Read Nduga OROMA 13 Bible Online

OROMA 13 - Nduga bible

OROMA 13

¹Ap oboksa-nen pemerinta-nen yidnak yidnak nak kwarurag-o. Nde, pemerinta pidsa enmawi-ge Mbal Pem Nagawan nak-nen wok indidnag-o. Nde, yawo worali pemerinta yu-nen Mbal Pem Nagawan-nen yidnak pem-et kwatli-o.

²Iri bem-e pemerinta inmin sirid mbatli nab-e Mbal Pem Nagawan-nen “Irit kwarurag-o” yidnak imin sirid mbatli-o. Nde, iri kwatli nap enpem-e wene mbaruwa-o.

³Nde, konak nak kwarugwi nap-nen-e pemerinta nap enaye kujwa bug-o. Alat nde, meya yugwi nap nak-nen mondok enaye kujwa-o. Pemerinta enaye kagit lak wolmomtak perasolar-e, kar-e mondok konak nak kwarosolat wolmin-o. Iri kwarosola-ge, kerembel wanuwa-o.

⁴Pemerinta iri-ge kit konak nak worabokluk Mbal Pem Nagawan eyabu wanugwi nap-nen yili-o. Alat nde, kit-nen nde meya kwarogola-ge, it enaye yugub-o. Nde, pemerinta-nen san ininggem worali iri-ge we-t ininggem worali-ge lag-o. Pemerinta iri-ge Mbal Pem Nagawan ndegel ubugwi nap me, Mbal Pem Nagawan isilepma-ge meya kwarugwi nap enpem pili-o.

⁵Iri bem-e, pemerinta-nen yidnak yidnak mondok kwarurak iri-ge Mbal Pem Nagawan isilepma kenpem puwa iri kunmud nak-nen kwarurag-e lag-o. Are, kinndi-nen “Irit kwareyeg-o” luk kwarurag-o.

⁶It yabu tena worali iri-ge Mbal Pem Nagawan ndegel ibili me, iri bem-nen na kir-e pemerinta enmanggim pili tol-e wok indili-o.

⁷Pemerinta onggo wok undurak iri-ge mondog-et wok undurag-o. O onggo wanurak nap iri-ge o onggo wok undurag-o. Terak mena pidnak iri-ge wanurak nap irit wok undurag-o. Nggok tak unpurak nap ala-ge, nggok tak unpurag-o. Nde, entembel wanurak nap ala-ge, entembel wanurag-o.

⁸Ap inmin namat wolmomtak pug-o. Are, nabuwa kabuwa bem iri perak nde ob-o. Nabuwa kabuwa yusu nab-e imiri mbarak pidnak wene-nen yidnak yidnak irit kwarusu-o.

⁹Imiri mbarak pidnak wene-nen yosolar-e, “Mbabi yurak pug-o. Ap wururak pug-o. Yariya wanurak pug-o. Ap insilobulo ukwe ukwe yurak pug-o” luk yidnak wene oboksa min “Iri nggal kwaru-o” luk yidnak wene erep na min lambuksa wene misiget tak posolar-e: “Kat kambik kabuwa kasu nggal, kimin worali nap enabuwa kasolat wolmin-o” luk yij-o.

¹⁰Nde, ap enabuwa kagolar-e, ap meya rak unpugwi bug-o. Iri bem-e nin nap enabuwa kali nab-e imiri mbarak pidnak wene oboksa-nen yidnak yidnak kwatli-o.

¹¹Yawo worali-ge kir-e kali me, wene yu-ge kwara kwarogolat wolmer-o. Nde, iri-ge kit nene yugwi na kunluk momtag-e abu panggo yij-o. Nde, nandug-et ninndi angin tubu yige tarem-e ninmiri yurak panggorag-e lag-et nde, yawo-nen perak nde, ninmiri yurak tarem-e panggo yij-o.

¹²Kubu lak yosolat, o nda yurak panggo yusu-o. Iri bem-e nit-nen-e ndamuk arem-nen kwarugwi mende keya buruk, yaya bem-nen wim mbarugwi san wanuwog-o.

¹³Nit-nen-e o lengge-nen kwarugwi konak irit kwarogolat wolmog-o. Meya kwarurak pem nggok sakwi min anggut engen amburu ndonggosa nunggwi min kwami terak ye unpugwi min meya kwarurak nak inndi yugwi min yig pugwi min enlengen ale yugwi iri oboksa-ge kwarurak pug-o.

¹⁴Alat nde, kit-nen mondok kwarurak iri-ge nagawan Indo Yesus Kerisut nak-nen mirik kunpuwag-o. Nde, ki nap enpage meya inndi-nen ukwe ukwe kwarugwi iri-nen yidnak nag-e kwarurak pug-o.