-nen-e an Neid na kenaru yeleb-o” luk yij-o.

²⁰Yesus-nen wene iri yosolar-e, Mbal Pem Nagawan ama-nen Mbal Pem Nagawan amanggim tol pugwi ondoro eralu worasolat-nen yij-o. Nde, at tenagurak tarem-e awo wok yigit lak me, ap misiger-o luk tet-nen at tenakit lag-o.

²¹Iri luk, Yesus-nen it tuguruk yak ondosolar-e: “An-e mbirimin-o. Nde, kit-nen an nogore yugub-et nde, kit meya yidnak min woragolat-net wat yugub-o. An mbirimin sa kit-nen wok yil mbururag-e meya-o” luk yak indij-o.

²²Yak ondosoloma-ge, Yawuri nap-nen yogolar-e: “ ‘An mbirimin sa kit-nen wok yil mbururag-e meya-o’ yid yu-ge at ambik wat korayekluk-nen yid, lak?” luk yiga-o.

²³Yogolikma-ge, Yesus-nen it yak ondosolar-e: “Kir-e ena nggwe-nen lobok yidnak nap-nen yili-o. Nde, an-e teram-nen lobok yidnak-nen yusu-o. Kir-e nggweyak ma nab-o. Nde, an-e nggweyak ma nab-e lag-o.

²⁴Iri bem-e, ‘Kit meya yidnak min woragolat-nen wat yugub-o’ luk yak kindigi nar-o. Nde, kit-nen-e an nimin-e ‘Ar-e Ar-e woraso-net yusu-o’ luk kinndi an nebem angin tubu yigit lak ala-ge, kit meya yidnak min woragolat-nen war-et yugub-o” luk yak indij-o.

²⁵Yak ondosoloma-ge, it-nen at kin wok obogolar-e: “Kar-e ta-o?” luk yogolikma-ge, Yesus-nen it yak ondosolar-e: “An-e no amanggim-nen tuguruk wene yak kindimin-o?

²⁶Nde, kit kenpem yurak wene nde kit kenpem wene mbarurak nde an-e kwarat worasu-t nde, an nibil lobok yidnak nap iri-ge ndemeret lud tak nak yoso-nen yusu-o. Nde, at-nen yak niridnak wene iri na-t an-nen nggweyak ma nap pidsa yak undusu-o” luk yij-o.

²⁷Iri yosola-t nde, at Eid imin yusu-o luk, ir-e yenggerak pigit lak yiga-o.

²⁸Iri ala karuk, Yesus-nen it yak ondosolar-e: “Kit-nen-e Ap Ambara an mendak nubugupmu-ge, ‘Ar-e Ar-e woraso-net yusu-o’ luk kenaru yogolat, nde, at-nen kwaroso na-ge misiger-o luk tet at indi-n pidnak pem kwaroso buk, are, at-nen yoso-ge Eid-nen mul tidnak wene nak yamu-o luk kenaru yugub-o.

²⁹An wirik nibil lobok yidnak nab-e an totno-t worali-o. An-e at indi-n pidnak nak kwaroso me, at-nen-e narik keya noboso bug-o” luk yij-o.

³⁰Iri yosola kuliga nap kwarat-nen-e at ebem inndi angin tubu yiga-o.

³¹Iri ala-ge, Yesus-nen at ebem inndi angin tubu yidnak Yawuri nap na yak ondosolar-e: “Kit-nen-e an-nen yidnak yidnag-et kwarogola-ge, ndemeret an nimin nugwi nap kwat yugub-o.

³²Kit-nen ndemeret wene kenaru yogola-ge, wene iri-nen-e wisirik kunpuwa-o” luk yak indij-o.

³³Yak ondosoloma, it-nen at yak togolar-e: “Kir-e Abaram-nen wigarak me, nir-e ap misiger-o luk tet ndegel unpugwi bug-o. Irit nde, kat-nen-e: ‘Wisirik kunpuwa-o’ yigen iri-ge ngge yosolat-nen yigen-o?” luk yiga-o.

³⁴Yogolikma-ge, Yesus-nen it yak ondosolar-e: “An-e ndemeret yak kundusu-o. Ta-nen nde meya kwaroso nap ala-ge, meya iri ndegel poso nap-nen yusu-o.

³⁵Ndegel unpugwi nap-nen-e o winde inmin pempa kundik woragwi bug-o. Nde, o winde ambara-nen perak nde o ma iri me pem woraso-o.

³⁶Iri bem-e Ambara-nen wisirik konposola-ge, ndemeret wisirik kinpidnak irit woragub-o.

³⁷Kir-e Abaram-nen wigarak-nen yili-o luk an-e naru-t nde, an-nen yidnak wene-ge kenarem nggusu buk me, an nuruwokluk tu mbenatli-o.

³⁸An-nen-e Neid-nen mirik nibidnak nak mul kundusu-t nde, kit-nen-e kit kineid-nen yak kindidnak mende-t kwatli-o” luk yak indij-o.

³⁹Yak ondosoloma, it-nen at yak togolar-e: “Nit nineij-e Abaram-net yusu-o” luk yogoloma-ge, Yesus-nen it yak ondosolar-e: “Kir-e ndemeret Abaram ilirak-nen yili nggal-e Abaram-nen kwaroso nggal-et kwatleb-o.

⁴⁰Nde, ndemeret wene Mbal Pem Nagawan-nen yak niridnak iri na-t yak kondosolat woragi-t nde, kit-nen an nuruwokluk yili-o. Abaram-nen-e iri nggal kwaroso bug-o!

