Read Nduga YIDNAK YIDNAK WENE 2 Bible Online

YIDNAK YIDNAK WENE 2 - Nduga bible

YIDNAK YIDNAK WENE 2

¹Nde, Pentakosta iri na ndak ndak wok yosola tarem-e it oboksa-ge o misik me lambuksa woraiga-o.

²Worakmu-ge, mimo ereya na-net mbal nggwe-nen obube nggal kwarat puk kil mbuwasolar-e, ene pu iri na-ge it koreyak woraidnak sa o ma irit yebet yij-o.

³It na yik karok worakmu-ge, kan amare tinggiringgi nggal wiyuluk, it komondomok enpem pak yosola kaiga-o.

⁴Pak yosola-ge, Konak Indi-nen it pidsa kobong tak onposola, Konak Indi-nen wene yaga wok ondosol-ge, ir-e nin wene nan wene bem yogolat woraiga-o.

⁵Iri tarem-e Yawuri nap, Mbal Pem Nagawan indi aye worak nab-e yi wi ndi wi-nen lobok yidnag-e Yerusalem irit woraiga-o.

⁶Ene pu iri kuluruk, ap kwarat kil ndok worogola-ge, it wirik inpidnak nap na-nen wene yogola-ge, it pidsa enne ndomok yidnak kolak woragolar-e, wendet luk inndi kabak yiga-o.

⁷Kwiye karuk, wi langgu mbatluk, it pidsa-nen yak kerak mbogolar-e: “Ap yu-ge pidsa Nggalilea nab-et nde,

⁸nggerak puruk-nen nit pidsa ndet ninpidnak sa nenne lombok pem yogola kulili-o?

⁹Nir-e Paratia nap min Meria nap min Elam nap min Mesopotamia woragwi nap min Yurea woragwi nap min Kapandokia woragwi nap min Pontus nap min Asia nap min

¹⁰Perigia nap min Pampilia nap min Mesira nap min Kirene koroga Libia nap oboksa min ap sal wandak-nen lobok yidnap nap Oroma nap min

¹¹Yawuri nap min enlem nin nab-et nde Yawuri nap nggal tak inpidnak nap min Kereta nap min Arap nap min nit oboksa nit nenambikpebe nenne bem Mbal Pem Nagawan-nen kwiye worak mende kwaroso na-ge it-nen yogola kulili-o” luk yiga-o.

¹²Yurug-e, it na wi langgu mbarogolat inndi kabak yogolat, yak kerak mbogolar-e: “Yu-ge ngge kwarosolar-o?” luk yiga-o.

¹³Nde, it erep-nen it na nda ondogolar-e: “Lag-o. It yu-ge anggut engen amburu undu nektak me, inmbitsa ninggidnak-nen yili-o” luk yiga-o.

¹⁴Nde, Peterus na-ge it ap sebelas na inmin menluk, ene ngguloksa-t yak ondosolar-e: “Yawuri nap min kit Yerusalem woragwi nap oboksa min wa-e. An yak kindimin wene yu-ge kenaru luk, kwara kinndi-n yebet ker-o.

¹⁵‘It yu-ge anggut engen amburu ninggarik-nen inndi lak lak yili-o’ luk peraigep iri-ge lag-o. Yawo-ge kuplila jam sembilan-nen yusu-o.

¹⁶Alat nde, Mbal Pem Nagawan-nen yidnak wene lomboksa yoso nap Yoel-nen yosolar-e, yu nggal yamu-o:

¹⁷‘Mbal Pem Nagawan-nen yosolar-e: “I woronosolat tarem-e an Nindi-ge ab-e ap enpem nggilara mberak pil mbuwamin-o. Iri ala-ge, kit kenmbararak min kenararak min-e urul pogolat, kunsugwerak-nen-e yik kagwi mende na yik kagolat, kineidtak inndi worak-nen-e yi nabi ndi nabi kagolat irit yuwa-o.

