Read Nduga 2 KORINTUS 1 Bible Online

2 KORINTUS 1 - Nduga bible

2 KORINTUS 1

¹Mbal Pem Nagawan indi-n pidnak pem Kerisut Yesus-nen idnak wirik nibidnak nap an Paulus min nennggam Timotius min-nen-e Mbal Pem Nagawan-nen idnak lambuk tak inpidnak nap Korintus woragwi kit kenmanggim na, Akaya uwi oboksa woragwi marak nap kit pidsa kenmanggim na, engga yu mbatli-o.

²Nineid Mbal Pem Nagawan min Nagawan Indo Yesus Kerisut min-nen-e we wok ondoso elem min lambuk tak woragwi elem kinmin wolmag-o.

³Nenagawan Indo Yesus Kerisut eid Mbal Pem Nagawan iri-ge, ap unpud kaso Nineid pem ap inndi yangonoso elem-e Mbal Pem Nagawan at nak erembel wanuwog-o.

⁴Inndi yangonoso mende Mbal Pem Nagawan-nen nondomok tak wok nindidnak iri na bem-nen nit-nen na it anggun panggun nin tak nan tak enpem mbidnak nap na inndi yangunuwakluk, nit anggun panggun kagwi mende oboksa Mbal Pem Nagawan-nen-e nit ninndi yangonoso-o.

⁵Nde, Kerisut ebem anggun panggun kwarat mbid na nggal-et nit nenpem mbusu-o. Nde, iri nggal-et Kerisut ebem-nen ninndi yangonoso mende kwarat tak nunpusu-o.

⁶Nit nde anggun panggun kali iri-ge kit kinndi yangonosolat, kinmiri yosolat makluk-nen kali-o. Nit-nen anggun panggun kali nggal, kit-nen na anggun panggun kagolar-et nde, mamak puruk amawi wanobokluk nit nde ninndi yangonosola-ge, kit kinndi yangunurak pem-nen yusu-o.

⁷Nit-nen anggun panggun kali mende kit na kali, nde, iri nggal-et nit ninndi yangunusu mende kit na kinndi yangunusu-t kali luk nenaru yili me, kit kenpem ninndi mbung mbung tak puruk tugup lak worali-o.

⁸Nanggamirak wa-e. Nir-e o Asia woragola-nen anggun worak mende nenpem mbidnak na kenaru rak powog-o. Nit nenpem pidnak mende iri-ge mondok nggulok lombok angin worak me, nit-nen-e: “War-et mul kagi” luk peragolat woraige-o.

⁹Nit ninndi-nen pragolar-e, wat momtak wene-ge nenpem mbarak worasu-o luk peraige-t nde, iri kwat ninpid iri-ge nit nondomok nenpem nde ninndi angin tubu yul naru, are, wat yidnak nap unluk tak poso Mbal Pem Nagawan ebem-et ninndi angin tubu yuwakluk iri kwat ninpij-o.

¹⁰Wat momtak mende mondok meya iri eram-nen ninmiri yij-o. Nde, abok-nen na ninmiri-t yuwa-o. Nde, tugurug-et ninmiri-t yuwa-o luk at ebem ninndi mbung mbung tak worali-o.

¹¹Kit-nen na yongga nondogolar-e, nenmanggim tepan yili-o. Nde, tepan kwarat nit nenmanggim yidnak na ndak tak posolar-e, Mbal Pem Nagawan-nen-e imbiringgat tak nonposola, nit nenpem ala, ap kwarat-nen Mbal Pem Nagawan wa yak togolat wolma-o.

¹²Wene misik yu bem-e nit ninndi kek tak pili-o: nit nondomok ninndi arem-nen kenggel nondosolar-e, nir-e ap inmin kwarogolat woraidnak na irit, kit kwat kinpidnak na irit, nir-e mot mot nak kwarogolat, Mbal Pem Nagawan-nen lud tak nak yoso nggal yogolat woraige-o. Nde, iri-ge nggweyak ma nap inndi tenggerak pem-nen kwaridnag-e lag-o. Are, Mbal Pem Nagawan-nen we wok ondoso amawi bem-net kwaridnag-o.

¹³Nit kenmanggim engga mbatli yu-ge kit-nen kagoluk, yebet kudtak pem nak mbarige-o. Nde, yawo wene erep nak yebet kali-t nde,

¹⁴abok-nen mondok iminep mbara-t kenaru yugub-o luk an nindi mbung mbung tak worasu-o. Nde iri-ge, Yesus Kerisut-nen idnak tarem-nen nir-e kit kenpem ala ninndi abi kek tak pul nggal, kit-nen na nit nenpem ala kinndi abi kek tak pugub-o.

¹⁵An-e wene yu mondok naru worasu bem-e, kir-e mberen pem tak posolat kenalen tak purak pem nandug-et kit kendam lobok yurak perasolat woragi-o.

¹⁶Perasolar-e, kit kendam wok luk, iri me-nen-e Makeronia wok luk, nde iri me-nen-e kit kendam tuguruk wok luk, kit-nen-e Yurea nggwe ndimirik nubugub-o luk peragi-o.

¹⁷Nindi-ge iniksa yebet kagi-t nde, nindi nden kagaid iri-ge te nggal perali-a? An-nen mbururak sa nindi-nen yebet kasolar-e, an nindi-n pidnak pem nak yebet karuk, an-nen-e misik tarem-et “Ob-o” yosolat, “Lag-o” yosolat yoso-o luk neberali-a?

¹⁸Mbal Pem Nagawan-e ndemeret wene nak yoso me, wene urul an-nen yak kondosolar-e: “Ob-o, Lag-o” yurak pem yak kundusu-ge lag-o.

¹⁹Nde, Mbal Pem Nagawan Ambara Yesus Kerisut na owene kit kennggendumu-ge Silwanus-nen na, Timotius-nen na, an-nen na yak kindi-ge owene iri-ge “Ob-o, Lag-o” yoso-nen yusu-ge lag-o. Are, at ebem-e “Ob-o” iri nak worasu-o.

²⁰Mbal Pem Nagawan urul pidnak wene oboksa min-e Yesus-e: “Ob-o” yidnak-nen yusu-o. Iri bem-e, nit-nen-e Mbal Pem Nagawan unu kek tak pogolar-e, Yesus Kerisut ebem-et “Amen-o” luk yili-o.

²¹Mbal Pem Nagawan at nak-nen-e Kerisut ebem nit min kit totno mondok tugup lak tak nonposolat, at nak-nen len nonposolat,

²²at arengge rak nonposolar-e, yenggerak purak mende nenpem posolat, abok-nen kwat nunpurak wene urul pidnak nggal Konak Indi-ge nit nenarem wolmakluk wok nondosolat yij-o.

²³An-nen yimin wene yu-ge: “Ndemeret wene-o” luk kungguruwak-nen an-e Mbal Pem Nagawan wene mbo busu-o. An nindi ar-e aru-o. An-e kit kenabuwa-nen Korintus iri me lobok yurak yigi-t nde, larok yigi-o.

²⁴Nit-nen-e: “Kinndi angin tubu yili iri na, yu nggal, iri nggal” yak kundul pug-o. Kit kinndi angin tubu yidnak pem-net mondok tugup lak worali-o. Are, kit kenalin kenalen worabok-nen yongga kindili-o.