Read Nduga YIDNAK YIDNAK WENE 20 Bible Online

YIDNAK YIDNAK WENE 20 - Nduga bible

YIDNAK YIDNAK WENE 20

¹Enne tap mbariga na lak alama-ge, Paulus-nen Yesus ene wanugwi nap na ndok worak unpuruk, inndi eyak wutluk, “Wiwa-o” yak unduruk, Makeronia mbirij-o.

²O iri me waring kasolar-e, anggamirak tak inpidnak nap inndi eyak wiril wiril-e Yunani wi wok yij-o.

³Iri me worasolar-e, waneya kenan worarug-e, ar-e Siria wi e koma arem mbereyekluk yij-et nde, Yawuri nap-nen at wururak obok mbaridnak kulurug-e, tuguruk Makeronia nggwe-nen mbururak peragaij-o.

⁴Mberea nap Sopater, Pirus ambara min Tesalonika nap mberen Aristarakus min Sekunduk min Nderebe nap Nggayus min Timotius min Asia nap mberen Tikikus min Teropimus min Paulus na imin mbiriga-o.

⁵It ereya na-ge nanduk mbirigarik, o Teroas-nen yik neneyarok woraiga-o.

⁶Alat nde, Oroti Lomboroso Mende Pigit lak Woraga Nunggwi tarem woraruk ombol nggwe-ge nir-e Pilipi-nen e koma arem mborogolar-e, lima nene lug-e, it endam Teroas wok yigerik, iri me-ge tuju nene yige-o.

⁷Nde, minggu tarem-e nir-e mburu ndeksa mbo nokluk ndok wirigerik woragola-ge, Paulus na-ge kup mbururak me, at-nen anggamirak tak inpidnak nap wene yak enderenak irit worasoma, o nggiringgendumu yij-o.

⁸Nde, nit ndok woraige sa teram wi iri me-ge tal kwarat paga bidnak woragaij-o.

⁹Nde, sugwe misik unu-ge Eutikus iri-ge papalo tumende pelak eralu koreyak woragaij-o. Nde, Paulus na wene na mor-et yik tenak worala-ge, la iri-ge nggulal nggulal yosolar-e, nggaruksa nene yosolar-e, o kuri worak kenan iri na me-nen wosa mbij-o. Wosa mbosoloma, kudsa mendak piganggal-e, abu wat yamu kaiga-o.

¹⁰Alat nde, Paulus na mbarig-e, la yu na imig pem mbiring luk, paruksa wanuruk-nen yosolar-e: “Kwiye yili-ge meyog-o. Uruk worasur-o” luk yij-o.

¹¹Yuruk, Paulus na-ge tuguruk teram lagarik, mburu ndeksa nurug-e, tuguruk wene na mor-et yik tenak worasoma, o kil posola mbirij-o.

¹²Nde, ir-e la na urug-et waruk mborogolar-e, inndi yanggosa-t mbiriga-o.

¹³Paulus-nen yak nondosolar-e: “An-e nggweyak tu mbirimindig-e, o Asos-nen e koma bem lid pid yuwokluk, kir-e e koma arem Asos nanduk mberer-o” luk yak nondosoloma, at-nen yidnak yidnak irit kwarige-o.

¹⁴Nde, at na Asos-nen nit ninmin lid pid lug-e, at na-ge e koma arem pil ngguruk mbirigerik, Metilene wok yige-o.

¹⁵Iri me-nen-e nir-e e koma arem nok nok mbirigerik, kub-e Kios wi korok korok wok yige-o. Wok luk, kup-nen-e Samos wok luk, kup-nen-e Miletus wok yige-o.

¹⁶Nde, Paulus-nen perasolar-e: “Asia wi iri me kwarat wolmomtag-e meya-o luk, o Epesus wok yimin pug-o” luk peragaij-o. Iri peragaid iri-ge Pentakosta tarem-e Yerusalem iri me worayekluk perasolat-nen ndig-et ndag-et mbirij-o.

¹⁷Iri bem-nen Paulus-e Miletus-nen wene wosa wirik posolar-e, Epesus woragwi lambuk tak inpidnak nap ennggendumu mendak inpidnak ogore yidnak nab-e at eram lobok yuwakluk yonggo inpij-o.

¹⁸Yonggo onposoloma, it na at eram wok yogolikma-ge, at-nen yak ondosolar-e: “An nandug-et o Asia wi yu me lobok yigirik kit kinmin woragi nebage-ge kir-e kenaru nar-o.

¹⁹Yawuri nap-nen an nuruwokluk yogolat-nen anggun panggun tak nibiga-t nde, nindi teberak pem-et yip lengen min-et Nagawan Indo ndegel posolat woragi-o.

