Read Nduga OROMA 2 Bible Online

OROMA 2 - Nduga bible

OROMA 2

¹Nanggamirak wa-e. Kit meya kwarugwi-t nde, kir-e ta nggal-nen nin nap enpem nde wene mbatli-o? Nde, kir-e nin nap enpem wene mbatli-t nde, it-nen kwarugwi mende iri-ge kit-nen na kwarugwi me, kit na kit-net kenambikpebe kenpem wene mbatli irir-o.

²Iri mende kwarogolat woragwi nap enpem wene mbarosolar-e, Mbal Pem Nagawan-nen lud tak wene nak mbarusu-o luk, nit nenaru yili-o.

³Alat nde, nanggamirak kir-e nin nap enpem wene mbarogolat-net nde, kit-nen na meya mende iri nggal kwarugwi me, Mbal Pem Nagawan-nen-e kit kenpem wene mbaruwa bug-o luk perali-a?

⁴Mbal Pem Nagawan-nen ap unpud kaso min indi yanggonak woraso min indi luruk puruk woraso min nggok iri-ge kir-e te rak pili-a? Kit meya yidnak keya buruk, kondok yuwakluk, ar-e kit kunpud kasu iri-ge kir-e kenaru buk yili-a?

⁵Alat nde, kit kinndi amawi luk, kondok yili bug-o. Iri-nen ndowaga Mbal Pem Nagawan isilepma luk lud tag-et ap enpem wene mbaruwa tarem-nen-e kenpem wene mbarurak iri na kenambikpebe kenare pili-o.

⁶Nde, Mbal Pem Nagawan-nen onggo posolar-e, ap oboksa-nen kwarogolat woraidnag-e ndak ndag-et puwa-o.

⁷Ap erep-nen-e konak mende nak kwarogolar-e, Mbal Pem Nagawan unu nak kek tak purak nak kore yogolat, at erembel wanurak nak kore yogolat, pem-et wolmomtak nak kore yili nab-e Mbal Pem Nagawan-nen unlug-et pem-et woralik nalik wolmomtak elem wok unduwa-o.

⁸Alat nde, ap erep-nen-e it enambik enambigit nak kek tak pogolar-e, Mbal Pem Nagawan-nen yidnak yidnak keya buruk, meya kwarugwi mende langgal luk mbitli nab-e Mbal Pem Nagawan isilepma-ge iri kwatli nap enpem puwa-o.

⁹Meya kwarugwi nap oboksa-ge andi bandi kagolat, yane worogolat ma-o. Nanduk tak posolar-e, Yawuri nap enpem puruk, abog-e enlem nin nap na enpem puwa-o.

¹⁰Alat nde, it konak nak kwarugwi nap oboksa wok ondosolar-e, Mbal Pem Nagawan-nen-e it unnu kek tak posolat, entembel wanosolat, yamuksa woragwi rak onposolat ma-o. Nanduk tak posolar-e, Yawuri nap kwat unpuruk, abog-e enlem nin nap na kwat unpuwa-o.

¹¹Nde, Mbal Pem Nagawan-e ap enpage lombonoso bug-o.

¹²Enlem nin nab-e Musa-nen imiri mbarak pidnak wene na-ge onlol-et woraiga-o. Iri bem-e it meya yidnak pem lak yogolar-e, imiri mbarak pidnak wene onlol-net lak ma-o. Nde, Yawuri nap na-ge Musa-nen imiri mbarak pidnak wene enaru-t nde, meya kwatli me, imiri mbarak pidnak wene iri bem-net it enpem wene mbaruwa-o.

¹³Nde, imiri mbarak pidnak wene na eneyanggo kulidnak pem nak-nen ab-e lud tak nak tak onposo bug-o. Are, imiri mbarak pidnak wene-nen yidnak yidnak kwaruwa nab-et luk tak nak tak onposo-o.

¹⁴Enlem nin nap na-ge Musa-nen imiri mbarak pidnak wene iri na enaru buk woragolar-et nde, imiri mbarak pidnak wene-nen “Iri nggal kwaru-o” yidnak iri na it inndi nak-nen kwaruwarig-e, imiri mbaak pidnak wene na-ge ir-e wanigit lag-et nde, it inndi-ge it ondomok enmanggim imiri mbarak pidnak wene kwat yusu-o.

¹⁵It-nen kwatli iri-nen-e imiri mbarak pidnak wene na-ge it inndi arem mbarak worasu-o nam tak pusu-o. It inndi-nen peragwi iri-nen-e nin tarem-e “Meya kwarigen-o” luk yak ondosolat, nin tarem-e “Mot mot kwarigen-o” luk yak ondosolat yoso me, it-nen yebet kagwi inndi-nen na irit, imiri mbarak pidnak wene na it inndi arem mbarak worasu-o luk mirik unpusu-o.

