Read Nduga YIDNAK YIDNAK WENE 28 Bible Online

YIDNAK YIDNAK WENE 28 - Nduga bible

YIDNAK YIDNAK WENE 28

¹Nir-e konag-et yi eyak ele bem wok lug-e, yi terapmu yu unu-ge Malta wok yige kagi luk nenaru yige-o.

²Iri me woragwi nab-e wa kwarat yak nunduruk, talme mbosolat me, toro ala karuk, nenmanggim kan maburuk, nit pidsa wok ninpiga-o.

³Paulus-nen kan yi mu ababol mbi ndok wosa kan nirik posoma-ge, embem ala karuk, lese mbi kan arem-nen wasolar-e, Paulus inggi eyak yilik pij-o.

⁴O iri woragwi nap-nen yik kaiganggal-e, lese na at inggi bem yilik puruk tiyong yidnak ala, it nak it nak yak kerak mbogolar-e: “Ap yu-ge ndemeret ap woroso nde ma-o. Nde, ar-e yi emndam-nen mengga wagaij-et nde, mot mot yoso kugi-nen wiridnak me, mondok uruk ma bug-o” luk yiga-o.

⁵Alat nde, Paulus-nen lese na werel yaga kan ma posolug-e, andi marig-et tet kagit lag-o.

⁶Alama-ge it yik karok woragolar-e, wiridnak a lumburuwa, lak? Are, ereya na-net wat yosolat mbud ma, lak? luk yik karok kwarat nggal woraiga-t nde, ar-e emesiyak konak irit worasola karug-e, it inndi-nen peragolar-e: “At yu-ge erembel wanugwi kugi kagi” luk peraiga-o.

⁷Nde, iri me-ge yi terapmu iri me woraso Gubernor unu-ge. Pubelius na onggweyak koroga me, at-nen-e nit wok nunpuruk yarik, kenan tarem-e konak nak kwat nonposolat woragaij-o.

⁸Nde, Pubelius eid na-ge kugi embem wuloksa wiridnak me, al-e eyabi min worosolat woragaij-o. Worasoma-ge, Paulus-nen at eram nggwarik, amanggim tepan luk, inggi-nen tena bosoloma-ge, ap iri na ki rak pij-o.

⁹Iri kwaridnak karug-e, yi terapmu iri me woragwi kugi worak nap erep na lobok yogola-ge, ki rak onposolat woragaij-o.

¹⁰Iri ala karug-e, ir-e kwarat kek tak nonpogolat, nir-e e koma arem mborogola, nit-nen ukwe kagwi mende pidsa wok nindil lobok yiga-o.

¹¹Waneya kenan woraruk, toro wok yidnak tarem-e yi terapmu iri me woraidnak e koma misik, o Aleksandaria-nen lobok yidnak koma na arem ngguruk, mbirige-o. Nde, koma na abi bem-e ap kambara nderak nggal (Ndioskuri) irit wosa pidnag-o.

¹²O Sirakusa wok luk, iri me kenan nene yige-o.

¹³Iri me-nen mborogolar-e, emende nggut nggwe mbirigerik, Eregium wok yige-o. Misik nene lug-e, abare ena nggwe-nen obube puk kil lobok yosolar-e, kub-e Putioli wok yige-o.

¹⁴Iri me-nen-e nennggamirak tak inpidnak nap inmin lambuk lug-e, it-nen-e: “Yu me ninmin wolmog-o” luk yak nondogoloma-ge, inmin iri me tuju nene luk, Oroma wi mbirige-o.

¹⁵Iri me woragwi nennggamirak tak inpidnak nab-e nit nonpok kuluruk yigarig-e, nenabuwok lobok yogolar-e, Ap Ndok Wurugwi San unu Apius min Ap Sal Enmanggim Wiridnak Wi Kenan min lobok luk, iri me-nen inmin lid pid yige-o. It eneyarug-e, Paulus-nen Mbal Pem Nagawan imin wa-o luk, indi wi yagaij-o.

¹⁶Nde, nir-e Oroma wok yogola-ge, Paulus na yak togolar-e: “Kat yik keyarok wolmomtak san winde misik imin nak karik kuwi wolmomtag-o” luk yak tiga-o.

