Read Nduga OROMA 1 Bible Online

OROMA 1 - Nduga bible

OROMA 1

¹Kerisut Yesus ndegel oboso nap Paulus an-nen engga yu mbarusu-o. Mbal Pem Nagawan-nen aid wene ap yak indil nurak pem wene mbo nuburuk, an-e wirik nibidnak nap tak nuburak pem len nibid nap-nen yusu-o.

²Aid wene iri-ge Mbal Pem Nagawan-net obi-net urul paga Mbal Pem Nagawan ene lomboksa yugwi nap enpem posola, it-nen konak engga bem mbariga-o.

³Wene iri na-ge at Ambara nit Nagawan Indo Yesus Kerisut imin yidnak wene-nen yusu-o. Yesus na ki nap enpage bem-e Ndaud-nen nderak lolo-nen yusu-o.

⁴Nde, at indi-ge lenak Mbal Pem Nagawan irit woralat me, wat yidnak ennggendumu-nen uruk tak pidnak iri bem-nen-e: Irige Mbal Pem Nagawan Ambara amawi ambik-nen yusu-o luk nam tak pij-o.

⁵Nde, ap enlem pidsa ininggi waga inndi at ebem angin tubu luk, at-nen yidnak yidnak nak kwaruwakluk, Kerisut ebem at unu nak kek tak puwakluk Mbal Pem Nagawan-nen we irit wirik nibidnak nap tak nibij-o.

⁶Kit Oroma nap na it inmin Yesus Kerisut ilirak tobokluk, wene mbo kinpid irir-o.

⁷Iri bem-nen an-e Mbal Pem Nagawan-nen kenabuwa worak nap at iliak len kinpidnak nap tobok-nen yonggo kinpidnak nap kit Oroma woragwi pidsa kenmanggim engga yu mbarusu-o. Nineid Mbal Pem Nagawan min Nagawan Indo Yesus Kerisut min-nen we wok ondoso elem min yamuksa woragwi elem min kinmin wolmag-o.

⁸Nandug-er-e kit kinndi angin tubu yigep konpog-e yi wi ndi wi kuliga iri bem-e an-nen-e Yesus Kerisut ebem kit pidsa kenpem ala, Nembal Pem Nagawan wiwa-o yak toso-o.

⁹An tepan yosolar-e, pempa kenmanggim yoso-o. Nde, an-nen yusu yu-ge ndemeret yusu-o luk Mbal Pem Nagawan-nen kenggel kunduwa-o. An-e at Ambara-nen idnak aid wene iri ninndi bem-net yak ondosolat ndegel pusu Mbal Pem Nagawan iri-nen kenggel kunduwa-o.

¹⁰An-nen tepan yosolar-e: “Mbal Pem Nagawan wa-e. Kat kindi-n pidnak nde ala-ge, an-e yawo-nen Oroma nap iniyil mbururag-e ndak tak nibi-o” luk at emengen mbaroso-o.

¹¹Kit kinndi wi ya burak pem Konak Indi-nen we wok ondoso mende wanobokluk, kit kiniyil lobok yurak mondok nindingen-o.

¹²Iri yigi iri-ge, nir-e Kerisut ebem ninndi angin tubu yidnak nap me, nit na nit-net ninndi eyak wat kerak mbogolat wolmomtak nde yigi-o.

¹³Nanggamirak wa-e. An-e pempa kit kendam lobok yurak perasu-t nde, yawo yu kuri-nen an-e pempa nari wari rak nubusu iri-ge kit kenaru yurag-e nindingen-o. Enlem nin nap ennggendumu-nen an neyabu ebe kwat yid iri nggal-et kit kennggendumu-nen na ebe kwat yidnak kayekluk-nen yigi-o.

¹⁴Nde Yunani nap na irit, enlem nin nap na irit, enaru nap min enaru buk nap min it pidsa enpem an-e namat nebem pidnak worasu-o.

¹⁵Iri bem-e, kit Oroma woragwi nap min-et aid wene yak kundurak nindi pigirik worasu-o.

¹⁶Aid wene iri-ge Mbal Pem Nagawan-nen idnak amawi me, ebem inndi angin tubu yidnak nap oboksa inmiri yoso-o. Nandug-er-e Yawuri nap, imbirig-e, enlem nin nap na inmiri yoso ala karuk, an-e aid wene na bem-e ninnggiri mondok kasu bug-o.

¹⁷Aid wene na-nen-e Mbal Pem Nagawan-nen at ondomok imin ap mot tak onposo wene iri nam tak pij-o. Mot tak onposolar-e, it inndi angin tubu yidnak kuri-net woroksiyem-e inndi angin tubu yidnak pem nak wolma nab-e Mbal Pem Nagawan engga mbarak pem-nen yosolar-e “Inndi angin tubu yidnak pem Mbal Pem Nagawan-nen lud tak nak inpidnak nab-e unlug-et wolma-o” luk yid iri nggal-nen yusu-o.

