Read Nduga YIDNAK YIDNAK WENE 16 Bible Online

YIDNAK YIDNAK WENE 16 - Nduga bible

YIDNAK YIDNAK WENE 16

¹Nde, iri lug-e, Paulus na-ge o Nderebe min Listera min ereya na me-t wok yij-o. Iri me-ge indi angin tubu yidnak nap misik unu-ge Timotius irit woragaij-o. At ija-ge Yawuri kwe, indi angin tubu yidnak kwe-t nde, at eij-e Yunani nab-o.

²Nde, Timotius iri-ge at anggamirak Listera woragwi-nen na Ikonium woragwi-nen na erembel wanugwi nab-o.

³Nde, Paulus na-ge Timotius na imin mbururak perasolar-e, iye ambasap wabij-o. Iri yid iri-ge, o iri em woragwi Yawuri nap pidsa-nen-e at eij-e Yunani nap enaru me, it inndi aye-nen iye ambasap wabij-o.

⁴Nde, ir-e o siri nin wok nan wok mborogolat-nen o ereba woragwi nap yak ondogolar-e, it wirik inpidnak nap min ogore yidnak nap min-nen Yerusalem-nen mbaridnak wene na yak unduruk: “Kit-nen na iri-nen yidnak yidnak nak kwarer-o” luk yak indil indil mbririga-o.

⁵Iri nggal kwaril nogolar-e, lambuk tak inpidnak nap inndi angin tubu yidnak na inndi wi ya bil mborogola-ge, ap ereb-e it inmin misik nambek misik nambek ap kwarat yiga-o.

⁶Nde, Konak Indi-nen-e: “Asia nggweyak pem aid wene yurak pug-o” luk yak ondosoloma-ge, it na-ge o Perigia min Nggalatia min waring kaiga-o.

⁷Nde, ir-e Misia wok lug-e, Mbitinia nggweyak pem ngguwokluk yiga-t nde, Yesus Indi-nen-e puk tak inpij-o.

⁸Puk tak onposoloma-ge, ir-e Misia nggwe-nen-e Teroas mbiga-o.

⁹Nde Paulus-nen kubu nggwe nabi nggal kasolar-e, Makeronia nap misik men luk, at emengen mbarosolar-e: “Makeronia yu me yongga nindil ndil sug-o” luk yak tij-o.

¹⁰Nde, Paulus na-nen nabi nggal iri kasoloma ereya na-net Mbal Pem Nagawan-nen aid wene it yak unduwakluk yonggo ninpij-o luk ninndi yebet karug-e, nir-e ndaget nak Makeronia iri me mburuwokluk yige-o.

¹¹Nir-e Teroas-nen e koma arem mborogolar-e, nok nok Samoterake wok luk, kup-nen-e Neyapolis wok yige-o.

¹²Iri me-nen Oroma nap-nen tenagaidnak wi Pilipi wok yige-o. Nde, Makeronia nggweyak pem o siri nggulog-e Pilipi irir-o. Nir-e o iri me woragolar-e, siyak woraige-o.

¹³Nde, weworagwi tarem-e nir-e o siri leget amberam nggwe yi eyak pem mbirigerig-e, yu me-ge tepan yugwi sa-o luk nenarem peragoluk, iri me kore lug-e, iri me ndok wiridnak kwami inmin-e wene yogolat woraige-o.

¹⁴Nde, kwami ereba na ennggenggerak nenne kulid kwe misik o siri Tiatira kwe unu-ge Liria irit woragaij-o. Kwe iri-ge kiloga sum onggo wanoso-o. At iri-ge Mbal Pem Nagawan erembel wanoso kwe-o. Nde, Nagawan Indo-nen kwe na indi tu kuwarak posola-ge, Paulus-nen yidnak wene-ge kwara kuluruk, wanij-o.

¹⁵Wanosoluk, kwe na min at ama woragwi nap pidsa min yi marak onpogolikma-ge, kwe na-nen nit nenmengen mbarosolar-e: “Kit-nen nde an lombot nuburuk, an-e ndemeret Nagawan Indo ebem nindi angin tubu yidnak ala neyarug-e, an nama mburulndik, iri me totno wolmog-o” luk kiri keresa yak nondosolat woragaij-o.

¹⁶Misik tarem-e tepan yugwi sa iri na me mburukmu-ge, ndegel onposo kwe misik imin lid pid yige-o. Kwe iri-ge kugi arem nggwidnak me, tu mbal ondosola-ge onggo wok togola, eidtak ereba na tol kwarat wok tenak woragwi-o.

¹⁷Nde, kwe na-ge Paulus min nit min ninmbirik langgal nunpuruk lobok yosolat-nen ene nggoksa yosolar-e: “It yu-ge Mondok Kek tak Mbal Pem Nagawan ndegel ubugwi nap-nen yili-o! Kit kinmiri yurak tula mirik kinpili-o!” luk yij-o.

¹⁸Iri nggal kwarosolar-e, kwarat tarem nggal nene yij-o. Alama, Paulus na puk momtag-e meya alama-ge, nden karuk, kugi na yak tosolar-e: “Yesus Kerisut unu bem kwe yu arem-nen mbiri-o” luk yak tosola ereya na-net kugi na-ge kwe na arem-nen mbirij-o.

¹⁹Mborosola-ge, kwe na eidtak-nen piriganggal-e, tol lesa wanugwi na lak alama-ge, it-nen-e Paulus min Silas min tena unpuruk wene mbarugwi nap endam onggo wanugwi sa entabit lit eneyaruk mbiriga-o.

