Read Nduga YIDNAK YIDNAK WENE 9 Bible Online

YIDNAK YIDNAK WENE 9 - Nduga bible

YIDNAK YIDNAK WENE 9

¹Iri kwarukmu-ge, Saulus na-nen-e: “Nagawan Indo ene wanugwi nap indimin-o” luk yik tenak worasolar-e, tepan ombo nggulok eram mbutlug-e,

²Yesus urula mburugwi nap, ap ala na, kwami ala na eneyasoluk, tenaga Yerusalem wok unpuruk mbereyeklug-e, Saulus na-nen nggi yosolar-e: “Ndamsik wi-ge Yawuri nap-nen tepan yugwi ma woragwi-nen an kwarimin iri yenggerak puwakluk enmanggim engga mbal niri-o” luk tepan ombo nggulok na ebem nggi yij-o.

³Ndamsik mborosolar-e, o iri me panggo panggo wok yosoma-ge, mimo ereya-t aid arem-nen yaya-ge yembak tak posoloma, at eralu yaya rak pij-o.

⁴Posoloma-ge, ar-e nggweyak ma mbud yarik-nen wene misik kolosolar-e: “Saulus wa-e. Saulus wa-e. Kar-e noluk-nen lel mberel nubusu-o?” luk yosola kulij-o.

⁵Kuluruk, at-nen kin wanosolar-e: “Nagawan Indo wa-e. Kar-e ta-nen yusu-o?” luk kin wanosoloma-ge, at-nen yosolar-e: “An-e Yesus kat-nen lel mberel noboso iri na-nen yusu-o.

⁶Alat nde, kar-e menluk, o siri iri me mbiri-o. Mondok kat-nen kwarurak mende-ge yak kuruwa-o” luk yij-o.

⁷At imin mbiriga nab-e ene-ge kuliga-t nde, ebe-ge kagit lak ala-ge, kwiye-nen enne lag-et yong ndong woraiga-o.

⁸Nde, Saulus na menluk, erengen pengge yidnggal-e, yik kudtag-e meya agaij-o. Alama-ge, it-nen-e o Ndamsik wi inggi waruk mbiriga-o.

⁹Nde, erengen ugut woralar-e, mburu min yi min ninggit lak kenan nene yij-o.

¹⁰Nde, Ndamsik wi-nen Yesus ene wanoso nap misik unu-ge Ananias irit woragaij-o. Worasoma-ge, nabi bem nggal Nagawan Indo-nen yak tosolar-e: “Ananias wa-e” luk yij-o. Yosoloma-ge, at-nen yosolar-e: “Nagawan Indo wa-e. An-e yu me worasu-o” luk yij-o.

¹¹Yosoloma-ge, Nagawan Indo-nen yak tosolar-e: “Kar-e menluk, Mot Mot Tula mburugundig-e, Yuras ama iri me o Tatus nap unu-ge Saulus iri na ogore yi-o. Ap iri na-ge tepan yusu-o.

¹²Tepan yosolat worasoma-ge, nabi nggal pem kasolar-e, ap unu-ge Ananias nggosolar-e, at erengen tuguruk kuwak yuwakluk inggi-nen tena bosoloma kagaij-o” luk yak tij-o.

¹³Yak tosoloma-ge, Ananias-nen wene erep nggarosolar-e: “Nagawan Indo wa-e. Marak nap Yerusalem woragwi nap meya rak onposo wene-ge ap kwarat-nen obok yogola koloso-o.

¹⁴Nde, tepan ombo nagawan nagawan-nen amawi-ge at ebem pidnak me, kat kunu bem wene mbo kubugwi nap pidsa tena enpeyekluk yu me lobok yij-o” luk yij-o.

¹⁵Alat nde, Nagawan Indo-nen at yak tosolar-e: “Irit nde, mbiri-o. Ap iri-ge an ndegel nobosolar-e, enlem nin nap min nagawan nagawan min Isarael nap min an nunu yak indil mburuwakluk an-nen lenak pidnak-nen yusu-o.

¹⁶Nde, an nunu bem ala, at ebem andi bandi mbumomtag-e an-net mirik ibimin-o” luk yak tij-o.

¹⁷Yak tosoloma-ge, Ananias na mberarig-e, o iri na me nggwij-o. Nggosolar-e, at inggi-nen Saulus na tena buruk-nen yak tosolar-e: “Nanggam Saulus wa-e. Kat tula lobok yosoma, at ambikpebe mirik kibid nap Nagawan Indo Yesus-nen kat kerengen tuguruk kuwak yosolat, Konak Indi-nen kat yebet tak kobosolat makluk, an wirik nebamu-o” luk yak tij-o.

¹⁸Yak tosoma ereya na-net erengen aberal nggal ponggoksa mbosolar-e, at erengen na tuguruk konak yij-o. Konak yosoloma-ge, ereya na-net yi ma bij-o.

¹⁹Yi ma bosoloma-ge, mburu nurug-e, amawi kwat yij-o. Saulus na-ge Ndamsik-nen Yesus ene wanugwi nap inmin siyag-et nggal woragaij-o.

²⁰Woralar-e, Yawuri nap-nen tepan yugwi ma ereya na me-nen Yesus owene wesera yak ondosolar-e: “At iri-ge Mbal Pem Nagawan Ambara-nen yusu-o” luk yak indij-o.

²¹Yosoloma-ge, at ene kuliga nap pidsa-ge kwiye kagolat-nen yogolar-e: “At yu-ge Yerusalem-nen Yesus unu luk wene mbo bugwi nap lak tak inpid nab-e lag-a? Nde, yu me-nen na Yesus unu yugwi nap na tena unpuruk tepan ombo nagawan nagawan wok indil mbereyekluk-nen lobok yid yu-ge lag-a?” luk yiga-o.

