Read Nduga YIDNAK YIDNAK WENE 23 Bible Online

YIDNAK YIDNAK WENE 23 - Nduga bible

YIDNAK YIDNAK WENE 23

¹Nde, Paulus-e wene mbarugwi nap na enpem erengen kere kererak worasolat-nen yosolar-e: “Nanggamirak wa-e, Mbal Pem Nagawan imbiri bem an-e nanduk-nen na, yawo-nen na an nindi mbek tak nak irit worasu-o” luk yij-o.

²Yosoloma-ge, tepan ombo nggulok Ananias-nen Paulus eralu mendak ereba na yak ondosolar-e: “Emende lel ker-o” luk yak indij-o.

³Yak ondosoloma-ge, Paulus-nen yak tosolar-e: “Kerep leget umuruk loro ndarak pidnak wa-e! Mbal Pem Nagawan-nen kat lel kiyujwa-o! Kar-e imiri mbarak pidnak wene-nen yidnak yidnak kwarosolar-re, an nebem wene mbareyekluk kore yusu-t nde, an nimin-e ‘Emende lel ker-o’ yigen iri-ge imiri mbarak pidnak wene lugud tak pigen-o” luk yak tij-o.

⁴Yak tosoloma-ge, iri me mendak woraiga nap-nen yogolar-e: “Kar-e Mbal Pem Nagawan-nen idnak tepan ombo nggulog-et nde, nggweyara keya bigen-o!” luk yak tiga-o.

⁵Yak togolikma-ge, Paulus-nen yak ondosolar-e: “Nanggamirak wa-e. At iri-ge tepan ombo nggulok-nen yusu-o luk naru buk-nen yigi-o. Engga mbarak pem-nen yosolar-e: ‘Kit kenlem nap nagawan imin-e wene meya yak turak pug-o’ luk mbarak worasu-o” luk yij-o.

⁶Nde, Paulus-nen wene mbarugwi nap na yik eneyagaidnggal-e, ereb-e Saruki nap, nde, ereb-e Parisi nap alama-ge, at-nen ene ngguloksa wene mbarugwi nap yak ondosolar-e: “Nanggamirak wa-e. An-e Parisi nap-nen nderak me, an na Parisi nap-net yusu-o. Nde, an nebem wene mbatli yu-ge an-e wat yidnak nap unluk ma-o luk iri bem nindi mbung mbung tak woraso na bem nebem wene mbatli kagi-o” luk yij-o.

⁷Wene iri yosola ereya na-net Parisi nap min Saruki nap min-e wene eyak wat kerak mbogolar-e, ap ndok wiridnak iri-ge ngaksa ponok ponok yiga-o.

⁸Nde, Saruki nap-nen yogolar-e: “Wat yidnak nab-e unlug-e ma bug-o. Aid nap na ap inndi na lak-nen yusu-o” luk yugwi-o. Nde, Parisi nap-nen perak nde wene ereya-ge pidsa worasur-o luk peragwi-o.

⁹Alama-ge, kwarat laga mbaga yogola-ge, Parisi nap-nen idnak engga enaru nap erep men luk-nen panggoksa yogolar-e: “At yu ebem-e meya mbi mariger-o luk ter-e kali bug-o. Indi ala na aid nap ala na-nen wene yak tid, lak?” luk yiga-o.

¹⁰Yuruk, it nak perang yogola-ge, “It-nen Paulus iri pok tak puwa-o” perasolug-e, san winde wari-nen san winde yak ondosolar-e: “Mburugupndik, kit kenarong-nen it ennggendumu-nen mengga wanuruk, san winde nenma waruk mberer-o” luk yak indij-o.

¹¹Iri rak puruk, kubu nggwe iri-ge Nagawan Indo-ge at eralu mendak-nen yosolar-e: “Kindi tugup lak wolmin-o. An-nen yidnak wene Yerusalem yu-nen kinggirigen nggal-et iri nggal-et Oroma-nen na kunggurugun-o” luk yij-o.

¹²O nda yosoloma, Yawuri nap-nen Paulus wuruwokluk wene mbarogolar-e: “Nir-e Paulus wirigit lak woragolar-e, mburu min yi min mondok nul pug-o” luk owak mbariga-o.

¹³Owak mbariga nab-e wonasa-ge empat pulu ombol nggwe nggal-o.

¹⁴Iri lug-e, it na tepan ombo nagawan nagawan min ogore yidnak nap min endam mbirigarik-nen yogolar-e: “Nir-e Paulus wirigit lak woragolar-e, yi min mburu min nul pug-o luk owak mbarigerik me,

¹⁵kit min wene mbarugwi nap min-nen kenpe-net nde san winde wari na yak togolar-e: ‘Nir-e Paulus na ebem wene kwara-t lombot puwoklug-e, nit nendam-e pi mbi-o’ luk yak ter-o. Nde, ar-e kit kendam wok yigit lak ma-net at wururag-e mondok lid lud tak puruk worali-o” luk yiga-o.

¹⁶Iri yiga-t nde, Paulus ambara, ambap-nen ndagaidnak iri-nen-e at wururak wene mbariga na kolosoluk yarig-e, mberarik, san winde enma ngguruk, wene iri na-ge Paulus na yak tij-o.

