Read Nduga YIDNAK YIDNAK WENE 14 Bible Online

YIDNAK YIDNAK WENE 14 - Nduga bible

YIDNAK YIDNAK WENE 14

¹Nde, Ikonium-nen na it wirik inpidnak nap mberen iri-ge Yawuri nap-nen tepan yugwi ma ngguruk, wene iri nggal yak ondogola-ge, Yawuri nap na irit, Yunani nap na irit, ap kwarat-nen-e inndi angin tubu yiga-o.

²Alat nde, it inndi angin tubu yigit lak Yawuri nap-nen-e it enlem nin nap enarem worakola, it-nen-e Paulus min Mbaranabas min insili rak inpiga-o.

³Alat nde, Paulus min Mbaranabas min-nen-e kwiye lag-et Nagawan Indo owene yak enderenak woragolar-e, siyak woraiga-o. Nde, Nagawan Indo-nen-e at-nen idnak we wok ondoso wene na amawi rak posolar-e, kwiye worak mende min kagwi buk mende min kwaruwakluk amawi wok indij-o.

⁴Alat nde, o iri nab-e nggaksa mberen yogolar-e, ereb-e Yawuri nap enambigit yogola, ereb-e wirik inpidnak nap mberen iri na enambigit yogola yiga-o.

⁵Nde, enlem nin nap min Yawuri nap min it-nen idnak nagawan nagawan min-nen-e wirik inpidnak nap iri na lel mberel onpogolat, kerep pem unduwokluk wene mbariga-o.

⁶Wene mbariga iri na enaru lug-e, wirik inpidnak nap mberen na-ge kwiye mborogolar-e, o Likaonia nggweyak pem o siri Listera min Nderebe min o siri ereya inggi inggi ereba nggwe mbiriga-o.

⁷Mbirigarig-e, ereba me aid wene yak indiga-o.

⁸Nde, o Listera iri me-ge ap mbi ndesa mbosolat-net ijok nggorak ndesa mbidnak me, erambet tu noso buk, koreyak nak woraso irit woragaij-o.

⁹Iri yidnak nap na-ge Paulus-nen wene yosola-ge, kolak woragaij-o. Nde, Paulus na-ge erengen ap iri na ebem kere kererak woralat-nen yik kagaidnggal-e, ap iri na indi angin tubu yidnak me, ki rak purak irit yenggerak karuk-nen

¹⁰ene ngguloksa-t yak tosolar-e: “Kat kijok-net wurungsa men yi-o” luk yak tosoloma-ge, ap iri-ge wurungsa men lug-e, lobok lik mbitlik kwarij-o.

¹¹Iri kwarosola-ge, ap kwarat ereba-nen Paulus-nen kwaridnak na karug-e, Likaonia wene bem enne ngguloksa yogolar-e: “Kugi nde ap kwat luk nit nennggendumu mbuwaiga-o” luk yiga-o.

¹²Mbaranabas na unu yarogolar-e, Sius irit yiga-o. Nde, Paulus na-ge wene yoso me, unu-ge Eremes irit yariga-o.

¹³Nde, kugi Sius amanggim kwal kwarugwi wi iri-ge o siri leget ombol nggwe iri me worak worala-ge, kwal Sius ombo na-nen-e sapi wam iye nggok min engen mimi nggora pidnak min-e o siri leget tumende bem waruk lobok yuruk, at min ap kwarat ereba na min-nen-e mberen nap na entembel wanogolar-e, wam na wat unduwokluk yiga-o.

¹⁴Yogolikma-ge, Mbaranabas min Paulus min-e wene iri na kuluruk yigarig-e, it unsum ndelak puruk, ap kwarat ndok wiridnak na ennggenggerak puburak nggogolat-nen ngguloksa yogolar-e:

¹⁵“Naptak wa-e. Kir-e noluk-nen yu ggal kwatli-o? Nir-e ki nap kit nggal-net yili-o. Nir-e aid wene yak kindil lobok yili yu-ge kir-e ebe lak mende yu nggal konmbol wok turuk, uruk nak woraso Mbal Pem Nagawan-e mbal min nggweyak min yi koma min ebem woraso mende oboksa Ndak Wiridnak Nap na eram lobok yobokluk-nen yak kindili-o.

