Read Nduga YIDNAK YIDNAK WENE 4 Bible Online

YIDNAK YIDNAK WENE 4 - Nduga bible

YIDNAK YIDNAK WENE 4

¹Nde, ir-e ap ereba na wene yak ondogolat worakmu-ge, it tepan omborak min Mbal Pem Nagawan ama yik karok woragwi nap ennggendumu-nen wari mendak pidnak nap min Saruki nap min it endam lobok yiga-o.

²Lobok yogolar-e, mberen nap iri-nen ap ereba na mirik onpogolar-e, Yesus na uruk yidnak pem-e wat yidnak nap ennggendumu-nen-e ap unluk momtak wene owak na mirik onpogola karuk, it insilepma kwarat mberen nap na enpem piga-o.

³Purug-e, o keyama nggwe ala-ge, kup-nen wene mbaruwokluk mberen nap yu na kamboksa o kubu me inpil nggwiga-o.

⁴Alat nde, it-nen yidnak wene kuluruk, inndi angin tubu yiga nab-e ap nag-e lima ribu (5,000) nggal-o.

⁵Nene luk, kub-e Yerusalem-nen ndok worogolar-e, it nagawan nagawan min ogore yidnak nap min engga enaru nap min

⁶tepan ombo nggulok Anas min Kayapas min Yoanes min Alekandat min tepan ombo nggulok owe owosi pidsa min iri me ndok wiriga-o.

⁷Ndok wutluk, mberen nap na-ge it ennggendumu mendak unpuruk, kin wok onpogolar-e: “Kir-e no amawi bem-nen, ta unu bem-nen yu nggal kwarigeb-o?” luk yiga-o.

⁸Yogolikma-ge, Konak Indi-ge Peterus arem kobongsa woralat-nen yosolar-e: “Kit ap nagawan nagawan min ogore yidnak nap min wa-e.

⁹Ap ijok nggorak na konak tak pidnak ala karuk, ‘No amawi bem-nen kwarigeb-o?’ luk nit kin wok ninpili ala-ge,

¹⁰kit min Isarael nap pidsa min-e wene yu kenaru mer-o. Ap ki yaga wok tidnak kit kinmbiri bem mendak worasu yu perak nde, Yesus Kerisut Nasaret nap unu bem ki yidnak worasa-o. Yesus iri-ge kti-nen e lang pang tak pem wirigep na-t nde, Mbal Pem Nagawan-nen uruk tak pij-o.

¹¹Yesus iri-ge kit o wurugwi nap-nen mbo bigep kereb-et nde, at iri-ge o unggut nggwe paro pidnak kerep nde kwat yij-o.

¹²Nin nap mbi unu bem ninmiri yaga wok undurag-e meya-o. Nggweyak ma yu me, o kuri ap kuri-nen nit ninmiri yaga wok nundurak Unu-ge ap-nen unu yaridnak nin mbi-ge lag-o” yuruk yij-o.

¹³Yosoloma-ge, it-nen yik eneyagolar-e, Peterus in Yoanes min na enmbereg-e we nap, sekola yugwi buk nab-et nde, wene kwiye lag-et yogola karuk, ir-e wi langgu mbarogolar-e, it enmbereg-e Yesus imin nugwi nap irit yenggerak eneyaiga-o.

¹⁴Nde, ijok mot tak pidnak nap na it mberen nap inmin lambuksa worala me, it-nen wene onggo yurag-e meya-t agaij-o.

¹⁵Alama-ge, ap mberen na mbepme wirik unpuruk, it nak it nak yak kerak mbogolar-e:

¹⁶“Ap mberen yu inmin-e no nde kwat unpul-o? It-nen kwiye worak mende nggulok kwariga yu-ge Yerusalem woragwi nap pidsa-nen kulidnak me, nit-nen-e ‘Kwarigit lag-o’ yurag-e meya-o.

¹⁷Alat nde, wene yu waruk ap pidsa naru karu yugu-o luk, it yak ondogolar-e: ‘Kir-e at unu bem wene-ge ap misiger-o luk tet yak undurak pug-o’ luk nenne amawi min watsa yak unduwog-o” luk yiga-o.

¹⁸Yogolug-e, it mberen nap na wene mbo unpuruk-nen enne amawi min watsa yak ondogolar-e: “Kir-e Yesus unu bem wene yogolat, ap mirik onpogolat yurak puk na-e” luk yak indiga-o.

¹⁹Yak ondogolikma-ge, Peterus min Yoanes min-nen it yak ondogolar-e: “Mbal Pem Nagawan-nen konag-o luk perasu-ge kit-nen yidnak yidnak nak kwarurak iri, lak? Are, Mbal Pem Nagawan-nen yidnak yidnak nak kwarurak iri-a? Kit-nen nak mbenarer-o.

