Read Nduga YOANES 9 Bible Online

YOANES 9 - Nduga bible

YOANES 9

¹Yesus na mborosolar-e, ija arem-net erengen ngguru ndesa mbidnak nap mbi kagaij-o.

²Nde, at owosirak-nen at kin wok obogolar-e: “Mul Nondoso Nap wa-e. Ap yu erengen ngguru ndet yid yu-ge ta-nen meya yidnak pem-nen kwarij-o? At ambik meya yidnak pem, lak? Are, at eid ija-nen meya yidnak pem-a?” luk kin wok ibiga-o.

³Yogolikma-ge, Yesus-nen yosolar-e: “Ap yu min at eid ija min-nen meya yidnak pem kwarij-e lag-o. Are, Mbal Pem Nagawan amawi-ge ap yu ebem-nen nam tak posola, ap-nen kujwakluk-nen at erengen ngguru ndet yid irir-o.

⁴An nibil lobok yidnak nap-nen kwaroso mende-ge o lengge worala-net kwarogolat wolmog-o. O ndamuk ma-o. Nde, o kubu yosola-ge, ap misiger-o luk tet yabu wanurag-e meya-o.

⁵An-e nggweyak ma yu me woralar-e, an-e nggweyak ma yaya-nen yusu-o” luk yij-o.

⁶Iri yurug-e, Yesus na-ge nggweyak pem wusi puruk, nggweyak na wusi bem omok wosa, nggweyak omok worak na waga ap iri na erengen pem ndarak pij-o.

⁷Ndarak puruk, Yesus-nen at yak tosolar-e: “Siloam ugup arem kerare maril mbiri-o” luk yak tij-o. (Siloam iri-ge nit nenne bem-e Wirik Pidnag-o yogolar-o.) Yak tosoloma-ge, ap na mberarik, at erare yi masa keya buruk, erengen kuwak yamu lobok yij-o.

⁸Lobok yosola-ge, at ama nap min at-nen silobulo nggi yosolat worasola kagwi nap min-nen yogolar-e: “Koreyak-nen silobulo nggi renak woraso na-ge at yu-t lak?” luk yiga-o.

⁹Yogolikma-ge, it erep-nen yogolar-e: “Eyo. Yu-ge ar-er-o” yogola-t nde, it erep-nen-e: “Lag-o. Ap nin at nggal-nen yusu-o” yiga-o. Yogolikma-ge, ap na-nen yosolar-e: “Lag-o. An-net yusu-o” luk yij-o.

¹⁰Yosoloma-ge, it-nen at kin wok obogolar-e: “Ngge kwasa-nen kerengen kuwak yij-o?” luk yiga-o.

¹¹Yogolikma-ge, at-nen yosolar-e: “Ap unu Yesus iri na-nen nggweyak omok worak puruk an nerengen pem ndarak puruk-nen an yak norosolar-e: ‘Kar-e Siloam ugupmu kerare maril mbiri-o’ luk yak norosoloma, an-e mbirigirik, nerare yi marosola ereya na-net nerengen kuwak yij-o” luk yij-o.

¹²Yosoloma-ge, it-nen at kin wok obogolar-e: “Ap iri-ge ngge me worasu-o?” luk yogolikma, at-nen yosolar-e: “An-e naru bug-o” luk yij-o.

¹³Iri luk, ap nanduk erengen ngguru woragaid na Parisi nap endam ibil mbiriga-o.

¹⁴Nde, we woragwi tarem-nen Yesus-nen nggweyak omok wosa, ap na erengen kuwarak pij-o.

¹⁵Iri ala-ge, ap iri na tuguruk Parisi nap-nen kin wok obogolar-e: “Kat kerengen nggesa-nen kuwak tak pij-o?” luk yiga-o. Yogolikma-ge, at-nen it yak ondosolar-e: “At-nen nggweyak omok wosa an nerengen pem ndarak pamu, an-nen nerare yi marosola-ge, nerengen kuwak yij-o” luk yij-o.

¹⁶Yosoloma-ge, it Parisi nap erep-nen yogolar-e: “Iri kwarid nap iri-ge we woragwi tarem-nen kwarugwi buk na kwaril noso me, at iri-ge Mbal Pem Nagawan eram-nen lobok yidnak nab-e lag-o” luk yiga-o. Nde, it erep-nen yogolar-e: “Lag-o. Meya yoso nap-nen-e kwiye worak mende nggulok yu nggal-e nggesa-nen kwatleb-o?” luk yiga-o. Iri nggal yak kerak mbogolar-e, iri wene lit lit ngguno piga-o.

¹⁷Iri ala-ge, Parisi nap-nen ap yu na tuguruk kin wok obogolar-e: “Kat-nen-e kat kerengen kuwarak pid nap iri-ge ta-o luk eberasu-o?” luk kin wok obogoloma-ge, at-nen yosolar-e: “Ar-e Mbal Pem Nagawan ene lomboksa yoso nap-nen yusu-o” luk yij-o.

¹⁸Alat nde, at iri na-ge erengen ngguru woraso-t nde, erengen kuwarak pij-o luk, it Yawuri nap-nen inndi angin tubu yurak insili me, at eid ija wene mbo unpuruk,

¹⁹it kin wok onpogolar-e: “Yu-ge ndemeret kit kenmbara ndesa mbosolat-net erengen ngguru ndesa mbij-o luk kit-nen yili na-t, lak? Iri na-t nde ala-ge, nggesa-nen yawo erengen kuwak yij-o?” luk kin wok inpiga-o.

²⁰Yogolikma-ge, at eid ija-nen yogolar-e: “Eyo. Yu-ge nit nenmbera, ndesa mbosolat-net erengen ngguru ndesa mbid iri nar-o.

