Read Nduga YIDNAK YIDNAK WENE 17 Bible Online

YIDNAK YIDNAK WENE 17 - Nduga bible

YIDNAK YIDNAK WENE 17

¹Nde, mberen nap na-ge Ampipolis min Apolonia min nggwe-nen Tesalonika wok yiga-o. Iri me-ge Yawuri nap-nen tepan yugwi wi mbi woragaij-o.

²Nde, Paulus na-ge at nggoso ereba na nggal-et Yawuri nap-nen tepan yugwi wi iri na me we woragwi tarem kenan pem nggwerenak worasolar-e, Mbal Pem Nagawan engga bem mbaridnak wene-ge o ereba nap yak ondosolat woragaij-o.

³Wene na nam para mirik onposolar-e, Mesias na-ge mondok andi bandi karuk, wat yidnak nap ennggendumu-nen men momtak wene na mirik onposolat woragaij-o. Iri luk, at-nen yosolar-e: “An-nen yak kundusu nap Yesus yu-ge Mesias-net yusu-o” luk yij-o.

⁴Yosoloma-ge, ap ereb-e wene na puksa wanogolar-e, Paulus min Silas min enambigit yiga-o. Nde, Mbal Pem Nagawan aye worak Yunani nap kwarat min unnu worak kweyap kwarat min-nen na it enambigit yiga-o.

⁵Alat nde, Yawuri nab-e enlengen ale lug-e, onggo wanugwi sa-nen we nak woragwi meya nap kwarat ndok worak unpuruk, o iri na me laga mbaga rak pogolar-e, inni enne rak piga-o. Iri kwarogolar-e, Paulus min Silas min-e ap Yason ama worali-o luk, ap kwarat endam inpil lobok yuwog-o peragolug-e, Yason uwi na mijaruwokluk yiga-o.

⁶Alat nde, mberen nap na onkore luk, eneyagit lak alama-ge, Yason min enggamirak erep na min lit eneyaruk, o iri me nagawan endam wok unpuruk mborogolat-nen enne nggoksa yogolar-e: “Yi wi ndi wi pidsa laga mbaga rak pugwi nap na-ge o yu me lobok yogola-ge,

⁷Yason yu-nen ama rak inpij-o. It pidsa-nen-e Kaisat-nen yidnak yidnak tarogolar-e: ‘Nagawan misik unu-ge Yesus-o’ luk yili-o” luk yiga-o.

⁸Yogolikma-ge, wene iri na kulurug-e, ap kwarat ereba min o iri me nagawan ereba min-e inndi kabak yiga-o.

⁹Nde, Yason min it erep min-nen-e onggo pogola karuk, wisirik inpiga-o.

¹⁰Nde, o ndamuk yosola ereya na-net ennggamirak tak inpidnak nap iri me woragwi-nen Paulus min Silas min-e Mberea wirik inpiga-o. Iri me wok lug-e, it-nen-e Yawuri nap-nen tepan yugwi ma nggwiga-o.

¹¹O iri me woragwi Yawuri nap iri-ge it Tesalonika woragwi Yawuri nap nggal-e lag-o. Inndi konak irit woragolar-e, aid wene-ge enalen min-et wanogolat, iri yili wene-ge ndemeret wene, lak? luk enaru moklug-e, Mbal Pem Nagawan Engga-ge pempa mbenarogolat woraiga-o.

¹²Woragolar-e, ereba woragwi nap kwarat-nen inndi angin tubu yiga-o. Nde, unnu worak Yunani kweyap kwarat min Yunani nap ap kwarat min-nen na inndi angin tubu yiga-o.

¹³Alat nde, “Paulus na-ge Mberea-nen na Mbal Pem Nagawan-nen yidnak wene yusu-o” yogola kulurug-e, Tesalonika woragwi Yawuri nap nap iri me lobok yigarik, it kwarat ereba na enarem woraga pil nggogolat, insilepma rak onpogolat yiga-o.

¹⁴Iri yogola-ge, enggamirak tak inpidnak nap-nen Paulus na yi koma eyak pem nggwe ndaget nak wirik piga-t nde, Silas min Timotius min na-ge Mberea-t woraiga-o.

¹⁵Nde, Paulus na imin mbiriga nab-e at ndemera Atena ibiga-o. Uburuk, it na mborogola-ge, “Silas min Timotius min na ndaget nak an neram lobok yuwag-o” luk Paulus-nen wene wosa enpem posoloma, unuwok lem mbiriga-o.

¹⁶Nde, Paulus na-ge mberen nap na yik eneyarok Atena worasolar-e, o iri me-ge kugiwak-nen yebet yidnak karuk, at indi puru kwarat agaij-o.

¹⁷Iri bem-e, at-nen-e Yawuri nap-nen tepan yugwi ma-nen-e Yawuri nap min Mbal Pem Nagawan aye kagwi enlem nin nap min inmin-e wene eyak wat wat yogolat, pelin na pelin na onggo wanugwi sa-nen na it imin lid pid yidnak nap inmin wene eyak wat wat yogolat woragaij-o.

