Read Nduga YIDNAK YIDNAK WENE 3 Bible Online

YIDNAK YIDNAK WENE 3 - Nduga bible

YIDNAK YIDNAK WENE 3

¹Misik tarem-e keyama jam tiga bem it tepan yugwi jam nak yosola-ge, Peterus min Yoanes min-e Mbal Pem Nagawan ama laiga-o.

²Lagola-ge, ap misig-e ija arem-net ijok nggorak ndesa mbidnak nap iri worala-ge, Mbal Pem Nagawan ama nggugwi nap enpem tol nggi tenak wolmakluk, ap iri-ge Mbal Pem Nagawan uwi Konak Tumende bem pelin na pelin na kamboksa ibil lobok yugwi nap irit woragaij-o.

³Woralar-e, yik kagaidnggal-e, Peterus min Yoanes min na-ge Mbal Pem Nagawan ama ngguwokluk yukmu, eneyarug-e, it enpem tol nggi yij-o.

⁴Yosoloma-ge, Peterus min Yoanes min na-ge enlengen kere kererak at ebem woragolat-nen Peterus-nen yak tosolar-e: “Yik niniyi-o” luk yak tij-o.

⁵Yak tosoloma-ge, “Ya-ge no nde wok nuruwa-o?” luk it kwara yik eneyagaij-et nde,

⁶Peterus-nen yak tosolar-e: “Posid tol emas min perak min an neram-e lag-o. Alat nde, an neram worasu mende nde wok kirimin-o. Yesus Kerisut Nasaret nap unu bem menluk mbiri-o” luk yak tij-o.

⁷Iri lug-e, Peterus-nen at inggi kigit nggwe tenaburuk, lit yaga mendak pij-o. Mendak posoloma ereya na-net at ijok min ijok lengen min-e amawi lug-e

⁸at na-ge wulungsa menluk, lobok yilik, mbitlik kwatlug-e, it inmin Mbal Pem Nagawan ama nggurug-e ya kud mbok ya kud mbok waring kasolat-net Mbal Pem Nagawan erembel wanij-o.

⁹Yosoloma-ge, at iri-ge waring kasolat-net Mbal Pem Nagawan erembel wanosola-ge, ap pidsa-nen kaiga-o.

¹⁰At na kagolar-e: “Yu-ge Mbal Pem Nagawan uwi Konak Tumende bem koreluk nggirenak woraso nap na-t” yenggerak karuk, at kwat pidnak mende bem kwiye karug-e wi langgu mbariga-o.

¹¹Nde, ap iri na-ge Peterus min Yoanes min tena unpuruk worala-ge, ap pidsa-nen wi langgu mbatluk, it endam lobok yogolar-e, panggo bem ndok wiril lobok yiga-o. Nde, panggo iri unu-ge Salomo Abanggo-o.

¹²It ereba ndok worogola eneyaruk, Peterus-nen it yak ondosolar-e: “Isarael nap wa-e. Kir-e noluk-nen wi langgu mbatli-o? Ap yu tula mburusu yu-ge nit mbek tak ninpidnak nap nit nondomok nenmawi-nen ki rak pidnak nggal tak puruk, noluk-nen nit yik neneyarok worali-o?

¹³Abaram min Isak min Yakub min Enmbal Pem Nagawan iri-ge nit nenlawingga Enmbal Pem Nagawan-nen-e at Ndegel Oboso Nap Yesus na unu kek tak pij-o. Yesus na-ge kit-nen wesera wok ondogolat, Pilatus-nen-e ‘Mondok keyap tak purak’ peragaij-et nde, kit-nen Pilatus imbiri bem-et wesera keya bigeb-o.

¹⁴Nde, kir-e Konak Nap, Lud tak nak Kwaroso Nap na-ge wesera keya bogolar-e, ‘Ap woroso nap irit wesera wok nindi-o’ yigeb-o.

¹⁵Iri yogolar-e, Unluk Momtak Elem wirigep na-t nde, Mbal Pem Nagawan-nen wat yidnak nap ennggendumu-nen uruk tak pij-o. Uruk tak pidnak iri-ge nit nenlengen-nen kaige-o.

¹⁶Nde, Yesus unu bem indi angin tubu yidnak me, at unu iri-nen ap yu-ge kir-e kenelengen-nen karuk yenggerak pili nap yu-ge amawi yaga wok tij-o. Indi-ge Yesus ebem angin tubu yidnak alat, ap yu-ge kit kinmbiri bem-et mondok ki agaid yur-o.

¹⁷Nowe nowosi wa-e. Kit-nen na, kit konowerak nagawan-nen na kwarigep iri-ge kenaru buk-net kwarigeb-o luk an-e naru-o.

¹⁸Alat nde, iri kwarigep iri-ge Mbal Pem Nagawan-nen at ene lomboksa yugwi nap pidsa enmendam tak posolar-e: ‘An-nen idnak Kerisut-e yane wuruwa-o’ yid iri na-t ndak tak posolat-nen kwarigeb-o.

¹⁹Iri bem-e, kit meya yogolat woraidnag-e korak kunpuwaklug-e, kinndi wanuruk, kondok yer-o.

²⁰Nagawan Indo eram-nen kenalen pem wolmomtak tarem pil lobok yuwakluk, nanduk-net kenmanggim lenak pidnak Kerisut iri-ge Yesus irit ibil lobok yuwakluk, kondok yer-o.

²¹Mbal Pem Nagawan-nen yidnak wene-ge at ene lomboksa yugwi nap marak nap obi-net enmendam tak pidnak wene iri pidsa iminep mbarak puwa tarem-net Yesus iri-ge aid arem-et wolma-o.

²²Musa-nen yosolar-e: ‘Nagawan Indo Kenmbal Pem Nagawan-nen an mendak nibid iri nggal-et kit kennggendumu-nen at ene lomboksa yoso nap mbi mendak puwa-o. Mendak posola-ge, at-nen yak kunduwa wene pidsa kulugup na-e.

²³Alat nde, ta-nen nde at ene lomboksa yoso nap iri-ne yuwa wene kuluwa buk nab-e nit nenlem nap ennggendumu-nen lesa lak tak puwa-o’ luk yij-o.

²⁴Mbal Pem Nagawan ene lomboksa yugwi nap Semuwel woragaid kuri-nen at imbirik woraiga nap pidsa-nen-e yawo tarem kwatli mende-ge urul pogolat woraiga-o.

²⁵Nde, kir-e Mbal Pem Nagawan ene lomboksa yugwi nap inlirak-nen yili-o. Mbal Pem Nagawan-nen kenlawingga obok yak indidnak wene-ge Abaram na yak tosolar-e: ‘Kat-nen ndakun lolo bem-nen nggweyak ma nap, ab-e ap enlem pidsa inmbiringgat ma-o’ luk yak tij-o.

²⁶Nde, kit kenmanggim-et nanduk nandug-et Mbal Pem Nagawan-nen at Ndegel Oboso Nap mendak puruk, kit kinmbiringgat tak konposolar-e, kit komondomok meya yogolat woraidnak keya buruk, nden yaga kinpil lobok yekluk, wirik pij-o” luk yij-o.