¹⁸Ap-nen meya yidnak iri-nen ndowaga Mbal Pem Nagawan enaru yurak iri kabak tak pusu bem-e Mbal Pem Nagawan isilepma-ge aid arem-nen ap-nen wene kuruk tugwi min meya kwarugwi min oboksa ebem nam tak pusu-o.

¹⁹Mbal Pem Nagawan owene iri-ge at-net ap mul indidnak me, ab-e nam-et inndi arem enaru worali-o.

²⁰Mbal Pem Nagawan-nen nggweyak yu ndak wirid kuri-nen yawo kuri-ge Mbal Pem Nagawan abage kagwi buk abage iri-ge at woralik nalik yoso amawi min abage Mbal Pem Nagawan woraso min iri-ge ab-e nam-et kagolar-e, at-nen ndak worak pidnak tengge bem-nen ap-nen-e at yenggerak kali me-ge, it innggiri worosola, it-nen-e onggo yurag-e meya-o.

²¹Ab-e Mbal Pem Nagawan enaru woragolar-et nde, ar-e Mbal Pem Nagawan-net yusu-o luk at kek tak ibigit lak, wa na yak tigit lak yiga-o. Are, it yebet kagwi indi na ebe lak mende kwat yosolat, it inndi-ge ndamuk yij-o.

²²Nir-e ninndi-ge anggat ponok tag-o luk perali-t nde, wid inndi nde worali-o.

²³Iri yili nap-nen-e kek tak woralik nalik woraso Mbal Pem Nagawan na ondolma lak yoso mende amorok ndak worogolar-e, ap ut mimirik min towe ut mimirik min wam ut mimirik min keyok keyok noso mende ut mimirik min ndak wiriga-o.

²⁴Iri kwarogola karuk, Mbal Pem Nagawan-nen-e keya inpij-o. It inndi-nen ukwe ukwe peragwi nak langgal luk mborogolar-e, it na it-net innggiri lag-et ondomok enpe meya yik korali-o.

²⁵It iri-nen-e lud tak nak kwaroso Mbal Pem Nagawan na keya buruk, ondolma-ge enesiget wene pogolat, Ndak Woroso Nap erembel wanurak na keya buruk ondolma-ge at-nen ndak worak pidnak tengge erembel wanogolat yiga-o. Ndemerer-e Ndak Woroso Nap nak erembel wanogolat woralik nalik momtak na-t nde-o. Amen.

²⁶Iri kwarugwi ala karuk, it enaboro nak-nen ukwe ukwe yugwi mende irit kwarogolat wolmakluk, Mbal Pem Nagawan-nen-e it keya inpij-o. Nde, kwami-nen na irit, ap-nen ye unpugwi na keya buruk, it kwami nak kwami nak yebogolat woraiga-o.

²⁷Nde, ap-nen na irit, kwami ye unpugwi na keya buruk, it na it-net ukwe ukwe luk, innggiri lag-et ap nak ap nak yebogolat woraidnak pem-e onggo-ge angin tubu worak mende enpem mbosolat woragaij-o.

²⁸Ab-e Mbal Pem Nagawan enaru yurag-e insili rak puruk keya bogola-ge, it inndi-ge meya nak peragolat, kwarugwi buk mende kwat tenak woragolat makluk-nen Mbal Pem Nagawan-nen-e keya inpij-o.

²⁹Keya onposola-ge, it enarem-e yi meya ndi meya yu-nen yebet tak worasolar-e, meya kwarugwi mende min ukwe ukwe yugwi mende min emben to rak mende min enlengen ale nak yurak min ap undugwi min yig pugwi min ap enmberam lagwi min mabin puruk woragwi min ap onpok pugwi min

³⁰enesiget wene bem ap unnu meya rak pugwi min Mbal Pem Nagawan imin sirid woragwi min paleksa yugwi min enambik entembel wanugwi min enambik kek yugwi min meya kwarurak pem enpam yugwi min ineid iniya-nen yidnak yidnak kwarugwi buk min

³¹kim kim nggal kwarugwi min ndak ndak kwarugwi buk min ap enabuwa kagwi buk min ap unpud kagwi buk min irit woraiga-o.

³²Mbal Pem Nagawan-nen imiri mbarak pidnak wene-nen yosolar-e: “Iri nggal kwarugwi nab-e mondok wat ma-o” luk yidnak iri-ge ir-e enaru-net nde, iri mende nak kwat tenak woragolat, nde, ap erep-nen na iri nggal kwarogola inndingen kali-o.