Read Nduga OROMA 4 Bible Online

OROMA 4 - Nduga bible

OROMA 4

¹Iri ala-ge, nenlem nap onmbo Abaram-nen kwaridnak na bem-e no yul-o?

²Nde, Abaram na-ge yi kwatlik ndi kwatlik kwaridnak pem-nen at lud tak nak ibidnggal-e, at ondomok kek yeleb-et nde, Mbal Pem Nagawan imbiri bem-e at kek yurag-e meya-o.

³Mbal Pem Nagawan engga bem-nen yosolar-e: “Abaram-e Mbal Pem Nagawan ebem nak indi angin tubu yidnak pem-e Mbal Pem Nagawan-nen at lud tak nak ibij-o” luk yid nar-o.

⁴Yabu wanidnak nap iri na onggo wok togolar-e, we wok tili-ge lag-o. Are, at eyabu wanidnak pem arengge-t wanoso-o.

⁵Nde, yabu-ge wanigit lag-et nde, we inndi-ge meya yugwi nap lud tak nak onposo Mbal Pem Nagawan na ebem inndi angin tubu yogola-ge, Mbal Pem Nagawan-nen-e it inndi angin tubu yidnak pem-net lud tak nak onposo-o.

⁶At-nen kwaroso mende bem-e lag-et nde, Mbal Pem Nagawan-nen-e lud tak nak ibidnak nab-e alen kasu-o luk, Ndaud-nen alen kaso nap na imin yosolar-e:

⁷“It-nen lugud tak kwarugwi mende na Mbal Pem Nagawan-nen amberam tak pusu nap min it-nen meya yidnak yemendak pusu nap min-e enalen kali-o.

⁸Nagawan Indo-nen at meya yidnak iri-ge wonarusu buk nab-e enalen kali-o” luk yij-o.

⁹Nde, enalen kali nab-o yid iri-ge iniye ambasap wabugwi nap inmin nak yij-a? Are, iniye ambasap wabugwi buk nap na inmin yij-a? Mbal Pem Nagawan engga mbarak pem-nen yosolar-e: “Abaram-e Mbal Pem Nagawan ebem nak indi angin tubu yidnak peme Mbal Pem Nagawan-nen at lud tak nak ibij-o” luk yanem yige nar-o.

¹⁰At lud tak nak ibid iri-ge ngge tarem-nen kwat ibij-o? At iye ambasap wabidnak ma-nen, lak? Are, at iye ambasap wabigit lak ma-nen lud tak nak ibij-a? Lag-o. At iye ambasap wabigit lak ma-net irit kwat ibij-o. At iye ambasap wabidnak ombol nggwe-nen-e lag-o.

¹¹At iye ambasab-e abok nggwe-nen wabamu-o. Nde, at iye ambasap wabidnak iri-ge, at indi angin tubu yidnak pem-net Mbal Pem Nagawan-nen at iye ambasap wabigit lak ma-net at lud tak nak ibij-o luk ap-nen yenggerak puwakluk-nen wabamu-o. Iri bem-e, it iniye ambasap wabigit lak nab-et nde, inndi angin tubu yidnak pem-net Mbal Pem Nagawan-nen lud tak nak unpusu nap oboksa onmbo-ge Abaram-nen yusu-o.

¹²Nde, Abaram na-ge it iniye ambasap wabugwi nap na onmbo-nen yusu-o. Alat nde, it iniye ambasap wabidnak pem-nen nak onmbo-nen yusu-ge lag-o. Are, Abaram na iye ambasap wabigit lak ma-net indi angin tubu yid iri nggal ninndi angin tubu yili nap nonmbo-nen yusu-o.

¹³“O nggweyak yu-ge kit-net winde yugub-o” luk Mbal Pem Nagawan-nen Abaram min at-nen ndagaidnak lolo min urul paga yak indid iri-ge ar-e imiri mbarak pidnak wene-nen yidnak yidnak kwaroso bem-nen-e lag-o. Are, at indi angin tubu yidnak pem Mbal Pem Nagawan-nen at lud tak nak ibidnak ala-nen urul paga yak indij-o.