¹⁸Nde, ereya tarem-e ndegel nubugwi ap min kwami min enpem-e an Nindi nggilara mberak pil mbuwasola-ge, it-nen-e urul pogolat wolma-o.

¹⁹Nde, an-nen kwarosolar-e, wi yurak mende na teram nggwe mbal pem-nen kwarosolat, nggweyak ma ena nggwe-nen na yenggerak purak mende-ge eyabi min kanduk min kule min irit nam tak pimin-o.

²⁰Nde, Nagawan Indo-nen idnak Tarem, nggulok abinal worak Tarem iri wok yigit lak ma-ge, molengen na lumu yosolar-e, mom ki yosolat, waneya na eyabi worak yosolat ma-o.

²¹Nde, ta-nen nde Nagawan Indo unu luk wene mbo buwa nab-e irit inmiri yaga wok unduwa-o” ’ yij-o.

²²Kit Isarael nap wa-e. Wene yu koler-o. Nasaraet nap na-ge Mbal Pem Nagawan-nen at mirik konposolar-e, kwiye worak mende min wi yurak mende min yenggerak purak mende min-e Mbal Pem Nagawan-e Yesus arem woralat-nen kit kennggendumu-nen irit kwarosolat woragaid na-ge kir-e kenaru irir-o.

²³Mbal Pem Nagawan-nen at indi-n pidnak pem at-nen irit kwarimin-o luk peragaid iri na ndak ndak tak posolar-e, Yesus na-ge wesera kininggem pamu, kit-nen-e it wene tarugwi nap endam pogola, it ininggi-nen-e e lang pang tak pem panggarak ibiga-t nde, kit-net wirigep nar-o.

²⁴Alat nde, Mbal Pem Nagawan-nen tuguruk uruk tak posolar-e, wat yugwi elem iri-nen Yesus tena wolmomtag-e mondok meya me, wat yugwi elem yane wurugwi iri inggiyem-nen at-nen weserak pamu-o.

²⁵Ndaud-nen at imin yosolar-e: ‘Nagawan Indo-ge an nurugwe nggwe pempa worala kagi-o. An tugup lak yaga wok nereyekluk, ar-e an ninggi kigit nggwe worasu-o.

²⁶Iri bem-e an nindi-nen na alen kasolat, nemende nggwe-nen na kijik kijak kasolat yusu-o. Nebe-nen an nindi ebem mbung mbung tak puruk woraso iri na ebem yamuksa worasu-o.

²⁷Kat-nen-e an nindi-ge wat yidnak nap woragwi sa iri me keya bugun pug-o. Kat-nen-e kat-nen idnak Lenak Pidnak Nab-e piri ma naru keya bugun pug-o.

²⁸Unluk wolmomtak tula na mul nirigen-o. Kat woraso sa worala-ge, nalen-e kobongsa wok nurugun-o’ luk irit yij-o.

²⁹Nanggamirak wa-e. Nam-et yak kendeyeg-o. Nit nenlawingga Ndaud iri na-ge wat yamu, yapma pikma-o. At yapma pidnak sa-ge yawo na nit nennggendumu worasu-o.

³⁰Iri bem-e at Ndaud na-ge Mbal Pem Nagawan ene lomboksa yoso nap me, Mbal Pem Nagawan-nen owak mbatluk urul posolar-e: ‘Kat-nen ndakun lolo misig-e an-nen nagawan tak pumu-ge, nagawan kat kore yoso ondoro ebem-et kore yuwa-o’ luk yidnak wene iri-ge Ndaud na aru woragaij-o.

³¹Iri yak tidnak aru bem-e Ndaud-nen-e Kerisut uruk yurak wene na obok yosolar-e: ‘At iri-ge wat yidnak nap woragwi sa iri me keya bigit lak, at ebe na piri yigit lak ma-o’ luk yij-o.

