Read Nduga 1 KORINTUS 10 Bible Online

1 KORINTUS 10 - Nduga bible

1 KORINTUS 10

¹Nanggamirak wa-e. Nenlawingga-nen kwaridnak iri-ge kir-e yebet yebet tak wolmomtag-e nindingen-o. Nggan nggan iri-nen it nggetlel unpuruk mborosola, ir-e ob-et yi koma na mbara ndil laiga-o.

²Ir-e Musa imbirik mburugwi nap kwat makluk, nggan nggan min yi koma min-nen mat inpij-o.

³It pidsa-ge inndi amanggim mburu misiget erep nak nonggolat,

⁴it pidsa-ge inndi amanggim yi na misiget erep nak nonggolat yiga-o. Ir-e yi nonggolar-e, inndi amanggim it inmin mbiridnak kerep iri arem-nen waidnak yi ningga-o. Nde, kerep iri-ge Kerisut arer-o.

⁵Alat nde, iri kwasa ningga-t nde, it ap kwarar-e Mbal Pem Nagawan-nen isili rak inpidnak me, karu me irit onowak nggilara mbiga-o.

⁶Nde, it-nen kwaridnak pidsa iri-ge nit nggomo nindidnak nggal kwarij-o. It-nen meya mende ukwe ukwe yiga na nggal nit-nen ukwe ukwe yuwa naru,

⁷it erep-nen kugiwak erembel waniga nggal nit-nen na kugiwak erembel wanuwa naru, nggomo nindidnak-nen yusu-o. Engga wene misik-nen yosolar-e: “It ap iri-ge mburu min yi min norak pem kore luk, nuruk men yogolar-e, enalin enalen yiga-o.”

⁸It erep iri-nen mbona kwarogolar-e, misik tarem-et ab-e dua pulu tiga ribu (23,000) irit wat yidnak me, nit-nen na mbona yurag-e meya-o.

⁹It erep iri-nen Nagawan Indo indi ngarogola-ge, waro-nen ondosola wat yidnak me, nit-nen na Nagawan Indo indi ngarurag-e meya-o.

¹⁰It erep-nen ujwa mbarogola-ge, wat yugwi winde aid nap-nen lak tak inpidnak me, nit-nen na ujwa mbarurak pug-o.

¹¹It enpem mbidnak mende pidsa iri-ge nit na “Iri nggal kwat nunpuwa-o” luk nit ninndi wanuwakluk-nen wene engga bem mbarak pid irir-o. Worok tak purak tarem nit worali nenmanggim.

¹²“An-e nggwelsa mendak worasu-o” perasu nab-e wosa mbimin naru, indi mbera-t wolmag-o.

¹³Kit kenarem woraga pil nggoso mende iri-ge arig-e lak, ap pidsa-nen kagwi mende-t kenpem mbusu-o. Alat nde, Mbal Pem Nagawan-e mot mot nak kwaroso me, kit kenmawi ndak ndag-e lak siyak terak menna kenarem woraga pil nggurak mende-ge kenpem mbuma naru, keya kunpuwa bug-o. Are, kenarem woraga pil ngguwa tarem-net at-nen-e mamak pobokluk wesera mbururak tula mirik kunpuwa-o.

¹⁴Nenggamirak kenabuwa worak wa-e. Iri bem-e, kugiwak erembel wanurak pug-o.

¹⁵Kir-e kinndi worak nap ala-nen yak kundusu-o. An-nen yigi wene yu-ge kit kondomok-nen mbenarer-o.

¹⁶Yimbe arem kenanggo konak mende iri-ge “Mbal Pem Nagawan wa-o” luk nonggolar-e, nir-e Kerisut eyabi min kondogolat-nen nili-ge lag-a? Nde, mburu ndeksa nonggolar-e, nir-e Kerisut ebe min kondogolat-nen nili-ge lag-a?

¹⁷Mburu iri-ge misiget nak me, nit pidsa nenpe kwarar-et nde, mburu iri ninggidnak me, nir-e nenpe misiget nak-nen yusu-o.

