Read Nduga 1 KORINTUS 4 Bible Online

1 KORINTUS 4 - Nduga bible

1 KORINTUS 4

¹Ap-nen yik neneyagolar-e, Kerisut ndegel ubugwi nab-er-o luk nenperagolat, Mbal Pem Nagawan-nen kura bidnak wene tena woragwi nab-er-o luk nunpurujwag-o.

²Nde, ap insilobulo inggem pidnak nab-e mot mot nak kwaroso irit mag-o.

³Alat nde, kit-nen ala na, nggweyak ma nap-nen ala na, an nebem wene mbarurak iri-ge an-e mondok numud kasu bug-o. An-nen na an nambik nebem wene mbaroso bug-o.

⁴An-nen meya yidnak mbi nindi-nen yebet kasu bug-o. Alat nde, iri kwarusu iri bem-nen an lud tak nubusu bug-o. An nebem wene mbaruwa nab-e Nagawan Indo-net yusu-o.

⁵Iri nggal kwarak me, Nagawan Indo lobok yurak awo worasola kagit, kir-e awo ma-nen ap enpem wene mbarurak pug-o. Nagawan Indo lobok yosolar-e, ndamuk arem kura woraso na nam tak posolat, ap inndi arem-nen yimndidnak mende na nam tak puruk, nuk kujwa-o. Iri tarem-e, Mbal Pem Nagawan-nen ap oboksa enarik tak entembel wanuwa-o.

⁶Nanggamirak wa-e. Kit kenpem-nen ndowaga wene yu-ge an min Apolos min-nen idnak nggal tak pigi-o. Nit nenpage karuk, engga mbarak pem-nen yidnak yidnak irit kenaru yobokluk yak kindigi-o. Kir-e kinndi kek luk misik nap unu kek tak pogolat, nin nap teberak pogolat momtag-e meya-o.

⁷Kar-e ta-nen nde kek tak keyasu-o? Kat karengge worasu iri-ge Mbal Pem Nagawan-nen wok kirigit lag-a? Iri bem-e, we wok kiridnag-et nde, kar-e noluk-nen kat-nen wanidnak nggal tak puruk, kondomok kek yusu-o?

⁸Kir-e kinmbitsa ninggidnak nggal woragolat, silobulo ombo yigeb-o. Nir-e nagawan yigit lag-et nde, kit nak perak nde nagawan yigeb-o! Nde, kir-e ndemeret nagawan yigep nggal-e, nit na kit totno lambuksa nagawan wolmomtak iri perak konak lombog-o.

⁹An-nen perasolar-e, Mbal Pem Nagawan-nen-e wirik ninpidnak nap nir-e mondok abok tak nonposolar-e, ap inmbiri bem unduwakluk enpem wene mbarak pidnak nap nggal tak nunpuruk, nggweyak ma mende pidsa, aid nap na irit ap na irit enlengen nit nak yik niniyujwakluk, abok tak ninpij-o luk perasu-o.

¹⁰Kerisut ebem-e nir-e wid alat nde, kir-e Kerisut ebem-e kinndi tenggerak worali-o! Nir-e ndeyag-et nde, kir-e kenmawi kwarar-o! Nir-e mbilaro ngin worali-t nde, kir-e kunnu kek tak irit worali-o!

¹¹Yawo-ne na nir-e mburu nere kagolat, yi nere kagolat, nunsum na ndelak nak yorogolat, nondogolat, nondoro kwasa woragit lak yogolat,

¹²nit nininggi bem-net yabu kwarat wanogolat yili-o. Ap-nen nde wene meya yak nondogola, nit-nen-e konak wene nak onggo yak indili-o. Ap-nen nde lel mberel nonpogola-ge, nit-nen-e mamak puruk worali-o.

¹³Nit mbawi worak nonpogola-ge, onggo konak wene nak yak indili-o. Nir-e ap eneyak ngen mbo bidnak nggal, yawo-nen na o liri nggal tak ninpidnak worali-o.

¹⁴An-e wene yu kenmanggim mbarusu yu-ge kinnggiri rak peyekluk-nen mbarusu-ge lag-o. Are, an nilirak nindi kundik nggomo kondosolat-nen mbal kundusu-o.

¹⁵Kir-e Kerisut ebem-e mul kundugwi nab-e sepuluribu (10,000) nggal kwarat woragola-t nde, kineij-e misiget nag-o. An-nen aid wene yak kindigi na bem-nen-e Kerisut Yesus ebem kineij-e an-et kwat yigi-o.

¹⁶Iri bem-e, an-nen kwaroso nggal irit kwarobog-o luk nggomo kundusu-o.

¹⁷Iri kwarobog-o luk-nen an nambara Timotius nindi kundik Nagawan Indo ebem mot mot nak kwaroso iri kendam pil lobok yigi iri-ge an-e Kerisut Yesus ebem kwaroso wene, an-e yi wi ndi wi-nen lambuk tak inpidnak nap pidsa mul indil nusu wene iri-ge yeberak kunpuwakluk pil lobok yigi-o.

¹⁸Nde, an neresa ar-e nendam lobok yuwa bug-o peragoluk, ap ereb-e kenambik kek yili-o.

¹⁹Alat nde, Nagawan Indo-nen: “Iri me mbiri-o” yosola-ge, an-e ndaget nak kit kendam lobok yimindig-e, it enambik-nen kek yili nap-nen yugwi wene nak kulimin-e lag-o. Are, it enmawi yidnak min-et kamin-o.

²⁰Nde, Mbal Pem Nagawan-nen tenagaidnak wi iri-ge ap-nen yugwi wene bem yidnag-e lag-o. Are, amawi bem-nen yidnak-nen yusu-o.

²¹Kir-e ngge kwat kunpurak perali-o? Linggamburok ninggem kendam lobok yimin, lak? Are, kit kenabuwa bem nindi yangonak pem lobok yimin-a?