²⁰Lit eneyaruk mbirigarik, o iri me nagawan endam wok yogolat-nen yak ondogolar-e: “It yu-ge Yawuri nab-o. It yu-nen nit nenma yu nari wari rak pili-o.

²¹It yu-nen yogolar-e: ‘Nit-nen kwarugwi mende yu waner-o’ luk mirik ninpili iri-ge nir-e Oroma nap me, it-nen kwarugwi mende iri-ge nit-nen wanogolat, kwarogolat kwarurag-e meya-o” luk yiga-o.

²²Iri me woraidnak nap kwarat-nen na men yogolat-nen mberen nap na ondogola, o iri me nagawan ereba na-nen mberen nap unsum ndela keya buruk-nen yogolar-e: “Linggamburok yembaksa ender-o” luk yiga-o.

²³Yogolikma-ge, linggamburok kwarat pem ondogoluk, o kubu me peleksa mbo inpil nggogolar-e, o kubu me yik karok woraso nap iri na yak togolar-e: “It yu mburugu-o. Kar-e kwil kwalsa yik eneyarok wolmin-o” luk yak tiga-o.

²⁴Yak tiga iri na ndak ndag-et kwarosolar-e, mberen nap na-ge o kubu me kuri worak ennggendumu iri na me inpil ngguruk, unuwog-e e uru pelak arem mon karuk, kere kamarak pij-o.

²⁵Alat nde, nggiringgendumu nggal-e Paulus min Silas min-e tepan yogolat, ndawi bem Mbal Pem Nagawan erembel wanogolat woragola-ge, o kubu me inpil nggwidnak nap erep-nen kologolat worakmu

²⁶ereya na-net o nuk nggulok pare kasolar-e, o kubu wi wiridnak paro na lele rak pij-o. Posolar-e, tumende pidsa yuwak kuwak mbosolat, kere kamat inpidnak pidsa wosok yosolat agaij-o.

²⁷Nde o kubu me yik karok woraso nap na indi luk luk, yik kagaidnggal-e, tumende pidsa kuwarep mbuwarep tak alama-ge, it o kubu me inpil nggwidnak nap pidsa mbirikma kagi perasolug-e, at ambikpebe wat korayekluk eyalawi lit kagaij-o.

²⁸Iri kwarosola karug-e, Paulus-nen ene nggoksa yak tosolar-e: “Kar-e kambikpebe wat korasu-ge meyog-o. Nit pidsa yu me worali-o” luk yij-o.

²⁹Yosoloma-ge, at-nen “Tal warug-o” luk, puburak mborosolar-e, kwiye-nen owak kot kot min-et Paulus min Silas min endam erare nggwe tud yij-o.

³⁰Iri lug-e, mberen nap na mbepme inpil wasolat-nen yak ondosolar-e: “Naptag-o. An nimiri yuwakluk, an-e no kwarimin-o?” luk yij-o.

³¹Yosoloma-ge, it-nen at yak togolar-e: “Kat kindi Nagawan Indo Yesus ebem angin tubu yosola-ge, kat min kat kama woragwi nap min kinmiri yaga wok kunduwa-o” luk yiga-o.

³²Yurug-e, Nagawan Indo-nen yidnak wene-ge at yak togolat, at ama woragwi nap pidsa yak indiga-o.

³³Yak ondogolikma-ge kubu nggwe ereya na-net o kubu me yik karok woraso nap na-ge mberen nap na inmin mberarig-e, indidnak ud na yi masa keya inpij-o. Onposoloma ereya na-net at min at ogwe la pidsa inmin-e yi ma rak inpiga-o.

³⁴Ir lug-e, mberen nab-e at ama inmin mberarig-e, nunggwi mende mak indij-o. Nde, it inndi-ge Mbal Pem Nagawan ebem angin tubu yidnak me, at min at ama woragwi nap min-e enalin enalen kaiga-o.

³⁵O na nda yosoloma kub-e, o iri me nagawan-nen polisi wirik onpogolar-e: “Ap ereya-ge wesera wirik unpurag-o” luk yiga-o.

³⁶Yogolikma-ge, o kubu me yik karok woraso nap na-nen wene iri lomboksa Paulus yak tosolar-e: “O yu me nagawan-nen kit wisirik kunpurag-o luk wene pil lobok yidnak me, kir-e yawo mborogolar-e, kinndi yek tag-et mberer-o” luk yak tij-o.

³⁷Alat nde, Paulus-nen polisi na yak ondosolar-e: “Nir-e Oroma nab-et nde, nenpem wene mbenarigit lag-et, ap inmbiri bem linggamburok nunduruk, o kubu me peleksa ninpil nggwiga na-t nde, yawo-nen-e mbik mbok nak wirik nunpurak yili-a? Iri yurag-e mondok lik lak sa-o! Ir-et lobok yuwarik-nen wirik nunpuwag-o” luk yak indij-o.

³⁸Yak ondosoloma-ge, polisi ereba na-nen iri yidnak wene na o iri me nagawan yak ondogolikma-ge, Paulus min Silas min na-ge Oroma nap ala kuluruk, kwiye kaiga-o.

³⁹Karug-e, mberen nap na endam lobok luk, “Nit nde meya yigerig-o” yak indiga-o. Yak unduruk, mbepme inpil waruk, “Naptag-o. Nenma yu me wolmomtak pug-o. Mberer-o” yak indiga-o.

⁴⁰Yak ondogola-ge, it mberen nab-e o kubu me-nen mbirigarig-e, Liria ama ngguruk, ennggamirak tak inpidnak nap na inmin lambuk luk, inndi eyak wutlug-e, mbiriga-o.