²²Alat nde, Saulus-nen yidnak wene iri-ge amawi kondosolar-e: “Yesus iri-ge Kerisut-net yusu-o” luk watsa-t yosola karuk, Ndamsik woragwi Yawuri nap na wene onggo yurag-e nggeyok yiga-o.

²³Kwarat nggal worarug-e, Yawuri nap-nen at wururak wene mbariga-o.

²⁴Alat nde, Saulus-e at wururak wene-ge aru yij-o. At wuruwokluk pak tumende-ge kubu-nen lengge-nen pak tak nak woraiga-o.

²⁵Iri yogola karug-e, kubu nggwe misik tarem-e at owosirak ereba-nen-e at na-ge mul sum arem yarak puruk, kere parik purug-e, pak pem-nen ombol nggwe mberak pil mbiga-o.

²⁶Saulus na-ge Yerusalem mberarig-e, Yesus ene wanugwi nap inmin kwendeyekluk yij-et nde, at iri-ge Yesus ene wanoso nap kwat yidnak iri-ge ndemerer-o luk inndi angin tubu yigit lak me, at aye tiga-o.

²⁷Alat nde, Mbaranabas-nen Saulus na imin tak puruk, wirik inpidnak nap na endam waruk mberarik, it yak ondosolar-e, Saulus na tula mborosoma erengen-nen Nagawan Indo kaidnak nde, Nagawan Indo-nen yak tidnak wene nde, Ndamsik-nen kwiye lag-et Yesus unu bem nggomo indid wene nde kerengga yak indij-o.

²⁸Yak ondosoloma-ge, Saulus na-ge it inmin lambuksa woralar-e, Nagawan Indo unu bem kwiye lag-et Yerusalem-nen nggomo indil nosolat woragaij-o.

²⁹Woralar-e, Yawuri nap-net nde Yunani wene yugwi inmin-e wene yogola, wene eyak wat kerak mbogolar-e, it-nen-e at wururak tula kore yogolat woraiga-o.

³⁰Nde, at anggamirak na-nen iri wene enaru lug-e, at imin luk Kaisaria mbirigarig-e, iri me-nen Tatus wirik piga-o.

³¹Yurea-nen na irit, Nggalilea-nen na irit, Samaria-nen na irit, lambuk tak inpidnak nap inndi yamuksa woragolat, inndi ogore yogolat woraiga-o. Nagawan Indo aye worak woragolar-e, Konak Indi-nen it inndi yangonosolar-e, misik nambek, misik nambek tak puruk, ap kwarat yiga-o.

³²Nde, Peterus na-ge ya wok nda wok waring kasolar-e, Lira woragwi marak inpidnak nap endam wok yij-o.

³³Wok yidnggal-e, o iri me-ge ap mbi unu-ge Eneas iri-ge kambung puk tak me, at nene yoso ondoro ma mbinggirik nak woralar-e, molengen lasolat mbosolat delapan woraidnak irit kagaij-o.

³⁴Karuk, Peterus-nen at yak tosolar-e: “Eneas wa-e. Yesus Kerisut-nen kat ki rak kubusu-o. Menluk, kat nene yoso kondoro yu koni-o” luk yak tosola, ereya na-net ap iri na men yij-o.

³⁵Alama karug-e, Lira woragwi nap min Saron woragwi nap min it pidsa-nen at iri karug-e, nden karuk Nagawan Indo eram mbiriga-o.

³⁶O Yope-nen Yesus ene wanoso kwe unu-ge Tabita irit woragaij-o. At unu-ge Yunani wene bem yogolar-e, Ndorokas-o. Nde, kwe iri-ge konak nak kwarosolat, isilobulo na we irit wok ondosolat woraso-o.

³⁷Woralar-e, iri tarem-e kwe iri na ud kunduruk, wat yij-o. Wat yosoloma-ge, at orogak na yi masa keya buruk, warug-e o kuri worak silabaga ma mbinggirik piga-o.

³⁸Nde, o Lira iri-ge Yope koroga me, it Yesus ene wanugwi nap-nen-e Peterus na-ge Lira worasu-o yogola kulurug-e, mberen nap ndimirik onpogolar-e: “Ndag-et nak nit nendam lobok yuwag-o” luk at eram ndimirik inpiga-o.

³⁹Ndimirik inpikma, Peterus na men luk, it inmin-et mberarig-e, iri me wok yosola-ge, imin luk o kuri worak silabaga ma laiga-o. Kweyap nanu pidsa at eralu men yigarik, yip lilan wanogolat-nen kwe Ndorokas na-ge it inmin woralat-nen embem sum min yurugwi sum min yagaidnak iri-ge mirik piga-o.

⁴⁰Alat nde, Peterus-nen it pidsa mbepme wirik unpuruk, endaru yunggusa kore luk, tepan yij-o. Tepan yuruk, at orogak ambigit nggwe nden kasolat-nen yak tosolar-e: “Tabita wa-e. Men yi-o” luk yak tosoloma-ge, kwe na erengen penggesa Peterus na yik kasolug-e, kore yij-o.

⁴¹Alama-ge, Peterus-nen kwe na inggi waga mendak pij-o. Iri lug-e, marak inpidnak nap min kweyap nanu min wene mbo unpuruk, kwe uruk yid na mirik inpij-o.

⁴²Iri yidnak wene na Yope wi oboksa wigak yosolar-e, ap kwarat-nen Nagawan Indo ebem inndi angin tubu yiga-o.

⁴³Nde, Peterus na-ge Yope wi iri me ap Simon wam aboro konoso nap iri imin siyak kwarat woragaij-o.