¹⁷Kenan nene lug-e, Paulus na iri me woragwi Yawuri nap ennggendumu sarok sarok iri na yonggo enpamu, eram ndok worogolikma-ge, at-nen yak ondosolar-e: “Nenggamirak wa-e. An-e nit nenlem nap inmin na meya yigit lak, nenlawingga-nen kwarugwi mende na nin tak pigit lag-et nde, Yerusalem-nen tenaga Oroma nap ininggem nibiga-o.

¹⁸Oroma nap-nen an mbenat nuburuk, an-e meya yosoma, undugwi ndak ndak meya mbi kwarigit lak ala karuk, weserak nuburak peraiga-o.

¹⁹Alat nde, Yawuri nap-nen yogolar-e: ‘At yu-ge mondok wusururag-e lag-o!’ luk yogolikma-ge, an-e nelem nap enpem wene purak lag-et nde, an-nen yosolar-e: ‘Iri ala-ge, Kaisat-nen an nowene mbaruwag-o’ luk yigi-o.

²⁰Iri bem-nen iri yidnak wene kit kinmbiri bem para yak kendeyekluk yonggo kinpigi-o. Isarael nap-nen inndi ebem mbung mbung tak worali na bem an posid kere bem kamat nibidnak worasu-o” luk yak indij-o.

²¹Yak ondosoloma, it-nen yak togolar-e: “Yurea-nen kat kobok mbaridnak ngga-ge nir-e wanigit lag-o. Nde, nit nennggamirak mbi iri me-nen lobok yogolar-e, kat-nen meya yidnak wene mbi yak nindigit lag-o.

²²Alat nde, nin me nin me-nen wene yu wanugwi nap inmin-e wene eyak wat yugwi iri na nenaru me, kat kindi-nen pidnak wene irit kulul-o” luk yak tiga-o.

²³Iri tarem-et yak nundurag-o luk yiga na tarem-e at eram ap kwarat ndok worogolikma-ge, at-nen-e wene yak ondosolar-e, Mbal Pem Nagawan-nen tenagaidnak wi wene kenggera yak ondosolar-e, Musa-nen imiri mbarak pidnak wene bem-nen na, Mbal Pem Nagawan ene lomboksa yugwi nap-nen mbaridnak wene bem-nen na, Yesus ebem inndi angin tubu makluk yak ondosolar-e, kuplila-nen tel kwirij-et nde, keyama rak pij-o.

²⁴Yak ondosoloma-ge, it ereb-e at-nen yidnak wene bem inndi angin tubu yiga-t nde, ereb-e inndi angin tubu yigit lak irit woraiga-o.

²⁵Woragolar-e, it inndi arik tak kuri wat luk, ndi yuwokluk yukmu-ge, Paulus-nen wene misik yu yak ondosolar-e: “Konak Indi-nen-e Mbal Pem Nagawan ene lomboksa yoso nap Yesaya emendam nggwe-nen kit kenlawingga ndemeret wene yak ondosolar-e:

²⁶‘Ap yu endam mburugundik, wene yu yak undu-o: Kulugub-e kulugub-et nde, yebet kagup pug-o. Kagub-e kagub-et nde, kagup pug-o.

²⁷Enlengen-nen kul naru, eneyanggo-nen kulul naru, inndi-nen yebet kul naru, nden karuk an neram lobok yogola, an-nen ki rak unpuwa naru, it ap elem yu inndi tulubuk yogolat, eneyanggoru nggorak tak pogolat, enlengen-e lambu rak pogolat yidnak worali-o.’

²⁸Iri bem-e mondok kenaru wolmer-o. Mbal Pem Nagawan-nen ap inmiri yurak wene yu-ge enlem nin nap endam wirik pij-o. It-nen perak kuluwa-o” luk yak indij-o.

²⁹(At-nen wene iri yak ondosoloma karuk, Yawuri nap na ndi yogolar-e, wene eyak wat kerak ndi yiga-o.)

³⁰Molengen lasolat mbosolat mberen pem woralar-e, Paulus-e at ambik-nen onggo pidnak o iri na me woralar-e, at eram lobok yidnak nap pidsa wok onposolat woralar-e,

³¹at-nen para yosolar-e, Mbal Pem Nagawan-nen tenagaidnak wi wene na nggomo ondosolat, Nagawan Indo Yesus Kerisut owene na mirik onposolat worala-ge, ap-nen-e: “Iri yusu-ge meyog-o” luk yak tigit lak yiga-o.