Read Nduga YIDNAK YIDNAK WENE 19 Bible Online

YIDNAK YIDNAK WENE 19 - Nduga bible

YIDNAK YIDNAK WENE 19

¹Apolos-e Korintus worala-ge, Paulus-e o siri anggul nggwe ereba waring kil kil-e Epesus wok yij-o. Iri me-ge Yesus ene wanugwi nap erep inmin lambuk lug-e,

²at-nen it kin wok onposolar-e: “Kit kinndi angin tubu yigep tarem-e, Konak Indi wanigep, lak?” luk kin wok onposoloma-ge, it-nen yogolar-e: “Konak Indi worasu-o luk obok na kulugwi buk me, wanigit lag-o” luk yiga-o.

³Yogolikma, Paulus-nen it yak ondosolar-e: “Iri ala-ge, yi ma unpugwi mende-ge no bem-nen yi ma kinpidnag-o?” luk kin wok onposoloma-ge, it-nen yogolar-e; “Yoanes-nen ap yi ma onposo bem-o” luk yiga-o.

⁴Yogolikma-ge, Paulus-nen yosolar-e: “Yoanes-nen yi ma onposo iri-ge kondok yidnak nap nak yi ma onposolat-nen it yak ondosolar-e: ‘An nimbirik lobok yuwa nap iri ebem mondok kinndi angin tubu yurag-o’ luk yid iri-ge Yesus min-et yij-o” luk yak indij-o.

⁵Yak ondosola kulurug-e, Nagawan Indo Yesus unu bem-et yi ma inpij-o.

⁶Yi ma unpurug-e, Paulus na inggi it enpem posoloma-ge, Konak Indi-ge it enpem mbuwasolar-e, nin wene nan wene bem yogolat, aid wene yiga-o.

⁷It pidsa wonasa ab-e duabelas nggal-o.

⁸Iri rak puruk, Paulus na-ge waneya kenan iri me woasolar-e, Yawuri nap-nen tepan yugwi ma nggwerenak worasolat, kwiye lag-et yosolar-e, Mbal Pem Nagawan-nen tenagaidnak wi wen-ge kwara enaru rak onposolat woragaij-o.

⁹Alat nde, ap erep-nen-e inndi amawi yogolar-e, inndi angin tubu yigit lak lug-e, ap kwarat iri na inmbiri bem Nagawan Indo Urula kimirik puwokluk yiga-o. Yogolikma-ge, Paulus-nen it keya unpuruk, Yesus ene wanugwi nap na lena enarik tak unpurug-e, Tiranus-nen ap mul ondoso sa iri na me-nen pelin na pelin na wene yosolat woragaij-o.

¹⁰Wene iri yik tenak woralar-e, olengen ebis-et mberen worasola-ge, Asia woragwi nap oboksa Yawuri nap-nen na irit, Yunani nap-nen na irit Nagawan Indo-nen yidnak wene kuliga-o.

¹¹Nde, Mbal Pem Nagawan-nen kwiye worak mende ija lombok Paulus ebem-nen kwarij-o.

¹²Iri kwarosolar-e, Paulus irigak ndogwaroso sum ala na, yirik woraso sum ala na ap kugi worak enpem pogola-ge, kugi lak yosolat, enarem woraidnak kugi na mborosolat yij-o.

¹³Nde, it kugi wirik pil waring kagwi Yawuri nap erep-nen na Nagawan Indo Yesus unu bem kugi enarem nggwidnak nap kugi wirik puwokluk yogolar-e, it-nen kugi na yak togolar-e: “Paulus-nen yil nusu Yesus unu bem yak kurusu-o” luk yiga-o.

¹⁴It iri kwarugwi nap iri-ge Yawuri nap tepan ombo nggulok unu Sekewa na ilirak tuju-nen kwariga-o.

¹⁵Alat nde, kugi na-nen it yak ondosolar-e: “Yesus iri-ge an-e naru-o. Paulus iri na naru-t nde, kir-e tarak-nen yili-o?” luk yij-o.

¹⁶Yurug-e, kugi arem nggwidnak nap-nen it enarik tak yemen unpuruk, yerel werel pem worak enpamu, it na-ge o iri me-nen mborogolar-e, mep-nen enpe ngenwa irit mbiriga-o.

¹⁷Iri karug-e, Epesus woragwi nap pidsa, Yawuri nap-nen na irit, Yunani nap-nen na irit wene na enaru lug-e, it pidsa kwiye kwarat kagolar-e, Nagawan Indo Yesus na unu nak mondok kwara kek tak pogolat woraiga-o.

¹⁸Nde, it inndi angin tubu yidnak nap, ap kwarat-nen lobok yogolar-e, it-nen na meya iri nggal kwaridnak na para nam tak piga-o.

¹⁹Iri kwarogolar-e, it kwal ombo kwarat-nen na it onkwal kwarugwi enengga mbarak ndok wosa ap kwarat inmbiri bem kan piga-o. Nde, kan piga engga mbarak ereba onggo pidnak tol wonarogolar-e, perak tol-e kwarat lombok (50,000) pidnak irit kan piga-o.

²⁰Iri nggal kwarogolar-e, Nagawan Indo-nen yidnak wene-ge mondok wigak yosolat, mondok amawi yij-o.

²¹Iri rak purug-e, Paulus indi-nen konosolar-e, Makeronia wok Akaya wok lug-e, Yerusalem wok yil mbirimin-o peragaij-o. Perasoluk, at-nen yosolar-e: “Iri me wok lug-e, Oroma min-et mondok kamin-er-o” luk yij-o.