²¹Alat nde, yawo at erengen konak yid min at erengen kuwarak pid nap min iri-ge ta-nen kuwarak pij-o luk nir-e nenaru bug-o. Ar-e indi worag-et me, ar-et kin wok eber-o. At owene-ge at ondomok-net yuwa-o!” luk yiga-o.

²²It Yawuri nap-nen wene mbarogolar-e: “ ‘Yesus iri-ge Mesias-nen yusu-o’ luk para yuwa nab-e Mbal Pem Nagawan ama-nen mbo bul-o” luk mbaridnak me, it Yawuri nap enaye-nen at eid ija-nen yogolar-e:

²³“Ar-e indi worag-et me, ar-et kin wok eber-o” luk yiga-o.

²⁴Iri yogola-ge, ap nanduk erengen ngguru woragaid na tuguruk wene mbo uburuk-nen at yak togolar-e: “Kar-e Mbal Pem Nagawan imbiri bem-e ndemeret lud tag-et yi-o. Ap iri-ge nir-e nenaru-o. Meya yoso nap-net yusu-o” luk yak tiga-o.

²⁵Yak togolikma-ge, ap iri-nen yosolar-e: “At iri-ge meya yoso nap-nen yusu, lak, lag-a? Iri-ge an naru bug-o. Alat nde, an nanduk nerengen ngguru woraso-t nde, yawo nerengen kuwarak pid iri nak naru-o” luk yij-o.

²⁶Yosoloma-ge, it-nen at kin wok obogolar-e: “Ar-e ngge nde kwat kibij-o? Kat kerengen-e ngge kwasa-nen kuwarak pij-o” luk yiga-o.

²⁷Yogolikma-ge, at-nen yosolar-e: “An-e nandug-et wene na yak kindigi na-t nde, kir-e kulurak kinsili yigep na-t nde, noluk-nen kir-e tuguruk kuluwokluk yili-o? Kir-e at imin nugwi nap yuwokluk-nen yili, lak?” luk yak indij-o.

²⁸Yak ondosoloma-ge, it-nen at nggweyel obogolat-nen yak togolar-e: “Kat perak nde at ene wanoso nap-nen yusu-o. Nde, nir-e Musa ene wanugwi nap-nen yili-o.

²⁹Mbal Pem Nagawan-nen Musa wene yak toso iri perak nir-e nenaru-o. Iri alat nde, ap iri-ge nggeba-nen lobok yij-o? Nit nenaru bug-o!” luk yiga-o.

³⁰Yogolikma-ge, ap iri na-nen it yak ondosolar-e: “At-nen an nerengen kuwarak pid iri-ge kagolat-net nde, ‘Ap iri-ge ngge me-nen lobok yidnag-o? Nir-e nenaru bug-o’ yili yu-ge kir-e wi yurag-et kwatli-o.

³¹Meya yugwi nap-nen yidnak wene Mbal Pem Nagawan-e koloso bug-o luk nenaru nar-o. Alat nde, at unu kek tak pugwi nap min at indi-n pidnag-et kwarugwi nap min-nen yidnak wene perak nde, ar-e koloso-o.

³²Nggweyak yu ndak wiridnak kuri-net ija arem-net erengen ngguru ndesa mbidnak nap misik erengen kuwarak pidnak wene mbi kulugwi bug-o.

³³Ap yu-ge Mbal Pem Nagawan eram-nen nde lobok yigit lak nggal-nen-e at-nen yi kwatlik ndi kwatlik kwarurag-e meya-o” luk yak indij-o.

³⁴Yak ondosoloma-ge, it-nen at yak togolar-e: “No yusu-o? Kar-e ndesa mbosolat-net meya kobong tag-et ndesa mbigen yu-net nde, nit nggomo nundusu-a?” yak turuk, “Kar-e Mbal Pem Nagawan ama kar-e nggumomtag-e lag-o” luk langgara wirik piga-o.

³⁵Yesus-nen ap iri na Mbal Pem Nagawan ama-nen langgara wirik pidnak wene kulurug-e, ap iri na ogore luk, karuk-nen yak tosolar-e: “Kar-e Ap Ambara ebem kindi angin tubu yusu, lak?” luk yij-o.

³⁶Yosoloma-ge, ap iri-nen yosolar-e: “Nab-o. At ebem nindi angin tubu yek-nen ar-e ta nde yigen-o? Yak niri-o!” luk yij-o.

³⁷Yosoloma-ge, Yesus-nen at yak tosolar-e: “Kar-e kaigenma-o. Nde, kaigen iri na-ge yawo kat kimin wene yusu yur-o” luk yak tij-o.

³⁸Yak tosoloma-ge, ap iri-nen yosolar-e: “Kar-e Nagawan Indo keyagi-o luk kebem nindi angin tubu yusu-o” luk at endaru yunggusa kore luk, Yesus erembel wanij-o.

³⁹Iri yosoloma-ge, Yesus-nen yosolar-e: “An-e nggweyak ma yu me lobok yigi-ge ap enpem wene mbarosolar-e: Enlengen ngguru nab-e enlengen kuwarak posolat, enlengen op nab-e enlengen ngguru rak posolat yekluk-nen lobok yigi-o” luk yij-o.

⁴⁰Iri yosoloma-ge, at imin woraidnak Parisi nap erep-nen at kin wok obogolar-e: “Iri yigen iri-ge kat na nenlengen ngguru ala-nen yigen-a?” luk yogola-ge,

⁴¹Yesus-nen it yak ondosolar-e: “Kir-e kenlengen ngguru woragwi nggal-nen-e kit meya yidnak lak woraleb-o. Alat nde, kit-nen-e: ‘Nit nenlengen-e ob-o’ luk yugwi me, kir-e meya min-et worali-o” luk yak indij-o.