Read Nduga 1 KORINTUS 6 Bible Online

1 KORINTUS 6 - Nduga bible

1 KORINTUS 6

¹Nde, kit kennggendumu-nen kit na kit-net ngguno pegerak mbidnak worala-ge, wene na mbaruwakluk marak nap endam mbururag-et nde, inndi angin tubu yigit lak nap endam mbururag-e ob-a?

²Marak nap-nen-e nggweyak ma nap pidsa enpem wene mbaruwa-o yidnak iri-ge kir-e kenaru buk, lak? Iri ala-ge, nggweyak ma nap pidsa enpem wene mbarurag-e kit kinggem worasola-t nde, wene te nggal iri-ge kit-nen mbarurag-e meya kali-a?

³Nit-nen aid nap enpem wene mbarul iri-ge kir-e kenaru bug-a? Iri ala-ge, pempa nit nenpem mboso mende konurag-e nggog-a?

⁴Irit nde, pempa nenpem mboso mende konuwakluk, lambuk tak inpidnak ennggendumu unnu lak nap endam pugub-a?

⁵Kinnggiri-o! Kit kennggendumu-ge indi tenggerak nap, at anggamirak enpem wene konurak nap misiger-o luk tet lag-a?

⁶Are, anggam misik-nen anggam na ebem wene mbaruwakluk, inndi angin tubu yigit lak nap endam mburugwi-a?

⁷Nde, kit na kit-net wene mbal kerak mbili iri bem-e mondok urugwe nggwe yili-o. Lag-et nde, enne nak-nen watsa kenpem pogola, kenne lak momtag-e meya-a? Kenarengge wanogola, larok momtag-e meya-a?

⁸Alat nde, kit kondomok kennggamirak inmin-et nde, kit-net mot mot na kwarigit lak, kit na kit-net kenarengge yariya wok kerak mbili-o.

⁹Mot mot yugwi buk nap-nen-e Mbal Pem Nagawan-nen tenagaidnak wi winde yuwa buk na-ge kir-e kenaru bug-a? Kenambikpebe konmbol pem lali meyog-o. Mbabi kwarugwi min kugi erembel wanugwi min ap onkwe yebugwi min ap-net ap ye unpugwi min

¹⁰yariya wanugwi min inndi meya min anggut engen amburu ndonggosa nunggwi min ap onpok pugwi min ap enmberam lagwi min-e Mbal Pem Nagawan-nen tenagaidnak wi-ge winde yuwa bug-o.

¹¹Kit ereb-e iri nggal kwarugwi woraigeb-o. Alat nde, Nagawan Indo Yesus Kerisut unu bem-nen Nenmbal Pem Nagawan Indi bem-nen kit mat kunpuruk, mbek tak kenpaga lud tak kinpij-o.

¹²Yi mende ndi mende pidsa an-nen kwarurag-e ndag-et nde, iri kwarimin mende ereb-e terak lesa wok nuruwa-ge lag-o. Yi mende ndi mende pidsa an-nen kwarurag-e ndag-et nde, iri kwarimin mende mbi-nen indipma rak nuburag-e nimbir-o.

¹³Nunggwi mende iri-ge unlum amanggim-o. Nde, unlum iri-ge nunggwi mende amanggim-o. Alat nde, Mbal Pem Nagawan-nen-e unlum min nunggwi mende enmberek lak tak puwa-o. Ap enpe iri-ge uwingga mbaruwakluk-nen ndak wirigit lag-o. Are, Nagawan Indo amanggim yidnak-nen yusu-o. Nde, Nagawan Indo-ge enpe amanggim yidnak-nen yusu-o.

¹⁴Mbal Pem Nagawan-nen Nagawan Indo na mendak pid iri na-net at amawi bem nit na irit mendak nunpuwa-o.

¹⁵Kit kenpe-ge Kerisut inggi ujok na-ge kir-e kenaru bug-a? Nde, an-e Kerisut inggi ujok na waga uwingga mbaroso kwe inggi ujok nggal tak pimin-a? Mondok lik laksa-o!

¹⁶Nde, at ebe-ge uwingga mbaroso kwe imin panggal yusu nab-e kwe iri imin-e enpe misiget kwat yili na kenaru bug-a? Nde, engga wene misik-nen yosolar-e: “It enpe-ge misiget nak ma-o” luk yij-o.

¹⁷Alat nde, ta-nen nde Nagawan Indo imin panggarak woraidnak ala-ge, at imin inndi misiget yusu-o.

¹⁸Ap onkwe yebugwi iri mondok keya ber-o. Yi meya ndi meya mende kwarogolar-e, ap enpe meya rak onposo bug-et nde, at mbabi yusu nab-e at ondomok ebe meya rak ubusu-o.

¹⁹Kit kenpe-ge Mbal Pem Nagawan-nen wok kindidnak Konak Indi kenarem worasu iri uwi na-ge kenaru bug-a? Kit kenpe iri-ge kenambik kenarengge-nen yusu-ge lag-o.

²⁰Are, kir-e abu konnggo mbarak-nen yili-o. Iri bem-e kit kenpe iri-net Mbal Pem Nagawan unu kek tak pogolat wolmer-o.