²⁰Alat nde, nit-nen kaidnak wene min nit-nen kulidnak wene min iri-ge yik tenak wulmul-o” luk yak indiga-o.

²¹Yak ondogolikma-ge, tuguruk enne amawi min-et watsa yak ondogoluk, mberen nap na wisirik inpiga-o. Mberen nap-nen kwiye worak mende kwaridnak ala karuk, ap pidsa-nen Mbal Pem Nagawan erembel wanogolat woragola karuk, ap ereba na inndi aye-nen it andi bandi rak unpurak elem-e lak me, wisirik inpiga-o.

²²Kwiye worak mende kwasa ki rak pidnak nap iri-ge molengen lasolat mbosolat empat pulu (40 tahun) nggal woraidnak nab-o.

²³It mberen nap wisirik onpogolikma-ge, ennggamirak endam mbirigarig-e, tepan ombo nggulok min ogore yidnak nap min-nen it yak indidnak wene ndegera yak indiga-o.

²⁴Yak ondogolikma-ge, it kuluruk yigarik, it inndi misiget luk, Mbal Pem Nagawan eram tepan yogolar-e: “Nagawan Indo wa-e. Mbal min nggweyak min yi koma min arem worasu mende pidsa-ge kat nak-nen ndak wirigen-o.

²⁵Kat ndegel koboso nap nenlawingga Ndaud emendam tak posolat, Konak Indi-nen yosolar-e: ‘Enlem nin nab-e noluk-nen insilepma yili-o? Ab-e ap pidsa-ge noluk-nen ebe lak mende nak yebet kali-o?

²⁶Nggweyak ma nagawan nagawan min ese mendak inpidnak nap min ndok worogolar-e, Nagawan Indo min at-nen idnak Kerisut min inmin wim mbaruwokluk ndok wiriga-o’ luk yij-o.

²⁷Ndemerer-o. O siri yu me-nen Erores min Pontius Pilatus min-e enlem nin nap min Isarael nap min ndok worogolar-e, kat Ndegel Koboso Len Ibidnak Nap Yesus, kat-nen amburu ebem kilidnak nap imin wim mbaruwokluk ndok wiriga-o.

²⁸Ndok wiriga iri-ge, kat kamawi min kat kindi-nen irit kwaruwag-o luk nanduk peraigen mende irit lud makluk kwariga-o.

²⁹Nagawan Indo wa-e. Yawo-ge it enne amawi min-et watsa yak nindidnak wene iri-ge yebet ki-o. Yebet karug-e, kat ndegel kubugwi nap nir-e kat-nen yidnak wene yik tenak wolmok-nen kwiye kagwi buk elem wok nindi-o.

³⁰Kat kinggi mberak puruk, ap ki yaga wok indi-o. Kat Ndegel Koboso Nap Yesus, Len Ibidnak Nap unu bem kwiye worak mende min kagwi buk mende min irit kwari-o” luk tepan yiga-o.

³¹Tepan yogolikma-ge, it ndok worak woraiga o na-ge yuk lenak mbosolar-e, Konak Indi-ge it enarem yebet yosolar-e, Mbal Pem Nagawan-nen yidnak wene-ge kwiye lag-et yogolat woraiga-o.

³²It inndi Yesus ebem angin tubu yidnak nap pidsa-ge inndi misiget luk lambuksa woragolar-e, insilobulo-ge enariktak-nen-e “Yu-ge an narengge-o” luk yigir-e lak. Are, “Nit nenarengge-o” luk insilobulo-ge lambuksa irit winde woraiga-o.

³³Nde, wirik inpidnak nap na-nen-e Nagawan Indo Yesus uruk yidnak wene-ge “Nenlengen-net kaigerig-o” luk mondok amawi min konggorogolat woraiga-o. Worakmu-ge, Mbal Pem Nagawan-nen we wok ondoso indi kwarat it pidsa enpem woragaij-o.

³⁴It ennggendumu-nen-e insilobulo lak nap misiger-o luk tet woragir-e lag-o. Woragolar-e, it unuwi ala na, onnggweyak ala na, onggo wanuruk, onggo wanidnak tol na pil lobok yogolar-e,

³⁵wirik inpidnak nap na ininggem pogolat woraiga-o. Pogola-ge, tol ereba na-ge tol lak nap tembesa wok ondogolat woraiga-o.

³⁶Iri nggal kwarogolar-e, ap misik unu-ge Yusup iri-ge, it wirik inpidnak nap-nen unu mbi yarogolar-e, Mbaranabas yariga-o. At unu yogolar-e, Inndi Yangonoso La-o yogolat. At elem-e Lewi nap, nde, at uwi-ge Siperus-nen lobok yidnak nap na-nen-e

³⁷at onggweyak onggo wanuruk, tol na pil lobok yosolar-e, wirik inpidnak nap ininggem pij-o.