Read Nduga YIDNAK YIDNAK WENE 8 Bible Online

YIDNAK YIDNAK WENE 8 - Nduga bible

YIDNAK YIDNAK WENE 8

¹Nde, Saulus-nen perasolar-e: “Sepanus iri-ge ob-et witli-o” luk peragaij-o. Ereya tarem-e Yerusalem-nen lambuk tak inpidnak nap lel mberel unpugwi tel korogolar-e, it pidsa na ndi rak onpogolar-e, Yurea wi min Samaria wi min ndi rak inpiga-o. Nde, wirik inpidnak nap nak perak nde iri me woraiga-o.

²Nde, it inndi angin tubu yidnak nap-nen Sepanus na yapma pogolar-e, ubud yip kwarat tiga-o.

³Alat nde, Saulus na-ge it lambuk tak inpidnak nap na mondok lak tak enpeyekluk yosolar-e, o nin nggwilik, o nin nggwilik kwarosolar-e, kweyap nde ap nde lit eneyaga o kubu me inpil nggosolat woragaij-o.

⁴Nde, it ndi rak inpidnak nap na-ge yi wi ndi wi waring kagolar-e, aid wene yak indil indil waring kaiga-o.

⁵Nde, Pilipus na-ge Samaria silmu mbarik-nen Kerisut obok yak ondosolat woragaij-o.

⁶Pilipus-nen yidnak wene na kologolat, at-nen kwiye worak mende kwaridnak na kagolar-e, ap kwarat iri na-nen-e inndi misiget luk, at-nen yidnak wene wanogolat woraiga-o.

⁷Ap enarem lin yidnak kugi iri-ge kum nggulok yuruk enarem-nen mborogolat, kambung puk tak woragwi nde unuwok nggorak woragwi nde ki rak onposolat woragaij-o.

⁸Iri kwarosola karug-e, o iri na me-ge enalin enalen kwarat kagolat woraiga-o.

⁹Alat nde, o iri me-ge ap misik unu-ge Simon irit woragaij-o. Nanduk woralar-e, ap iri-nen kwal yosola karug-e, it Samaria woragwi nap pidsa-nen-e kwiye kwarat kagwi ala-ge, at-nen yosolar-e: “An-e ijar-o” luk iri yoso-o.

¹⁰Yosoloma-ge, it ap marik nggulok pidsa-nen at-nen yidnak yidnak nak kwarogolat-nen yogolar-e: “Mbal Pem Nagawan amawi kwarar-o luk yugwi iri na-ge ap yu-t kagi-o” luk yogolat woraiga-o.

¹¹Obi-net at-nen kwal kwaridnag-e kwiye rak onposo me, it pidsa-nen at ene nak kolak woragwi-o.

¹²Alat nde, Pilipus na-nen aid wene yak ondosolar-e, Mbal Pem Nagawan-nen tenagaidnak wi wene yak indilik, Yesus Kerisut unu na yak indilik kwarosola-ge, kweyap nde ap nde wene iri na bem inndi angin tubu yogola-ge, yi ma inpij-o.

¹³Simon na indi angin tubu yosola-ge yi ma bidnak ombol nggwe-ge pempa Pilipus na imin waring kasolar-e, kwiye worak mende min kagwi buk mende min kwarosola karug-e, ar-e kwiye kwarat kasolat woragaij-o.

¹⁴Nde, wirik inpidnak nap Yerusalem woragwi iri na-nen kuliganggal-e, “O Samaria-nen Mbal Pem Nagawan-nen yidnak wene waniga-o” yogola kulurug-e, it-nen-e Peterus min Yoanes min it endam wirik inpiga-o.

¹⁵Wirik inpikma, mberen nap iri na wok yogolar-e: “It Samaria nap-nen Konak Indi wanuwag-o” luk enmanggim tepan yiga-o.

¹⁶It iri-ge Nagawan Indo Yesus unu bem nak yi ma inpidnak me, it ennggendumu-nen ap misiger-o luk tet Konak Indi-ge enpem mbuwagit lag-o.

¹⁷Iri ala-ge, mberen nap na ininggi-nen it tena onpogola-ge, Konak Indi waniga-o.

¹⁸Nde, Simon-nen yik kagaidnggal-e, wirik inpidnak nap ininggi-nen tena inpidnak pem-et Konak Indi it wok ondosola karug-e, at-nen uwang wok ondosolat-nen

¹⁹yak ondosolar-e: “An ninggi-nen tena inpimin nap na Konak Indi wanuwakluk, amawi yu-ge an na wok nerer-o” luk yak indij-o.

²⁰Alat nde, Peterus-nen at yak tosolar-e: “Kar-e Mbal Pem Nagawan-nen yagiga wok ondoso mende iri-ge onggo baga wanugwi-o luk perasu me, kat min kuwang iri min-et lak min-o.

²¹Kat kindi-ge Mbal Pem Nagawan erengen pem-e lugud tak me, wene yu-ge kat karengge min kat kowene min-e mondok lag-o.

²²Iri bem-e, kat meya kwarigen yu keya buruk kondok yosolat, kat kindi-nen peraidnak yu-ge amberam tak puwakluk, Nagawan Indo emengen mbari-o.

