Read Nduga YIDNAK YIDNAK WENE 5 Bible Online

YIDNAK YIDNAK WENE 5 - Nduga bible

YIDNAK YIDNAK WENE 5

¹Nde, ap misik unu-ge Ananias min at ogwe Sapira min woragolar-e, it onnggweyak mbi onggo waniga-o.

²Wanuruk, at ogwe enmberek inndi misiget lug-e, tol ereb-e at toborosolat, ereb-e at-nen waruk wirik inpidnak nap na ininggem pij-o.

³Posola-ge, Peterus-nen yosolar-e: “Ananias wa-e. Noluk-nen kar-e Sere karem yebet yosola, Konak Indi min yubul posolat nggweyak onggo pidnak tol ereb-e kat menggesa yimndigen-o?

⁴Nggweyajiri na onggo wanigit lak woralar-e, kat konggweyak woragaij-o. Nde, onggo wanigen iri-ge kat kolor-et wanigen-et nde, kar-e no kindi yebet karuk-nen yu nggal kwarigen-o? Kar-e ap inmin kenesiget wene yigen-e lag-o. Alat nde, Mbal Pem Nagawan imin-et kenesiget yigen-o” luk yij-o.

⁵Yosola-ge, Ananias na wene iri na kuluruk, ereya-net mbud yosolar-e, indisep worok yij-o. Alama-ge, iri wene kuliga nap pidsa-nen kwiye kwarat kaiga-o.

⁶Nde, ap sugwe ereba na menluk yigarig-e, at orogwak na sum-nen perena keya buruk, waruk yapma pil mbiriga-o.

⁷Iri lug-e, jam kenan nggal worarug-e, iri kwaridnak wene na kuligit lag-et woralar-e, ogwe na lobok yarik, ma nggwij-o.

⁸Nggosoloma-ge, Peterus-nen kwe na kin wanosolar-e: “Konggweyak onggo tol wanigep ya-ge yat, lak?” luk kin wanij-o. Kin wanosoma-ge, kwe na-nen yosolar-e: “Ye, tol-e ereyar-o” luk yij-o.

⁹Yosoloma-ge, Peterus-nen yosolar-e: “Kit kenmbereg-e kinndi misiget luk, noluk-nen Nagawan Indo Indi na indi ngarurak wene mbarigeb-o? Yu nde ki-o. Kat kun yapma piga nap unuwok ene mbirib-e tumende bem wok yili yur-o. Kat na en wat kuburuk mburuwa-o” luk yak tij-o.

¹⁰Yak tosoloma, ereya na-net kwe na-ge at ijok eralu mbud luk, wat yij-o. Wat yosoloma-ge, ap sugwe ereba na nggwigarik, wat yidnak alama karug-e, en wutluk mbirigarik, un eralu yapma piga-o.

¹¹Iri yidnak wene kulidnak nap oboksa min Yesus-nen lambuk tak inpidnak nap pidsa min kwiye kwarat kagolat woraiga-o.

¹²Nde, kwiye worak mende kwarat min kagwi buk mende kwarat min wirik inpidnak nap na-nen-e ap kwarat ennggendumu-nen kwarogolat woraiga-o. Nde, inndi angin tubu yidnak nap oboksa-ge Salomo Abanggo bem lambuksa ndok worogolat woraiga-o.

¹³Nde, ap pidsa-nen it entembel wanogolat woraiga-t nde, ap ereb-e it inmin lambuk yurag-e kwiye-nen larok yiga-o.

¹⁴Nde, Nagawan Indo ebem inndi angin tubu yidnak nap kwarat yogolar-e, ap-nen na kwami-nen na it inmin lambuk yogolar-e, misik nambek, misik nambek, kwarat yiga-o.

¹⁵Nde, Peterus na mborosolat, at ugumak na it erep enpem maklug-e, kugi worak nap ereba na en wosa tulabiyem lis yemara mbinggirik onpogolat, e mbat ndamak pem mbinggirik onpogolat yiga-o.

¹⁶Iri kwarogola-ge, o Yerusalem inggi inggi woragwi o siri-nen ap kwarat nggigirik lobok yogolar-e, kugi worak nap min kugi enarem lin yidnak nap min inpil lobok yogola-ge, it pidsa ki yiga-o.

¹⁷Iri kwarogola-ge, tepan ombo nagawan min at ene kulugwi nap Saruki nap ereba inmin men yogolar-e, it enlengen ale kwarat luk,

¹⁸wirik inpidnak nap tenaga o kubu me inpil nggwiga-o.

¹⁹Alat nde, kubu nggwe-ge Nagawan Indo-nen idnak aid nap mbi lobok yosolar-e, o kubu me tumende ereba na kuwarak puruk, wok unpuruk mbepme mborosolat-nen yak ondosolar-e:

²⁰“Kir-e mburugupndig-e, Mbal Pem Nagawan ama-nen menluk, unluk wolmomtak wene ngget yu ndegera ap kwarat yak ondogolat wolmer-o” luk yak indij-o.

²¹Yak ondosoloma kuluruk yigarig-e, kuplilasa-net Mbal Pem Nagawan ama nggwigarik, ap nggomo ondogolat woraiga-o. Yak ondogolat woragola-ge, tepan ombo nagawan min at ene kulugwi nap min-nen-e wene mbarugwi nap min Isarael nap ogore yidnak nap oboksa yonggo unpuruk yigarig-e, “Wirik inpidnak nap na o kubu me-nen wok unpuruk lobok yurag-o” luk yiga-o.

