Read Nduga YIDNAK YIDNAK WENE 24 Bible Online

YIDNAK YIDNAK WENE 24 - Nduga bible

YIDNAK YIDNAK WENE 24

¹Lima nene lug-e, tepan ombo nggulok Ananias min ogore yidnak nap erep min wene mbenaroso nap unu-ge Teretulus min mbiga-o. Mbogolug-e, Paulus ebem pidnak wene-ge at Gubernor na yak tiga-o.

²Nde, Paulus na yonggo buruk, lobok yosola-ge, Teretulus iri na-nen at ebem pidnak wene tel korosolat-nen yosolar-e: “Kek tak woraso Pelik wa-e. Kat-nen kwaroso bem nir-e yamuksa worali-o. Nde, kat kindi-nen konidnak pem-e nit Yawuri nap nanduk angin worak mende nenpem mbidnag-e kat-nen kona wok nundusu-o.

³Iri kwat nonposo bem-e, nit pidsa-nen pempa wiwa-o yak kitli-o.

⁴Kat-nen kwarurak kwaruwom-o luk, an-nen wene poro-t yimin me, nit-nen yul wene yu-ge kat kindi yangonak pem worasolat-nen kolonog-o luk kemengen mbarusu-o.

⁵Nit-nen kagolar-e, ap Paulus yu-ge ap enne rak poso-o. Yi wi ndi wi worali Yawuri nap ennggendumu nari wari rak poso-nen yusu-o. At iri-ge Nasarani nap ennggendumu ene kulugwi nap-nen yusu-o.

⁶Nde, at-nen-e Mbal Pem Nagawan uwi emben to rak peyekluk yosola-ge, nit-nen tenaige-o. Tenaguruk, nit-nen idnak imiri mbarak pidnak wene ndak ndag-et at yu ebem wene mbaruwokluk yukmu-ge,

⁷san winde wari Lisias na amawi kunduruk lobok yosolar-e, nit nininggem-nen mengga wanij-o.

⁸Wanurug-e, wene at ebem pili nap nit yak nondosolar-e: ‘Pelik eram mberer-o’ yak nindij-o. Nde, kat-nen at indi ngarugundig-e, nit-nen ebem pili wene pidsa iri-ge karu yugun-o” luk yak tij-o.

⁹Yak tosoloma-ge, Yawuri nap erep-nen-e at-nen yidnak wene amawi rak pogolar-e: “Wene iri-ge ndemeret yij-o” luk yiga-o.

¹⁰Nde, at Gubernor na-nen inggi warok pem “Wene yi-o” yak tosola karug-e, Paulus-nen yosolar-e: “Kar-e o yu nap enpem wene mot mot nak mbaroso nap woralar-e, molengen lasolat mbosolat kwarat worasu iri-ge an-e naru me, an-nen-e an nowene-ge kat kimbiri bem yosolar-e, kwiye lag-et yimin-o.

¹¹An-e Mbal Pem Nagawan erembel waneyekluk, Yerusalem lagi kuri-nen yawo-ge duabelas nak nene yigirik worasu-o. Nde, kat kondomok mbenarosolat-nen karu yugun-o.

¹²Alat nde, it-nen yik neyagolar-e, Mbal Pem Nagawan ama-nen na irit, Yawuri nap-nen tepan yugwi ma-nen na irit, o siri eralu eralu ereba-nen na irit woralar-e, ap misiger-o luk tet imin ngguno posolat, ap ndok worak ma-nen laga mbaga rak onposola-ge, neyagir-e lag-o.

¹³Nde, yawo an nebem pili wene iri-ge it-nen-e ebe yoroksa yak kuruwa bug-o.

¹⁴Alat nde, nam-et yak kereyeg-o. An-e nit nenlawingga Enmbal Pem Nagawan erembel wanosolar-e, at urula mburusu-t nde, it-nen-e ‘Nin tula mburusu-o’ luk yili-o. Nde, imiri mbarak pidnak wene arem-nen mbaridnak wene min Mbal Pem Nagawan ene lomboksa yugwi nap-nen mbaridnak engga min oboksa ebem nindi angin tubu yusu-o.

¹⁵Lud tak nak yugwi nap-nen na, meya kwarugwi nap-nen na wat yidnak nap ennggendumu-nen unluk ma-o luk, it-nen yili iri nggal-et an-nen na iri nggal-et kwat ma-o luk nindi mbung mbung tak worasu-o.

¹⁶Iri bem-e, an-e pempa Mbal Pem Nagawan min ap min inmbiri bem an nindi mbek tak worayekluk namawi kundusu-o.

¹⁷Molengen lasolat mbosolat kwarat worarug-e, an-e tuguruk Yerusalem lobok yosolar-e, an nelem nab-e tol wok ondosolat, Mbal Pem Nagawan amanggim pugwi mende peyekluk lobok yigi-o.

¹⁸Korak nibidnak ombol nggwe-ge an-e iri na kwarosolat Mbal Pem Nagawan ama worasoma-ge, it Asia woragwi Yawuri nap erep-nen-e neyaiga-o. Neyaiga tarem-e ap kwarat na lak, nari wari mbugwi na lak woragi-o.

¹⁹Nde, neyaiga nap iri-ge an nimin yidnak mbi worala-ge, it-net kat keram lobok luk, an nebem pidnak wene yak kuruwag-o.

²⁰Are, wene mbarugwi nap iri na endam mendak worasola, an meya kwaridnak nebem pidnak iri-ge it yu me worali nap-nen yuwag-o.

²¹Are, it ennggendumu mendak worasolar-e, an-nen wene misiget mbi nene nggoksa yosolar-e: ‘Kit yawo an nebem wene mbatli yu-ge ap wat luk unluk yugwi iri na bem yili-o’ luk yigi-o.”

²²Alat nde, Pelik iri-ge aid wene tula kwara aru yosolar-e: “San winde wari Lisias na lobok yuwama-nen wene yu-ge nggaruksa yimin-o” luk yij-o.

²³Iri lug-e, at-nen san winde sarok na yak tosolar-e: “At iri-ge togwarag-et wolmomtag-o. Alat nde, angin worak ebem purak pug-o. Nde, anggamirak-nen at ndegel ibil lobok yogola-ge, langgal iniyudtak pug-o” luk yak tij-o.

²⁴Siyak worarug-e, Pelik min at ogwe Nderusila, Yawuri kwe iri na imin lobok yij-o. At-nen-e: “Paulus iri lobok yuwag-o” luk, Paulus-nen Kerisut Yesus ebem inndi angin tubu yugwi wene yak ondosola kuliga-o.

²⁵Alat nde, Paulus-nen-e lud tak kwarugwi wene yosolat, inndi-nen tebe yoso wene yosolat, abok-nen nit nenpem wene mbarurak tarem obok yosolat yosola karug-e, Pelik iri na kwiye kwarat luk-nen yosolar-e: “Yu bem-et ndag-o. Mbiri-o. Abok-nen kat kene kulurak tarem ndak yosola-ge, yonggo kibimin-o” luk yij-o.

²⁶Iri yosolar-e, at indi arem-nen-e “Paulus-nen tol mbi wok nuruwa-o” luk indi-ge Paulus ebem mbung mbung tak woralar-e, at yonggo buruk, imin wene ndok ndok tenak woragaij-o.

²⁷Alat nde, molengen lasolat mbosolat mberen worarug-e, Pelik ondolma-ge, Porokius Pestus nde piga-o. Nde, Yawuri nap indi leneyeklug-e, Pelik-nen-e Paulus na o kubu me ibil nggwidnak iri na-t keyap tak pij-o.