¹⁶Nanduk ereba woragola-ge, ab-e ap pidsa-t it untula ndomok mburuwag-o luk Mbal Pem Nagawan-e yumbuk nak eneyasolat woragaij-o.

¹⁷Irit nde, at na at-net nam yaga mirik konposolat-nen konak mende nin tak nan tak wok kondosolar-e, mbal nggwe-nen talme wok kondosolat, ndilagi woragwi tarem na wok kondosolat, nunggwi mende wok kondosolat, kenalen tak konposolat yoso-o” luk yiga-o.

¹⁸Nde, wirik inpidnak nap-nen wene iri yak indiga-t nde, at kwarat ereba-nen it entembel wanogolar-e, wam wat unduwokluk lembe yiga-t nde, larok tak inpiga-o.

¹⁹Alat nde, Yawuri nap ereb-e Antiokia min Ikonium min woragwi nap wok yogolar-e, o iri nap kwarat ereba na enarem worakola, it enambigit yogolar-e, Paulus-e kerep pem wutlug-e, “Wat yamu-o” perarug-e, lit kuruk o siri leget ombol nggwe pil mbiriga-o.

²⁰Alat nde Yesus ene wanugwi nap iri na at eralu lop lop worak worakmu-ge, at na menluk, tuguruk o siri iri na me nggwij-o. Nene luk kub-e, Mbaranabas imin luk o Nderebe mbiriga-o.

²¹Nde, it-nen o iri me-nen aid wene yogola-ge, ap kwarat-nen Yesus ene waniga-o. Wanogolikma-ge, it mberen nabe-e unuwok lem Listera wok Ikonium wok Antiokia wok yiga-o.

²²Iri me wok lug-e, Yesus ene wanugwi nap na inndi wi yakolat-nen it inndi angin tubu yidnak pem tugup lak wolmakluk nggomo indiga-o. It-nen yogolar-e: “Nir-e Mbal Pem Nagawan-nen tenagaidnak wi nggurak pem mondok andi bandi kwarat karuk-net nggurag-o” luk yak indiga-o.

²³Nde, it wirik inpidnak nap-nen-e lambuk tak inpidnak nap o nin me nin me woragwi na ennggendumu ogore yidnak nap mendak inpil lobok yiga-o. Mendak onpogolar-e, mburu ninggit lak tepan nak yogolat-nen ogore yidnak nap ereba na-ge ebem inndi angin tubu yidnak Nagawan Indo na eram kegera inggem inpiga-o.

²⁴Iri lug-e, ir-e o Pisiria nggwe-nen-e o Pampilia wok yiga-o.

²⁵Aid wene-ge Perega-nen yuruk, Atalia mbiga-o.

²⁶Iri me-nen e koma arem mbirigarig-e, nanduk-nen it mberen nap na-ge yanem worok tak piga yabu iri-ge Mbal Pem Nagawan-nen we wok ondoso elem pem yabu na wanuwakluk Mbal Pem Nagawan inggem kegera keya inpidnak sa Antiokia iri me tuguruk wok yiga-o.

²⁷Iri na me wok lug-e, lambuk tak inpidnak nap na ndok worak unpuruk, Mbal Pem Nagawan-nen it inmin kwaridnak mende pidsa-t kenggera yak ondogolat, Mbal Pem Nagawan-nen enlem nin nap inndi angin tubu yurak tu kuwarak pidnak wene na yak ondogolat yiga-l.

²⁸Yak undurug-e, o iri me-ge it mberen nap na-ge Yesus ene wanugwi nap inmin siyak woraiga-o.