²²Nde, at yongga tugwi nap mberen, Timotius min Erastus min Makeronia nanduk wirik inpij-o. Alat nde, at ariget nak siyak Asia iri me woragaij-o.

²³Ereya tarem-e Nagawan Indo Urula lit lit nari wari kwarat mbiga-o.

²⁴Ap misik unu-ge Ndemeterius iri-ge perak posid pem konoso nap irit woragaij-o. At iri-nen-e kugi kwe Aretemis erembel wanugwi wi amorok perak posid pem ndak wosa kondinak iri na bem onggo lesa wanogolar-e, at min at totno eyabu wanugwi nap min-e tol kwarat wanugwi-o.

²⁵Iri bem-e at iri-nen at totno eyabu wanugwi nap min yabu misiget erep wanugwi nap erep min ndok worak unpuruk, at-ne it yak ondosolar-e; “Naptag-o. Nir-e yabu yu bem-e nit-nen ukwe peragwi mende-ge mondok ndak lesa wanugwi-ge kenaru nar-o.

²⁶Nde, Epesus yu me nag-e lag-o. Are, Asia nggweyak yi wi ndi wi pidsa-nen na ap Paulus iri-nen-e ap enarem woragosolat, inndi nden eneyasolat yusu iri-ge kit-nen kagolat kologolat kwatli irir-o. At iri-nen yosolar-e: ‘Ap ininggi-nen konidnak mende iri-ge erembel wanugwi Mbal Pem Nagawan-e lag-o’ luk yusu-o.

²⁷Wene iri nggal yosolar-e, nit neneyabu yu-ge imbiri lamut tak posolat, nde, unu kek tak kugi kwe Aretemis wi na min-et ebe lak mende rak posola-ge, Asia woragwi nap pidsa-nen na yi wi ndi wi-nen na erembel wanugwi kugi kwe na unu kek tak woraso na lak tak puwa-o” luk yij-o.

²⁸Iri yosola kulurug-e, it insilepma kwarat luk, enne ya mba mbogolat-nen yogolar-e: “Epesus nap unkugi Aretemis iri-ge nggulok-net yusu-o” luk yiga-o.

²⁹Yogolikma-ge, o siri iri me-ge nari wari mbogolar-e, ap kwarat ereba-nen-e Paulus imin waring kagwi Makeronia nap mberen Nggayus min Aristarakus min na lit unpuruk mbirigarik, keyari pugwi wi iri me inmin nggwiga-o.

³⁰Nde, Paulus na-ge ap kwarat iri na ennggendumu nggweyekluk yij-et nde, Yesus ene wanugwi nap-nen-e larok tak ibiga-o.

³¹Nde, it Asia woragwi nagawan Paulus anggamirak yidnak nap erep-nen wene wosa at eram wirik pogolar-e: “Nab-o. Keyari pugwi wi iri me nggurak pug-o” luk yak tiga-o.

³²Nde, o iri me ndok wiriga nap ereba-nen-e enne ya mba mbogolar-e, it erep-nen-e “Iri nggal-o” luk yogolat, it erep-nen-e “Yu nggal-o” luk yogolat, nde, it ennggendumu ndok wiriga ap kwarat nggal-nen-e “Wene ngge erep pem ndok wirige-o?” luk inndi kabak yiga-o.

³³Yogolikma-ge, Yawuri nap-nen Aleksandet na wene yuwakluk mendak pogola-ge, ap kwarat-nen-e: “Wene yu yak nindi-o” luk yak togolikma-ge, at-nen wene iri nggal-o luk wesera yak endeyeklug-e, inggi warok pem “Kenne meyog-o” yij-o.

³⁴Alat nde, it-nen lombot piganggal-e, at iri-ge Yawuri nap ala karug-e, it lambuksa enne ya mba renak woragolat-nen yogolar-e: “Epesus nap unkugi Aretemis iri-ge nggulok-net yusu-o” luk yogolar-e, jam mberen lak tak piga-o.

³⁵Iri lug-e, o iri me engga mbaroso nap mbi-nen it unsune lak tak puruk-nen yosolar-e: “Epesus nap wa-e. O Epesus wi yu me-nen-e kugi kwe Aretemis nggulok na uwi min at amorok ndak worak mbal pem-nen mbuwaidnak min kir-e yik karok woragwi-o luk ap misiger-o luk tet nggweyak ma yu-nen-e iri aru buk nab-e ta-o?

³⁶Wene yanem yigi iri-ge onggo onggo yugwi buk me, kir-e kunsune lak luk, mija lele yi kwatlik ndi kwatlik kwarurak pug-o.

³⁷Inpil lobok yigep nap yu perak nde, nunkugi ma woraso mende yariya wanili, nunkugi obok pilik kwarugwi buk nab-et nde inpil lobok yigeb-o.

³⁸Iri ala-ge, Ndemeterius min at totno eyabu wanugwi nap min-nen wene tup tup mbi ap enpem purak worala-ge, wene mbarugwi sa min wene mbarugwi nap min worali me, it ponok ponok iri me mburuwarik-nen yu nggal-o, iri nggal-o luk mbenasa yuwag-o.

³⁹Alat nde, kit-nen wene mbi yurak peraidnak worala-ge, wene mbenaruwakluk mendak inpidnak nap inmbiri bem nak nggaruk tak purag-o.

⁴⁰Nit yawo o yu laga mbaga rak pige yu bem-e wene nenpem purak worasu-o. Nde, nit ndok wirigerik nari wari mbige yu-ge elem-e yu bem-nen kwarige-o yurag-e lak me, ninnggiri kul-o” luk yak indij-o.

⁴¹Iri yak undurug-e, ap ndok wiriga na-ge ndi rak inpidj-o.