Read Nduga YIDNAK YIDNAK WENE 11 Bible Online

YIDNAK YIDNAK WENE 11 - Nduga bible

YIDNAK YIDNAK WENE 11

¹Wirik inpidnak nap min anggamirak tak inpidnak nap Yurea woragwi-nen kuliganggal-e, “Enlem nin nap-nen na Mbal Pem Nagawan-nen yidnak wene waniga-o” luk yogola kuliga-o.

²Kuligarik worakmu-ge, Peterus na-ge Yerusalem lasoloma-ge, it Yawuri nap-nen at met pogolat-nen

³yak togolar-e: “Kar-e iniye ambasap wabugwi buk nap enma nggwigendik mburu totno ninggeb-o” luk met piga-o.

⁴Met pogolikma-ge, Peterus-nen wene na elem ndindera yak ondosolar-e:

⁵“An-e Yope wi-nen tepan yosolat worasoma-ge, nabi nggwe nggal kasolar-e, unggut empat worak sum abak nggulok nggal misig-e unggut empat na tenaga mbal pem-nen nggweyak ma an neram mberak pil mbuwasola kagi-o.

⁶Nde, sum iri na arem kwara piriginggal-e, towe min nggweyak nggwe keyok keyok noso mende min erengen kege mende min inggi ijok empat worak yi mende ndi mende pidsa yarak kagi-o.

⁷Kasoma-ge, ene misik-nen yak norosolar-e: ‘Peterus wa-e. Men luk, wosa min-o’ luk yak nirij-o.

⁸Yak nirij-et nde, an-nen yosolar-e: ‘Nagawan Indo wa-e. Mondok lag-o. Nunggwi buk mende min wosama-o yidnak mende min iri-ge an-e nemendam mondok pil nggoso bug-o’ luk yigi-o.

⁹Iri yigi-t nde, mberen pem tak posolat-nen mbal pem-nen ene pil mbuwasolar-e: ‘Mbal Pem Nagawa-nen sarik tak pidnak tengge-ge kat-nen wosama rak pusu meyog-o’ luk yij-o.

¹⁰Iri nggal kwarosolar-e, kenan pem tak purug-e, sum nggal iri na tuguruk mbal nggwe lagaij-o.

¹¹Iri kwarosola ereya na-net Kaisaria-nen an neram wirik inpil lobok yidnak nap kenan mbi nit woraige sa o mborom wok yiga-o.

¹²Wok yogola-ge, Konak Indi-nen an yak norosolar-e: ‘Kindi angin lag-et inmin mbiri-o’ luk yak norosoloma-ge, nanggamirak ap enam yu-ge totno mbirigerig-e, ap iri na ama nggwige-o.

¹³Nggogolikma-ge, ap iri na-nen aid nap kaidnak wene yak nindij-o. At-nen kasolar-e, aid nab-e at ama mendak woralat-nen at yak tosolar-e: ‘Ap Simon unu mbi-ge Peterus iri na imin lobok yuwakluk, ab-e Yope wi yonggo eram wirik inpi-o.

¹⁴At iri-nen-e kat min kat kama woragwi nap min kinmiri yurak wene irit yak kunduwa-o’ luk yak tij-o.

¹⁵Nde, an-nen wene tel korosolat-nen yosoma ereya na-net Konak Indi-ge nanduk nit nenpem mbuwagaid na nggal-et it na enpem mbuwagaij-o.

¹⁶Mbuwasoloma-ge, Nagawan Indo-nen yosolar-e: ‘Yoanes-nen-e we yi bem ap yi ma inpij-et nde, kir-e Konak Indi bem-nen yi ma kunpuwa-o’ luk yidnak wene iri na nindi yebet kagi-o.

¹⁷Nde, nit-nen nde Nagawan Indo Yesus Kerisut ebem ninndi angin tubu yogola, yagiga wok nindid iri nggal-et Mbal Pem Nagawan-nen yagiga it na wok ondosoloma karug-e, an-nen ‘Iri yusu-ge meyog-o’ luk Mbal Pem Nagawan yak turag-e meya agaij-o” luk yak indij-o.

¹⁸Yak ondosola kulurug-e, puk lug-e, it-nen Mbal Pem Nagawan erembel wanogolar-e: “Iri ala-ge, Mbal Pem Nagawan-nen enlem nin nap wok ondosolar-e, it kondok yogola, unlug-et wolmomtak elem wanuwakluk wok indij-o” luk erembel waniga-o.

¹⁹Nde, Sepanus na wiridnak ombol nggwe-ge it erep na lel mberel onpogola, ndi yogolar-e, Penisia nde Siperus nde Antiokia nde mborogolar-e, aid wene-ge enlem nin nap yak indigit lak, it Yawuri nap nak yak indil mbiriga-o.

²⁰Alat nde, it iri na ennggenggerak ap ereb-e Siperus nap min Kireni nap min iri-ge Antiokia wok yogolat-nen-e Nagawan Indo Yesus-nen yidnak aid wene-ge Yunani nap na yak ondogolat woraiga-o.

²¹Nde, Nagawan Indo amawi-ge it inmin worala me, ap kwarat inndi Yesus ebem angin tubu yogolat, inndi nden karuk Nagawan Indo eram lobok yiga-o.

²²Nde, iri yidnak onpog-e lambuktak inpidnak nap Yerusalem woragwi-nen enaru lug-e, it-nen-e Mbaranabas na-ge Antiokia wi wirik ibiga-o.

²³Wirik ibikma, wok yidnggal-e, Mbal Pem Nagawan-nen we wok ondoso mende iri na kasolug-e, alin alen kagaij-o. Karuk, it pidsa-nen tugup lak Nagawan Indo-nen yidnak yidnak kwat tenak wolmakluk nggomo indij-o.

²⁴At Mbaranabas iri-ge konak nap, nde, Konak Indi-ge arem kobong tak pidnak nap, nde, Yesus ebem indi angin tuburak woraso me, ap kwarat Nagawan Indo eram lesa inpil mborosolat woragaij-o.

²⁵Iri lug-e, Mbaranabas na-ge Saulus ogore Tatus mbirij-o.

²⁶Mberarik, at iri na kasolug-e, Antiokia imin lobok yij-o. Imin lobok luk, lambuk tak inpidnak nap inmin lambuksa woragolar-e, ap kwarat nggomo ondogolar-e, molengen lasolat mbosolat misiget woraiga-o. Nde, Antiokia-nen-e Yesus ene wanugwi nab-e nanduk nandug-et unnu yarogolar-e, “Kerisut nab-o” luk yariga-o.

²⁷Ereya tarem-e Mbal Pem Nagawan ene lomboksa yugwi nap ereb-e Yerusalem-nen Antiokia mbiga-o.

²⁸It ereya na ennggendumu ap misik unu-ge Agapus na-nen men luk Konak Indi-ge ebem worala-nen yosolar-e: “Nogoro nggulok enpem mbosolar-e, yi wi ndi wi oboksa wok yuwa-o” luk yij-o. Iri na ndak yosolar-e, Nagawan Kelaudius iri worasola tarem-nen kwat yij-o.

²⁹Kwat yosoloma-ge, Yesus ene wanugwi nap-nen-e Yurea woragwi ennggamirak tak inpidnak nap na yongga unduwog-o luk, it komondomok insilobulo ndak ndag-et menggasa enmanggim piga-o.

³⁰Iri kwasa yigarik, silobulo na pil mborogolar-e, Mbaranabas min Saulus min ininggem pikma, ogore yidnak nap wok indil mbiriga-o.