¹⁶Mbal Pem Nagawan-e Yesus Kerisut ebem-nen-e ap-nen yebet kagwi kura woraso pidsa bem enpem wene mbaruwa tarem-e an-nen aid wene yoso iri nggal ndak ndag-et tak puwa-o.

¹⁷Alat nde, kit-nen nde: “Nir-e Yawuri nab-o” luk yogolat, imiri mbarak pidnak wene bem kinndi wat tak pogolat, “Nit Nineij-e Mbal Pem Nagawan-o” luk yugwi bem nak ija bija yili nap kir-e

¹⁸Mbal Pem Nagawan indi-n pidnak kenaru nar-o. Imiri mbarak pidnak wene-nen mirik kinpidnak pem-e konak min meya min lunurag-e kenaru nar-o.

¹⁹Kit-nen peragolar-e: “Nir-e enlengen ngguru nap ininggi waruk mborogolat, ndamuk arem worali nap na yaya rak onpogolat,

²⁰enaru buk nap mul ondogolat, li marik mul undugwi nab-e nir-er-o” luk peragwi-o. Kit-nen peragolar-e: “Imiri mbarak pidnak wene iri bem-e inndi tenggerak elem min lud tak nak kwarugwi elem min winde-ge nit nag-o” luk perali-o.

²¹Nde, kit-nen-e nin nap mul indili-t nde, kit kondomog-o mul korali bug-a? Kit-nen nin nap nggomo ondogolar-e: “Yariya wanurak pug-o” luk yak indili-t nde, kir-e yariya wanili bug-a?

²²Kit-nen nin nap nggomo ondogolar-e: “Mbabi yurak pug-o” luk yak indili-t nde, kit-nen-e mbabi yili bug-a? Kir-e kugiwak kinsili rak pugwi-t nde, kugiwak ama woraso mende silobulo na kir-e yariya wanili bug-a?

²³“Imiri mbarak pidnak wene winde-ge nir-o” luk kondomok ija bija yili-t nde, wene iri na kuruk togolar-e, Mbal Pem Nagawan unu mbilaro ngin tak pili-ge lag-a?

²⁴Mbal Pem Nagawan engga mbarak pem-nen yosolar-e; “Kit Yawuri nap-nen kwaridnak karuk-nen enlem nin nap-nen-e Mbal Pem Nagawan unu mbilaro ngin tak pili-o” luk yij-o.

²⁵Kit-nen Musa-nen imiri mbarak pidnak wene-nen yidnak yidnak kwarogola-ge, kit kiniye ambasap wabili iri-ge ebe worak mende rak pili-o. Nde, kit-nen nde imiri mbarak pidnak wene-nen yidnak yidnak kuruk togola-ge, kiniye ambasap wabugwi na-ge ebe lak mende kwat yusu-o.

²⁶Nde, iniye ambasap wabigit lak nap enlem nin nab-et nde, imiri mbarak pidnak wene-nen yidnak yidnak kwarosola-ge, Mbal Pem Nagawan-nen-e iniye ambasap wabugwi nap nggal iyujwa bug-a?

²⁷Imiri mbarak pidnak wene engga bem mbaridnak iri-ge kit Yawuri nap-nen winde woragolat, kiniye ambasap wabidnak na woragolar-et nde, imiri mbarak pidnak wene-nen yidnak yidnak iri-ge kit-nen kuruk witli-o. Nde, it iniye ambasap wabigit lag-et nde, imiri mbarak pidnak wene-nen yidnak yidnak irit kwatli me, enlem nin nap-nen-e kit Yawuri nap kenpem wene mbaruwa-o.

²⁸Nde, ndemeret Yawuri nab-e unnu nak we Yawuri nap yidnag-e lag-o. Nde, ndemeret iniye ambasap wabidnak nab-e we ndemeret enaboro nak mbaridnak nab-e lag-o.

²⁹Are, it inndi-ret Yawuri yidnak nab-e ndemeret Yawuri nap-nen yusu-o. Nde, ndemeret iniye ambasap wabidnak iri-ge Mbal Pem Nagawan Indi-nen it enarem yabu wanosola, inndi ambasap wabidnak iri-net yusu-o. Nde, iri-ge imiri mbarak pidnak wene-nen kwaridnag-e lag-o. Mbal Pem Nagawan Indi-nen kwaridnak-nen yusu-o. Iri kwat ibidnak nap erembel wanogolar-e, ki nap-nen wanuwa-ge lag-o. Mbal Pem Nagawan-net at erembel wanuwa-o.