³²Yesus yu-ge Mbal Pem Nagawan-nen uruk tak pamu-o. Uruk tak pidnak na-ge nit pidsa nenlengen-nen kaige-o.

³³Iri bem-e, Yesus na Mbal Pem Nagawan inggi kigit nggwe-nen kek tak puruk, Eid-nen obok yak tidnak Konak Indi-ge at wok turuk, tak purug-e, at-nen nit nenpem nggilara pil mbuwasola-ge, kit-nen kagolat, kologolat kwatli yur-o.

³⁴Ndaud na-ge aid arem-e lagit lag-et nde, at ondomok-net yosolar-e: ‘Nagawan Indo-nen an Nagawan Indo yak tosolar-e: “Kat kimin wim nab-e kat kijok ondoro rak enpeyek-nen kar-e an ninggi kigit eralu yu me koreyak wolmin-o” luk yak tij-o.’

³⁵

³⁶Iri bem-e, kit-nen e lang pang tak pem wirigep nap Yesus na-ge, Mbal Pem Nagawan-nen Nagawan Indo min Kerisut min tak pidnak nap-nen yusu-o luk Isarael nap it lolo pidsa-nen wene yu mondok kwara enaru mag-o” luk yij-o.

³⁷Iri yosola kuluruk yigarig-e, it-nen inndi andi min-et Peterus min it wirik inpidnak nap erep na min yak ondogolar-e: “Nowe nowot wa-e. Ngge kwarul-o?” luk yiga-o.

³⁸Yogolikma-ge, Peterus-nen it yak ondosolar-e: “Kondok yer-o. Kit meya yogolat woraidnak lak tak puwakluk, kenarik tak Yesus Kerisut unu bem yi ma konpogola-ge, Konak Indi-ge onggo lag-et we irit wanugub-o.

³⁹Nde, urul pidnak wene iri-ge kit kenmanggim na, kit kinlirak enmanggim na, it erepma worali nap pidsa, Mbal Pem Nagawan nit Nagawan Indo-nen yonggo unpuwa nap pidsa enmanggim na irit urul pij-o” luk yak indij-o.

⁴⁰Yak undurug-e, wene erep kwarat nimi nomosa yak unduruk, nggomo kiri keresa yak ondosolar-e: “Yawo worali nap meya nak kwarugwi nggal yugub-o luk kenambikpebe-t kinmiri yer-o” luk yak indij-o.

⁴¹Yak ondosoloma-ge, at-nen yidnak wene waniga nab-e yi ma inpiga-o. Iri tarem-et it inmin lambinil nggogolar-e, ab-e tigaribu (3,000) nggal yiga-o.

⁴²Iri lug-e, ir-e pempa wirik inpidnak nap-nen mirik inpidnak wene puksa wanogolat, it inmin kundik woragolat, mburu ndeksa nonggolat, tepan yogolat irit kwarogolat woraiga-o.

⁴³Nde, wirik inpidnak nap-nen-e kwiye worak mende min kagwi buk mende min kwarogola-ge, ap pidsa-nen kwiye kwarat kaiga-o.

⁴⁴It inndi Yesus ebem angin tubu yidnak nab-e lambuksa woragolat, enarengge na it lambuksa winde woragolat woraiga-o.

⁴⁵It onggweyak min insilobulo min onggo wanuruk, tol-e tembesa ap pidsa ndak ndak wok ondogolat woraiga-o.

⁴⁶Nde, pelin na pelin na it inndi lambuksa Mbal Pem Nagawan ama ndok worogolat, it enma lombok-nen mburu ndeksa nonggolat yiga-o. Nunggwi mende nonggolar-e, inndi mot mor-et enalin min nonggolat,

⁴⁷Mbal Pem Nagawan erembel wanogolat kwarogola-ge, ap pidsa-nen it inndingen tak inpiga-o. Iri ala-ge, pelin na pelin na Nagawan Indo-nen-e inmiri yidnak nab-e it inmin nambenak onposolat woragaij-o.