Read Nduga YIDNAK YIDNAK WENE 25 Bible Online

YIDNAK YIDNAK WENE 25 - Nduga bible

YIDNAK YIDNAK WENE 25

¹Nde, Pestus na-ge at tena wolmomtak sa wok luk, kenan nak nene luk, Kaisaria-nen Yerusalem lagaij-o.

²Lasola-ge, tepan omborak nagawan nagawan min Yawuri nap ap yok nggok min-nen Paulus ebem pidnak wene na at imbiri bem yiga-o.

³Nde, Paulus na lobok yosoma, tu ndumu-nen wuruwokluk wene mbarigarik-nen at nggiyak togolar-e: “Nit nenambigit nggwe yosolat-nen Paulus na Yerusalem lobok yuwakluk yonggo bi-o” luk yak tiga-o.

⁴Alat nde, Pestus-nen wene erep nggarosolar-e: “Lag-o. Paulus iri-ge Kaisaria-t wolmag-o. Nde, siyag-et worarug-e, an na iri me mbirimin-o.

⁵Iri ala-ge, kit kennggendumu enne kulugwi nab-e an nimin mbulndik, ap iri-nen meya yidnak mbi worala-ge, at ebem pidnak wene-ge it-nen yuwag-o” luk yij-o.

⁶Iri luk, it inmin-e delapan ala na, sepulu ala na nene lug-e, Kaisaria mbij-o. Mbarik, nene luk kub-e, wene mbarugwi sa kore luk-nen-e “Paulus na ibil lobok yer-o” luk yij-o.

⁷Nde, Paulus na lobok yosola-ge, it Yerusalem-nen mbiga Yawuri nap-nen at kambuk kambuk tak puruk, mendak woragolar-e, wene elem-e lag-et nde, at ebem-e meya wene kwarat pogolat woraiga-o.

⁸Iri yogola-t nde, Paulus-nen at ondomok elat mbarosolat-nen yosolar-e: “Yawuri nap-nen idnak imiri mbarak pidnak wene imin ala na, Mbal Pem Nagawan uwi imin ala na, Kaisat imin ala na, an-nen-e mariget ter-o luk meya rak pigit lag-o” luk yij-o.

⁹Alat nde, Yawuri nap inndi leneyeklug-e, Pestus-nen Paulus yak tosolar-e: “Kat kebem pidnak wene yu-ge iri me-nen an nimbiri bem mbaruwokluk, kar-e Yerusalem ludtag-e op, lak?” luk yak tij-o.

¹⁰Yak tosoloma-ge, Paulus-nen yosolar-e: “An-e Kaisat-nen ap enpem wene mbaroso sa mendak worasu yu me-net an nebem wene mbarurag-o. Nde, an-e Yawuri nap inmin-e meya mariget tet kwarigit lak iri-ge kar-e karu irir-o.

¹¹Nde, an-nen meya kwarosoma, undugwi ndak ndak kwarumu ala-ge, nururag-e ob-er-o. Alat nde, it-nen an nebem pidnak wene iri-ge ebe lak wene ala-ge, ta-nen niminep wesera it ininggem nubuwa-o. An nebem Kaisat-nen wene mbaruwag-o” luk yij-o.

¹²Yosoloma-ge, at-nen idnak wene mbarugwi nap inmin wene mbarak purug-e, Pestus-nen wene erep nggarosolar-e: “ ‘Kaisat-nen an nebem wene mbaruwag-o’ yigendik me, Kaisat eram-et mburugun-o” luk yij-o.

¹³Iri kwatluk, siyak worarug-e, Nagawan Ageripa min Mberenike min-e Pestus na “Wiwa-o” yak tuwoklug-e, Kaisaria wok yiga-o.

¹⁴Wok luk, it enmberek iri me kwarat nggal woragola karug-e, Pestus-nen Paulus owene-ge nagawan iri kenggera yak tosolar-e “Pelik-nen o kubu me ibil ngguruk, keya buruk mbiridnak nap mbi worasu-o.

