Read Nduga OROMA 14 Bible Online

OROMA 14 - Nduga bible

OROMA 14

¹Kwara indi angin tubu yigit lak nap iri-ge kit-nen konag-et wok obogolar-e, at indi-n peraso iri na bem wene namawi kamawi yurak pug-o.

²Ap erep-nen peragolar-e, nunggwi mende pidsa norak nak perali-t nde, ap erep kwara inndi angin tubu yigit lak nap-nen-e we mburu mburungga nak norak perali-o.

³Kasa yeba-t naso nap-nen-e naso buk nap iri na pesel uburak pug-o. Nde, mbuu mburungga nak naso nap-nen-e ugun naso nap iri-ge Mbal Pem Nagawan-nen wok ibidnak me, at ebem wene mbarurag-e meya-o.

⁴Kar-e ta nggal-nen nin nap ndegel oboso nap ebem wene mbarugun-o? Mendak worasolat na, mbud yosolat na, at ondomok Eid nak-nen at ebem wene mbaruwa-o. Alat nde, at mendak wolmomtag-e Nagawan Indo amawi bem mendak worala me, ndegel oboso nap iri-ge mendak irit wolma-o.

⁵Ap misik-nen perasolar-e, hari misik nggulok tak posolat, hari ereb-e te rak poso-o. Nde, ap erep-nen peragolar-e, hari pidsa-ge ndak ndak nak yik kali-o. Yebet kagwi inndi ndomok irit yebet kudtak ob-er-o.

⁶Hari misik nggulok tak pusu nap iri-ge iri kwarusu iri-ge Nagawan Indo kek tak ubusu-o. Nde, nunggwi mende ugun nasu nab-e, “Mbal Pem Nagawan wa-o” luk nasu me, Nagawan Indo kek tak posolat-nen nasu-o. Nde, ugun naso buk nap-nen-e “Mbal Pem Nagawan wa-o” luk keya busu me, Nagawan Indo kek tak posolat-nen ninggit lak yusu-o.

⁷Nit nennggendumu-nen ap misiger-o luk tet nunluk woragolat na, wat yogolat na, nit nondomok nenmanggim-e lag-o.

⁸Nde, nir-e nunluk nde woragolar-e, Nagawan Indo amanggim nunluk wulmul-o. Wat yogolat na, Nagawan Indo amanggim-et wat yul-o. Iri bem-e, nunluk wolmomtak na, wat momtak na nir-e Nagawan Indo arengge-nen yili-o.

⁹Kerisut na wat luk, uruk agaid iri-ge, wat yidnak nap min unluk worali nap min-nen idnak Nagawan Indo yuwakluk-nen kwarij-o.

¹⁰Iri bem-e, kar-e noluk-nen kat kowe kowot enpem wene mbarusu-o? Nde, kar-e no luk-nen kowe kowot pesel unpusu-o Mbal Pem Nagawan-nen ap enpem wene mbareyekluk kore yoso sa iri na me nit oboksa nenpem wene mbaruwakluk, eram wok mul-o.

¹¹Mbal Pem Nagawan engga bem-nen yosolar-e: “Nagawan Indo-nen at ondomok ebem owak mbal korasolat-nen yosolar-e: ‘Ap oboksa-nen-e an neram endaru yunggusa tud luk, ar-e ndemeret Mbal Pem Nagawan-nen yusu-o luk yuwa-o’ luk yij-o.”

¹²Iri ala-ge, nit oboksa nondomok tak-net kwaridnak iri-ge Mbal Pem Nagawan para yak tul-o.

¹³Iri bem-e, nit na nit-net nenpem wene mbal kerak mbili iri-ge keya buwog-o. Are, yu nggal mog-o luk wene amburu mbarer-o: Nonowe nonowot enare purak kerep tulabiyem pogolat, inndi kabak tak onpogolat momtak pug-o.

¹⁴An-e Nagawan Indo Yesus imin kundik woraso me, wene yu-ge an-e “Irir-o” perasu-o. Yi mende ndi mende pidsa ondomok-net wosama yoso bug-o. Alat nde, ap inndi-nen peraidnak pem-et “Yu-ge wosama-o” luk perasola-ge, iri mende-ge at amanggim-e wosama yusu-o.

¹⁵Nde, kat-nen nunggwi mende bem Kerisut ebem kanggam mbi indi abi meya rak posola-ge, at abuwa kasolat-nen yusu-ge lag-o. Kerisut-e ap iri amanggim wat yidna me, kat-nen nunggwi mende bem at are purak pug-o.

¹⁶Kat kindi-nen konag-et kwarusu-o peraso na-ge, nin nap-nen mbilaro ngin nggal kuburudtag-e meya-o.

¹⁷Nde, Mbal Pem Nagawan-nen tenagaidnak wi-ge nunggwi mende min yi min erep kundig-e lag-o. Are, Konak Indi-nen wok ondoso luk tak nak kwarugwi elem min yamuksa woragwi elem min enalin enalen kagwi min erep kundik-nen yusu-o.

¹⁸Nde, iri nggal kwasa Kerisut ndegel ubusu nab-e Mbal Pem Nagawan indi alen tak posolat, ap erep-nen na at kek tak ibili-o.

¹⁹Iri bem-e nit-nen pempa kwarurag-e, lambuk tak onposo mende min ninndi uwi yak kerak mburak mende min kwaruwog-o.

²⁰Nde, kar-e nunggwi mende iri-ne ndowaga Mbal Pem Nagawan eyabu na meya rak purak pug-o. Nunggwi mende pidsa-ge nalma nak-nen yusu-t nde, kat-nen nunggun iri-nen ndowaga ap erep meya yogola-ge, kat nasu iri-ge meya irit kwat yusu-o.

²¹Kerisut ebem kanggamirak meya rak inpimin naru, ino min anggut engen amburu min nasolat, enare purak mende erep min kwarosolat yigit lak yurak iri-ge mondok konag-o.

²²Kat-nen konag-o luk peraso mende iri-ge kat kondomok kamanggim Mbal Pem Nagawan imbiri bem nak kwarosolat wolmin-o. Nde, at-nen konag-et kwarusu-o luk kwaridnak pem at na at ondomok ebem wene mbaroso buk nab-e alen min-et worasu-o.

²³Alat nde, indi angin min nasu nap at indi angin tubu yigit lak-net nde ninggidnak me, at ebem-e Mbal Pem Nagawan-nen wene mbarak pidnak worasu-o. Nde, yi mende ndi mende oboksa inndi angin tubu yigit lak pem-nen kwatli iri-ge meya irit kwatli-o.