¹⁴Nde, imiri mbarak pidnak wene-nen yidnak yidnak kwarugwi nap nak-nen Mbal Pem Nagawan urul pidnak wene winde yurak nggal-e, inndi angin tubu yugwi iri-ge ebe lak mende kwat yeleb-o. Nde, Mbal Pem Nagawan-nen urul pidnak wene iri na lak tak peleb-o.

¹⁵Imiri mbarak pidnak wene-nen Mbal Pem Nagawan isilepma nam tak pusu-o. Alat nde, imiri mbarak pidnak wene worasu buk sa-ge kuruk tugwi mende na lak woraso-o.

¹⁶Nde, urul pidnak wene iri-ge Mbal Pem Nagawan ebem indi angin tubu yidnak pem-net yak tij-o. Iri yak tid iri-ge, urul pidnak wene iri-ge we wok ondoso elem pem Abaram-nen ndagaidnak lolo pidsa-nen winde yuwakluk-nen yak tij-o. Imiri mbarak pidnak wene-nen yidnak yidnak nak kwarugwi nap enmanggim nag-e lag-o. Are, Abaram indi angin tubu yid nggal, iri nggal ninndi angin tubu yul nap na nenmanggim-nen yusu-o. Nde, Abaram iri-ge nit pidsa nineid-nen yusu-o.

¹⁷Mbal Pem Nagawan-nen Abaram yak tosolar-e: “Kar-e ap enlem kwarat onmbo rak kibigi-o” luk yak tij-o. Nde, urul yak tid iri-ge Mbal Pem Nagawan na imbiri bem-e ob-et worasu-o. Nde, at ebem indi angin tubu yid Mbal Pem Nagawan iri-nen-e wat yidnak nab-e unluk tak posolat, at ene nak-nen lak woraidnak mende-t nde, worak tak posolat yoso-o.

¹⁸“Kar-e ap enlem kwarat onmbo yugun-o” luk yak tidnak wene bem-e at indi mbung mbung tak worasoma-ge, mondok meya yij-et nde, at indi angin tubu luk, wene na bem indi mbung mbung tak woraidnak me, kwat yid irir-o. At yak tidnak wene-nen yosolar-e: “Kat-nen ndakun lolo-ge inik nggal wigak ma-o” luk yak tidnag-e ndak ndak agaij-o.

¹⁹Iri tarem Abaram-e olengen seratus nggal woraidnak me, ebe na indi worak me, la ndagurag-e meya-t nde, ogwe Sara na yibiri-t nde, iri kwarak worasolar-et nde, at indi angin tuburak irit woragaij-o.

²⁰Mbal Pem Nagawan-nen urul paga yak tidnak na-ge ar-e indi mberen yigit lak, indi angin tubu yidnak wat tak irit worasolar-e, at indi angin tubu yidnak pem amawi rak obosola-ge, Mbal Pem Nagawan erembel wanosolat woragaij-o.

²¹“Mbal Pem Nagawan-nen urul paga yak niridnak iri-ge at amawi kwarat me, kwar-et ma-o” luk at indi mondok wat tak irit woragaij-o.

²²At Abaram indi-ge iri nggal angin tubu yidnak me-ge, Mbal Pem Nagawan-nen-e “Kar-e lud tak nak kwaroso keyagi-o” luk yak tij-o.

²³“Kar-e lud tak nak kwaroso keyagi-o” luk ya tid wene iri-ge Abaram arik nak amanggim mbaridnak wene-ge lag-o.

²⁴Are, nir-e Nagawan Indo Yesus wat yidnak nap ennggendumu-nen uruk tak pid Mbal Pem Nagawan ebem ninndi angin tubu yul me, lud tak nak nunpuwa nap nit nenmanggim na irit mbaridnak-nen yusu-o.

²⁵Yesus na-ge nit meya yidnak pem wat makluk, weserak uburuk, nit lud tak nak nunpuwakluk uruk tak pij-o.