²⁰Nde, kit konak tak kunpurak mende mbi larok yigit lak yigi-o. Are, ap inmbiri bem-nen na, kit kenma ya nggwilik waring kasolat-nen na nggomo kondosolat, mul kondosolat woragi-o.

²¹Yawuri nap na irit, Yunani nap na irit, Mbal Pem Nagawan imin kondok yuwakluk wene kenggera yak ondosolat, nin-nen idnak Nagawan Indo Yesus Kerisut ebem inndi angin tubu yuwakluk, wene yak ondosolat woragi-o.

²²Yawo-ge an nindi kamarak nggal woralar-e, Yerusalem nggwe mburusu-o. Nde, iri me-nen kwat nuburak iri-ge naru bug-et nde.

²³Konak Indi-nen kenggera yak norosolar-e: ‘Kar-e o siri nin me wok nin me wok waring kasola-ge, o kubu me kuburak min andi bandi rak kuburak min kat kabuwok pak tak worasu-o’ luk yak nurusu-o.

²⁴Alat nde, an nondomok nindi abuwa marig-et tet kasu bug-o. Are, an nebem pidnak yabu iri na ndak tak posolar-e, Nagawan Indo Yesus-nen wok niridnak yabu iri-ge Mbal Pem Nagawan-nen we wok ondoso aid wene iri na konggorosolat-nen neyabu na worok tak purak iri perak nde ijar-o.

²⁵An-e kit kennggendumu waring kasolat-nen Mbal Pem Nagawan-nen tenagaidnak wi wene yak kondosolat woragi nap kit-nen-e tuguruk nerare kagup pug-o luk naru yusu-o.

²⁶Iri bem-e, yanem-et nam-et yak kendeyeg-o. Kit pidsa keneyabi-ge an nebem-e lag-o.

²⁷Mbal Pem Nagawan indi-n pidnak ereb-e teberak pigit lak. Pidsa yak kindigi nar-o.

²⁸Iri bem-e, kit na kit-net yik karok woragolat, Konak Indi-nen lomba wam ndok worak pidsa iri yik eneyarok wolmakluk mendak kinpidnak me, Mbal Pem Nagawan-nen at ambik Ambara eyabi bem-nen winde yidnak lambuk tak inpidnak nap iri na kit-nen-e lomba wam yik karok woragwi nap kwasa yik eneyarok wolmer-o.

²⁹Nde, an-e naru-o. An mburumu nimbirig-e, isilepma worak ndakngge-nen kit kennggendumu ngguwasolar-e, lomba wam ndok worak iri mondok keya buwa-ge lag-o.

³⁰Kit kenambik kennggendumu-net ap erep men yogolar-e, Yesus ene wanugwi nab-e it langgal unpurak makluk, enesiget wene nde yuwa-o.

³¹Iri bem-e, kwil kwalsa wolmer-o. An-e olengen ebis-et kenan woralar-e, kubu-nen, lengge-nen yip lengen min-et kundugu kit pidsa nggomo kondosolat woragi na-ge kinndi yebet yebet tak wolmer-o.

³²Nde, yawo-ge an-e Mbal Pem Nagawan min at-nen we wok ondoso wene min inggem kegera kunpusu-o. At-nen-e tugup lak tak konposolat, marak inpidnak nap pidsa enmanggim lud tak pidnak imining angge iri-ge it inmin lambuksa wok kondosolat kwarurag-e ndak-nen yusu-o.

³³Ap misik ebem-o luk tet perak tol ala na, emas tol ala na, yurugwi sum ala na an-e ukwe ukwe yigit lag-o.

³⁴Nde, an min an nanggamirak totno nugwi nap min ukwe peragwi mende ndak wolmokluk an nondomok ninggi-net yabu wanoso iri-ge kir-e kenaru nar-o.

³⁵Nde, namawi min-et yabu wanosolat woragi iri-ge nir-e yabu iri nggal wanogolat-nen ap ndeyak mondok yongga undurag-o luk mirik kinpigi-o. Nde, Yesus at ondomok-nen yosolar-e: ‘Wanugwi iri-ge marig-et nde, ap wok undugwi iri-ge mondok imbiringgat-nen yusu-o’ luk yidnak iri-ge iri kwarogolat-nen yeberak wulmul-o” luk yak indij-o.

³⁶Wene iri yak unduruk yarig-e, endaru yunggusa kore luk, it pidsa inmin tepan yij-o.

³⁷Tepan yosola-ge, it pidsa yip kek yud lud mbogolar-e, Paulus na urusu ngonoksa tena buruk, wa yak togolar-e, erabengen porok ningga-o.

³⁸It inndi puru pera kwarat yiga-o. Nde, iri-ge ebem luj-e at-nen yosolar-e: “Tuguruk an nerare kagup pug-o” luk yid iri-net yiga-o. Iri rak purug-e, it-nen-e Paulus na e koma arem ibil nggwiga-o.