Read Nduga OROMA 3 Bible Online

OROMA 3 - Nduga bible

OROMA 3

¹Iri ala-ge, no lesa wanurak pem Yawuri nap kwat yurag-o? Nde, no amanggim-nen iniye ambasap wabugwi-o?

²Lag-o. Iri mende-ge nggulok-nen yusu-o. Nanduk tak posolar-e, Mbal Pem Nagawan-nen-e at owene-ge Yawuri nap ininggem pij-o.

³Nde, it Yawuri nap erep-nen mot mot nak kwarigit lak yiga iri-ge nunggwirig-o? It iri kwariga bem Mbal Pem Nagawan-e mot mot nak kwaroso buk kwat ma, lak?

⁴Mondok lag-o! Ap oboksa ennesiget yugwi-t nde, Mbal Pem Nagawan-e mondok ndemeret wene nak yoso-o. Mbal Pem Nagawan engga mbarak pem-nen yosolar-e: “Kat-nen wene yosola-ge, lud tak wene nak yij-o luk yuwag-o. Nde, kat kebem wene mbarogola-ge, kar-et ombol pem yugun-o” luk mbarij-o.

⁵Nde, nit-nen meya yidnak pem-nen-e Mbal Pem Nagawan-nen lud tak nak kwaroso iri na nam tak posola-ge, nir-e no wene nde yul-o? Nit meya yidnak pem Mbal Pem Nagawan isilepma nenpem posola-ge, “Kar-e mot mot kwat nunpusu bug-o” luk yak tul-a? (An-e ki nap inmin yidnak nggal yigi-o.)

⁶Mondok lag-o! Mbal Pem Nagawan-e mot mot kwaroso buk nggal-e, nggesa-nen nggweyak ma nap oboksa enpem wene mbatleb-o?

⁷Alat nde, an nenesiget wene yidnak-nen-e Mbal Pem Nagawan-e ndemeret wene yoso na nam tak posolat, at unu kwara kek tak pusu ala-ge, kir-e noluk-nen an meya yoso nap iri nar-o luk neberali-o?

⁸Nde, nir-e noluk-nen: “Konak mende nam makluk meya kwaruwog-o” luk yurag-e meya-o? Nde, ap erep-nen-e an mbilaro ngin tak nobogolar-e: “Ar-e iri nggal yoso-o” luk an nobok pili-o. Iri yugwi nap enpem wene mbarosolar-e, it-nen yugwi ndak ndag-et mbaruwa-o.

⁹Iri ala-ge, nit Yawuri nab-e kek tak woragola, enlem nin nab-e teberak woragwi-a? Mondok lag-o! Nde, an nanduk yak kodosolar-e, Yawuri nap na irit, enlem nin nap na irit pik paksa-ge meya yugwi elem-nen teberak unpuruk woraso-o luk yak kidigi nar-o.

¹⁰Mbal Pem Nagawan engga mbarak pem-nen yosolar-e: “Lud tak nak woraso nap ap misiget ter-o luk mondok lag-o.

¹¹Kwara yebet kaso nap na mondok lag-o. Mbal Pem Nagawan ogore yoso nap na lag-er-o.

¹²It oboksa-ge lugud tuk nggwe mborogolar-e, ebe lak mende nak kwatli-o. Lud tak nak kwaroso nab-e misik tet mondok lag-o.

¹³It ontonggo lem-e ap yapma inpidnak sa tu kuwarak nggal-nen yusu-o. It enma nggwe-nen-e enesiget wene nak wirik pili-o. Lese arem woraso ninggis mende nggal iri-ge meya wene-ge it enemende ben worasu-o.

¹⁴It enemende-ge imbiri lamut tak onposo ngari worak wene-nen kobong tak worasu-o.

¹⁵Ap eneyabi wirik puwoklug-e, it unuwog-e ndag-et nak mburugwi-o.

¹⁶Kugun tak pidnak mende min anggun panggun tak inpidnak mende min it nugwi sa pil kil nili-o.

¹⁷Inndi lambuk mom tu-ge ir-e enaru bug-o.

¹⁸Mbal Pem Nagawan aye kudtak inndi na it enarem-e lag-o” luk yij-o.