²²Alat nde, polisi wari ereba na o kubu me wok yogolat-nen lombot piganggal-e, it wirik inpidnak nap ereya na lak alama-ge, it na tuguruk lobok yogolat-nen yogolar-e:

²³“O kubu me tumende na-ge amawisa-t lerak puruk, yik karok woragwi nab-e tumende bem yik karok woragola eneyaige-t nde, nir-e tu kuwara pak kaigenggal-e, ap misiger-o luk tet eneyagit lak yige-o” luk yiga-o.

²⁴Yogolikma-ge, Mbal Pem Nagawan ama polisi wari min tepan omborak nagawan nagawan min-nen wene iri kulurug-e, inndi yok pok mbogolat-nen yogolar-e: “E! It wirik inpidnak nap iri-ge ngge yiga-o?” luk yiga-o.

²⁵Yukmu-ge, ap misik wene waruk lobok yosolar-e: “Ker-o. O kubu me inpil nggwigep nap na-ge Mbal Pem Nagawan ama-nen men yigarik, ap kwarat nggomo indili-o” luk yij-o.

²⁶Alama-ge, Mbal Pem Nagawan ama polisi wari na owosirak inmin mbirigarig-e, mberen nap ya na wok unpuruk lobok yogolar-e, ap kwarat ereba na-nen kerep pem unduwa naru, kwiye-nen we laroksa nak wok unpuruk lobok yiga-o.

²⁷Wok unpuruk lobok yigarik, wene mbarugwi nap endam inpil lobok yogola-ge, tepan ombo nggulok-nen it kin wok inpij-o.

²⁸At-nen yosolar-e: “Nit nenne amawi min watsa yak kondogolar-e: ‘At unu iri bem-e ap nggomo undurak pug-o’ luk yak kindige-t nde, kir-e ngge kwarigeb-o? Kit-nen yili wene-ge o Yerusalem wigak tak pigeb-o. Nde, ap iri eyabi-ge nit nenpem puwokluk-nen yili-o” luk yak indij-o.

²⁹Yak ondosoloma-ge, Peterus min wirik inpidnak nap erep min-nen wene erep nggarogolar-e: “Nit-nen-e mondok Mbal Pem Nagawan-nen yidnak yidnak nak kwarul-o. Nde, ki nap-nen yidnak yidnak kwarurag-e meya-o.

³⁰Kit-nen-e Yesus e lang pang tak pem panggarak puruk wirigep na-ge nit nenlawingga Enmbal Pem Nagawan-nen Yesus na uruk tak pij-o.

³¹Nde, it Isarael nap na-ge kondok luk, it meya yogolat woraidnak amberam tak paga wok endeyekluk, Mbal Pem Nagawan-nen-e at inggi kigit nggwe-nen Yesus na-ge Nagawan min Inmiri Yoso Nap min tak pij-o.

³²Nde, ereba kwaridnak oboksa iri-ge nit-nen na irit, Mbal Pem Nagawan-nen yidnak yidnak wanugwi nap wok indidnak Konak Indi-nen na irit, nenlengen-nen kaidnak nap-nen yili-o” luk yiga-o.

³³Yogola kulurug-e, it na ebem lud insilepma lug-e, it wirik inpidnak nap yu na unduwokluk yiga-o.

³⁴Alat nde, wene mbaroso nap, Parisi nap mbi unu-ge Nggamaliel, imiri mbarak pidnak wene mondok aru nap, ap pidsa-nen ene kek tak pugwi nap iri na menluk-nen yosolar-e: “Wirik inpidnak nap yu-ge siyag-et nak woraruk, lobok yuwak-nen mbepme wirik enper-o” luk yij-o.

³⁵Yuruk, at-nen wene mbarugwi nap ereba na yak ondosolar-e: “Isarael nap wa-e. Ap yu kwat unpugup ereba-ge kwara kinndi mbutluk-net kwarer-o.

³⁶Nandug-e ap Teuras na men yarik, at ambikpebe kek yosola-ge, ab-e empat ratus (400) nggal at imin niga-t nde, at worogolikma-ge, imin niga nap oboksa ndibi ndi yogolar-e, lak agaid nar-o.

³⁷At imbirig-e, ap wonarogola tarem-nen Nggalilea nap Yuras na men yosola-ge, ap kwarat-nen at langgal luk mbiriga-t nde, at na worogoloma-ge, at langgal luk nugwi nap oboksa ndibi ndi yiga nar-o.

³⁸Iri bem-e, an yak kendeyeg-o. Ap yu-ge yu nggal kwat unpurak pug-o. Keya enper-o. Nde, it-nen peragwi min it-nen kwarugwi min iri-ge ki nap inndi-nen pidnak ala-ge, lag-et ma-o.

³⁹Alat nde, wene iri-ge Mbal Pem Nagawan indi-nen pidnak alar-e, kit-nen-e it lak tak unpugub-e mondok lag-o. Nde, abok-nen-e kir-e Mbal Pem Nagawan imin wim pidnak nde kwat ma-o” luk yij-o. Yosoloma-ge, at-nen yidnak wene iri na-ge waniga-o.

⁴⁰Wanurug-e, wirik inpidnak nap na yonggo unpuruk, linggamburok unduruk, enne amawi min watsa yak ondogolar-e: “Yesus unu bem-e ap nggomo undurak pug-o” yak unduruk, wirik inpiga-o.

⁴¹Wirik onpogolikma, it na wene mbarugwi nap endam-nen mborogolar-e: “Yesus unu bem ala linggamburok nindiga-o” luk enalin enalen min-et mbiriga-o.

⁴²Nde, pelin na pelin na Mbal Pem Nagawan ama-nen na ap enma-nen na “Yesus iri-ge Kerisut-nen yusu-o” luk konak wene iri-ge ap mul ondogolat nak woraiga-o.