¹⁸Nde, ap nggomo undugwi nap ereb-e Epikuros nap min Stoa nap min-e Paulus imin wene onggo onggo yogolat-nen it erep-nen imin yogolar-e: “Indi-ge mbirigit lag-et wene yoso yu-ge no wene yusu-o?” luk yiga-o. Nde, at-nen Yesus owene min at uruk yidnak wene min yak ondosola, it erep-nen yogolar-e: “Ap yu-ge ap sal unkugi owene yoso-o” luk yiga-o.

¹⁹Nde, at na tenaga Areopagus endam ibil mborogolat-nen yogolar-e: “Kat-nen wene ngget mul undusu yu-ge nit nenaru yurag-e ob-a?

²⁰Kat-nen yusu wene ereba-ge nit neneyanggoma-ge wi yurak wene nde yusu-o. Iri bem-e, kat-nen yusu wene yu-ge no yosolat-nen yusu-o luk nit nenaru yuwog-o” luk yiga-o.

²¹Nde, Atena nap ereba min ap sal erepma-nen lobok yidnak Atena woragwi nap min-e inndi nin-e yebet kagit lak, are, ngget wene mbi mul ondogolat, ngget wene mbi kologolat wolmomtak inndi nak woraiga-o.

²²Woragola-ge, Paulus na-ge Areopagus ennggendumu men luk-nen yosolar-e: “Atena nap wa-e. Kit-nen yi mende ndi mende kwarogolar-e, mondok kwiye min-et kugi unu kek tak pogola, keneyagi-o.

²³An-e kit kenma yu me waring kasolat-nen kit-nen erembel wanugwi kunkugiwak na kil kil mborosolar-e, kugi amanggim wam wosa pugwi sa misik pem-e yik kaginggal-e, ‘Nenaru buk kugi amanggim-o’ luk yaga mbaridnak irit kagi-o. Nde, kenaru bug-et nde erembel wanugwi iri-ge an-nen nam para yak kundusu-o.

²⁴Nggweyak min ebem woraso mende pidsa min ndak wiridnak nap Mbal Pem Nagawan iri-ge Mbal min nggweyak min ombol pem Nagawan Indo-nen yusu-me, ap ininggi-nen wiridnak kwal uwi iri me woraso bug-o.

²⁵At-nen-e ab-e ap pidsa unluk yaga wok ondosolat, indisep wok ondosolat, yi mende ndi mende wok ondoso me, at-nen lak mende mbi mondok lak me, ap ininggi-nen at ndegel uburag-e lag-o.

²⁶At-nen-e nggweyak yu ebem yi wi ndi wi pidsa wolmakluk, ap misiget ebem nak-net nde, ab-e ap enlem pidsa ndak worak inpij-o. Ndak worak unpurug-e, it wolmomtak tarem min it unuwi nggweyak min kuri wosa arik tak mbara wok indij-o.

²⁷Ap-nen Mbal Pem Nagawan ogore yuwakluk-nen ndak worak inpij-o. Ar-e nit nenambiktak lombok ninmin koroga worasu-t nde, at ogore yogolar-e, ininggi pak pak kore yugwi nggal at tenaga wok ubuwakluk ndak worak inpij-o.

²⁸‘At ebem-nen nunluk woragolat, nuntugup worak woragolat yili-o.’ Kit-nen idnak ndawi engga mbarugwi nap-nen na iri nggal yogolar-e: ‘Nit na at-nen wigal ninpidnak-nen yili-o’ luk yiga-o.

²⁹Nde, nir-e Mbal Pem Nagawan-nen wigal ninpidnak me, nit ninndi-nen peragolar-e, Mbal Pem Nagawan abage-ge emas posid min perak posid min kerep min-nen ap inndi tenggerak pem ininggi-nen konidnak mende ereba ndak ndak-nen yusu-o luk pururak pug-o.

³⁰It enaru buk woraiga tarem-e Mbal Pem Nagawan-nen we yik nak eneyaruk keya inpij-et nde, yawo-nen-e yi wi ndi wi worali nap pidsa ‘Kondok yer-o’ luk yak undusu-o.

³¹Nde, at-nen-e ab-e ap pidsa enpem wene lud tak nak mbarurak tarem-e ndak worak pidnak worasu-o. Nde, ap enpem wene mbaruwakluk at-nen-e ap misik mendak pij-o. Iri yidnak nab-e wat yidnak nap ennggendumu-nen uruk tak pamu me, nenpem wene mbaruwa-o luk ap pidsa enaru rak pij-o” luk yij-o.

³²Nde, it-nen-e wat yidnak nap uruk tak pidnak wene na kulurug-e, ap ereb-e nggweyel ibiga-t nde, it erep-nen yogolar-e: “Wene yu-ge tuguruk kuluwok-nen misik tarem na yurag-o” luk yiga-o.

³³Yogolikma-ge, Paulus na-ge it ennggendumu-nen mbirij-o.

³⁴Alat nde, ap erep-nen-e at ambigit yogolar-e, inndi angin tubu yiga-o. Nde, it ennggendumu-nen-e Areopagus nap misik unu-ge Ndionisius iri na min kwe Ndamaris min ap erep inmin lambuksa inndi angin tubu yiga-o.