Read Nduga YIDNAK YIDNAK WENE 6 Bible Online

YIDNAK YIDNAK WENE 6 - Nduga bible

YIDNAK YIDNAK WENE 6

¹Ereya tarem-e inndi Yesus ebem angin tubu yidnak nab-e misik nambek, misik nambek, ap kwarat yogolar-e, it Yawuri nab-et nde, Yunani wene yugwi nap-nen-e Iberani nap inmin ujwa kujwa mbogolar-e: “Pelin na pelin na mburu tomborogolar-e, nit nonkwe togwerag-e logak indili yu-ge noluk-nen yili-o?” luk yiga-o.

²Iri yogola karug-e, it wirik inpidnak nap duabelas na-nen inndi Yesus ebem angin tubu yidnak nap pidsa ndok worak unpuruk, yak ondogolar-e: “Nir-e mburu tomborogolat-nen Mbal Pem Nagawan engga iri-ge kebeyo kebeyo rak purag-e meya-o.

³Iri bem-e, nowe nowosi wa-e. Kit kennggendumu-nen ap tuju mburu tumburuwakluk lenak onpogolar-e, ab-e entembel wanugwi nab-et, Konak Indi-ge enarem kobong tak woragwi nab-et, inndi worak nap rit lenak enper-o.

⁴Nde, nir-e tepan nak yilik, aid wene mul indilik kwarogolat wulmul-o” luk yak indiga-o.

⁵Yak ondogolikma-ge, it pidsa-nen-e: “Kit-nen yigep iri-ge konag-o” luk ap len onpogolar-e, Sepanus iri-ge ndemeret indi Yesus ebem angin tubu yidnak nap, Konak Indi arem kobong yidnak nap iri min Pilipus min Porokorus min Nikanot min Timon min Paramenas min Nikolaus, Yawuri nap nggal kwat yidnak nap, o Antiokia-nen lobok yidnak nap iri min irit len inpiga-o.

⁶It iri-ge wirik inpidnak nap na endam inpil lobok yogola-ge, ir-e tepan yuruk ininggi-nen tena inpiga-o.

⁷Nde, Mbal Pem Nagawan-nen yidnak wene iri-ge wigak yosolar-e, o Yerusalem-nen aid wene wanidnak nab-e misik nambek misik nambek irit kwarat yogolat, tepan omborak kwarat-nen na inndi Yesus ebem angin tubu yogolat kwariga-o.

⁸Nde, Sepanus na-ge Mbal Pem Nagawan-nen we wok ondoso elem min amawi min arem kobong tak ibidnak nap me, ar-e ap kwarat ennggendumu-nen kwiye worak mende nggulok min kagwi buk mende min irit kwarosolat woragaij-o.

⁹Alat nde, Yawuri nap-nen tepan yugwi ma ndok wurugwi nap unu-ge Liberitini nap iri-ge o Kireni nap min o Ikandaria nap min iri-nen Yawuri nap o Kilikia nap min o Asia nap min ereba-nen-e Sepanus imin wene nden nden yiga-o.

¹⁰Alat nde, Konak Indi-nen indi pindong tak wene Sepanus emendam tak posola me, it-nen at imin wene onggo yurak meya agaidj-o.

¹¹Alama-ge, it-nen ap mbi enarem woraga pil nggogola-ge, iri yidnak nap-nen yogolar-e: “At yu-nen Musa min Mbal Pem Nagawan min-e onpok posola kulige-o” luk yiga-o.

¹²Iri yogolar-e, it-nen-e ap kwarat min ogore yidnak nap min imiri mbarak pidnak wene enaru nap min insilepma rak onpogola-ge, Sepanus na eram lobok luk, at tenaguruk, wene mbarugwi nap endam pil lobok yiga-o.

¹³Iri luk, it-nen-e enesiget kunggurugwi nap ereba na inpil lobok yogola-ge it-nen enesiget wene ebem pogolar-e: “Ap yu-ge marak uwi yu min imiri mbarak pidnak wene min obok perenak woraso-o.

¹⁴At yu-nen yosolar-e: ‘Yesus Nasaret nap na-nen-e o yu mijarak posolat, Musa-nen yak nindidnak kwarugwi mende na nin tak posolat irit yuwa-o’ luk yosola kulige-o” luk yiga-o.

¹⁵Yogolikma-ge, it wene mbarugwi sa koreyak woraidnak nap oboksa-nen-e Sepanus na enlengen kere kererak yik karok worakmu-ge, at erare-ge aid nap erare nggal irit yik kaiga-o.