¹⁷Yak tosoloma-ge, Paulus-nen san winde sarok mbi wene mbo buruk-nen yak tosolar-e: “La yu-ge san winde wari eram pil mbiri-o. At-nen yak turak wene mbi worasu-o” luk yak tij-o.

¹⁸Yak tosoloma-ge, la na imin luk, san winde wari eram pil mberarik-nen yak tosolar-e: “Ap sugwe yu-nen kat yak kururak wene mbi worala me, kat keram waruk lobok yuwakluk o kubu me pil nggwidnak Paulus-nen an wene mbo nobosola, la yu-ge ibil lobok yigi-o” luk yij-o.

¹⁹Yosoloma-ge, san winde wari-nen la na inggi warug-e, enarik me ponok ereba lagarik-nen kin wanosolar-e: “Kar-e no wene yak nereyekluk-nen yigen-o?” luk kin wanij-o.

²⁰Kin wanosoloma, at-nen yosolar-e: “Yawuri nap inndi misiget lug-e, kup-nen enpe-net nde kat yak korogolar-e: ‘Paulus na ebem wene kwara lombot puwakluk, wene mbarugwi nap endam pil mbi-o’ luk yak kuruwa-o.

²¹Iri yak kuruwa-t nde, it-nen nggi yak korogola-ge, kat-nen-e enne kulurak pug-o. Ab-e empat pulu ombol nggwe nggal at wuruwokluk tulabiyem pak tili-o. Pak tili nap iri-nen owak mbarogolar-e: ‘Paulus na wirigit lak woragolr-e, yi min mburu min mondok nul pug-o’ luk yiga-o. Nde, yawo-ge ir-e lid lud tak puruk, kat-nen yugun nak yik karok worali-o” luk yij-o.

²²Yosola karug-e, san winde wari na-nen la iri na wirik posolat-nen yak tosolar-e: “Yanem yak nirigen wene yu-ge ‘Iniksa yak tigi-o’ luk ap misiger-o luk tet yak undurak pug-o” luk yak tij-o.

²³Iri rak purug-e, at san winde wari-ne san winde sarok mberen yonggo unpuruk, yak ondosolar-e: “Yawo kubu nggwe jam sembilan pem-e san winde duaratus (200) min kura wam ombolak pem mburugwi nap tuju pulu (70) min tege wanugwi nap duaratus (200) min Kaisaria mbururak pem-e lid lud tak per-o.

²⁴Nde, Paulus ebem kore luk mbururak pem-e kura wam mbi waner-o. Iri lug-e, at iri-ge pemerinta nap Pelik Gubernor na eram-e yebosa-t waruk mberer-o” luk yak indij-o.

²⁵At-nen engga amanggim mbarosolar-e, yu nggal yij-o:

²⁶“Kunu kek tak woraso pemerinta nap Pelik Gubernor wa-e. An Kelaudias Lisias-nen wa yak kurusu-o.

²⁷Yawuri nap-nen ap yu tenaguruk, wuruwokluk yukmu-ge an kuliginggal-e, at yu-ge Oroma nap ala karug-e, san winde imin mbirigirig-e, imiri yigi-o.

²⁸Yurug-e, at ebem pidnak wene na elem mbenareyekluk-nen it-nen idnak wene mbarugwi nap endam imin mbukmu-o.

²⁹Imin mbigirik, an-nen lombok piginggal-e, at ebem pidnak wene iri-ge it-nen yugwi imiri mbarak pidnak wene na bem-nen at ebem piga-o. Alat nde, at-nen kwaridnak pem-nen at worogolat, o kubu me ibil nggogolat momtag-e lag-et kagi-o.

³⁰Nde, at yu wuruwokluk wene mbariga wene an yak norosoloa-ge, ar-e ndag-et nak kat keram pil lobok yigi-o. Nde, at ebem wene pili nap-nen kat kimbiri bem-et iri wene na wesera yak kuruwakluk yak indigi-o” luk engga mbarij-o.

³¹Mbarosola-ge, wene yak indidnak iri na ndak ndag-et kwarogolar-e, san winde-nen kubu nggwe-ge Paulus na Antipateris eram waruk mbiriga-o.

³²Nene luk kub-e, ir-e unuwok lem san winde enam lobok yogolar-e, kura wam ombolak pem waring kagwi nab-e Paulus imin mburuwakluk keya inpiga-o.

³³Mbirigarik, it na Kaisaria wok luk, engga mbarak na-ge Gubernor na wok turug-e, Paulus na at eram piga-o.

³⁴Pogolikma-ge, Gubernor-nen engga mbarak na piruruk-nen Paulus kin wok obosolar-e: “kat kuwi nggweyak ngge me woraso-o?” luk kin wok obosoloma-ge, “Nuwi Kilikia woraso-o” yosola kulurug-e,

³⁵at-nen yosolar-e: “Kat kebem wene pili nap wok yogola-ge, kowene kwara mbenarimin-o” yurug-e, “Paulus yu-ge Erores ama iri me yik karok wolmomtag-o” luk yak indij-o.