Read Nduga 1 KORINTUS 5 Bible Online

1 KORINTUS 5 - Nduga bible

1 KORINTUS 5

¹Kit kennggendumu-ge ap mbi eid ogwe wanidnak wene kuligi-o. Nde, meya iri nggal iri-ge it inndi angin tubu yigit lak nap-nen na kwarugwi bug-et nde, kwaridnak obok kuligi-o.

²Iri nggal worasola-t nde, kir-e kinndi kek tak pili-o. Kit kinndi puru luk, iri nggal kwaridnak nab-e kit kennggendumu-nen lena mbepme rak peleb-o.

³Nde, an nebe-ge kit kinmin worasu bug-et nde, nindi-ge kit kinmin worasu-o. Nde, an nebe kit kinmin woraidnak nggal-et worasolar-e, Nagawan Indo Yesus unu bem-et meya iri kwaridnak nap ebem wene abu mbarigi-o.

⁴Kir-e Nagawan Indo Yesus unu bem ndok worogola, an-e nindi min-et kinmin lambuksa ndok wurulndig-e, nit Nagawan Indo Yesus amawi bem-net

⁵Nagawan Indo-nen idnak Tarem-nen at indi imiri yuwakluk, iri kwaridnak nap iri-ge Sere eram kegera per-o, at ebe lak tak puwakluk.

⁶Kit-nen kek yili iri-ge meya-o. Oroti lomboroso mende marik komosa-t nde, oroti enggendumu posoma, oroti pidsa lumburusu iri-ge kir-e kenaru bug-a?

⁷Kir-e nanduk woraidnak meya lomboroso mende iri-ge mbo ber-o. Iri ala-ge, kir-e nggeret konidnak oroti lomboroso mende pigit lak yidnak oroti iri nggal-et kwat yobokluk. O Anggul Pandok Mbiridnak tarem lomba wam wurugwi nggal, nit Nonlomba Kerisut iri-ge nenmanggim wiriga-o.

⁸Iri bem-e, nir-e sakwi tarem iri igijak worogolar-e, nanduk-nen lomboroso mende, meya yugwi min uwingga mbarugwi min yidnak lomboroso mende arem pidnak oroti iri imin igijak wururak pug-o. Are, lomboroso mende arem pigit lak oroti, mbek tak pidnak oroti, ndemeret wene bem yidnak oroti iri nak igijak wuruwog-o.

⁹An-e engga kenmanggim mbarigi na bem-nen yak kondosolar-e: “Kir-e mbabi yugwi nap inmin erep kundik wolmomtak pug-o” luk yak kindigi-t nde,

¹⁰it nggweyak ma nap, mbabi kwarugwi min inndi meya min enesiget yugwi min kugi erembel wanugwi min, it inmin yigir-e lag-o. It inmin nde yosolat nggal-e, kir-e nggweyak ma yu me-nen konoksa nin me mbetleb-o.

¹¹An yak kindigi na-ge, ap misik-nen-e: “Kerisut ebem an-e kanggam-nen yusu-o” luk yosolar-et nde, mbabi kwarosolat, indi meya yosolat, kugi erembel wanosolat, ap onpok posolat, anggut engen amburu ndonggosa nasolat, enesiget yosolat, iri nggal kwaroso imin nde yigi-o. Iri nggal kwaroso imin-e nunggwi mende erep mondok norak pug-o.

¹²Noluk-nen an-e inndi angin tubu yigit lak nap enpem wene mbarimin-o? Mbal Pem Nagawan-nen it enpem wene mbaruwa-o. Alat nde, lambuk tak inpidnak nap kennggendumu woragwi enpem-e kit-net wene mbarurak iri-ge kali bug-a? Meya kwaroso nap iri-ge kit kennggendumu-nen wirik per-o.