²³An-nen yik keyasoma-ge, kat karem-e umburugwi ngari worak nggal-nen kobong tak kobosolat, meya yugwi elem-nen ngonok tak kibidnak-nen yusu-o” luk yak tij-o.

²⁴Yak tosoloma-ge, Simon-nen yosolar-e: “Kit-nen yigep mende iri an nebem mbuma naru, an namanggim Nagawan Indo emengen mbarer-o” luk yij-o.

²⁵It enlengen-nen kaidnak wene min Nagawan Indo-nen yidnak wene min kenggera yak undurug-e, unuwok lem Yerusalem mborogolar-e, Samaria nap unuwi siri kwarat na me-ge aid wene yak indil indil mbiriga-o.

²⁶Nde, Nagawan Indo-nen idnak aid nap mbi-nen Pilipus yak tosolar-e: “Kar-e menluk, abare ena nggwe Yerusalem-nen Nggasa mbugwi tula iri nggwe mbi-o” luk yak tij-o. Tula iri-ge ap lak nggwe-o.

²⁷Yak tolosoma-ge, at na-ge menluk, mbirij-o Mborosolat-nen yik kagaidnggal-e, Etiopia (Apsi) nap, iyiri wabidnak nap iri na yik kagaij-o. Ap iri-ge Etiopia kwe nagawan unu-ge Kandake na-nen wari mendak pidnak nap me, kwe na ndegel obosolar-e, kwe iri na uwang min at isilobulo pidsa min tena woraso nap iri na-ge Yerusalem-nen Mbal Pem Nagawan erembel waneyekluk lobok yarik-nen

²⁸at ama mborosolar-e, nggweyak koma bem kore luk, Mbal Pem Nagawan ene lomboksa yoso nap Yesaya-nen mbaridnak engga wonaril wonaril mborosoma kagaij-o.

²⁹Nde, Konak Indi-nen Pilipus yak tosolar-e: “Kar-e mburugundik, nggweyak koma iri eram panggosa mbiri-o” yak tij-o.

³⁰Yak tosoloma-ge, Pilipus na-ge puburak at eram mberarig-e, Mbal Pem Nagawan ene lomboksa yoso nap Yesaya-nen mbaridnak engga wonarosoma kulij-o. Kuluruk, Pilipus-nen kin wanosolar-e: “Kar-e engga wonarusu iri-ge yenggerak pusu, lak?” luk kin wanij-o.

³¹Kin wanosoloma-ge, at-nen onggo yosolar-e: “Ap-nen mirik nibigit lak me-ge, nggesa-nen naru yimin-o?” lug-e, “Kar-e neralu ya kore yil luwasug-o” luk Pilipus na yak tij-o.

³²Nde, at-nen wonarosolat woragaid engga iri-ge yu nggal yidnag-o: “At iri-ge lomba wam wuruwokluk waruk mburugwi nggal, lomba wam marik usu mbarugwi nap-nen usu mbarogola, ene lak woraso nggal, iri nggal-et ar—e ondogwak wisirigit lak yij-o.

³³At inggiri worogolar-e, at ebem wene ludsa mbarigit lak yiga-o. At indi-ge nggweyak yu me-nen worok yidnak me, at-nen wigarag-e ta-nen wonaruwa-o?” luk yij-o.

³⁴Nde, iyiri wabidnak nap na-nen Pilipus kin wok obosolar-e: “Yak niri-o. Wene yu-ge Mbal Pem Nagawan ene lomboksa yoso nap-nen at ambikpebe imin yidnak, lak? Are, nin nap imin yidnak wene-a?” luk kin wok ibij-o.

³⁵Yosoloma-ge, Pilipus na-nen engga wene na kenggera yak til til mbirij-o.

³⁶It iri-ge tula mbiriga mbiriga-ge, yi ma wok yogolar-e, iyiri wabidnak nap-nen yosolar-e: “Yi yu worasu yu ki-o. An yi ma nuburag-e nunggwirig-o?” luk yij-o.

³⁷Yosoloma-ge, Pilipus-nen yosolar-e: “Kat kindi-ge ebis-et angin tubu yidnak ala-ge, ob-o” luk yij-o. Yosoloma-ge, at-nen yosolar-e: “Yesus Kerisut iri-ge Mbal Pem Nagawan Ambara-nen yusu-o luk nindi angin tubu yigi-o” luk yij-o.

³⁸Iri luk, Etiopia nap na-nen-e: “Nggweyak koma yu-ge ndong tak pi-o” luk yak turug-e, Pilipus min iyiri wabidnak nap na min yi ma mbogolar-e, Pilipus-nen ap iri na yi ma bij-o.

³⁹Nde, ir-e yi ma-nen wigarik pem-e Nagawan Indo Indi-nen Pilipus na lomboksa wirik posola-ge, iyiri wabidnak nab-e kagit lak yij-et nde, at na mborosolar-e, alen min-et mbirij-o.

⁴⁰Alat nde, Pilipus na-ge o Asarot wok yij-o. Iri lug-e, Pilipus na o siri pidsa aid wene yak indil indil mborosolar-e, Kaisaria wi wok yij-o.