¹⁵Nde, an-e Yerusalem worala-ge, tepan omborak nggulok min Yawuri nap ogore yidnak nap min-nen at ebem wene pogolat-nen nggi yak norogolar-e: ‘Angin worak mende-ge at ebem purag-o’ luk yiga-o.

¹⁶Alat nde, an-ne it yak ondosolar-e: ‘Nit Oroma nap-nen perak nde, wene enpem pidnak nab-e we iminep wesera wok undugwi bug-o. Are, it wene ebem pidnak nap min at ebem wene pili nap min-e o misik me ndok wutluk-nen at ondomok-nen elat mbaroso-o’ luk yak indigi-o.

¹⁷Iri kwarugwi me, ir-e yu me an nimin lobok yogola-ge, an-e pem woragit lag-o. Are, kub-et wene mbarugwi sa kore yigirik, ‘Ap iri-ge lobok yuwag-o’ luk yonggo bigi-o.

¹⁸Nde, at ebem wene pugwi nap na men yogolar-e, an nindi-nen peraso meya kwaridnak mende iri nggla-e at ebem pigir-e lak yiga-o.

¹⁹Alat nde, it-nen at imin yuk puk mborogolar-e, it onkwal kwarugwi bem-nen na irit, wat yidnak nap misik unu-ge Yesus iri-ge Paulus-nen-e: ‘Urug-et worasu-o’ luk yoso nap iri ebem-nen na irit yuk puk mbiga-o.

²⁰Nde, wene iri nggal elem mbenarurag-e nindi kabak ala, an-nen Paulus yak tosolar-e: ‘Kar-e Yerusalem mbutluk, iri me-nen kebem pidnak wene mbarurag-e konak, lak, ngge-o?’ luk yak tigi-t nde,

²¹Paulus-nen yosolar-e: ‘Kaisat-nen an nowene mbaruwaklug-e, an-e tena nibidnak sa yu me woramin-o’ yosoloma-ge, an-nen yak ondosolar-e ‘Iri ala, an-nen Kaisat eram ibil mbururak me, yu me-t tena wolmer-o’ luk yak indigi-o” luk yij-o.

²²Iri yosoloma-ge, Ageripa-nen Pestus na yak tosolar-e: “Ap iri emende nggwe-nen yuwa wene kuleyeg-o” luk yosoloma-ge, at-nen yosolar-e: “Kup-nen kulugun-o” luk yij-o.

²³Nene luk kub-e, Ageripa min Mberenike min-e ap enpem wene mbarugwi sa nggogolar-e, nagawan-nen nggugwi nggal-et nggwiga-o. San winde wari ereba inmin iri me woragwi ap yulok nggulok inmin nggogola-ge, Pestus-nen-e Paulus na lobok yuwakluk yonggo bij-o.

²⁴Nde, Pestus-nen yosolar-e: “Nagawan Ageripa min nit totno yu me ndok wirige pidsa naptag-o. Yawuri nap Yerusalem woragwi-nen na irit, yu me woragwi-nen na irit pidsa-nen ap yu ebem enesiget wene pogolar-e, enne nggasilek kundugu an neram lobok yogolat-nen yogolar-e: ‘At iri-ge mondok uruk wolmomtag-e lag-o’ luk yili nap yu-ge ker-o.

²⁵Alat nde, an-nen mbenarosolar-e, at-nen kwaridnak pem wururag-e lak kagi-o. Nde, at ondomok-nen-e: ‘Lag-o. Kaisat-nen an nowene mbaruwag-o’ yosola karug-e, an nindi-nen-e ‘At eram wirik pimin-o’ luk peragi-o.

²⁶Alat nde, ‘Ar-e iri nggal kwaramu-o’ luk an-nen Kaisat amanggim engga mbarurag-e ebe lak ala-ge, nandug-et Nagawan Ageripa kat min kit pidsa kendam na ibil lobok yigi-o. Engga-ge ‘Iri nggal-o’ luk mbareyekluk-nen nit-nen at indi ngarul-o.

²⁷An nindi-nen-e o ubu me ibil nggwidnak nap wirik obogolar-e, at ebem pidnak wene na para yigit lak-nen wirik purag-e meya kagi-o” luk yij-o.