¹⁹Nit nenaru yili wene-ge yu-o: Musa-nen imiri mbarak pidnak wene arem-nen yidnak wene na-ge, imiri mbarak pidnak wene wanugwi nap nenmanggim yidnak-nen yusu-o. Iri yid iri-ge ap pidsa wene onggo yigit lak makluk, nggweyak ma nap pidsa enpem Mbal Pem Nagawan-nen wene mbaruwakluk-nen yij-o.

²⁰Imiri mbarak pidnak wene-nen ydina yidnak nak kwarogolat woraidnak nab-e ap misiger-o luk tet Mbal Pem Nagawan erengen pem-e lud tak nak unpuwa bug-o. Alat nde, imiri mbarak pidnak wene iri-nen-e nggweyak ma nab-e meya yugwi-nen yusu-o luk mirik nonposo-nen yusu-o.

²¹Alat nde, Mbal Pem Nagawan-nen ap lud tak nak onposo wene yawo nam tak pid iri-ge imiri mbarak pidnak wene-nen-e nam tak pigit lag-o. Alat nde, Musa-nen imiri mbarak pidnak wene min Mbal Pem Nagawan ene lomboksa yugwi nap min-nen iri kwaroso wene yak nondogolar-e:

²²It inndi-ge Yesus Kerisut ebem angin tubu yidnak pem-e Mbal Pem Nagawan-nen-e lud tak nak onposo-o. Iri yusu iri-ge Mbal Pem Nagawan-e ap enpage lombonoso buk me, Yesus ebem inndi angin tubu yili nap oboksa-ge lud tak nak unpusu-o.

²³Ap oboksa-ge meya nak kwarugwi me, kek tak woraso Mbal Pem Nagawan na imin-e mbok tak woragwi-o.

²⁴Alat nde, onggo lag-et we wok ondoso elem pem-nen Kerisut Yesus-nen nit nonnggo pidnak me, Mbal Pem Nagawan-nen-e lud tak nak ninpij-o.

²⁵Mbal Pem Nagawan-nen-e Yesus iri-ge wam wosa eyabi at amanggim pidnak nggal pid iri-ge, at eyabi mbiridnak pem at ebem inndi angin tubu yidnak nap-nen meya yidnak lak tak peyekluk pij-o. Mbal Pem Nagawan-nen Yesus pid iri-ge at lud tak nak kwaroso na mirik nenpeyekluk-nen pij-o. Nandug-e ap-nen meya kwarogola, eneyasolar-et nde, Mbal Pem Nagawan-nen at indi luruk puruk, indisem woragaij-o.

²⁶Alat nde, yawo-nen-e Mbal Pem Nagawan-e at lud tak nak kwaroso nam tak posolar-e, inndi-ge Yesus ebem angin tubu yuwa nab-e Mbal Pem Nagawan-nen lud tak nak onposo-o luk mirik nunpusu-o.

²⁷Iri ala-ge, no bem-nen nir-e ija bija yul-o? Mondok lag-o! Noluk-nen iri yigi-o? Ap-nen imiri mbarak pidnak wene-nen yidnak yidnak kwarogolat woraidnak pem-nen-a? Iri-ge lag-o. Are, inndi angin tubu yidnakpem-ner-o

²⁸Iri bem-e, wene ebe-ge yu-o: It inndi angin tubu yidnak pem-net ab-e lud tak nak onposo-o. Nde, imiri mbarak pidnak wene-nen yidnak yidnak kwaridnak pem ap lud tak onposo bug-o.

²⁹Nde Mbal Pem Nagawan na-ge Yawuri nap nak Enmbal Pem Nagawan-a? Mbal Pem Nagawan-e enlem nin nap na Enmbal Pem Nagawan-nen yusu-ge lag-a? Ndemeret, ar-e enlem nin nap Enmbal Pem Nagawan-net yusu-o.

³⁰Nde, Mbal Pem Nagawan-e misiget nak-nen yusu me, iniye ambasap wabugwi nap na inndi angin tubu yidnak pem-net lud tak nak onposolat, iniye ambasap wabugwi buk nap na irit, it inndi angin tubu yidnak pem-net lud tak nak onposolat ma-o.

³¹Iri ala-ge, ninndi angin tubu yili iri-ge imiri mbarak pidnak wene iri-ge lak tak purak pem kwatli-a? Mondok lag-o! Are, Musa-nen imiri mbarak pidnak wene na-ge mondok tugup lak tak puwokluk-nen yili-o.