⁴¹Kit-nen-e kineid-nen kwaroso mende irit kwatli-o” luk yak indij-o. Iri yosoloma-ge, it-nen at yak togolar-e: “Nir-e mbabi-n nderag-e lag-o. Nit Nineij-e misiget nak, Mbal Pem Nagawan-net yusu-o” luk yiga-o.

⁴²Yogolikma-ge, Yesus-nen it yak ondosolar-e: “Kir-e ndemeret Mbal Pem Nagawan ilirak-nen yili nggal-e, kir-e an nabuwa kaleb-o. Nde, an-e Mbal Pem Nagawan eram-nen lobok yigirik, yawo yu me worasu-o. An-e an nindi-n pidnak pem lobok yigit lag-o. Are, Mbal Pem Nagawan-net wirik nibil lobok yij-o.

⁴³Kir-e noluk-nen an-nen yidnak wene yebet kali bug-o? Kwara yebet kali buk iri-ge an-nen yidnak wene kit-nen kwara lid puruk wanili buk iri bem-nen-o.

⁴⁴Kir-e Sere ilirak-nen yili me, kineid indi-n pidnak nak kwaruwokluk yili-o. Nanduk-net ar-e ap woroso-nen yusu-o. Ndemeret wene-ge at arem mondok lak me, lud tak nak kwarugwi mende at arem-e woraso bug-o. At-nen enesiget wene yosolar-e, at-nen kwaroso mende irit kwarusu-o. Enesiget wene yoso, nde, enesiget wene pidsa elem-e an-net yusu-o.

⁴⁵Alat nde, an-ne ndemeret wene yak kundusu me, iri bem-nen kinndi angin tubu yili bug-o.

⁴⁶Kit kennggendumu-nen an meya yidnak nimbiri para yak nururak nab-e ta-o? Nde, an-e ndemeret wene nak yak kondosola-ge, kir-e noluk-nen an nebem kinndi angin tubu yili bug-o?

⁴⁷Mbal Pem Nagawan ilirak-nen-e Mbal Pem Nagawan-nen yidnak wene-t kulugwi-o. Nde, kir-e Mbal Pem Nagawan ilirag-e lak me, Mbal Pem Nagawan-nen yidnak wene kulili bug-o” luk yak indij-o.

⁴⁸Yak ondosoloma-ge, it Yawuri nap-nen Yesus yak togolar-e: “Nit-nen-e: ‘Kar-e Samaria nap, kugi karem nggwidnak nap-nen yusu-o’ luk yak kirige na-ge ndemeret yak kirige-o” luk yiga-o.

⁴⁹Yogolikma-ge, Yesus-nen yosolar-e: “An-e kugi narem nggwidnag-e lag-o. An-e Neid kek tak pusu-t nde, kit-nen-e an kek tak nibili bug-o.

⁵⁰Nde, an kek tak nuburak iri-ge an-e kore yusu bug-o. Alat nde, an kek tak nobosolat an nebem wene mbarosolat yurak Nab-e misik worasu-o.

⁵¹An-e ndemeret yak kundusu-o. An-nen yidnak yidnag-et kwaruwa nab-e wat yigit lak, pem-et woralik nalik ma-o” luk yij-o.

⁵²Yosoloma-ge, Yawuri nap na-nen at yak togolar-e: “Kar-e kugi karem nggwidnak-nen yusu-o luk yawo-nen perak nde mondok nenaru yili-o! Abaram min Mbal Pem Nagawan ene lomboksa yugwi nap min na wat yiga-t nde, kat-nen yosolar-e: ‘An-nen yidnak yidnag-et kwaroso nab-e wat yigit lak, pem-et woralik nalik ma-o’ luk yigen-o.

⁵³Kar-e nit nineid Abaram kek tak wat yid iri na anggul pem terak minik kek tak-nen yusu-a? Mbal Pem Nagawan ene lomboksa yugwi nap na war-et yiga-o. Nde, kar-e ta nggal-nen yusu-o?” luk yak tiga-o.

⁵⁴Yak togolikma-ge, Yesus-nen yosolar-e: “An-e an nambik kek tak posolat nggal-e, kek tak nibidnak iri-ge ebe lak mende yeleb-o. Alat nde, an kek tak nubusu nab-e kit-nen ‘Nineij-o’ yili Mbal Pem Nagawan iri-net kek tak nubusu-o.

⁵⁵Kir-e Mbal Pem Nagawan iri-ge kenaru bug-et nde, an-e naru-o. Nde, an-nen nde ‘At naru bug-o’ luk yosolar-e, an-e kennesiget wene yugwi kit nggal-et teleb-o. Alat nde, an-e at naru-me, at-nen yidnak yidnag-et kwarusu-o.

⁵⁶Kit kineid Abaram na-nen-e an lobok yurak tarem kamin-o perasoluk, alen min-et woragaij-o. Nde, an na lobok yosola karuk, kijik kijak yij-o” luk yij-o.

⁵⁷Yosoloma-ge, Yawuri nap na-nen at yak togolar-e: “Abuga! Kar-e olengen lima pulu-ge awo woragit lag-et nde, kar-e Abaram na kerengen kaigendik-nen yusu-a?” luk yak tiga-o.

⁵⁸Yak togolikma-ge, Yesus-nen it yak ondosolar-e: “An-e ndemeret yak kundusu-o. Abaram na ndet yigit lak ma-net an-e woraso-net yusu-o” luk yij-o.

⁵⁹Yosoloma-ge, Yawuri nap-nen at wuruwokluk kerep wanogola-ge, Yesus na-ge kurik kurak Mbal Pem Nagawan ama-nen mbirij-o.