Read Nduga YIDNAK YIDNAK WENE 1 Bible Online

YIDNAK YIDNAK WENE 1 - Nduga bible

YIDNAK YIDNAK WENE 1

¹Teopilus wa-e. An-nen nanduk engga iri bem mbarosolar-e, Yesus-nen yidnak yidnak oboksa min nggomo indidnak oboksa min

²at lagit lak ma-nen at-nen yidnak yidnak oboksa mbatluk, Konak Indi bem-nen at-nen lenak unpuruk wirik inpidnak nap na wene yak indij-o.

³At yane wutlug-e, ar-e ndemeret uruk worasu-o luk yenggerak puwaklug-e, it inmbiri bem at na at ondomok nuk eneyasolar-e, empat pulu tarem woralar-e, Mbal Pem Nagawan-nen tenagaidnak wi wene mirik onposolat woragaij-o.

⁴It inmin woralat-nen it yak ondosolar-e: “Yerusalem yu me-ge keya buruk mbururak puk na-e. Are, Neid-nen obok yak kindidnak iri-ge towarak wolmer-o. Iri yidnak wene-ge an-nen yak kondosolat woragi nar-o.

⁵Nde, Yoanes-e we yi bem nak-nen ap yi marosolat woragaij-o. Alat nde, mariget nggal worarug-e, kir-e Konak Indi bem-nen yi mat kunpuwa-o” luk yak indij-o.

⁶Yosoloma-ge, it iri me ndok wiriga iri na-nen at kin wok obogolar-e: “Nagawan Indo wa-e. Ya tarem-e kat-nen-e Isarael nap-nen tenagaidnak wi na-ge tuguruk nininggem tak pugun-a?” luk yiga-o.

⁷Yogolikma-ge, at-nen engga yak ondosolar-e: “Yi tarem ndi tarem iri-ge an Neid ondomok amawi bem-nen lud tak pidnak iri-ge kit tet kenaru momtag-e lag-o.

⁸Nde, Konak Indi kit kenpem mbuwasolar-e, amawi rak kunpuwa-o. Konposola-ge Yerusalem-nen na, Yurea wi oboksa-nen na. Samaria-nen na, ap lak kuri-nen na irit an nowene kunggurugwi nap tugub-o” luk yak indij-o.

⁹Iri wene yak unduruk, it-nen yik karok worakmu-ge, at lek karuk lasola-ge, nggan nggan-nen muruk tak posola-ge, it-nen-e kagit lak yiga-o.

¹⁰At lasola-ge, it na-ge enlengen mbal nggwe arogo lik karok worakmu-ge, ap mberen sum loro yiridnak mimo it endam panggosa mendak woragolat-nen

¹¹it yak ondogolar-e: “Nggalilea nap wa-e. Kir-e noluk mendak-nen mbal nggwe lik karok worali-o? Kit kendam-nen keya kunpuruk lek karuk aid arem lagaid Yesus yu-ge aid arem lasola kaigep iri na nggal-et kwasa mbuma-o” luk yak indiga-o.

¹²Iri lug-e, ir-e Saitun ndobo bem-nen koroga unuwok lem Yerusalem mbiga-o. Mbogolar-e, we woragwi tarem-nen tu nugwi ndak ndak irit mbuwaiga-o.

¹³Mbuwaigarik-nen-e o silmu wok yogolar-e, o kuri worak teram iri na me-ge Peterus min Yoanes min Yakobus min Andereas min Pilipus min Tomas min Mbatolomeus min Matius min Alpius ambara Yakobus min Age worak Simon min Yakobus ambara Yuras min woragwi sa irit laiga-o.

¹⁴It pidsa min kweyap erep min Yesus ija Maria min Yesus owottak min inndi misiget tak nak puruk, tepan-e lambuksa kundugu yogolat woraiga-o.

¹⁵Misik tarem-e inndi angin tubu yidnak nab-e seratus dua pulu (120) nggal ndok worak worakmu-ge, Peterus na it ennggendumu men luk-nen yosolar-e:

¹⁶“Nanggamirak wa-e. Yuras-nen Yesus tenagaidnak nap ininggi waruk lobok yid iri-ge at urul-e nanduk Konak Indi-nen Mbal Pem Nagawan engga bem Ndaud emendam tak pidnak wene iri na mondok ndak ndak tak posolat-nen kwarij-o.

¹⁷Yuras na-ge nit ninmin lambuksa wonat ninpidnak nap na-ge nit ninmin yabu misiget yu erep wanosolat woragaid nar-o.

¹⁸Ap iri-ge at meya kwaridnak onggo pidnak tol iri na bem nggweyak misik onggo puruk, iri na me anggul sindik nggwe mbosolar-e, at embe penaksa al kilaksa mbij-o.

¹⁹Iri kwaridnak wene na-ge it Yerusalem woragwi nap pidsa-nen kuluruk yigarig-e, nggweyak iri na it enne bem unu yarogolar-e, Akal ndama irit yiga-o. Iri yogolar-e, Eyabi Nggweyag-o.

²⁰Ndawi Engga bem-nen mbarosolar-e: ‘At uwi-ge o wa mag-o. Nde, ap-nen na iri me woragit lak mag-o’ lug-e, ‘At eyabu na nin nap-nen wanugwag-o’ luk mbaridnak worasu-o.

²¹Iri bem-e nit Nagawan Indo Yesus imin nggogolat mborogolat kwarogola, ninmin pem woragwi nap misig-e

²²Yoanes-nen Yesus yi ma bid kuri-nen at nit nendam-nen laidnak kuri, nit ninmin woraidnak nap misig-e nit ninmin lambuksa Yesus uruk yidnak wene kunggurugwi nap irit mag-o” luk yij-o.

²³Yosoloma-ge, ir-e ap mberen len inpiga-o. Ap ereya unnu-ge Yusup min Matias min. Nde, Yusup na unu misig-e Mbarasabas. Nde, at elem unu-ge Yutus-o.

²⁴Yurug-e, it-nen tepan yogolar-e: “Nagawan Indo wa-e. Kar-e ap pidsa inndi karu me, ap mberen yu-ge kat kindi-nen linidnak nap irit mirik ninpi-o.

²⁵Yuras-e at ambik ondolma mborosolat-nen keya bidnak eyabu min at-nen wirik pidnak nap tak pidnak iri na min ap iri-nen wanuwak-nen-o” luk tepan yiga-o.

²⁶Iri lug-e, it-nen engga mbara ligik pigarik pem-e, engga na-ge Matias ebem mbosoloma-ge, at iri-ge it wirik inpidnak nap sebelas iri na inmin wonat ibidnak nap kwarij-o.