¹⁸It Isarael nap-nen kwarugwi iri-ge lombot per-o. Mbal Pem Nagawan amanggim wosa kan pugwi mende nunggwi nab-e wam wosa kan pugwi sa imin kondogolat-nen nili-ge lag-a?

¹⁹Wene yigi yu-ge ngge yosolat-nen yigi-o? Kugiwak amanggim pidnak nunggwi mende min kugiwak min-e ebe worak mende-nen yusu-o luk yosolat-nen yigi-a?

²⁰Mondok lag-o! It enlem nin nap-nen wosa bugwi sa pili mende iri-ge Mbal Pem Nagawan amanggim pili-ge lag-o, kugi amanggim-et pili-o luk iri yosolat-nen yigi-o. Nde, kir-e kugi imin kundik wolmomtak iri-ge an-e nisili-o.

²¹Kit-nen-e Nagawan Indo-nen idnak yimbe arem kenanggo nonggolat, kugi-nen idnak yimbe arem kenanggo nonggolat momtag-e lag-o. Kit-nen-e Nagawan Indo-nen idnak mburu nonggolat, kugi-nen idnak mburu na nonggolat momtag-e lag-o.

²²Nit-nen Nagawan Indo na erengen ale worak tak purag-e ob-a? Are, at amawi teberak puruk, nit nenmawi-ge kek tag-a?

²³“Yi mende ndi mende pidsa nalma-nen yusu-o” yili-t nde, iri kwarurak mende ereb-e terak lesa wok nunduwa-ge lag-o. “Yi mende ndi mende pidsa nalma-nen yusu-o” luk yili-t nde, yi mende ndi mende iri-nen yongga nunduwa bug-o.

²⁴Ap misik-nen at ondomok amanggim nak ndugururak pug-o. Are, ap erep enmanggim-et ndugururag-o.

²⁵Ino onggo wanugwi sa-nen onggo pidnak wam-e limbinigit lag-et, we irit norag-o.

²⁶Engga mbarak pem-nen yosolar-e: “Nggweyak yu min ebem woraso mende pidsa min-e Nagawan Indo arengge nak-nen yusu-o” luk mbaridnak worasu-o.

²⁷Indi angin tubu yigit lak nap-nen-e “Totno nog-o” luk yak korosola, kit kinndi-nen “Mbereyeg-o” luk eram mburugun pem-e, elem limbinigit lag-et keram pidnak nunggwi mende iri-ge norag-o.

²⁸Alat nde, ap misik-nen yak korosolar-e, “Nunggwi mende yu-ge kugiwak amanggim pidnak-nen yusu-o” luk yak korosola-ge, norak pug-o. Yak kiridnak nap abuwa-nen na, at indi aye-nen na norak pug-o.

²⁹Iri keya burak iri-ge, at indi aye-nen-o, kat kindi-nen-e lag-o. Nde, ap misik-nen yosolar-e: “Noluk-nen an weserak nibidnak na-ge nin nap indi aye kagwi-nen an kamat nuburag-o?

³⁰An-e Mbal Pem Nagawan wa yak turuk nasola-ge, Mbal Pem Nagawan wa yak turuk iri namin pem noluk an nobok purag-o?” luk yij-o.

³¹Iri bem-e, mburu nonggolat, yi nonggolat, yi kwatlik ndi kwatlik kwarogolar-e, Mbal Pem Nagawan kek tak purak nak kwarogolat wolmer-o.

³²Yawuri nap na irit, enlem nin nap na irit, Mbal Pem Nagawan-nen idnak lambuk tak inpidnak nap na irit, inndi mberen tak pili-ge meyog-o.

³³An-nen kwaroso nggal irit kwarogolat wolmer-o. An-nen yi mende ndi mende pidsa bem ap oboksa enalen tak posolar-e, it pidsa inmiri yaga wok unduwakluk, an nondomok namanggim-e lag-o. Are, it enmanggim-et kwaroso-o.