Read Nduga 1 KORINTUS 9 Bible Online

1 KORINTUS 9 - Nduga bible

1 KORINTUS 9

¹An-e wisirik nibidnak nab-e lag-a? An-e wirik nibidnak nab-e lag-a? An-e nit Nagawan Indo Yesus-e nerengen-nen kagi-ge lag-a? Nagawan Indo amanggim yabu wanigi bem-nen kit ebe worak tak kinpigi na-ge lag-a?

²It ap erep-nen-e an-e wirik ibidnak nab-o luk neberali bug-et nde, kit-nen-e wirik ibidnak nab-o luk neberali-o. An-e ndemeret wirik ibidnak nap-nen yusu-o luk yenggerak nuburak mende-ge kit Nagawan Indo ebem worali iri-net yusu-o.

³Ap-nen an neyabu wanogola, an-nen wene erep nggarosolar-e, yu nggal yusu-o.

⁴Nir-e mburu min yi min norak pug-a?

⁵Wirik inpidnak nap erep min Nagawan Indo owosirak min Peterus min-nen kwatli nggal, nit na irit nonkwe rak inndi angin tubu yidnak kwe na ninmin waring kudtag-e meya-a?

⁶Are, nit Mbaranabas nenmberek nak nininggi-nen yabu wanugwi na keya burag-e meya-a?

⁷San winde-nen wim timbiril mborosolar-e, at ambikpebe-nen onggo buruk mboroso-a? Nde, anggut yabu wanurug-e, engen yidnak naso bug-e ta-o? Are, sapi wam ndogoroso nap-nen-e agamo amburu naso bug-e ta-o?

⁸An-nen yak kundusu yu-ge nggweyak ma nap-nen peragwi bem nak-nen yak kundusu-ge lag-o. Imiri mbarak pidnak wene arem na iri nggal-et yidnak worasu-o.

⁹Musa-nen imiri mbarak pidnak engga bem-nen yosolar-e: “Lembu wam-e wabuk ngen nggal yimndil waring kasola-ge, emende kamaru bug-o” luk yid iri-ge Mbal Pem Nagawan-e ndemeret lembu wam min yij-a?

¹⁰Are, nit ninmin nde yij-a? Ye, nit nenmanggim engga bem mbarid irir-o. Nggweyak yaloso nap min ebe mbaroso nap min-nen-e: “Ebe posola, ereb-e namin-er-o” luk-nen nggweyak yalosolat, ebe mbarosolat mag-o.

¹¹Nit-nen aid wene uwi-ge kit kennggendumu pil kaigerik me, kit-nen-e nggweyak ma mende nit wok nundurag-e nggog-a?

¹²It erep-nen perak nde kit kinmin-e “Wog-et nunduwa-o” perali-t nde, nit wok nundurak iri-ge ndak-nen yusu yu-ge kali bug-a? Alat nde, nit-nen-e “Wok nender-o” yigir-e lag-o. Are, Kerisut-nen idnak aid wene-ge tu nggelak pul naru, angin kagolar-et nde, puk nak woraige-o.

¹³Mbal Pem Nagawan ama yabu wanugwi nap-nen-e it norak mende-ge iri me-nen wanogolat, nde, wam wosa Mbal Pem Nagawan amanggim kan pugwi sa iri me wam wurugwi nap-nen-e wam ereb-e iri me-nen wanogolat kwarugwi iri-ge kir-e kenaru bug-a?

¹⁴Iri nggal-et Nagawan Indo-nen watsa yosolar-e: “Aid wene tumburugwi nab-e it-nen aid wene timbitli iri na bem-net it ukwe peragwi mende wanuwag-o” yij-o.

¹⁵Alat nde, kit kenarengge wok nururag-e ob-et nde, an-e larok nak yoso-o. Nde, yawo an-nen engga mbarusu yu-ge wok norobokluk-nen mbarusu-ge lag-o. Ap mbi-nen an nunu kek tak woraso iri ebe lak tak purak iri-ge meya-o. Iri kwarurak ala-ge, an-e wat yosolar-e ob-o.

¹⁶An-nen aid wene yusu bem-nen nunu kek tak peyekluk-nen yusu-ge lag-o. An nebem pidnak ala-net yusu-o. Nde, an-nen nde aid wene yigit lak ala-ge, ije! An-e meya-t kagi-o.

¹⁷An nindi-nen yabu wanosolat nggal-e, “Onggo wok nerer-o” yeleb-o. Alat nde, an yabu wanusu yu-ge an nindi-nen wanusu-ge lag-o. An nebem-et pidnak ala-nen wanusu-o.

¹⁸Iri bem-e onggo-ge no mende wanimin-o? Nde, onggo-ge; we onggo lag-et aid wene tumburusu irir-o. “Aid wene yak kindidnak pem onggo wok nerer-o” yurag-e ob-et nde, an-e iri yoso bug-o.

¹⁹An-e wisirik nibidnak nab-et nde, ap kwarat wok enpeyekluk, it pidsa ndegel onposo nap kwat yusu-o.

²⁰Yawuri nap wok enpeyekluk, it ennggendumu woralar-e, an-e Yawuri nap nggal kwat yoso-o. It imiri mbarak pidnak wene tena woragwi nap wok enpeyekluk, imiri mbarak pidnak wene na an tena woraso bug-et nde, an-e imiri mbarak pidnak wene tena woraso nap nggal kwat yoso-o.

²¹Nde, enlem nin nap wok enpeyekluk, it ennggendumu woralar-e, an-e imiri mbarak pidnak wene tena woraso buk nap nggal kwat yoso-o. Alat nde, Mbal Pem Nagawan-nen yidnak yidnak wene an-e keya bigit lag-et nde, Kerisut-nen yidnak yidnak wene bem nak woraso-o.

²²It ndeyak nap wok enpeyekluk, it ennggendumu woralar-e, an-e ndeyak nap nggal kwat yoso-o. It erep inmiri yeklug-e, an-e ap pidsa-nen kwarugwi nggal yi kwarugwi ndi kwarugwi pidsa kwarukmu-o.

²³An-nen iri kwarusu iri-ge aid wene bem ala-nen imbiringgat waneyekluk-nen kwarusu-o.

²⁴Pong kagolar-e, it pong kagwi nap pidsa ndak ndak puburak mbiridnag-et nde, nggareksa mbiridnak nap misiget nak-nen onggo wanoso kir-e kenaru bug-a? Iri nggal-et kir-e onggo wanurak pem-e pong nak kagolat wolmer-o.

²⁵Keyari purak nap-nen-e keyari pogolar-e, iri nggal kwaru-o yidnak iri na ondomok tak lid lud tak pugwi-o. Nde, it iri-ge lak momtak kid kud wanuwokluk nen yili-t nde, nir-e pem wolmomtak kid kud wanuwokluk nen yili-o.

²⁶Iri bem-e an-e kondok yil mburugwi sa wok yekluk-nen puburak mborosolat nak worasu-o. An-e obube nduk puk wiridnak nggal wurusu-ge lag-o.

²⁷An-nen aid wene-ge nin nap yak indidnag-et nde, an mbo nubuwa naru, an nebe tebesa wolmaklug-e, an na an-net wat korasu-o.